Read Khoekhoegowab Deuteronomium 26 Bible Online

Deuteronomium 26 - Khoekhoegowab bible

Deuteronomium 26

¹ǃAruǀî i ge nîra ī, ǁnā ǃhūb ǃKhūb, sa Elob nî ǀumise mā tsib ǃnâts ga sīo, tsî ǀumisets ga ǁîba ūhâ tsî ǁîb ǃnâ ǁano,

²ots ge ǂgurosaben ǃhūb di ǂûn din sa ǃhūb, ǃKhūb, sa Elob nî mā tsib din hoan xa ū tsî nî ǁîna ǀharu-i ǃnâ ǁgui; tsîts ge ǁnā ǃās, ǃKhūb, sa Elob nî ǀons âbab nî ǁnāpa ǁan kaise ūǂuibasens ǃoa nî ǃgû.

³Tsîts ge pristeri, ǁnā tsēdi ai nî hâb tawa sī tsî ǁîb ǃoa nî mî: Tita ge nētsē ra ǂanǂan ǃKhūb, sa Elob aiǃâ ǁnā ǃhūb ǃKhūb sada îga sadab nî ǁîga mā ti ge nūbab ǃnâ ge hā ǃkhaisa.

⁴Ob ge pristera ǀharusa sa ǃomǁaeba xu ū tsî nî ǁîsa ǃKhūb, sa Elob di altars aiǃâ mâi.

⁵ǃNubaits ge ǃKhūb, sa Elob di ais aiǃâ ǃkhō-am tsî nî mî: Ti îb ge ǁhapuma ra Siriaǁî ge i, tsîb ge Egipteb ǃoa doeǁgôa tsî ǁnāpa ǂkhari ǁaes ǀkha ge hâ, xaweb ge ǁnāpa kai tsî ge ǀgaisa ǀgauxa ǁae kai.

⁶Xawe Egipteǁîn ge tsūdī tsî ge ǁgâiǀā da tsî ǃgom ǃoabasa ge ǁgui-ai da.

⁷ǁGoasi da ge ǃKhūb, sada îgu di Elob ǃoa ge ǂgai; ob ge ǃKhūba dommi âda ǁnâu tsî ge kōǀî sada di ǀkhomǀkhomsasib tsî sada di sîsenni tsî sada di ǁgâiǀāb tsîna.

⁸Tsî ǃKhūb ge sada ǀgaisa ǃommi ǀkha tsî ǀhōǂuihesa ǁôab ǀkha tsî kai ǃhurib ǀkha tsî saodi tsî buruxa dīn tsîn ǀkha Egipteba xu ge ǂgaeǂguiǂui.

⁹Tsî ǁîb ge sada nē ǃkhais kōse ge ūhā; tsîb ge nē ǃhūba ge mā da, ǃhūb, daib tsî danib tsîkha ra dâuǃnâba.

¹⁰Tsî nēsi mû, tita ge ǂgurosaben nē ǃhūb, sats, ǃKhūts, ge mā teb dina go ūhā. ǃNubaits ge ǁîna ǃKhūb, sa Elob di ais aiǃâ ǁgui, tsîts ge nî ǃhon ǃKhūb, sa Elob di ais aiǃâ.

¹¹Tsîts ge nî ǃgâiaǂgao ǁnā ǃgâib, ǃKhūb, sa Elob, sats tsî sa omma ge māb ǂama; sats tsî Leviǁîb tsî ǃhaokhoeb sa ǁaegu hâb tsîdo.

¹²Disiǁî ǃân, ūǀkhībahets ran hoan dinats ga mātoao ǃnonaǁî kurib, hîa disiǁî ǃân di kurib ǃnâ, ots ge Leviǁîb, ǃhaokhoeb, ǃoaǀgôab tsî ǃoataras tsîna nî mā, sa ǁāgu ǃnân nî ǂû tsî ǁâse.

¹³Tsîts ge ǃKhūb, sa Elob di aiǃâ nî mî: Tita ge ǃanu xūna omma xu dībē, tsî ta ge ǁîna ǁkhāti Leviǁîb, ǃhaokhoeb, ǃoaǀgôab tsî ǃoataras tsîna ge mā, sa mîmādi, titats ge mîmādi hoadi ǃoa; sa mîmādi xa ta ge xū-e ǃûǂam tama tsî xū-e ǀuru tama hâ.

¹⁴Ti ǃoab ǃnâ ta ge ǁîn xa ǂû tama tsî xū-e ūbē tama ǃanuoǃnâ-iǀî tsî ǁkhāti xū-e mā tama, ǁō hâ-i ǂama; tita ge ǃKhūb, ti Elob di domma ǁnâuǀnamxa go i, tita ge sats ge mîmāden hoana goro dī.

¹⁵Kōǁgôa re sa ǃanu ǁanǃkhaiba xu, ǀhomma xu, îts sa ǁaes Israelsa ǀkhae tsî ǁnā ǃhūb, sats ge mā daba, sida îgats ge nūba xase, ǃhūb, daib tsî danib tsîkha ra dâuǃnâba.

¹⁶Nē tsēs ǁkhās aib ge ǃKhūb, sa Eloba nē ǂnûiǂgādi tsî ǂhanugu tsîna ra mîmā tsi, dīts nîga; ǂan ǁnâi îts ǁîna dī sa ǂgaob hoab ǀkha tsî sa ǀoms hoas ǀkha.

¹⁷Nētsēts ge ǃKhūba go mî kai, ǁîb nî sa Elo ti, tsî sats nî ǁîb di daogu ǃnâ ǃgû tsî ǂnûiǂgādi âb tsî mîmādi âb tsî ǂhanugu âbats nî ǂan, tsî dommi âbats nî ǁnâuǀnam ti.

¹⁸Tsî ǃKhūb ge nētsē satsa go mî kai, ǁîbats ūb hâ ǁaese nî ība, mîba tsib ge xase, tsî ǁîb di mîmādi hoadets nî ǂan, ti.

¹⁹Nētib nî satsa ǁaedi, hîab ge dīdi hoadi ǂamai ǀgapise ǂnûiga, koas ǃoa tsî ǀons ǃoa tsî ǂkhaisib ǃoa; tsî ǃKhūb, sa Elobats nî ǃanu ǁaese ībaga, ǁîb ge mî xase.