Read Khoekhoegowab Deuteronomium 27 Bible Online

Deuteronomium 27 - Khoekhoegowab bible

Deuteronomium 27

¹Tsî Moseb ge Israeli di kaigu ǀkha ǁaesa mîmā tsî ge mî: Nē mîmādi, nētsē ta ra mîmā tsi di hoade sâu.

²Tsî i ge nîra ī, Jordanna-ū du ga ǁnā ǃhūb, ǃKhūb, sa Elob nî mā tsib ǃnâ ǃgâu tsēs ai, ots ge kai ǀuide ǂnubikhâi tsî nîra ǃuri ǂgoab ǀkha ǁîde ǂkhau.

³Tsîts ge ǁîdi ai nē ǂhanub di mîdi hoade nî xoa, ǃgâuts ga io; sīts nîga ǁnā ǃhūb, ǃKhūb, sa Elob nî mā tsib ǃnâ, ǃhūb, daib tsî danib tsîkha ra dâuǃnâba, ǃKhūb, sa îgu di Elob ge sa ǃoa ǃhoa xase.

⁴O i ge nîra ī, Jordanna du ga ǃgâuo, o du ge nē ǀuidi, ǁîdi xa ta nētsē ra mîmā tside nî ǂnubikhâi Ebalǃhommi ai, îts ǁîde ǃuri ǂgoab ǀkha ǂkhau.

⁵Tsîts ge ǁnāpa ǃKhūb, sa Eloba altarsa nî ǂnubiba, altarsa ǀuidi ǀkha; ǁîdi aits ge ǂnūǀuri-e gongon tide.

⁶ǂUru ǀuidi ǀkhats ge ǃKhūb, sa Elob di altarsa nî ǂnubi; tsîts ge ǃKhūb, sa Eloba ǁîs ai khauǁguibade nî ǁguiba.

⁷ǁKhātits ge ganganǁguibade nî ǁguiba, tsîts ge ǁnāpa nî ǂû tsî ǃgâiaǂgao ǃKhūb, sa Elob di ais aiǃâ.

⁸Tsîts ge nē ǀuidi ai nē ǂhanub di mîdi hoade nî xoa, ǃgāsase ra xoaǂgāse.

⁹ǃAruǀîb ge Moseba Leviǁîb pristergu ǀkha Israeli hoab ǃoa ǃhoa tsî ge mî: ǃGâ îts ǁnâu, Israeltse, nē tsēs aits ge go ǃKhūb, sa Elob di ǁae kai.

¹⁰ǁNā-amagats ge ǃKhūb, sa Elob di domma nî ǁnâuǀnam, tsîts ge nî dī ǁîb di mîmādi tsî ǁîb di ǂnûiǂgādi, nētsē ta ra mîmā tside.

¹¹Tsî Moseb ge ǁkhā tsēs ai ǁaesa mîmā tsî ge mî:

¹²Nēgu ge nî mâ ǁaesa nî ǀkhaese, Gerisimǃhommi ai, Jordanna du ga ǃgâuo: Simeonni, Levib, Judab, Isaskari, Joseb tsî Benjaminni tsîga.

¹³Tsî nēgu ge nî mâ ǀâxareb ǂama Ebalǃhommi ai: Rubenni, Gadi, Aseri, Sebulonni, Danni tsî Naftalib tsîga.

¹⁴Tsî Leviǁîgu ge ǃkhō-am tsî mâb hoab Israeli dib ǃoa nî mî ǃgari dommi ǀkha:

¹⁵ǀÂxarexūheb hâ ǁnā khoeb, ǃgaohesa ī-i kas, ǂnâhesa ī-i kas hoas, ǁgaiǁgaisa-i ǃKhūb di-i kuru-aob ǃomgu di sîsenai-e ga dī tsî ǂganǃgâsib ǃnâ ga ǁî-e ǂnûikhâiba! Os ge ǁaes hoaragasa ǃeream tsî: Amen, ti nî mî.

¹⁶ǀÂxarexūheb hâ ǁnāb, ǁgûb tsî ǁgûs tsîra ga ǃharaxūba! Os ge ǁaes hoaragasa: Amen, ti nî mî.

¹⁷ǀÂxarexūheb hâ ǁnāb, ǀgūkhoeb âb di ǃhūǀkhariba ga ǂnûiǃkhuniba! Os ge ǁaes hoaragasa: Amen, ti nî mî.

¹⁸ǀÂxarexūheb hâ ǁnāb, ǂgī hâ-e ga daob ai ǁhapu kaiba! Os ge ǁaes hoaragasa: Amen, ti nî mî.

¹⁹ǀÂxarexūheb hâ ǁnāb, ǃhaokhoe-i, ǃoaǀgôa-i tsî ǃoatara-i di ǂhanuba ga gamagamaba! Os ge ǁaes hoaragasa: Amen, ti nî mî.

²⁰ǀÂxarexūheb hâ ǁnāb, ǁgûb di taras tawa ga ǁgoeba, ǁgûb di ǃgū-aisab ge khowa-ai xui-ao. Os ge ǁaes hoaragasa: Amen, ti nî mî.

²¹ǀÂxarexūheb hâ ǁnāb, mâ ǀgoa-i hoa-i ǀkha ga ǁgoeba. Os ge ǁaes hoaragasa: Amen, ti nî mî.

²²ǀÂxarexūheb hâ ǁnāb, ǃgâsas âb, ǁgûb di ôas kas, ǁgûs di ôas kas hoas ǀkha ga ǁgoeba. Os ge ǁaes hoaragasa: Amen, ti nî mî.

²³ǀÂxarexūheb hâ ǁnāb, ǀuiǁgûs âb ǀkha ga ǁgoeba. Os ge ǁaes hoaragasa: Amen, ti nî mî.

²⁴ǀÂxarexūheb hâ ǁnāb, ǀgūkhoeb âba ǂganǃgâsib ǃnâ ga ǂnauǃanna. Os ge ǁaes hoaragasa: Amen, ti nî mî.

²⁵ǀÂxarexūheb hâ ǁnāb, ǀkhaexū-e ga ǃkhōǃoaba, ǀhapioǃnâ-i di ǀaobab nî ǂnause. Os ge ǁaes hoaragasa: Amen, ti nî mî.

²⁶ǀÂxarexūheb hâ ǁnāb, mîdi nē ǂhanub dide ga ǃkhōǀgaipe tama iba, ǁîdeb nî dīse. Os ge ǁaes hoaragasa: Amen, ti nî mî.