Read Khoekhoegowab Deuteronomium 28 Bible Online

Deuteronomium 28 - Khoekhoegowab bible

Deuteronomium 28

¹Tsî i ge nîra ī, ǃKhūb, sa Elob di dommats ga ôasase ǁnâuǀnamo, ǁîb di mîmādi, nētsē ta ra mîmā tsidi hoade dīsa a ǂanǃâ, ob ge ǃKhūb, sa Eloba ǀgapise nî ǂnûi tsi ǃhūbaib di ǁaedi hoadi ǃgâ-ai.

²O gu ge nē ǀkhaegu hoaga sa ai nîra hā, tsîts ge ǁîga nîra ǃoa, ǃKhūb, sa Elob di dommats ga ǁnâuo:

³ǀKhaehesasets ge nîra i ǃās ǃnâ, ǀkhaehesasets ge nîra i ǃaub ǃnâ.

⁴ǀKhaehesan ge nîra sa ǃnāb di ǂûtanib tsî sa ǃhanab di ǂûtanib tsî sa ǀgoan di ǂûtanib, sa gomadi di ôananôagub tsî sa gūdi di ôananôagub tsîna.

⁵ǀKhaehesa ra ge nîra sa ǀharus tsî sa ǀhomamǃoreb tsîra.

⁶ǀKhaehesats ge nîra sa ǂgâs ǃnâ, ǀkhaehesats ge nîra sa ǃgûǂoas ǃnâ.

⁷ǃKhūb ge sa khākhoen, sa ǃoagu ra khâina sa ais aiǃâ ǂnauhe hâse nîra mâ; ǀgui daoba-ūn ge sa ǃoa nîra ǂoa, xawen ge hû daoga-ū sa ais aiǃâba xu nîra ǁhâ.

⁸ǃKhūb ge ǀkhaeba nîra mîmā, îb sa ǀkha hâ, sa sâu-omgu ǃnâ, tsî sa ǃommats ga ǁguiǀkhā xū-i hoa-i ǃnâ; tsî ǁîb ge nîra ǀkhae tsi ǁnā ǃhūb, ǃKhūb, sa Elob nî mā tsib ǃnâ.

⁹ǃKhūb ge satsa ǃanu ǁaese nîra ǁapoǁapobasen, ǁîb ge nūba tsi xase, ǃKhūb, sa Elob di mîmāde dī tsîts ga ǁîb di daogu ǃnâ ǃgûo.

¹⁰Tsî ǁaedi ǃhūbaib didi hoadi ge nîra mû, ǃKhūb di ǀons sa ǂama ǂgaihe hâsa, tsîdi ge nîra ǃao tsi.

¹¹Tsî ǃKhūb ge satsa xūn ǃnâ nîra ǃnā kai, sa ǃnāb di ǂûtanib ǃnâ tsî sa ǀgoan di ǂûtanib ǃnâ tsî sa ǃhanab di ǂûtanib ǃnâ; ǁnā ǃhūb, ǃKhūb ge sa îga, satsab nî ǁîba mā, ti nūbab ǃnâ.

¹²ǃKhūb ge ǁîb di ǁuib ǃgâiba nîra ǁkhowa-amba tsi: ǀHomma, sa ǃhūbab ǁaeb ai ǀapiba nî māse, tsî ǀkhaeb nîse sa ǃommi di xūreb hoaba; tsîts ge ǂgui ǁaede nîra ǀkhupi, xawe sats ge ǀkhupi tide.

¹³Tsî ǃKhūb ge nîra dana kai tsi tsî ǂare kai tsi tide, tsîts ge nîra ǃnā tsî ǃnaga hâ tide, ǁnâuǀnamts kao ǃKhūb, sa Elob di mîmādi, nētsē ta ǂan tsîts nî dīse ra mîmā tside,

¹⁴tsî ǂgō tamats ka io ǁnā mîdi, nētsē ta ra mîmā tsîdi hoade xu, amǀkhāb ǁôab ais kao, ǁareǀkhāb ǁôab ais kao, ǀkhara eloga sao tsîts nî ǁîga ǃoabase.

¹⁵Tsî i ge nîra ī, ǃKhūb, sa Elob di dommats ga ǁnâu tama io, ǂan, tsîts nî dīse ǁîb di mîmādi hoadi tsî ǁîb ǂnûiǂgādi, nētsē ta ra mîmā tside, o di ge nē ǀâxaredi hoade sa ai hā tsî nîra hō tsi.

¹⁶ǀÂxarexūhesats ge nîra ǃās ǃnâ, tsî ǀâxarexūhesats ge nîra ǃaub ǃnâ.

¹⁷ǀÂxarexūhe ra ge nîra sa ǀharus tsî sa ǀhomamǃoreb tsîra.

¹⁸ǀÂxarexūhesan ge nîra sa ǃnāb di ǂûtanib tsî sa ǃhanab di ǂûtanib, sa gomadi di ǁorab tsî sa gūdi di ǁorab tsîna.

¹⁹ǀÂxarexūhesats ge nîra sa ǂgâs ǃnâ, tsî ǀâxarexūhesats ge nîra sa ǂoas ǃnâ.

²⁰ǃKhūb ge sa ǁaegu nîra sî ǀâxareb tsî hîǀhurus tsî ǁgaoǁgaos tsîna, sa ǃommats ga ǁguiǀkhā xū-i hîats ra dī-i hoa-i ǃnâ, hîkākāhets nîs kōse, tsî ǃhaesets nî kās kōse, sa sîsengu di ǂkhabasib, ǁîb ǀkhats ge ǁnāxū teb ǃaroma.

²¹ǃKhūb ge ǂhīǁōba nîra ǂae-ai kai tsi, hîkākā tsib nîs kōse ǁnā ǃhūb, ǁîb ǃoats ra ǀumi bits nîse ǃgûba xu.

²²ǃKhūb ge nîra ǂnau tsi ǁnopaǁōb ǀkha, ǁkhais ǀkha, ǀaexa ǁkhais, ǀkhūǁkhais ǀkha, ǀkhurub ǀkha, ǃhorokhaus ǀkha tsî ǂae ra ǀaub tsîn, satsa nîra ǃgôaǃgonn ǀkha, kāts nîs kōse.

²³Tsî ǀhommi, sa danas ǂamai hâb ge nîra ǂai; tsî ǃhūb sa ǃnaga hâb ge nîra ǂnūǀuri.

²⁴ǃKhūb, sa Elob ge tsarab tsî tsaob tsîkha ǀapib sa ǃhūb dib ase nîra mā; ǀhomma xub ge sa ai nî ǁgôaxa, hîǀhuruhets nîs kōse.

²⁵ǃKhūb ge satsa sa khākhoen di ais aiǃâ ǂnauhe hâse nîra mā; ǀgui daoba-ūts ge ǁîb ǃoa nîra ǂoa, xawets ge hû daogu âba xu nîra ǃhū; tsîts ge ǃhūbaib di gaosidi hoadi xa nîra gongonǃnâhe.

²⁶Tsî ǁō hâ soros âts ge mâ anin ǀhommi din hoan tsî mâ ǀgurun ǃhūbaib din hoana ǂûse nî ība; tsî khoe-i xare-i ge ǁîna ǃhaebē tide.

²⁷ǃKhūb ge nîra ǂnau tsi ūǀhapigu Egipteb digu ǀkha, tsuidi ǀkha, ǂnâsa ǀgoros ǀkha tsî ǁhumis ǀkha, ǁîna xuts nî ǂuruǂuruhe ǁoana.

²⁸ǃKhūb ge nîra ǂnau tsi ǃkhausasib ǀkha, ǂgīsib ǀkha tsî ǂgaob di ǃhurigâs ǀkha;

²⁹ots ge tsēǃgâǁaeb ai nî tsanana, ǂgī hâb ra ǃkhaeb ǃnâ tsanana xase, tsîts ge ǃgâiǃgâ kai tide sa daoga; tsîts ge ǁgâiǀāhes tsî ǀâǀhanahes ǀguisa nî hîhe hoa tsēde, tsî ore-ao-i ge nî ǀkhai.

³⁰Tarasats ge nî dî-ammâi, xawe ǀkhara aob ge ǁîsa nîra ǁomū; omsats ge nî ǂnubibasen, xawets ge ǁîb ǃnâ ǁan tide; ǂauxûiǂûǃhanabats ge nî ǂgābasen, xawets ge ǁîb xa ǃorabasen tide.

³¹Sa gomab ge sa mûdi aiǃâ nî ǂāhe, xawets ge ǁîb xa ǂû tide; sa eseli ge sa ais aiǃâ nî ǃnarihe, xaweb ge sa ǃoa oa tide; sa ǀgoan ge sa khākhoena nî māhe, xawe hui-ao-i ge satsa hâba tide.

³²Sa ôagu tsî ôadi tsîn ge ǀkhara ǁaesa nîra māhe, tsî sa mûdi ge ǁîsa mû tsî nî tsēs hoasa ǁîna ǁkhore; xawe ǁkhāsi-i ge sa ǃomǁae hâ tide.

³³ǂÛb sa ǃhanab dib tsî sa xūreb hoabas ge ǁaes, hîats ǂan tama hâ ge isa nîra ǂû; tsîts ge hoa tsēde ǁgâiǀāhes tsî ǂkhūǂkhūhes ǀguisa nîra hîhe.

³⁴Tsîts ge nî ǃkhau sa mûra di ai-i, hîats nî mû-i ǃaroma.

³⁵ǃKhūb ge tsū tsuidi ǀkha nîra ǂnau tsi ǁgoakha tawa tsî ǀnūkha tawa, ǁîn xats ǂgauǂgauhe ǁoana, sa ǂaiǃnāba xu sa danaǂkhōs kōse.

³⁶ǃKhūb ge sats tsî sa gao-aob, hîats nî sa ǂamai ǂnûi hâb ona nîra ǃgû kai ǁaes, sats tsî sa îgu on ge ǀū is ǃoa; tsî ǁnāpats ge ǀkhara eloga nîra ǃoaba; haib tsî ǀuib tsîkha.

³⁷Tsîts ge ǃhurise nîra ī tsî ǂkhoamîse tsî ǃhōmîse ǁnā ǁaedi, ǃKhūb nî satsa ǁîn ǃoa ǂgaeǂguisīdi ǁaegu.

³⁸ǀOasa ǃkhommats ge ǃhanab ǃoa nî ūsī, xawets ge ǀorose nî hōǂgābasen; ǂhoms ge ǁîna nîra hapu xui-ao.

³⁹ǂAuxûiǂûǃhanabats ge ǂgā tsî nî sîsen, xawets ge ǂauxûi-e ā tide tsî xū-e ǀhaoǀhaobasen tide; ǂunib ge ǁîna nîra hapu xui-ao.

⁴⁰ǀKherahaidets ge nî ūhâ sa ǀkharigu hoagu ǃnâ, xawets ge olib ǀkha ǂkhauǀkhāsen tide; ǀkherahais âts di ǂûn ge nîra ǁnā xui-ao.

⁴¹ǀGôagu tsî ǀgôadi tsînats ge nî hō, xawen ge sa tide; ǁîn ge ǃkhō-oms ǃnâ nîra ǂgâ xui-ao.

⁴²Sa haidi hoadi tsî ǂûb sa ǃhūb diban ge ǂhomna ǀumise nîra ūhâ xui-ao.

⁴³ǃHaokhoe-i, sa ǁaegub ǃnâ hâ-i ge sats xa o-i ra ǀgapi o nî ǀgapi, tsî sats ge ots ra ǁgôa o nî ǁgôa.

⁴⁴ǁÎb ge satsa nî ǀkhupi, xawe sats ge ǁîba ǀkhupi tide; ǁîb ge satsa danase nî ība, tsî sats ge ǁîba ǂarese nî ība.

⁴⁵Tsî nē ǀâxaregu hoagu ge nîra hāǂam tsi tsî nî ǃgôaǃgon tsi tsî nî hō tsi, hîkākāhets nîs kōse, ǃKhūb, sa Elob di dommats ǁnâuǀnam tama ge i xui-ao, dīts nîse ǁîb di mîmādi tsî ǁîb di ǂnûiǂgādi, ǁîb ge mîmā tside.

⁴⁶Tsî di ge sa ǃnâ saose nî ī tsî buruxa dīse nî ī, ā, surib âts ǃnâ ǀamosib kōse.

⁴⁷ǃKhūb, sa Elobats ge ǃgâiaǂgaob tsî dâxa ǂgaob ǀkha ǃoaba tama i ǃkhais ǃaroma, ǃnāǂamsasib hoan dib ǃaroma;

⁴⁸ots ge sa khākhoen, ǃKhūb nî sa ǃnâ sîna nîra ǃoaba, ǃâs ǃnâ tsî ǁgâs ǃnâ tsî ǀōǀkhāsib ǃnâ tsî hoan di tôasib ǃnâ; tsî ǁîb ge ǂnūǀuriǃnaoba sa ǃaob ai nîra ǁgui, hîǀhuru tsib nîs kōse.

⁴⁹ǃKhūb ge sa ǃoagu ǁae-e nî ǃkhōkhâi ǃnūseba xu, ǃhūbaib di ǀamsa xu, ǃariǃkhās ra ǁkhana xase; ǁae-i, ǁî-i di gowabats ǁnâuǃā tama nî ī-i;

⁵⁰ǁae-i, ǀkhamasa ais â-i-i; kaib di aisa ǃkhōǃoa tama tsî ǂkhamma ǀkhom tide-e.

⁵¹Tsî i ge ǂûn sa ǀgoan din tsî ǂûn sa ǃhūb dina nîra hapu, hîǀhuruhets nîs kōse; tsî i ge ǃhoro-i xare-i tsî ǂauxûi-i tsî oli-i xare-e tsî gomadi âts di ǁora-i tsî ǀgoan âts di ǁora-i xare-e ǃgau kaiba tsi tide, ǁîb nî hîkākā tsis kōse.

⁵²Tsî i ge sa ǁāgu hoagu ǃnâ nîra ǂōǂō tsi, ǁnā ǀgapi tsî ǁaposa ǂnubiǂgoagu, ǁîgu aits sa ǃhūb hoab ǃnâ ge ǂgomaiǂnûigu nî ǁnās kōse; ā, ǁî-i ge nîra ǂōǂō tsi sa ǁāgu hoagu ǃnâ, sa ǃhūb, ǃKhūb, sa Elob ge mā tsib hoab ǃnâ.

⁵³Tsîts ge nîra ǂû sa ǃnāb di ǂûtanib, sa ôagu tsî sa ôadi tsîn, ǃKhūb ga mā tsin di ǁgansa ǁnā xāǂgās tsî ǁnā ǂōǂōs, sa khākhoen nî satsa ǁîs ǀkha ǂōǂō-ūs ǃnâ.

⁵⁴ǁNā khoeb xasa, sa ǃnâ a tsamra tsî a turaxab: ǁÎb di mûs ge nî ǁaixa ǃgâsab âb ǂama tsî ǃâǃnâb âb di taras ǂama tsî nau ǀgôagu âb, ǃgaubaheb nîgu ǂama;

⁵⁵ob ge ǀgui-i âna mā tide ǁnā ǁgans, ǁîb di ôagu, hîab nî ǂûgu dis xa, xū-i xare-eb ge ǃgaubasen tama hâ ǃkhais ǃaroma; ǁnā xāǂgās tsî ǂōǂōs, khākhoeb âts nî satsa sa ǁāgu hoagu ǃnâ ǂōǂōs ǃnâ.

⁵⁶Tsamra tsî turaxa taras, sa ǃnâ hâs xasa, ǁîs hîa ǂaiǃnāb âsa ǃhūb ai ǂnûitsâ tama ge is, turaxa tsî tsamtsises ge ūsen hâ i amaga, ǁîs di mûs ge nî ǁaixa ǃâǃnâb âs di aob ǂama, tsî ǁîs di ôab ǂama tsî ǁîs di ôas ǂama.

⁵⁷Tsî ǁîs di ǁgôa ra ǁhās, ǁîs di ǀnūkha ǁaeguba xu ge ǂoaxas tsî ǁîs di ôagu, hîas ge ǁoragu ǃaroma: ǁÎnas ge ǂganǃgâsib ǃnâ nîra ǂû, xūn hoan tawas tôasi hâ amaga; xāǂgās tsî ǂōǂōs, sa khākhoeb sa ǁāgu hoagu ǃnâ nîra ǂōǂō tsis ǃnâ.

⁵⁸ǂAn tsîts ga dī tama io, nē ǂhanub di mîdi, ǂkhanis ǃnâ xoahe hâdi hoade, nē ǂkhaisa tsî ǃaoǃaosa ǀons, ǃKhūb, sa Elobats nî ǃaose;

⁵⁹ob ge ǃKhūba sa tsûtsû-aide buruxase nîra dī tsî tsûtsû-aidi sa surib didi on; ǁîdi ge kai tsî hâhâ ra tsûtsû-ai tsî tsū tsî hâhâ ra ǀaesenaise nî ī.

⁶⁰Tsî ǁîb ge ǁōgu, Egipteb digu, ǁîgats ra ǃaogu hoaga sa ai nîra hā kai, tsî gu ge satsa nî ǂae-ai.

⁶¹Tsî ǀaesenai-i hoa-i tsî tsûtsû-ai-i hoa-i, nē ǂhanub di ǂkhanis ǃnâ xoahe tama hâ i onab ge ǃKhūba sa ai nîra hā kai, hîkākāhets nîs kōse.

⁶²Tsîts ge ǀoro khoerose nîra ǃgau, ǀhommi di ǀgamiron a ǂguis kōse du ge ǂgui is khaoǃgâ; ǃKhūb, sa Elob di dommats ge ǁnâuǀnam tama i ǃkhais ǃaroma.

⁶³Tsî i ge nîra ī, ǃKhūb sats ǂama ǃgâiaǂgaosa ge hîs ǁkhās xase, ǃgâidī tsî ra ǂguiǂgui duǃâ, ǁnās ǁkhās xaseb ge ǃKhūba sats ǂama nîra ǃgâiaǂgao, ǃgam tsî ra hîǀhuru duǃâ; tsîts ge nîra tsubuǂuihe ǁnā ǃhūb, ǁîb ǃoats ǀumi bi du nîga ra ǃgûba xu.

⁶⁴Tsî ǃKhūb ge nîra ǀgaruǀgaru tsi ǁaedi hoadi ǃnâ, ǃhūbaib di ǀgui ǀamsa xu ǃhūbaib di nau ǀams kōse; tsî ǁnāpats ge ǀkhara eloga nî ǃoaba, sats ge ǀū iga tsî sa îgu on; haib tsî ǀuib tsîkha.

⁶⁵Tsî nē ǁaedi ǁkhādi ǃnâts ge sâsase hâ tide, tsî ǂaiǃnāb âts ge sâ-i xare-e ūhâ tide: ǃKhūb ge ǁnāpa ǀkhū ra ǂgaoba nîra mā, tsî ǀhape mûǁkhāsib tsî ǀoms di ǂoposib tsîna.

⁶⁶Tsî sa ûib ge sa ǃoagu nîra ǂgāmâisen, tsîts ge tsēa tsî tsuxuba nîra ǃhuri; tsîts ge ûib âts xa ǁaposase hâ tide.

⁶⁷ǁGoas aits ge nî mî: Ae, î-i ga ǃui! Tsî ǃuiats ge nî mî: Ae, î-i ga ǁgoa, ǃhurib sa ǂgaob dib ǃaroma, ǁîb xats nî ǃhurib, tsî ais sa mûdi dis, hîats nî mûs ǃaroma.

⁶⁸Tsî ǃKhūb ge Egipteb ǃoa nîra oa kai tsi doe-omgu ǃnâ, ǁnā daob, ǁîb xa ta ge: ǁKhawats ge ǁîba mû tide, ti mîba-ū; tsîts ge ǁnāpa sa khākhoen tawa khobogu ase tsî khobodi ase nî ǁamaxū ǂgao, xawe ǁama-ao-i ge nî ǀkhai.

⁶⁹Nēdi ge mîdi, ǁnā ǃgaeǀhaos didi, ǃKhūb ge Moseba mîmās, Israeli ôan ǀkhab nî ǁîsa dīsa, Moab ǃhūb ǃnâ ǁnā ǃgaeǀhaos, Horeb tawab ge ǁîn ǀkha dīs ǃgâ-ai.