Read Khoekhoegowab Deuteronomium 29 Bible Online

Deuteronomium 29 - Khoekhoegowab bible

Deuteronomium 29

¹Tsî Moseb ge Israeli hoaba ǂgai tsî ǁîna ge mîba: Sadu ge ge mû, ǃKhūb Egipteb ǃnâ sadu di mûdi aiǃâ ge dīsa Faraob tawa tsî ǁîb di ǃgāgu hoagu tawa tsî ǁîb di ǃhūb hoab tawa,

²ǁnā kai ǃâitsâdi, sa mûdi ge mûde, ǁnā saodi tsî kai buruxa dīgu on;

³xawe ǃKhūb ge sado ǂgaoba mā tama, ǁnâuǃā du nîse, tsî mûde, mû du nîse, tsî ǂgaede, ǁnâu du nîse, nētsēs kōse.

⁴O ta ge tita sado hakadisi kurigu kōse ǃgaroǃhūb ǃnâ ge ǃgûma kai; sadu di saran ge ǀkhāb ai ǀoro tama, tsî ǁharon âdu ge ǂaidi âdu ai ǀoro tama ge i.

⁵Pereba du ge ǂû tama, tsî ǂauxûib tsî ǀgaisa xûiba du ge ā tama ge i; ǂan du nîga, tita a ǃKhū, sadu di Elo ǃkhaisa.

⁶Tsî nē ǃās tawa du ge hā ǃnubaib ge Sihonni, Hesbons di gao-aob, tsî Ogi, Basanni di gao-aoba ge ǃgûǂoa, sadab nî ǃkhamūga; tsî da ge ǁîkha ge ǂnau.

⁷Tsî da ge ǁîkha di ǃhūba ū tsî ǁîba Rubenǁîn, Gadǁîn tsî ǃkhare ǃhaos Manaseǁîn disa ge mā.

⁸Sâu ǁnâi mîdi nē ǃgaeǀhaos dide î du ǁîde dī; î du ǁnâuǃāxase sîsen, dī du kan hoan ǃnâ.

⁹Sadu ge nētsē hoatsama mâ ǃKhūb, sadu Elob di ais aiǃâ: Sadu ǃhaodi di danakhoegu, sadu di kaigu tsî sadu di ǃoabasabegu, mâ aob Israeli dib hoab,

¹⁰sadu di ôan, sadu di taradi tsî sadu di ǃhaokhoeb, sadu di ǁgoeǃkhais ǁaegu hâb, haiǁhā-aob âtsa xu ǁgamxuri-aob âts kōse,

¹¹ǂgâ nîse ǃgaeǀhaos ǃKhūb, sadu Elob dis ǃnâ tsî ǀâxareb âb ǃnâ, nētsēb ra ǃKhūb, sadu Eloba sadu ǀkha dība;

¹²nētsēb nî satsa ǁaese ǁapoǁapobasense, îb ga sa Elo, ti, sa ǃoab ge ǃhoa xase, tsî sa îgu, Abrahammi, Isaki tsî Jakob tsîgab ge nūba khami.

¹³Tsî sadu ǀguidu ǀkha ta ge nē ǃgaeǀhaos tsî nē nūs tsîra dī tama,

¹⁴tsî ǁnāb, nētsē sada ǀkha nēpa ǃKhūb sada Elob di ais aiǃâ mâb ǀkha; tsî ǁnāb, nētsē sada ǀkha nēpa hâ tama hâb ǀkha.

¹⁵Sadu ge a ǂan, mati da ge Egipteb ǃnâ ǁan hâ isa tsî mati da ge ǁnā ǁaedi hîa da ge doeǃganude ǃkharuǃnâ ǃkhaisa.

¹⁶Tsî du ge ge mû ǁîn di ǁgaiǁgaisan tsî ǁîn di ǀurisan, haib, ǀuib, ǀhaiǀurib tsî ǃhuniǀurib tsîn, ǁîn ǀkha ge hâ ina.

¹⁷A i sadu ǃnâ tā hâ khoeb kas, taras kas, ommi din kas, ǃhaos kas hoas, ǁî-i di ǂgaoba xu ga nētsē ǃKhūb, sada Eloba xu ǂnan-i, ǃgû tsî i nî nē ǁaedi di eloga ǃoabase, îb sadu ǃnâ tā hâ ǃnoma-i, tsaba-i tsî alsem-i tsîna ra tani-e.

¹⁸Tsî i ga īo, nē ǀâxareb di mîdeb ga ǁnâuo, ǂgaob âb ǃnâb ǀkhaesen tsî ra mîsa: Tita ge ǂkhîba nî ūhâ, ti ǂgaob di karokarosens ǃnâ ta ga tanisen xawe, ākhanu hâ-i tsî ǁgâ hâ-i tsîna ta nî hîkākāse.

¹⁹ǃKhūb ge ǁî-e ǀûba ǂgao tama nî ī, tsî ǁnāǃnubaib ge ǃKhūb di ǁaib tsî ǁgôasib tsîkha nîra ǀan ǁnā khoeb ǂama, tsî ǀâxareb, nē ǂkhanis ǃnâ xoahe hâb hoab ge ǁîb ai nî ǁgoe; tsî ǃKhūb ge ǀons âba ǀhommi ǃnagaba xu nîra ǀari.

²⁰Tsî ǃKhūb ge ǁîba ǂkhabab ǃoa nîra ǀgora Israeli di ǃhaodi hoade xu, ǀâxaregu ǁnā ǃgaeǀhaos, nē ǂhanub di ǂkhanis ǃnâ xoahe hâs digu hoagu ǃoa.

²¹Os ge saoǃgoaxa ǃhaosa nîra mî, sadu di ôan, sadu khaoǃgâ nî khâin, tsî ǃhaokhoeb, ǃnū ǃhūba xu nî hāb tsîn, mûn kao nē ǃhūb di tsûtsû-aidi tsî ǁîb di ǀaesengu, ǃKhūb ge ǁîba ǁîgu ǀkha ǀaesen kaiga;

²²îb ǁîb di ǃhūb hoaba swabel tsî ǂō tsî khauǃkhūse ī; ob ge tsorohe tide, tsî ǂgona-i xare-eb ge ūǀkhī tide, tsî ǁhao-i xare-i ge ǀkhī tide, Sodoms tsî Gomoras, Admas tsî Seboims tsîdi di dawaǃkhapus ge ī xase, ǃKhūb ge ǁaib âb ǃnâ tsî ǁgôasib âb ǃnâ dawaǃkhapude;

²³î di ǁaedi hoade mî: Tare xū-i ǃaromab kha ǁnâi ǃKhūba nē ǃhūba ǁnāti go dī? Tarexasa kha ǁnâi, nē kai ǁaib ra ǂhubisa?

²⁴On ge nîra mî: ǃKhūb, ǁîn Elob di ǃgaeǀhaos ǃaromas ge ǁîn ǀkhab ge dīsa, Egipteba xub ge ǁîna ǂgaeǂguiǂui ǃnubai;

²⁵tsî sī tsîn ge ǀkhara eloga ǃoaba tsî ǁîgu aiǃâ ǃhon ǃnubai; elogu ǁîn a ǀūgu tsî ǀguib âgu ǁîna xū-e ǀkhae tama gu:

²⁶ǁNā-amagab ge ǃKhūb di ǁaiba ge ǂhubi nē ǃhūbǀî, ǁîb ǂamab nî ūhāga nē ǀâxareb, nē ǂkhanis ǃnâ xoahe hâb hoaba.

²⁷Tsî ǃKhūb ge ǁîna ǁîn di ǃhūba xu ge tsubuǂui ǁaib ǃnâ tsî ǁgôasib ǃnâ tsî kai ǁaixasib ǃnâ; tsîb ge ǁîna ge aoxū ǀkhara ǃhūb ǃoa, nētsē i ī khami.

²⁸ǂGanǃgâsa xūn ge a ǃKhūb, sada Elob di; xawe ǂhaiǂhaihe hân ge a sada di tsî sada ôan di ǀamosib kōse, dī da nîse nē ǂhanub di mîdi hoade.