Read Khoekhoegowab Deuteronomium 3 Bible Online

Deuteronomium 3 - Khoekhoegowab bible

Deuteronomium 3

¹ǁNās khaoǃgâ da ge oa tsî Basanni daoba-ū ge doeǃapa; tsî Ogi, Basanni di gao-aob ge sada ge ǃgûǃoa, ǁîb tsî ǁaes âb hoab, ǃkhammi ǃoa, Edreis ǁga.

²ǃNubaib ge ǃKhūba tita ǃoa ge mî: ǁÎba tā ǃao, ǁîb tsî ǁaes âb hoab tsî ǃhūb âba ta ge sa ǃomǁae ge mā xuige; ots ge ǁîba nî dī, Sihonni, Amorǁîn di gao-aob Hesbons tawa ǁan hâbats ge dī khami.

³Tsî ǃKhūb, sada Elob ge ǁkhāti Ogi, Basanni di gao-aob tsî ǁaes âb hoaba sada ǃomǁae ge mā, o da ge ǁîba ge ǂnau, khoe-i xare-e da ge ǁîba ǃgauba tama is kōse.

⁴Tsî da ge ǁnā ǁaeb ǁkhāb ai ǁîb di ǃādi hoade ge ū; ǀgui ǃās xares ge hâ tama ge hâ i, ǁîna xu ta ge ū tama isa; ǃnanidisi ǃādi, Argob di ǃhūǃâs hoaragas, Basanni ǃnâ hâ gaosis Ogi dis hoas dide.

⁵ǁNā ǃādi hoadi ge ǀgapi ǂnubiǂgoagu tsî ǁāgu tsî daoǁkhaegu tsîn ǀkha ge ǁapoǁapohe hâ i, tsî ǁkhāti ǂnubiǂgoao ǃādi ǂguide.

⁶O da ge ǁîde ge ǀâxare, Sihonni, Hesbons di gao-aoba da ge dīs xase, ǃādi hoadi, aogu, taradi tsî ǀgôaron tsîna ra ǀâxarese.

⁷Xawe ǀgoan hoan tsî ǃnarixūn tsîn ǁnā ǃādi din, ǁîna da ge sada ge ǁkhâuǁnâbasen.

⁸Nēti da ge ǁnā ǁaeb ǁkhāb ai ǃhūba ge ū, ǁnā ǀgam gao-aokha Amorǁîn dikha, Jordanǃāb nēxaǃani ge hâ ikha di ǃomǁaeba xu, ǃārob Arnonna xu Hermonǃhommi kōse;

⁹Sidonǁîn ge Hermonna Sirion ti ra ǂgai, xawe Amorǁîn ge ǁîba Senir ti ra ǂgai.

¹⁰ǃĀdi ǂhaba ǃhūb didi hoade tsî Gileadi hoab dide Salxas kōse tsî Edreis kōse, ǃādi, Ogi, Basanni dib di gaosis dide.

¹¹Ogi, Basanni di gao-aob ǀguib ge Refaimǁîn xa ge ǃgau; mû, ǁomaixūs âb, ǀurib ǀkha dīhe hâ ǁomaixūsa hâ tamas hâ Rabas, Amonni ôan dis tawa? ǁÎs ge khoese ǂhâgu kōse a gaxu tsî haka ǂhâgu kōse a ǂhaba, khoeb di ǃunib ǃoa.

¹²ǁNā ǃhūb ǁkhāba da ge ǁnā ǁaeb ai ǁîsise ge ū; Aroers hîa ǃārob Arnonni tawa hâsa xu tsî Gileadi ǃhommi di ǃkhareba da ge ǁîs di ǃādi ǀkha Rubenǁîn tsî Gadǁîn tsîna ge mā.

¹³Tsî Gileadi xa ge ǃgau-i, ǁî-e ta ge Basanni hoaragab, Ogi di gaosis ǀkha ǃkhare ǃhaos Manaseb disa ge mā, Argob di ǃhūǃâs hoaragasa, Basanni hoaragaba ǃganu; ǁîb ge Refaimǁîn di ǃhūb ti gere ǂgaihe.

¹⁴Jairi, Manaseb ôab ge ǃhūǃâs Argob dis hoasa ge hō, Gesurǁîn tsî Maaxatǁîn di ǀkharib kōse; ob ge ǁîsa ǀons âb ǃoa Basan Havot-Jair, ti ge ǂgai nētsēs kōse.

¹⁵Tsî Maxira ta ge Gileada ge mā.

¹⁶Xawe Rubenǁîn tsî Gadǁîn tsîna ta ge Gileada xu ǃārob Arnonni kōse ge mā, ǃārob tsî ǀkharib ǁaegu, tsî Jabokǃāb kōse Amonni ôan di ǀkhariba;

¹⁷ǁnās tawa ǂhaba ǃhūb tsî Jordanǃāb tsîn ǀkharib ǀkha; Kineretsa xu ǂGās di Hurib kōse, ǂŌxahurib Asdot-Pisgas ǃnaga aiǂoasǀî.

¹⁸ǃAruǀî ta ge ǁkhā ǁaeb ai mîmā du tsî ge mî: ǃKhūb, sadu Elob ge nē ǃhūba ge mā du, ǀumi bi du nîse; î go ǁnâi ǃkham ǁkhā aogo hoago, ǁâtanisen hâse sago di ǃgâsan, Israeli ôan di ais aiǃâ ǃgû.

¹⁹Sago di taradi ose tsî sago di ôaron ose tsî sago di ǀgoan ose (ǂan ta a ǀgoaxa du a ǃkhaisa) ǁîn ge nî hâ ǁnā ǃādi, sado ta ge mādi ǃnâ;

²⁰ǃKhūb nî sago di ǃgâsana sâba mās kōse, sadu khami, în ǁkhāti ǀumi ǁnā ǃhūb, ǃKhūb, sada Elob nî ǁîna māba, Jordanǃāb nauǃanib ai; ǃnubai du ge nî oa, mâb hoab ǁîb di ǀumis, tita ge sado mās ǃoa.

²¹ǁKhāti ta ge Josuaba ǁkhā ǁaeb ai mîmā tsî ge mî: Sadu di mûdi ge ǁnā xūn, ǃKhūb, sadu Elob ge nē ǀgam gao-aokha tawa dīn hoana ge mû; nētib ge ǃKhūba gaosidi hoadi tawa nî dī, ǁîdi ǃoa da ga doede.

²²ǁÎna tā ǃao, ǃKhūb sadu Elob ra ǃkhamba du xuige.

²³ǁKhāti ta ge ǃKhūb tawa ǀkhomma ge ǂganbasen, ǁnā ǁaeb ǁkhāb ai ra mîǃâ:

²⁴ǃKhūtse, ǃKhūtse, sats ge sa ǃgāta ge ǁgautsoatsoa, sa kaisib tsî sa ǀgaisa ǃommi tsîkha; mâ elo-e kha ǁnâi hâ, ǀhommi ǃnâs karao, ǃhūbaib ais karao, sa sîsengu ǃoa tsî sa ǁkhāsigu ǃoa dī ǁkhā-e?

²⁵A ta ǃgâu Jordanǃāba, î ta sī mû, ǁnā ǃgâi ǃhūb, Jordanǃāb nauǃani hâb, ǁnā ǃgâi ǃhomxa ǃhūb tsî Libanonni tsîna.

²⁶Xawe ǃKhūb ge ti ai kaise ge ǁaixa sadu ǃaroma, tsî ǁnâu-am te tama tsîb ge ǃKhūba ge tita ǃoa ge mî: ǂKhî, îts nē ǃkhais xa tā ǁkhawa tita ǀkha ǃhoa.

²⁷ǃApa Pisgab di ǂaob ai îts ǃgapakhâi huriǂoasǀî, ǀapasǀî, ǃkhawagasǀî tsî aiǂoasǀî îts sa mûra ǀkha mû: Nē Jordanats ge satsa ǃgâu tide xuige.

²⁸ǁNâi Josuaba mîmā, îts ǁîba ǀgaiǀgai îts ǁîba ǁapoǁapo: ǁÎb ge nē ǁaes di ais aiǃâ ǃgâu tsî nî ǁnā ǃhūb, sats nî mûba ǁîna ǀumi kai.

²⁹Nēti da ge ǁnā ǃgoaǃnāb ǃnâ ge hâ, Bet-Peors ǃoa-ai.