Read Khoekhoegowab Deuteronomium 30 Bible Online

Deuteronomium 30 - Khoekhoegowab bible

Deuteronomium 30

¹ǃAruǀî i ge nîra ī, nē xūn hoan xats ga hāǂamheo, nē ǀkhaeb tsî nē ǀâxareb tsîkha, nētsē ta go mâi-aiǃâ tsi kha xa; ots ge ǁkhawa ǂgaob ǃnâ nîra ǂâiǂâisen ǁaedi, ǁîdi ǃoab ǃKhūb, sa Eloba nî doeǁgasī tsi di hoade.

²Ots ge nîra ǃhobasen ǃKhūb, sa Elob ǃoa, tsîts ge nîra ǁnâuǀnam ǁnān, nētsē ta ra mîmā tsin hoan ǃoa, sats tsî sa ôan tsîdo, sa ǂgaob hoab ǀkha tsî sa ǀoms hoas ǀkha.

³Ob ge ǃKhūb, sa Eloba sa ǃkhōsisa ǀkharaǀkhara tsî nîra ǀkhom tsi; tsî ǁîb ge ǁkhawa nîra ǀhaoǀhao tsi ǁnā ǁaedi, ǁîdi ǃoab ge ǃKhūb, sa Eloba ǀgaruǀgaru tsi di hoade xu.

⁴Tsî sa doeǁgabēhesan ga ǀhommi di ǀams tawa hâ xawe, ǃKhūb, sa Elob ge ǁnāpa xu nîra ǀhaoǀhao tsi, tsî ǁnāpa xub ge nîra ū tsi.

⁵Tsî ǃKhūb, sa Elob ge nîra ūsī tsi ǁnā ǃhūb, sa îgu ge ǀumise ūhâ ib ǃnâ, tsîts ge ǁîba ǀumise nî ūhâ, tsîb ge nîra ǃgâidī tsi tsî nîra ǂguiǂgui tsi sa îgu ǃgâ-ai.

⁶Tsî ǃKhūb, sa Elob ge sa ǂgaoba nîra ǃgao tsî sa surib di ǂgaob on, ǃKhūb, sa Elobats nî ǀnamse sa ǂgaob hoab ǀkha tsî sa ǀoms hoas ǀkha, ûits nîga.

⁷Tsî ǃKhūb, sa Elob ge nē ǀâxaregu hoaga sa khākhoen tsî sa ǁkhansaben, satsa gere ǃgôaǃgonn ai nîra ǁgui.

⁸Ots ge satsa nîra ǃhobasen tsî ǃKhūb di domma nîra ǁnâuǀnam, tsîts ge nîra dī ǁîb di mîmādi, nētsē ta ra mîmā tsidi hoade.

⁹Tsî ǃKhūb, sa Elob ge nîra ǃnā kai tsi sa ǃommi di sîsenni hoab ǃnâ, sa ǃnāb di ǂûtanib ǃnâ tsî ǀgoan di ǂûtanib ǃnâ tsî sa ǃhūb di ǂûtanib ǃnâ ǃgâib ǃoa; ǃKhūb ge ǁkhawa nîra oa xui-ao, sats ǂamab nî ǃgâiaǂgaose ǃgâib ǃoa, sa îgu ǂamab ge ǃgâiaǂgaos ǁkhās xase,

¹⁰ǃKhūb, sa Elob di dommats ga ǁnâuǀnamo, ǁîb di mîmādi tsî ǁîb di ǂnûiǂgādi, nē ǂhanub di ǂkhanis ǃnâ xoahe hâde ra dīǃâ; ǃhobasents kao ǃKhūb, sa Elob ǃoa sa ǂgaob hoab ǀkha tsî sa ǀoms hoas ǀkha.

¹¹Nē mîmās, nētsē ta ra mîmā tsis ǁkhās ge ǂganǃgâsaba tsi tama hâ, tsîs ge ǃnū tama hâ.

¹²ǁÎs ge ǀhommi ǃnâ hâ tama hâ, mîts nîse: Tari-e nî ǀhommi ǃoa ǃapaba da, ǁîsa i nî ūhāba dase, tsî ǁîsa i nî ǁnâu kai dase, î da ǁîsa dī?

¹³ǁÎs ge hurib nau ǀkhāb ai hâ tama hâ, mîts nîse: Tari-e nî hurib nauǀkhāb ai ǃgâu, ǁîsa i nî ūhāba dase, tsî ǁîsa i nî ǁnâu kai dase, î da ǁîsa dī?

¹⁴Nē mîs ge satsa kaise ǀgūse hâba sa ams ǃnâ tsî sa ǂgaob ǃnâ, dīts nîga.

¹⁵Mû, tita ge nētsē go mâi-aiǃâ tsi ûib tsî ǃgâib tsîkha, ǁōb tsî ǂkhabab tsîkha.

¹⁶Tita ge nētsē ra mîmā tsi xui-ao, ǃKhūb, sa Eloba ǀnam tsîts nî ǁîb di daogu ǃnâ ǃgûsa, ǁîb di mîmādi tsî ǁîb di ǂhanugu tsînats nî dīsa, ûi tsîts nî ǂguiǂguisenga, tsî ǃKhūb, sa Elob nî ǀkhae tsiga ǁnā ǃhūb, ǁîb ǃoats ra ǃgûb ǃnâ, ǀumi bits nîga.

¹⁷Xawe sa ǂgaob ga ǂnanoao tsî ǁnâu tamats ka io, tsî doeǁgahets kao, ǀkhara elogu aiǃâ ǃhon tsîts nî ǁîga ǃoaba, timîo,

¹⁸o ta ge tita nētsē ra aoǁnâ du, ǂanǂansase du nîra kā ǃkhaisa; tsēde du ge ǃnūǃnū tide ǁnā ǃhūb ǃnâ, ǁîb ǃoa du ge Jordanna-ū ǃgâuba, ǁîb ǃnâ sī tsî du nî ǀumise ūhâ bise.

¹⁹Tita ge nētsē sadu ǃoagu ǀhûǀguitimî-aose ra ū ǀhommi tsî ǃhūbaib tsîkha. Ûib tsî ǁōb tsîkha ta ge goro mâi-aiǃâ tsi, ǀkhaeb tsî ǀâxareb tsîkha; ǁnâi ûiba ǃkhōǂuibasen, îts ûi, sats tsî sa surib tsîdo,

²⁰ǃKhūb, sa Eloba ǀnam hâse, ǁîb di domma ra ǁnâuǀnamse tsî ǁîba ra ǂae-aise; ǁîb ge a sa ûi tsî sa tsēdi di kōsi xui-ao; hâhâts nîga ǁnā ǃhūb, ǃKhūb, sa îgu Abrahammi, Isaki tsî Jakob tsîgab ge nūbab ǃnâ, ǁîgab nî mā ti.