Read Khoekhoegowab Deuteronomium 31 Bible Online

Deuteronomium 31 - Khoekhoegowab bible

Deuteronomium 31

¹ǁNās khaoǃgâb ge Moseba ǃgûsī tsî nē mîde gere ǃhoa Israeli hoaragab ǃoa.

²Tsîb ge ǁîn ǃoa ge mî: Tita ge nētsē a ǀguikaidisiǀgamdisi kurixa, tita ge ǃaruǀî ta nî ǂoa tsî ǂgâse ī tama hâ; ǁnās tawab ge ǃKhūba tita ǃoa ge mî: Nē Jordannats ge satsa ǃgâu tide.

³ǃKhūb, sa Elob, ǁîb ge sa ais aiǃâ nî ǃgâu; ǁîb ge nē ǁaede sa ais aiǃâba xu nîra hîkākā, ǁînats nî ǀumise ūhâga. Josuab ge sa ais aiǃâ nî ǃgâu, ǃKhūb ge mî khami.

⁴Tsî ǃKhūb ge ǁîna nîra dī-ū, Sihonni tsî Ogi tsîkha, Amorǁîn di gao-aokha tsî ǁîkha di ǃhūbab ge dī-ū xase, ǁîn hîab ge hîǀhuruna.

⁵Tsî ǃKhūb ga ǁnâi ǁîna sadu di ais aiǃâ māo, o du ge ǁîna nî dī-ū ǁnā mîmās, tita ge mîmā dus hoas ǃoa.

⁶ǀGaisa, î du ǃgâiǂâixa, tā ǃao î du tā ais ân aiǃâ ǃhuri; ǃKhūb, sa Elob ge ǁnāb, sa ǀkha ra ǃgûba xuige; ǁîb ge ǀû tsî ǁnāxū tsi tide.

⁷Tsî Moseb ge Josuaba ǂgai tsî ǁîb ǃoa ge mî Israeli hoab di mûdi aiǃâ: ǀGaisa îts ǃgâiǂâixa, sats ge nē ǁaes ǀkha nîra ǂgâ xuige ǁnā ǃhūb, ǃKhūb ge ǁîn di îga ǁînab nî mā bi ti nūbab ǃnâ; tsî sats ge ǁîna nîra ǀumi kai bi.

⁸Tsî ǃKhūb ge ǁnāb, sa aisa ra aiǃgûbaba; ǁîb ge ǀû tsî ǁnāxū tsi tide; tā ǃao îts tā ǃhuri.

⁹Tsî Moseb ge nē ǂhanuba xoa tsî ǁîba pristergu, Levib ôagu, ǃgaeǀhaos ǃKhūb dis di ǂgaesa ra taniga ge mā tsî Israeli di kaigu hoaga.

¹⁰Tsî Moseb ge ǁîga mîmā tsî ge mî: Mâ hû kurigu hoagu di ǀams ai, mîmâisa ǁaeb ǃnorakais di kurib dib ai ǁhaogu di kaitsēdi ǁaeb ai,

¹¹Israeli hoab ga hāo, ǃKhūb, sa Elob di ais aiǃân nî ǁnā ǃkhais, ǁîb nî ūǂuibasens tawa ǂhaise, ǃnubaits ge nē ǂhanuba Israeli hoab aiǃâ nî khomai, ǁîn di ǂgaedi aiǃâ.

¹²ǁAesa ǀhaoǀhao, aogu, taradi, ǀgôan tsî sa ǃhaokhoeb, ǁāgu âts ǃnâ hâb tsîna; în ǁnâu, în ǁkhāǁkhāsen, în ǃKhūb, sa Eloba ǃao, în ǂan în dī nē ǂhanub di mîdi hoade.

¹³În ǁîn di ôan, hîa ge ǀū ina ǁnâu tsî ǁkhāǁkhāsen, ǃKhūb, sa Eloba ǃaosa ǁnā ǃhūb, Jordanna-ūts ra ǁîb ǃoa ǀumi bits nîga ǃgûbab di tsēdi hoadi kōse.

¹⁴Tsî ǃKhūb ge Moseb ǃoa ge mî: Mû, sa tsēdi go ǀgū, ǁîdi aits nî ǁōde; ǂgai Josuaba î kho tentoms ǀhûs dis ǃnâ sī mâ, î ta mîmā bi. Nēti kha ge Moseb tsî Josuab tsîkha tentoms ǀhûs dis ǃnâ sī ge mâ.

¹⁵ǃNubaib ge ǃKhūba tentoms ǃnâ ge ǂhai, ǀnanus ǃnâ; tsî ǀnanus ge tentoms di ǁāb ǂamǃnâ sī ge mâ.

¹⁶Ob ge ǃKhūba Moseb ǃoa ge mî: Mû, sats ge sa îgu ǀkha nîra ǁom; os ge nē ǁaesa khâi tsî nîra ǀaiǃgon elogu ǁnā ǃhūb, ǁîb ǃoan ra ǃgûb di ǃhaokhoen diga ǁîn di ǁaegu; on ge tita ǁnāxū tsî nîra hîkākā ti ǃgaeǀhaos, ǁîn ǀkha ta ge dīsa.

¹⁷Ob ge ti ǁaiba ǁnā tsēs ǁkhās ai ǁînǀî nîra ǂhubi, o ta ge tita ǁîna nîra ǁnāxū tsî ti aisa ǁîna xu nîra gaugau, on ge ǂûse nîra hâ tsî ǂgui ǁōgu tsî ǂōǂōsigu tsîn xa nîra hāǂamhe; on ge ǁnātsē nîra mî: Nē ǁōgu xa hāǂamhe tama ta hâ, ti Elob ti ǁaegu hâ tama hâ ǃkhais ǃaroma.

¹⁸Tsî ta ge tita ti aisa ǁnā tsēs ǁkhās ai nîra gaugauǃari, ǁîn ge dī ǂkhaban hoan ǃaroma, ǀkhara elogu ǃoan ge dabasen amaga.

¹⁹Tsî nēsi xoabasen re nē amsa, î du ǁîsa Israeli ôana ǁkhāǁkhā, î du ǁîsa ams ân ǃnâ ǁgui; îs nē amsa tita ǀhûǀguitimîse ība Israeli ôan ǃoagu.

²⁰Tita ge nē ǁaesa nîra ūǂgâ ǁnā ǃhūb, ǁîn di îga ta ge nūbab, daib tsî danib tsîkha xa ra dâub ǃnâ, on ge nîra ǂû tsî ǁâ tsî kau; ǃnubain ge ǀkhara elogu ǃoa dabasen tsî ǁîga nîra ǃoaba, on ge tita nîra ǁgonǁgonǂgao tsî ti ǃgaeǀhaosa nîra hîǀhuru.

²¹Tsî i ge nîra ī, ǂgui ǁōgu tsî ǂōǂōsigu tsîn xan ga hāǂamheo, os ge nē amsa ǁîn di ais aiǃâ ǀhûǀguitimî-aose nîra ǃeream, ǁîn surib di amsa xus ge ǀuruhe tide xui-ao; ǂâin ra xūn, nētsēn ra dīna ta a ǂan amaga, ganupe ta ǁîna ǁnā ǃhūb, ǁîna ta ge nūbab ǃnâ ūǂgâ tama hâ hîa.

²²Nētib ge Moseba nē ǁnaetsanasa ǁnātsē xoa, tsî Israeli ôana ge ǁkhāǁkhā.

²³Tsîb ge Josuab, Nunni ôaba mîmā tsî ge mî: ǀGaisa îts ǃgâiǂâixa, sats ge Israeli ôana nîra ūǂgâ ǁnā ǃhūb, tita ge ǁîna nūbab ǃnâ; tsî tita ge sa ǀkha nîra hâ.

²⁴Tsî i ge ge ī, Moseb ge nē ǂhanub di mîde ǂkhani-i ǃnâ xoatoao, toaǃari di ges kōse,

²⁵ob ge Moseba Leviǁîgu, ǃgaeǀhaos ǃKhūb dis di ǂgaesa ra taniga mîmā tsî ge mî:

²⁶Nē ǂhanub di ǂkhanisa ū î go ǁîsa ǃgaeǀhaos, ǃKhūb, sa Elob dis di ǂgaes xōǀkhā ǁgui, îs ǁnāpa ǀhûǀguitimî-aose hâ sa ǃoagu.

²⁷Tita ge a ǂan sa mâǃoaxasib tsî sa ǂnîxaǃaosib tsîkha xuige. Mû, ǁnātsē ta ganupe sadu ǀkha hâ, hîa du ge ǀnai a mâǃoaxa ǃKhūb ǃoagu; matikō ǃnā hâse du kha ǁnāti nî ī ti ǁōb khaoǃgâ!

²⁸Tita tawa go ǀhaoǀhao re sadu ǃhaodi di kaigu hoaga tsî sadu di ǃoabasabega, î ta ǁîgu di ǂgaedi aiǃâ nē mîde ǃhoa, î ta ǀhommi tsî ǃhūbaib tsîkha ǁîn ǃoagu ǀhûǀguitimî-aose ū.

²⁹Tita ge a ǂan xui-ao, ti ǁōb khaoǃgâ du ǂanǂansase ǁgao tsî nîra ǁnāǁgôa ǃkhaisa ǁnā daob, tita ge mîmā duba xu; ǁnāǃnubaib ge nē ǂkhababa ǀuni tsēdi ǃnâ nîra ǃoa du, ǃKhūb mûǁae a ǂkhaba xūna du ga dīo, ǁîba du nî sadu ǃomgu di sîsenni ǀkha ǁaiǁaise.

³⁰ǃNubaib ge Moseba Israeli di ǀhaohâb hoab aiǃâ nē ǁnaetsanas di mîde ge ǃhoa ǀams kōse.