Read Khoekhoegowab Deuteronomium 32 Bible Online

Deuteronomium 32 - Khoekhoegowab bible

Deuteronomium 32

¹ǃGaoǃgâ, ǀhomgo, o ta ge nî ǃhoa, îb ǃhūbaiba ǁnâu ti ams di mîde.

²As ti ǁkhāǁkhāsa ǂnâ ǀapib khami, îs ti mîsa dâu ǀaub xase; ǁhō ra ǀapib xase ǀgâb ai tsî ǁgamxa ǀapib xase ǁhaob ai.

³Tita ge ǃKhūb di ǀonsa nî ǂgaiǂui xuige; kaikai du re sida Eloba!

⁴ǃGareǀuib ge a ǁî, sîsenni âb ge a ǀoasa. ǁÎb di daogu hoagu ge a ǂhanu xui-ao; Elob ge a ama tsî gāxaǃnâ tama, ǂhanu-aib tsî ǂhauǃnâb ge a ǁî.

⁵ǁÎn ge ǁgao hâ ǁîbǀî, ǁîb di ôa taman ge, ǁîn dis ge taotaosisa, ǁîn ge a ǂkhaba tsî gamaǃgâ ǃhao.

⁶Nēnas kha ǁnâi ǃKhūba nî dīdawa-am, gâ tsî ǁnauǃāoǃnâ ǁaese. Sa î tamab kha a ǁîb, sasa ge hōb, sasa ge dīb, sasa ge ǁapoǁapoba?

⁷ǂÂi re hugakam tsēdi xa, ǃgaoǃgâ re mâ ǃhaos hoas di kurigu ai; dî re sa îba, ǁîb ge nî ǂanǂan si, sa kaira aoga, ǁîgu ge nî mîba si.

⁸Hoan xa ǀGapib ge ǁaede ǀumi kai ǃnubai, Adammi ôanab ge ǁîba ǀgora ǃnubaib ge ǁaedi di ǀkhariga ge ǂnûi, Israeli ôan di ǀgausa ǃoa.

⁹ǃKhūb di amǃnâs a ǁîb di ǁae xui-ao, Jakob ge a ǀumis âb di tsuri.

¹⁰ǁÎbab ge ge hō ǃgaroǃhū-i ǃnâ, ǀkhaiǃnâ tsî ā ra ǃgarob ǃnâ; ǁîb ge gere ǂgaeǂguima tsî gere ǁgau bi, ǁîb ge gere ǃûi bi âutsiǂgares âb ǁkhās xase.

¹¹ǃAriǃkhās ra oms âsa ǂkhaiǂkhaikhâi, ǁîs di ôaron ai ra ǀnarema, ǁgabokha âsa ra khoraǃā, ǁîna ū tsî ǁgabokha âs ai ra tani khami,

¹²ǁnās ǁkhās khamib ge ǃKhūb ǀguiba ǁîba gere ǂgaeǂgui, tsî ǃhao elob xareb ge ǁîb ǀkha hâ tama ge hâ i.

¹³ǁÎb ge ǁîba ge ǀgapi kai ǃhūbaib di ǀgapigu ai, ob ge ǃaub di ūǀkhīna gere ǂû; tsîb ge ǁîba daniba gere ǀgom kai ǃhaoba xu tsî oliba ǃgareǀuib di ǁkhaeba xu;

¹⁴ora ǁnuiba gomade xu, tsî daiba ǀgoana xu, ǁkhaon tsî bairagu, Basanni ǃnâ ra ǃûn di kaub ǀkha tsî pirin dib tsî ǃnaidi ǃhorob didi di kaub ǀkha; tsî ǀaob ǂauxûiǂûn dib, ǃanu ǂauxûibats ge gere ā.

¹⁵Tsî Jesurunni ge kauo, ob ge gere khaoǂnā; kau tsîts ge ǃgupu, ā, kaub ǀkhats ge ǃkhûǂamhe; ǃnubaib ge ǁîba Elob, ǁîba ge kuruba ǁnāxū tsî ǃgâiǃōb âb di ǃgareǀuiba ge ǃharaxū.

¹⁶ǁÎn ge ǁîba ge tauxa kai ǃhao elogu ǀkha; ǁgaidīn ǀkhan ge ǁîba ge ǁaixa kai.

¹⁷ǁÎn ge ǁgâuaga gere ǁguiba, Eloba tama, elogu, hîan ge ǀū iga, ǀasagu, ǀgūseba xu ge hāgu, ǁîgu aiǃâ gu ge sa îga ǃhuri tama hâ iga.

¹⁸ǁNā ǃgareǀuib, satsa ge ôab, ǁîbats ge ge ǀuru; tsîts ge ge ǀuru ǁnā Elob, satsa ge ǁoraba.

¹⁹Tsî ǃKhūb ge mûo, ob ge ǁîna ge ǃharaxū, ǁaib, ǁîb ôagu tsî ǁîb ôadiǀîb ūhâba xu.

²⁰Tsîb ge ge mî: Tita ge ti aisa ǁîna xu nî gaugau; mû ta ge nî, mâs nî ǁîn di ǀam ǃkhaisa; ama ǂkhaba ǃhaos ge a ǁî, ǀgôan, ǂgomǂgomsasi-i xare-e ǁîn ǃnâ hâ tama hâna.

²¹ǁÎn ge ge ǁaixa kai te ǁnā-i, Elo tama-i ǀkha; ǁîn ge ge ǁaixa kai te ǁîn di ǁauxūn ǀkha; o ta ge tita ǁîna nî tauxa kai ǁnān, ǁae tamase ina xu, gâre ǁae-e xu ta ge tita ǁîna nî ǁaixa kai.

²²ǀAe-i ge go ǂhubi ti ǁaib ǃnâ tsî nîra khau hoan xa ǃnaga hâ ǀamo ǀaeb kōse, tsî i ge ǃhūba ūǀkhīn âb ǀkha hapu tsî nîra ǃhomgu di ǃgaoǃgaode ǂhubi.

²³Tita ge ǂkhabana ǁîn ai nîra ǂguiǂgui; ti ǂāga ta ge ǁînǀî nî ǁkhâutoa.

²⁴ǁÎn ge nîra ǃgarasa ǃâs xa, hapuhen ge nîra karbonkeltsuigu tsî au ǁōb xa; tsî ta ge ǀgurun di ǁgûga ǁîn ǁaegu nîra sî, tsarab ǃnâ ra ǀkhuri ǀaon di ǃgāb ǀkha.

²⁵ǃAugaba xub ge gôaba nîra ǀâǀhana tsî ǃnā-omdi ǃnâ ǃhurib, ǁkhāti ǂkham khoeb tsî ǁkhāti ǂkham khoes, dai ra ǀgôa-e ǀhaidana aob ǀkha.

²⁶Tita ge ge mî: ǁHôagu hoagu ǃnâ ta ga ǁîna ǀgaruǀgaru; tita ga ǂâiǂâisens âna khoen ǁaeguba xu ǀû kai,

²⁷se i ga ī tama io, khākhoeb di ǁaiba ta ra sausa, în ga ǁîn di mâǃoasabena tā ǀū khami dīsen, în tā mî: Sida di ǃommi ge ǀgapi ge i, tsî ǃKhū tamab ge ǁnāb, nēn hoana go sîsenna.

²⁸ǁÎn ge a ǁae, ǀapemāde xu ra kāǁōna, tsî ǁnâuǃā-i xare-i ge ǁîn ǃnâ hâ tama hâ.

²⁹Ae, în ga ǁnâuǃāxa, on ga ǁîsa ǂanǃā, ǀams ân ain ga ǃgaoǃgâ!

³⁰Matib kha ǀguiba ǀoadisina sauru, tsî ǀgamkha disiǀoadisina ǃhū kai ǁkhā; ǁîn di ǃgareǀuib ga ǁîna ǁamaxū tsî ǃKhūb ga ǁîna māǁnâ tama io?

³¹ǁÎn di ǃgareǀuib ge sida di ǃgareǀuib khami ī tama xui-ao, sida khākhoen ǂûn a ǂhanuǂhanu-ao.

³²ǁÎn di ǂauxûiǂûhais ge Sodoms di ǂauxûiǂûhais di tsî Gomoras ǃhanagu di xui-ao; ǁîn di ǂauxûiǂûn ge a ǃgāxa ǂû, ǁîn ge au ǂûna ūhâ.

³³ǁÎn di ǂauxûib ge a ǀaexa ǀaoǃgā tsî a ǃaoǃaosa ǃgaenǃgā.

³⁴Nēsa tita tawa sâusa tama hâ, ǂganǂamsa tamas hâ ti ǁuigu ǃnâ?

³⁵ǀKhaob tsî mādawa-ams tsîra ge a ti, ǁîn di ǂais ra ǁnope tsēs ai; kāǁōtsēs ân ge a ǀgū, tsî ǁnā xūn, ǁîn ǂama nîra hān ra ǃhae.

³⁶ǃKhūb ge ǁaes âba nîra ǂhanudība, tsîb ge ǃgāgu âb xa nîra ǃhausen; ǁîb ge nîra mû xui-ao, ǃommi ân go bē ǃkhaisa tsî ǂganamhe hâ tsî ǁnāxūhe hâ-i a ǀkhai ǃkhaisa.

³⁷ǃNubaib ge ǁîba nîra mî: Mapa gu hâ ǁîn di eloga, ǃgareǀuib, ǁîb ain ge ǂgomaiǂnûiba,

³⁸ǁîgu di ǂāǁguibadi di kauba ǂû tsîn ǁîgu di ǂnâǁguibadi di ǂauxûiba gere āga? A gu khâi î gu hui du, î du sâuhe.

³⁹Kō nēsi, tita, tita a ǁî ǃkhaisa tsî ǀnî elo-i tita xōǀkhā hâ tama hâ ǃkhaisa. Tita ge ǃgam tsî ra ûi-ûi, tita ge ǂnauǂkhūǂkhū tsî ra ǂuruǂuru, tsî khoe-i, ti ǃomǁaeba xu a ore ǁkhā-i ge a ǀkhai.

⁴⁰Ti ǃomma ta ǀhommiǀî ǀhōǃapa tsî nîra mî xui-ao: Tita ge a ûitsama ǀamosib kōse.

⁴¹Tita ga ti ǂkhaisa gôaba ǀāǀā tsî ti ǃommi ga ǂhanuba ǃkhō-o, o ta ge tita ǀkhaoba ti mâǃoasaben ai nîra oa kai tsî ti ǁkhansabena nîra mādawa-am.

⁴²O ta ge ti ǂāga nîra ākhanu kai ǀaob ǃnâ, tsî ti gôab ge ǁgansa nîra ǂû: ǂNauǃanhe hâb tsî ǃkhōsab di ǀaob xa, ǀûdanasa xu di ge khākhoeb di ǀkhaode nîra hâ.

⁴³Dâ, ǀūbedo, ǁaes âb ǀkha! ǁÎb ge ǃgāgu âb di ǀaoba nîra ǀkhao xuige; tsî ǁîb ge ǀkhaoba mâǃoasaben âb ai nîra oa kai, tsî ǃhūb tsî ǁaes âba nîra ǂkhîbagu kai.

⁴⁴Tsî Moseb ge hā tsî gere ǃhoa nē ǁnaetsanas di mîdi hoade ǁaes di ǂgaedi aiǃâ, ǁîb tsî Josuab, Nunni ôab tsîkha.

⁴⁵Tsî Moseb ge nē mîdi hoade Israeli hoab ǃoa ǃhoatoao,

⁴⁶ob ge ǁîn ǃoa ge mî: ǃGaoǃgâ nē mîdi, nētsē ta sadu ǃnâ ra ǀhûǀguitimîdi ai, î du ǁîde sadu di ôana mîmā, ǂan tsîn nî dīga nē ǂhanub di mîdi hoade.

⁴⁷Nē mîs ge sado ǁau mî tamase ība, tsîs ge a sadu di ûi; tsî nē mîs ǁkhāsa xu du ge ûiba nîra ǃnūǃnū ǁnā ǃhūb, ǁîb ǃoa du ge Jordanna-ū ǀumi bi du nîga ǃgûb ǃnâ.

⁴⁸ǁNās khaoǃgâb ge ǃKhūba ǁnā tsēs ǁkhās ai Moseb ǀkha ǃhoa tsî ge mî:

⁴⁹ǃApa Abarimǃhommi ai (Neboǃhommi ge ǁîb, Moabǃhūb ǃnâ hâb, Jerixos ǃoa-ai ǁgoeba) îts Kanaanǃhūb, Israeli ôana ta ǁîsise nîra māba kō;

⁵⁰îts ǁnā ǃhommi, ǁîbats nî ǃapab ai ǁō, îts sa ǁaedi tawa ǀhaoǀhaosen; sa ǃgâsab Aronni ge Horǃhommi ai ǁō tsî ǁaedi âb tawa ǀhaoǀhaosen khami.

⁵¹Tita ǃoagu kho ge dīsā ǃkhais ǃaroma Israeli ôan ǁaegu ǂnoagu ǁgammi Kades dib tawa ǃgaroǃhūb Sinni ǃnâ; tita kho ge Israeli ôan di ǁaegub ǃnâ khai tama i amaga.

⁵²Sa ǃoa-aits ge ǁnā ǃhūba nîra mû, xawets ge ǁîb ǃnâ sī tide, ǁnā ǃhūb, Israeli ôana ta nîra māb ǃnâ.