Read Khoekhoegowab Deuteronomium 33 Bible Online

Deuteronomium 33 - Khoekhoegowab bible

Deuteronomium 33

¹Tsî nēb ge ǀkhaeb, ǁîb ǀkhab ge Moseb, Elob aoba, Israeli ôana ǀkhaeba, ǁōb âb aiǃâ.

²ǁÎb ge ge mî: ǃKhūb ge Sinaiba xu ge hā, tsîb ge ge ǀkhī Seira xu; ǁîb ge ǂkhaisase ge ǁhai ǃhommi Paranna xu; tsîb ge disiǀoadisin ǃanun din ǀkha ge hā; amǀkhāb ǃommi âb ǀkha i ge ǀaexa ǂhanu-e ǁîna ge hâba i.

³Aio, ǁîb ge ǁaede ǀnam hâ, ǁîb di ǃanun hoan ge sa ǃomǁae hâ; ǁîn ge sa ǂaira ǁaegu nîra ǂnûihe; mâ-i hoa-i ge sa mîdi xa nîra ǃkhōǃoa.

⁴Moseb ge ǂhanuba ge mîmā da, ǀumi-amǃnâs Jakob ǀhaohâb disa;

⁵ǁîb ge a gao-ao Jesurunni ǃnâ, danakhoegu ǁaes digu ge ǀhû ǃnubai Israeli di ǃhaodi ǀkha.

⁶Ab Rubenna ûi, îb tā ǁō, în khoen âba ǀgauxa.

⁷Nēs ge Judab dis, nētib ge mîsa: ǁNâu, ǃKhūtse, Judab di domma, îts ǁîba ǁkhawa ǁaes âb ǃoa ūhā; ǁîb di ǃomkha ge ǁîba nî ǂâuba, îts satsa huise ība bi, khākhoen âb ǃoagu.

⁸Tsî Levib xab ge ge mî: Sa Tumims tsî sa Urims (ǃnâb tsî ǂhanub) tsîra a ra sa khoeb ǀkhomxaheb di kai; ǁnāb, Masas tawats ge ǃâitsâb, Meribas di ǁgamgu tawats ge ǂnoagu-ūb,

⁹ǁgûb tsî ǁgûs tsîra ǃoa ge mîba: Tita ge mû bi tama hâ; tsî ǃgâsagu âba ǀū ge ib tsî ǁîb di ôaga ge sorab, sa mîsan ge sâu tsî ǃgaeǀhaosan ge ǃûi amaga.

¹⁰ǁÎn ge Jakoba sa ǂhanusiga nîra ǁkhāǁkhā tsî Israela sa ǂhanuba; ǁîn ge ǀanǀanxūna nîra ǁgui sa ǂguis ǃnâ tsî ǀoasa khauǁguibade sa altars ai.

¹¹ǀKhae re, ǃKhūtse, ūb hâ xūna, îts ǃgâibahe ǃomgu âb di sîsenni xa; ǂnauǂkhūǂkhū kamanagu ǁnān, ǁîb ǃoagu khâi tsî ra ǁkhan bin diga, ǁkhawan nî khâi ǁoas kōse.

¹²Tsî Benjaminni xab ge ge mî: ǀNamǀnamsab ǃKhūb dib, ǁîb ge sâusase ǁîb tawa nîra ǁan; ǁîb ge hoaraga tsēsa ǁîba nîra ǃgū-aiǂam, tsî ǁîb di ǃhōra ǁaegub ge nîra ǁan.

¹³Tsî Joseb xab ge ge mî: ǁÎb di ǃhūb ge ǃKhūb xa ǀkhaehe hâba ǀhommi di ǀgapiǃgôasan ǀkha, ǀaub ǀkha tsî ǃgamsib ǃnaga hâb tsîn din ǀkha,

¹⁴tsî ǀgapiǃgôasa ūǀkhīn sores din ǀkha, tsî ǀgapiǃgôasa ūǀkhīn ǁkhâb din ǀkha;

¹⁵tsî ǃgomǀgausan kaira ǃhomgu din ǀkha, tsî ǀgapiǃgôasan ǀamo ǃnomdi din ǀkha;

¹⁶tsî ǀgapiǃgôasan ǃhūbaib tsî ǁîb di ǀoasib din ǀkha, tsî ǀkhomxasib ǁnāb, ǁkhūs ǃnâ ge ǁan hâ ib diba ab hā Joseb di danas ai, danaǂkhōs ǃgâsagu âb ǃnâ khaihe hâb dis ai.

¹⁷ǁÎb ge ǂkhaisib, ǁîb di gomab di ǂguroǃnaesabeb diba ūhâ tsî ǁîb di ǁnâgu ge a ǀgui ǁnâb â-ib di ǁnâ; ǁîgu ǃgarogomab ge ǁaede nîra ǃkhākākā ǃhūb di ǀams kōse. Nēn ge disiǀoadisin Efraimmi dina, tsî nēn ge ǀoadisin Manaseb dina.

¹⁸Tsî Sebulonni xab ge ge mî: Dâ, Sebulontse, sa doeǂoas xa, tsî Isaskartse, sa tentomdi xa.

¹⁹ǁÎn ge ǁaede ǃhommi ǃoa nîra ǂgai; ǁnāpan ge ǁguibadi ǂhanu-aisib dide nîra ǁguiba; hurigu di ǃnāǂamsasin ge nîra ǀgom xui-ao tsî ǂganǃgâsa xūn ǀgopab dina.

²⁰Tsî Gadi xab ge ge mî: ǀKhaehesab ge ǁnāb, Gada hara ǃkhai-e ra dībaba; ǁîb ge kaira xammi xase ǁan hâ, tsîb ra ǁôaba ǀkhauǃā tsî danaǂkhōs ona.

²¹Tsîb ge ǂguro ǃâsa ge ǂhomibasen, ǁnāpa ǂhanumā-aob di amǃnâs ǃnâb sâuhe hâ amaga; ǁnā-amagab ge ǁaes di danakhoegu ǀkha ge hā, ǁîb ge ǂhanu-aisib ǃKhūb diba ge dī, tsî ǀgoraǃgâdi âba Israeli tawa.

²²Tsî Danni xab ge ge mî: Danni ge ǂkham xamma; ǁîb ge Basanna xus a khami ra uriǂoa.

²³Tsî Naftalib xab ge ge mî: Naftalitse, ǁâ ǀkhomxasib xa îts ǀoa ǃKhūb di ǀkhaeb ǀkha; ǀumise ūhâ huriǂoasǀkhāb tsî aiǂoasǀkhāb tsîkha.

²⁴Tsî Aseri xab ge ge mî: Asera ab ǀkhaehe ǀgôagu ǀkha; îb ǁîb di ǃgâsaga ǃgâiba, îb ǂais âba olib ǃnâ ǂgā.

²⁵ǂNūǀurib tsî ǂaib tsîkha ge sa ǁharos ǃnaga nîra hâ, îb ǀgaib âtsa sa tsēdi khami ī.

²⁶ǀGuib xareb ge Elob khami ī tama, Jesuruntse, ǀhommi ai ra ǃnarib, hui tsi nîse, tsî ǀgapisib âb ǀkha ǀgapise ǀnanudi ai hâba.

²⁷Ab ǀamo Eloba satsa hâǃkhaise ība tsî ǃnagaba xu ǀamo ǁôase; îb ǁîba khākhoeba sa ais aiǃâba xu doeǁgabē îb: Hîǀhuru, ti mî.

²⁸Ab Israela sâusase ǀguri ǁan, îs Jakob di mûsa ǃhoroxa tsî ǂkhon ǂauxûixa ǃhūb ai kō; ā, ab ǀhommi âba ǀaub xa ǂnâ.

²⁹ǃGâiǃōts ge sats Israeltsa; tari-e sats khami ī? ǁAets ge satsa, ǃKhūb xa ge orehetsa, ǁîb sa huib di khōsikhōb tsî sa ǀgapisib di gôaba; ǁnā-amagan ge sa khākhoena hînaxaǃnâse sats ǃnaga nîra māsen, tsî sats ge ǁîn di ǀgapigu ai nîra dā.