Read Khoekhoegowab Deuteronomium 4 Bible Online

Deuteronomium 4 - Khoekhoegowab bible

Deuteronomium 4

¹ǁNâu ǁnâi, Israeltse, ǁnā ǂnûiǂgādi tsî ǁnā ǂhanugu tsîn, dī du nîse ta ra ǁkhāǁkhā duna; î du ûi î du sī, î du ǁnā ǃhūb, ǃKhūb, sadu îgu Elob ra mā duba ǀumi.

²Sadu ge nē mîs, sado ta ra mîmāsa dīǀaro tide tsî ǁkhāti dīǁnâ tide, î du ǃKhūb, sadu Elob di mîmādi hîa ta ra mîmā dude ǃkhōǀgaipe.

³Sadu di mûdi ge ge mû, Baal-Peori tawab ge Eloba dīna; mâ khoeb hoab Baal-Peora ge saobab ge ǃKhūb, sadu Eloba sadu ǁaeguba xu ge hîkākā.

⁴Xawe sadu, ǃKhūb sadu Eloba ge ǂae-ai du ge nētsē hoatsama a ûitsama.

⁵Mû, tita ge sado ge ǁkhāǁkhā ǂnûiǂgādi tsî ǂhanugu tsîna, ǃKhūb, ti Elob ge mîmā te khami, î du ǁnāti dī ǁnā ǃhūb, ǁîb ǃoa du ra ǃgûb ǁaegu, ǁîba du nî ǀumise.

⁶ǁÎna ǁnâi ǂan î du ǁîna dī, nēb ge sadu di gā-aisi tsî sadu di ǁnâuǃā nî ī, ǁnā ǁaedi, nē ǂnûiǂgādi tsî ǂhanugu tsîna nî ǁnâudi tsî: Nē kai ǁaes ǀguis ge a gā-ai tsî ǁnâuǃāxa ǁae, ti nî mîdi di mûdi aiǃâ.

⁷Mâ kai ǁaesa kha ǁnâi hâ, elogu ǁnāti ǁîsa ǀgū hâsa, ǃKhūb, sada Elob ī khami, ǁîba da ra ǂgaiǀî ǃnās hoas ai?

⁸Tsî mâ kai ǁaesa kha ǁnâi hâ, ǁnāti ī, ǂhanu-ai ǂnûiǂgādi tsî ǂhanugu tsîna ūhâsa, nē ǂhanub hoab, nētsē ta sadu di ais aiǃâ nî māb ī khami?

⁹ǂAnbasens ǀguisa hî, îts sa ǀomsa ǃgâise sâu, îts ǁnā xūn, sa mûdi ge mûna, tā ǀuru, în tā ǂgō ǂgaob âtsa xu sa ûitsēdi hoadi kōse; tsîts ge ǁîna sa ôan tsî sa ôan di ôana nî ǂanǂan.

¹⁰ǁNātsē, ǃKhūb, sa Elob di ais aiǃâts ge mâo Horeb tawa, ǃKhūb ge tita ǃoa mîo: Nē ǁaesa ǀhaoǀhaoba te, o ta ge ǁîna ti mîde nî ǁnâu kai, ǁîn nî ǁkhāǁkhāsende, titan nî ǃaoga, ǃhūbaib ain nî ûi tsēdi hoade, tsîn ge ǁîde ǁîn di ôana nî ǁkhāǁkhā.

¹¹Tsî dāǀgū tsî du ge ǃhommi tawa mâo; tsî ǃhommi ge ǀaes xa ge khau ǀhommi di ǁaegub kōse, ǃkhaeb, ǀnanudi tsî ǃkhaenab tsîn ge ge hâ i

¹²Ob ge ǃKhūba sadu ǃoa ǀaes di ǁaeguba xu gere ǃhoa; dommi mîdi diba du ge ǁnâu, xawe du ge īsi-e mû tama ge i, dommi ǀguib ge ge hâ i.

¹³ǃNubaib ge ǁîba ǁîb di ǃgaeǀhaos, dī du nîseb ge mîmā dusa ge ǂhôa du, ǁnā disi mîmāde, tsîb ge ǁîde ǀgam ǀuixoa-aixūra ai ge xoa.

¹⁴ǁKhātib ge ǃKhūba tita ǁnā ǁaeb ǁkhāb ai ge mîmā, ǂnûiǂgādi tsî ǂhanugu tsîna ta nî ǁkhāǁkhā du ǃkhaisa, ǁîna du nî dīse ǁnā ǃhūb, ǁîb ǃoa du ǀumi bi du nîga ra doeb ǃnâ.

¹⁵ǁNâi ǃgâise ǂanbasen sadu di ǀomdi ǂama: Ī-i xare-e du ge mû tama ge i xui-ao, ǃKhūb ge Horeb ai ǀaes ǁaeguba xu ǃhoaǀî du ǃnubai,

¹⁶î du tā ǁgaoǁgaosen, î du ǃgaoǂuihesa ī-e tā dībasen, mâ ī-i hoa-i di-e: Aob di ī-i kas taras di-i kas;

¹⁷ǀguru-i hoa-i, ǃhūbaib ai hâ-i di ī-i kas, ǁgaboxa ani-i hoa-i ǀhommi ǃnâ ra ǁkhana-i di ī-i kas;

¹⁸xū-i ǃhūb ai ra ǂhana-i hoa-i di ī-i kas; ǁau-i hoa-i, ǁgammi ǃnâ ǃhūb ǃnaga hâ-i di ī-i kas hoasa.

¹⁹Î du ǁkhāti tā ǃgapakhâi ǀhommiǀî, î du tā kōǀî sores, ǁkhâb tsî ǀgamiron tsîna; ǀhommi di ǂnubis hoasa, î du tā doeǁgarihe, ǁîn aiǃâ ǃhon tsî du nî ǁîna ǃoabaga; ǁîn, ǃKhūb sadu di Elob ge ǁaedi, ǀhommi ǃnaga hâdi hoadi tawa ǀgoraǂuina.

²⁰Xawe sadob ge ǃKhūba ǃkhōǃoa tsî ǂnūǀuri ǁganoms Egipteb disa xu ge ǂgaeǂguiǂui; ǁîba du nî ǀumiǁaese ībaga, nē tsēs ai ǁkhāti ī xase.

²¹ǁKhātib ge ǃKhūba ti ai ge ǁaixa sadu di mîdi ǃaroma; tsîb ge ǁîba ge nū, Jordanna ta ǃgâu tide tsî ǁnā ǃgâi ǃhūb, ǃKhūb, sadu Elob nî ǀumise mā dub ǃnâ ta sī tide, ti.

²²O ta ge tita nē ǃhūb ǃnâ nî ǁō, tita ge Jordanna ǃgâu tide; xawe sadu ge ǃgâu tsî nî ǁnā ǃgâi ǃhūba ǀumi.

²³ǂAnbasen î du ǃgaeǀhaos, ǃKhūb, sadu Elob dis, sadu ǀkhab ge dīsa tā ǀuru, î du ǃgaoǂuihesa ī-e tā dībasen, ǁnā xū-i, ǃKhūb sadu Elob ge ǃkhâi du-i di ī-e.

²⁴ǃKhūb sadu Elob ge a khauǃkhū ra ǀae, tauxa Elob a ǁî xuige.

²⁵ǀGôan tsî ǀgôan di ôana du ga ǁnâi hō-o, tsî ǃhūb ǃnâ du ga kairao, tsî ǁgao tsî du ga ǃgaoǂuihesa īga dībaseno, xū-i di ība, tsî ǃKhūb, sadu Elob mûǁae a ǂkhaba xū-e du ga dīo, ǁîba du nî ǁaib ǁga ǂoeǂoese,

²⁶o ta ge tita nētsē ǀhommi tsî ǃhūbaib tsîkha ǀhûǀguitimî-aose sadu ǃoagu ra ǂgaikhâi, ama ǃhaese du nî ǁnā ǃhūb ǁîb ǃoa du Jordanna-ū, ǀumi bi nîse, doeǃgâuba xu kā ǃkhaisa; sadu di tsēde du ge ǁîb ǃnâ ǃnūǃnū tide, tsî du ge hoaragase nî hîkākāhe.

²⁷Tsî ǃKhūb ge sado ǁaedi ǃnâ nîra ǀgaruǀgaru; tsî du ge ǂkhari ǀgaus â-i ǁaerose nîra ǃgau ǁnā ǀūben, ǁîn ǃoab nî ǃKhūba ǂgaeǂguisī dun ǃnâ.

²⁸Tsî du ge ǁnāpa eloga nî ǃoaba, khoen ǃomgu di sîsenaiga, haigu tsî ǀuigu, mû ǁoa, ǁnâu ǁoa, ǂû ǁoa tsî ǃkhapa ǁoaga.

²⁹Xawe ǁnāpa xu du ga ǃKhūb, sadu Eloba ôao, o du ge nîra hō bi, ǁîba du ga sadu di ǂgaob hoab ǀkha tsî sadu di ǀoms hoas ǀkha ôao.

³⁰ǂŌǂōsib ǃnâ du ga hâo tsî nē xūn hoan xa du ga hāǂamheo, o du ge ǀuni tsēdi ai ǃKhūb, sadu Elob ǃoa oa tsî nîra dommi âba ǁnâuǀnam.

³¹ǃKhūb sadu Elob ge a ǀkhomxaǂgao Elo xui-ao; ǁîb ge ǁnāxū du tide tsî ǁkhāti hîkākā du tide; ǁîb ge sadu îgu di ǃgaeǀhaos, ǁîgab ge nūbasa ǀuru tide.

³²Dîǃgâ re aibegam tsēdi, sadu aiǃâ ge hâ ide, ǁnā tsēs, ǁîs aib ge Eloba khoeba ǃhūbaib ai kurusa xu ǀhommi di nē ǀkhāba xu ǀhommi di nau ǀkhāb kōse, ise i ge ǁnāti ī kai xū-e ī tsî ǁnâuhe ǃkhaisa, nē-i khami:

³³Ise i ǁnā ǁae-i, Elob di domma ga ǁnâu-e ǀaes di ǁaeguba xu ra ǃhoaǃâ, sadu ge ǁnâu khami, nî ûi ǃkhaisa?

³⁴Tsî iseb Eloba dītsâ tsî ǁaesa xu ǁae-e ge ūbasen ǃkhaisa ǃâitsâde xu, saode xu, buruxa dīna xu, ǃkhamsa xu, ǀgaisa ǃomma xu, ǀhōǂuihesa ǁôaba xu tsî kai ǃhuride xu, ǃKhūb sadu Elob ge sadu di mûdi aiǃâ Egipteb ǃnâ sadu tawa gere dīs xase?

³⁵Sadu ge ǁgauhe hâ, ǂan du nîga, ǃKhūb a ǁnā Elo ǃkhaisa; ǀnîb ge a ǀkhai, ǁîb ǀguib.

³⁶ǀHomma xub ge dommi âba ge ǁnâu kai du, sadob nî ǁgause; tsî ǃhūbaib aib ge kai ǀaes âba ge mû kai du, tsî du ge mîdi âba ǀaes di ǁaeguba xu gere ǁnâu.

³⁷Tsî sadu di îgab ge ǀnam tsî surib âgab ge ǁîgu khaoǃgâ ǃkhōǂuibasen amagab ge sado ais âb aiǃâ kai ǀgaib âb ǀkha Egipteba xu ge ǂgaeǂguiǂui,

³⁸ǁaedi sadu xa kai tsî ǀgaisa ge ideb nî sadu di ais aiǃâ ūn hâna xu doeǁgaǂuiga; sadob nî ūǂgāse, îb ga ǁîn di ǃhūba ǀumise mā du ti, nētsē ī khami.

³⁹O du ge nētsē nî ǂan tsî sadu di ǂgaob ǃnâ nî ǂâiǂâisen, ǃKhūb a ǁnā Elo ǃkhaisa, ǀgapise ǀhommi ǃnâs kas, ǃnaga ǃhūbaib ais kas hoasa; ǀnîb ge a ǀkhai.

⁴⁰Tsî du ge nî ǃkhōǀgaipe ǁîb di ǂnûiǂgādi tsî ǁîb di mîmādi, nētsē ta ra mîmā dude, î du sadu tsî sadu ôana sadu khaoǃgâ ǃgâibahe, î du sadu di tsēde ǃnūǃnūbahe ǁnā ǃhūb, ǃKhūb, sadu Elob ra mā dub ǃnâ, ǀamos kōse.

⁴¹ǃNubaib ge Moseba ǃnona ǃāde ge ǁkhaeǂui, Jordanǃāb nauǃanib ai, sores ra ǁhai ǀkhāb ai,

⁴²ǃgamaob ǀgūkhoe-i, ǁari tsî aetsēsa xub ǁkhan tama-i âba ǁgapadommi ai ga ǂnauǃanni nî ǁnāǀî ǁhâga; îb ga nē ǃādi di ǀguis ǃnâ ǁhâsī, îb ga ûi ti:

⁴³Besers ǃgaroǃhūb ǃnâ, ǂhaba ǃhūb ǃnâ, Rubenǁîn dise; tsî Ramots Gileadi ǃnâ, Gadǁîn dise; tsî Golans Basanni ǃnâ, Manaseǁîn dise.

⁴⁴Nēb ge ǁnā ǂhanub, Moseb ge Israeli ôana mâi-aiǃâba.

⁴⁵Nēn ge ǃkhō-amdi tsî ǂnûiǂgādi tsî ǂhanugu tsîn, Moseb ge Israeli ôan ǃoa ǃhoana, Egipteba xun ge doeǂoao,

⁴⁶Jordanǃāb nēxaǃani, ǃgoaǃnāb Bet-Peors ǃoa-ai ǁgoeb ǃnâ, Sihonni, Amorǁîn di gao-aob, Hesbons tawa ge ǁanni di ǃhūb ǃnâ; ǁîban ge Moseb tsî Israeli ôana ge ǂnau, Egipteba xun ge doeǂoao,

⁴⁷tsî ǃhūb âban ge ǁîsise ūo; tsî ǁnāb tawa Ogi, Basanni gao-aob di ǃhūba, ǀgam gao-aokha, Amorǁîn dikha, Jordanǃāb nēxaǃanib ai gere hâkha, sores ra ǁhaiǀî;

⁴⁸Aroers, ǃārob Arnonni amǃgâ ǁgoesa xu ǃhommi Sionni, Hermonni kōse;

⁴⁹tsî ǂhaba ǃhūb hoab Jordanǃāb nēxaǃanib ai aiǂoasǀî, ǂGās di Hurib kōse, Pisgas ǃnaga.