Read Khoekhoegowab Deuteronomium 5 Bible Online

Deuteronomium 5 - Khoekhoegowab bible

Deuteronomium 5

¹Tsî Moseb ge Israeli hoaba ǂgai tsî ǁîna ge mîba: ǁNâu, Israeltse, ǂnûiǂgādi tsî ǂhanugu tsîn, nētsē ta sadu ǂgaedi ǃnâ ra ǃhoana, î du ǁkhāǁkhāsen, î du ǂan, î du ǁîna dī.

²ǃKhūb, sada Elob ge ǃgaeǀhao-e sada ǀkha ge dī, Horeb tawa.

³Sada îgu ǀkhab ge ǃKhūba nē ǃgaeǀhaosa dī tama, tsîb ge sada ǀkha ge dī, sada, nētsē nēpa ûitsamase hâda hoada ǀkha.

⁴Aisa xu aisa ǃoab ge ǃKhūba sadu ǀkha ǃhommi ai ge ǃhoa, ǀaes di ǁaeguba xu.

⁵Tita ge ǁnā ǁaeb ai ǃKhūb tsî sadu ǁaegu ge mâ i, ǃKhūb mîsa ta nî mîba duse, ǀaesa ǃao tsî du ge ǃhommi ai ǃapa tama i xui-ao, mî raǃâ:

⁶Tita ge ǃKhūta sa Elota, Egipteǃhūb, ǁnā khobosis omma xu ge ǂgaeǂguiǂui tsi ta.

⁷ǀKhara elogats ge ti aiǃâ ūhâ tide.

⁸ǃGaoǂuihesa ī-i kas, ǀnî ī-i kas hoasats ge dībasen tide, ǀgapise ǀhommi ǃnâ hân di-i kas, ǃnaga ǃhūbaib ai hân di-i kas, ǃhūbaib ǃnaga ǁgam-i ǃnâ hân di-i kas;

⁹ǁîn aiǃâts ge ǃhonǁgoa tsî ǁîna ǃoaba tide; tita ǃKhūta sa Elota ge tauxa Elota, ǁgûgu di ǁorena ra ôaǃnâ ta ǀgôan tawa, ǃnonaǁî tsî hakaǁî ǃhaos kōse, tita ǁkhan hân disa;

¹⁰tsî ta ge ǀkhomxaǂgaosiba ra dī ǂgui ǀoadisin, tita ǀnam hân tsî ti mîmāde ra dīn tawa.

¹¹ǃKhūb, sa Elob ǀonsats ge ǁause ǂgaiǀhuru tide: ǃKhūb ǁnān, ǀons âba ǁause ra ǂgaiǀhuruna ǀhapiose ūhâ tide xui-ao.

¹²Sâtsēs xa ǂâi îts ǁîsa khai, ǃKhūb, sa Elob ge mîmā tsi khami.

¹³ǃNani tsēdets ge sîsen tsî nî dīxūn âts hoana dī;

¹⁴xawe hûǁî tsēs ge a ǃKhūb, sa Elob di sâtsē; ǁîs aits ge sîsen-i xare-e dī tide, sats karao, sa ôab karao, sa ôas karao, sa ǃgāb karao, sa ǃgās karao, sa ǀgoa-i karao, sa ǃhaokhoe-i sa ǁāgu ǃnâ hâ-i karao; î ra sa ǃgāb tsî sa ǃgās tsîra sâ, sats ǁkhāts xase.

¹⁵Sats nî ǂâi xui-ao, Egipteǃhūb ǃnâts ge ǃgā i ǃkhaisa, tsî ǃKhūb, sa Elob ge ǁnāpa xu ǀgaisa ǃommi tsî ǀhōǂuihesa ǁôab ǀkha ǂgaeǂguiǂui tsi ǃkhaisa; ǁnā-amagab ge ǃKhūb, sa Eloba ge mîmā, sâtsēsats nî khai ǃkhaisa.

¹⁶Saob tsî saos tsîrats ge nî ǃgôa, ǃKhūb, sa Elob ge mîmā tsi xase, î di sa tsēde ǃnūǃnūhe, îts ǃgâibahe ǃKhūb, sa Elob nî mā tsi ǃhūb ǃnâ.

¹⁷ǃGamts ge tide.

¹⁸ǃGamebats ge khôa tide.

¹⁹ǃNarits ge tide.

²⁰ǂKhabasets ge sa ǀgūkhoeba ǂgā-am tide.

²¹Tsîts ge sa ǀgūkhoeb tarasa tura tide; tsîts ge sa ǀgūkhoeb omma tura tide tsî ǁîb ǃhanab kas, ǁîb ǃgāb kas, ǁîb ǃgās kas, ǁîb gomab kas, ǁîb eseli kas tsî ǀnî xū-i sa ǀgūkhoeb di-i kas hoasa.

²²Nē mîdeb ge ǃKhūba sa ǀhaohâb hoab ǃoa ǃhommi ai ge ǃhoa ǀaes, ǀnanus tsî ǃkhaenas di ǁaeguba xu kai dommi ǀkha, tsîb ge xū-e ǀaro tama hâ; tsîb ge ǁîde ǀgam ǀuixoa-aidara ai xoa tsî ǁîra tita ge mā.

²³Tsî i ge ge ī, sadu ge ǁnā domma ǃkhaenas di ǁaeguba xu ǁnâuo tsî ǃhommi ge ǀaes xa khauo, o du ge tita ge ǀgū sadu ǃhaodi di danakhoegu hoagu tsî sadu kaiga.

²⁴Tsî du ge ge mî: Kō, ǃKhūb, sada Elob ge ǁîb di ǂkhaisib tsî ǁîb di kaisib tsîkha go mû kai da, tsî da ge dommi âba ǀaes ǁaeguba xu goro ǁnâu; nētsē da ge go mû, Elob ra khoeb ǀkha ǃhoa, xaweb ra ûi ǃkhaisa.

²⁵Xawe tare xū-i ǃaroma da kha ǁnâi nî ǁō? Nē kai ǀaes kom nî hapu dao; ǃaruǀîǀgui da ga ǃKhūb, sada Elob di domma ǁnâuo, o da kom nî ǁō-o.

²⁶Mâ khoe-e hâ ǁgans hoas ǃnâ, ûitsama Eloba ǀaes ǁaeguba xu ra ǃhoase sada khami ǁnâu tsî ga ûitsamase hâ-e?

²⁷ǀGū îts satsa ǁnâu, ǃKhūb, sada Elob nî mî xūn hoana, îts ǃKhūb, sada Elob nî mîmā tsin hoana sida ǃoa ǃhoa, o da ge sida ǁîna ǁnâu tsî nî dī.

²⁸Tsî ǃKhūb ge sadu mîdi di domma ǁnâuo, tita ǀkha du ra ǃhoa hîa, ob ge ǃKhūba tita ǃoa ge mî: Tita ge dommi nē ǁaes di mîdi, tita ǃoan goro ǃhoadi diba go ǁnâu: Mîn go xūn hoan ge a ǃgâi.

²⁹În ga nēti ī ǂgaoba ūhâ, titan nî ǃaos kōse, în ga ti mîmādi hoade mâ ǁaeb hoab ai ǃkhōǀgaipe; ǁîn tsî ǁîn di ôan nî ǃgâibahega ǀamosib ǃnâ.

³⁰ǃGû î ǁîna mîba: Oa sadu di tentomdi ǃoa!

³¹Xawe satsa mâ nēpa, tita tawa, î ta sa ǃoa ǃhoa ǁnā mîmādi, ǂnûiǂgādi tsî ǂhanugu tsîn, sats nî ǁîna ǁkhāǁkhān, ǁînan nî dīse, ǁnā ǃhūb, tita nî ǁîna ǀumin nîse māb ǃnâ.

³²ǂAn ǁnâi î du dī, ǃKhūb, sadu Elob ge mîmā du xase; î du tā ǂgō, amǀkhāb ǁôab ais kao, ǁareǀkhāb ǁôab ais kao.

³³ǁNā daob, ǃKhūb sadu Elob nî mîmā dub hoab ǃnâ du ge nî ǃgû, ûi du nîga tsî ǃgâibahe du nîga, tsî sadu tsēde du nî ǃnūǃnūbasenga ǁnā ǃhūb, ǁîba du nî ǀumib ǃnâ!