Read Khoekhoegowab Deuteronomium 6 Bible Online

Deuteronomium 6 - Khoekhoegowab bible

Deuteronomium 6

¹Nēn ge mîmādi tsî ǂnûiǂgādi tsî ǂhanugu tsîn, ǃKhūb sadu Elob ge ǁkhāǁkhāhe du nîga mîmāna, ǁîna du nî dīse ǁnā ǃhūb ǃnâ, ǁîb ǃoa du ra doeba, ǀumise du nî ūhâ biga,

²ǃKhūb, sadu Eloba ǃao tsî du nî dīse ǁîb di ǂnûiǂgādi tsî ǁîb di mîmādi, nētsē ta ra mîmā dudi hoade, sats tsî sa ôab tsî sa ôab di ôab tsîna, sa ûitsēdi hoadi kōse; î di sa tsēde ǃnūǃnūhe, ti.

³ǁNâu ǁnâi Israeltse, ǂan, îts ǁîna dī, îts ǃgâibahe, îts kaise ǂguiǂguihe, ǃKhūb, sa îgu Elob ge sa ǁga ǃhoa xase, ǁnā ǃhūb, daib tsî danib tsîkha ra dâuǃnâb ǃnâ.

⁴ǁNâu, Israeltse, ǃKhūb sa Elob ge a ǀgui ǃKhū ǃkhaisa.

⁵Ots ge ǃKhūb, sa Eloba nî ǀnam sa ǂgaob hoab ǀkha, sa ǀoms hoas ǀkha tsî sa ǁkhāsib hoab ǀkha.

⁶Tsî nē mîdi nētsē ta ra mîmā tsidi, ǁîdi ge sa ǂgaob ǃnâ nî hâ.

⁷Tsîts ge ǁîde sa ôana nî ǁkhāǁkhāǀāǀā tsî ǁîdi xa nî ǃhoa, ommi ǃnâts ga ǂnûo tsî daob aits ga ǃgûo, ǁgoe tsîts ga khâio.

⁸Tsîts ge ǁîde ǁkhāti saose sa ǃommi ai nî ǃgae, tsî di ge ǃūs di î-î xūse sa mûra ǁaegu nî ība tsi.

⁹Tsîts ge ǁîde dao-amdi haigu sa ommi digu ai tsî sa ǁāgu ai nî xoa.

¹⁰Tsî ī-i kao, ǃKhūb sa Elob nî ǁnā ǃhūb ǃnâ ūǂgâ tsi ǃkhaisa, ǁîb ge sa îgu Abrahammi, Isaki tsî Jakob tsîga nūbab, satsab nî mā biga, kai tsî ǃgâi ǃādi, sats ǂnubi tamadi,

¹¹tsî omdi, ǃgâi xūn hoan ǀkha ǀoa hâdi, sats ǀoaǀoa tamade, tsî xorahe hâ tsaudi, sats xora tama hâde, ǂauxûiǂûhaidi tsî ǀkherahaidi, sats ǂgā tamade; tsî du ga ǂû tsî ǁâo,

¹²ǁnâi ǂanbasen, îts ǃKhūb, Egipteǃhūba xu, khobosis omma xu ge ǂgaeǂguiǂui tsiba tā ǀuru.

¹³ǃKhūb, sa Elobats ge ǃao tsî nî ǁîba ǃoaba; tsîts ge ǁîb di ǀons tawa nî nū.

¹⁴ǀKhara elogats ge sao tide, ǁnā ǁaedi, sats ǂnamipe hâdi di elogu xa.

¹⁵ǃKhūb sa Elob ge a tauxa Elo sadu ǁaegu; îb ǁaib ǃKhūb, sa Elob diba saǀî tā ǂhubi, îb tā ǃhūbaiba xu hîkākā tsi.

¹⁶ǃKhūb, sa Elobats ge ǃâitsâ tide, Masas tawats ge ǁîba ǃâitsâ khami.

¹⁷Sats ge ǃKhūb, sa Elob di mîmāde ôasase nî ǃkhōǀgaipe, ǁîb di ǀhûǀguitimîdi tsî ǁîb di ǂnûiǂgādi, satsab ge mîmādi ǀkha.

¹⁸Tsîts ge ǃKhūb mûǁae a ǂhanu tsî ǃgâina nî dī, ǃgâibahets nîga, tsî ǂgâ tsîts nî ǁnā ǃgâi ǃhūb, ǃKhūb ge sa îga nūbaba ǀumise;

¹⁹sa khākhoen hoanats nî ais âtsa xu doeǁgabēga, ǃKhūb ge mî xase.

²⁰Sa ôab ga aetsē dî tsi, mî raǃâ: Mâ ǀhûǀguitimîdi, ǂnûiǂgādi tsî ǂhanugu tsîna kha ǁî, ǃKhūb sada Elob ge mîmāna?

²¹Ots ge sa ôab ǃoa nî mî: Faraob di ǃgā da ge i Egipteb ǃnâ; xawe ǃKhūb ge ǀgaisa ǃommi ǀkha Egipteba xu ge ǂgaeǂguiǂui da.

²²Tsî ǃKhūb ge saodi tsî kai tsî tsū buruxa dīna gere dī Egipteb ǃnâ, Faraob tawa tsî ǁîb di ommi hoaragab tawa, sida di mûdi âiǃâ.

²³Tsîb ge ǁnāpa xu ge ǂgaeǂguiǂui da, ūǂgā dab nîga, ǁnā ǃhūb, sada îgab ge nūbabab nî mā dase.

²⁴Tsî ǃKhūb ge ge mîmā da, nē ǂnûiǂgādi hoade da nî dīsa, î da ǃKhūb, sada Eloba ǃao, ǃgâibahe da nîga hugaǀgui tsî da ûib ǃnâ nî sâuhega, nētsē ī khami.

²⁵Tsî ǁî-i ge nî sada di ǂhanu-aisi, ǂan tsî da ga dīo nē mîmādi hoade ǃKhūb, sada Elob di ais aiǃâ, ǁîb ge mîmā da xase.