Read Khoekhoegowab Deuteronomium 7 Bible Online

Deuteronomium 7 - Khoekhoegowab bible

Deuteronomium 7

¹ǃKhūb, sadu Elob ga ǁnā ǃhūb, ǁîb ǃoa du gaub ǃnâ ūǂgā duo, ǁîba du nî ǀumise, tsî ǂgui ǁaedeb ga sadu di ais aiǃâ aoǂuio, Hetiǁîn, Girgasiǁîn, Amorǁîn, Kanaanǁîn, Perisǁîn, Hiviǁîn tsî Jebusǁîn tsîn, hû ǁaedi, sadu xa ǂgui tsî ǀgaisade;

²tsî ǃKhūb, sadu Elob ga ǁîna sadu ais aiǃâ māo, sadu nî ǁîna ǂnause, ots ge ǁîna nî ǀâxareǃari, ǃgaeǀhao-i xare-ets ge ǁîn ǀkha dī tide, tsî du ge ǁîna ǀkhom tide.

³Tsî du ge ǁîn ǀkha ǁkhāti khoexagusa dī tide; sadu di ôade du ge ǁîn di ôaga mā tide tsî ǁîn di ôade du ge sadu di ôaga ūba tide.

⁴Sadu di ôaga di nî tita xu ǂgō kai amaga, ǀkhara eloga gu nî ǃoaba ga; ob ge ǃKhūb di ǁaiba saduǀî ǂhubi tsî ǃhaese nî hîǀhuru du.

⁵Î du nēti ǁîna dī-ū: ǁÎn di altarde ǃhanǁgui tsî ǁîn di ǂnûikhâihe hâ īga khôaǂkhūǂkhū, î ǁîn di ǀhomade ǁhāǁgui tsî ǁîn di ǃgaoǂuihesa īga ǀaes ǀkha khauǃkhū.

⁶Sadu ge ǃKhūb, sadu Eloba ǃanu ǁaese ība; sadob ge ǃKhūb, sadu Eloba ge ūǂuibasen, ǁîba du nî ǁaedi hoadi, ǃhūbaib ai hâde xu ūb hâ ǁaese ībaga.

⁷ǃKhūb ge sado ūǂuibasen tama hâ nau ǁaedi hoadi xa du a ǂgui ǃkhais ǃaroma; ǁaedi hoadi xa ǀoro khoedu kom ge io.

⁸Tsî sadob ǃKhūba ǀnam hâ amaga, tsî sadu îgab ge nūba nūsab nî ǃkhōǀgaipeseb ge ǃKhūba ǀgaisa ǃommi ǀkha ǂgaeǂguiǂui tsî ge ore du khobosis omma xu tsî Faraob, Egipteb gao-aob di ǃomǁaeba xu.

⁹Î du ǁnâi ǂan, ǃKhūb sadu Elob a ǁnā Elo ǃkhaisa, ǁnā îǂhôa Elob, ǃgaeǀhaos tsî ǃgâidīb tsîra ǁnān, ǁîba ǀnam hân tsî mîmādi âba ra ǃkhōǀgaipena ǀoadisi ǃhaodi kōse ra ūhâbaba.

¹⁰Tsî ǁîb ge mâ-i hoa-i ân, ǁîba ǁkhan hân di-e ǁî-i di ais ǃnâ ra mādawa-am, ǁî-eb nî hîkākāse; ǁîb ge ǁkhansabe-i âba ǀhape-ū tide, ǁî-i di ais ǃnâb ge ǁî-e nî dīdawa-am.

¹¹ǃKhōǀgaipe ǁnâi mîmādi, ǂnûiǂgādi tsî ǂhanugu tsîn, nētsē ta ra mîmā duna, dī du nîse.

¹²O i ge nîra ī, nē ǂhanuga du nî ǁnâu tsî ǃkhōǀgaipe tsî ǁîga dī ti, ob ge ǃKhūb, sadu Eloba ǁnā ǃgaeǀhaos tsî ǃgâidīb tsîra, sadu îgab ge nūbara nîra ūhâba du;

¹³tsîb ge nîra ǀnam du, ǀkhae du tsî ǂguiǂgui du; tsî ǁîb ge nîra ǀkhae sa ǃnāb di ǂûtanib, sa ǃhanab di ǂûtanib, sa ǃhorob, sa ǂkhon ǂauxûib, sa olib, sa gomadi di ôas tsî sa ǀgoan di ǀarosens tsîna ǁnā ǃhūb, sadu îgab ge nūbab ǃnâ, sadob nî ǁîba mā ti.

¹⁴ǀKhaehe du ge nîra ǁaedi hoadi ǃgâ-ai, sadu ǃnâ i ge ǂûtanioǃnâse ī tide, aob kas, taras kas hoasa tsî ǁkhāti ǀgoan ǃnâ.

¹⁵Tsî ǃKhūb ge ǀaesenni hoaba sado xu nîra ǁkhaebē tsîb ge Egipteǁîn di ǂkhaba ǀae-aigu sadu a ǂangu xa ǁgui-ai du tide, tsîb ge ǁîga ǁnān, sado ǁkhan hân hoan ai nîra ǁgui.

¹⁶Tsî du ge ǁnā ǁaedi, ǃKhūb sadu Elob nî mā du di hoade nîra hapu; sadu di mûs ge ǁîna sâu tide, tsî du ge elogu âna ǃoaba tide, ǁîs nî ǂhanise ība du amaga.

¹⁷Sadu ǂgaob ǃnâ du ga mîo: Nē ǁaedi ge ǂguidā te hâ; mati ta kha ǁnâi tita ǁîna ūn hâna xu nî doeǁgaǂui?

¹⁸Tā ǁîna ǃao, hugaǀgui ǂâi tare xū-eb ge ǃKhūb, sadu Eloba Faraob tsî Egipteǁîn hoan tawa dī ǃkhaisa,

¹⁹ǁnā kai ǃâitsâdi sadu mûdi ge mûdi, tsî ǁnā saodi tsî buruxa dīn tsîn tsî ǁnā ǀgaisa ǃommi tsî ǁnā ǀhōǂuihesa ǁôab, ǁîb ǀkhab ǃKhūb, sadu Eloba sado ge ǂgaeǂguiǂuiba; ǁnās ǁkhās xaseb ge ǃKhūb, sadu Eloba ǁnā ǁaedi, ǁîde du ra ǃaodi hoadi tawa nîra dī.

²⁰ǁNās ǁkhās xaseb ge ǃKhūb, sadu Eloba ǁkhāti kai ǀgeruga ǁîn ǁaegu nîra sî, ǁnā ǃgau gen nî kā tsî sadu di ais aiǃâ ǀkhais kōse.

²¹Tā ǃhurigâ ǁîn di ais aiǃâ; ǃKhūb, sadu Elob ge sadu ǁaegu hâ, kai tsî ǃaoǃaosa Eloba.

²²Tsî ǃKhūb sadu Elob ge nē ǁaede ǂkhariǂkharibese nîra aoǂui; ǃhaese du ge ǁîna hîkākā ǁoa nî ī, în ǀgurun ǃaub dina sadu ǃoa-ai tā ǂgui ti.

²³Tsî ǃKhūb ge ǁîna sa ais aiǃâ nîra mā, tsîb ge ǁîna kai ǃhurib ǀkha nîra ǃhuriǃhuri, hîǀhuruhen nîs kōse.

²⁴Tsîb ge ǁkhāti gao-aogu âna sadu ǃomǁae nîra mā, ǁîgu di ǀonde du nî ǀhommi ǃnagaba xu ǁauǁaus kōse; khoeb xareb ge sadu ais aiǃâ mâ tide, ǁîna du nî hîkākās kōse.

²⁵ǃGaoǂuihesa īgu ǁîn elogu diga du ge ǀaes ǀkha nîra khauǃkhū; ǀhaiǀurib tsî ǃhuniǀurib, ǁîgu tawa hâba du ge tura tide tsî ǁkhāti ūbasen tide, ǁî ǃkhais ǀkha du ǂhanikaisen tidega; ǁîs ge a ǁgaidī ǃKhūb, sa Elob tawa.

²⁶O du ge ǁgaidība sadu di ommi ǃnâ ūǂgā tide, ǀâxare kai du nîse, ǁîb ī khami; ǃharaxūǃari du nî ǁîba tsî ǁîba hoaragase uixaba, ǀâxarexūb a amaga.