Read Khoekhoegowab Deuteronomium 8 Bible Online

Deuteronomium 8 - Khoekhoegowab bible

Deuteronomium 8

¹Nē mîmādi, nētsē ta ra mîmādi hoadi, ǁîde du ge nî ǂan, dī du nîse, ûi tsî du nî ǂguiǂguisense tsî ǂgâ tsî du nî ǀumise ǁnā ǃhūb, ǃKhūb ge sadu îga nūbaba.

²Tsî du ge nî ǂâi ǁnā daob, ǃKhūb, sadu Elob ge nē hakadisi kurigu kōse ǂgaeǂguib xa, ǃgamǃgam dub nîga, ǃâitsâ dub nîga, ǂanni nîse, sadu ǂgaob ǃnâ i hâsa, ise du nî mîmādi âba ǃkhōǀgaipe, ise du ǃkhōǀgaipe tide ǃkhaisa.

³Ob ge ǁîba ge ǃgamǃgam tsî ge ǃâ kai du, tsî manab, sadu a ǀūb tsî sadu îgu tsîn ǂan tama ge hâ iba gere ǂûmā du; ǁîb nî ǂanǂan duse, khoeb pereb ǀguib xa ûi tama xawe mâ mîs ǃKhūba xu ra ǂoaxas hoasa xu ra ûi ǃkhaisa.

⁴Sadu di saran ge sadu ai ǀoro tama tsî sadu di ǂais ge xâi tama ge i nē hakadisi kurigu ǃnâ.

⁵Mûǂan ǁnâi sadu di ǂgaob ǃnâ, ǃKhūb, sadu Elob ra ǁkhara du ǃkhaisa, aob ra ǀgôaba ǁkhara xase.

⁶Î du ǃKhūb sadu Elob di mîmāde ǃkhōǀgaipe, ǁîb di daogu ǃnâ ǃgû tsî du nî ǁîba ǃaoga.

⁷ǃKhūb sadu Elob ra ǃgâi ǃhū-i ǃnâ ūǂgā du, ǃhū-i ǁgamxa ǃārogu â-i-i, ǀaudi tsî ǃgam ǃkhaidi, ǃgoaǃnāgu tsî ǃhomgu tsîga-ū ra dâuǂoadi â-i-i,

⁸ǃhū-i, ǃhorob tsî gerst tsîkha â-i-i, tsî ǂauxûiǂûhaidi â-i-i tsî ǀnomahaidi â-i-i tsî granatǂûn â-i-i; ǃhū-i, ǁnuixa ǀkherahaidi â-i-i tsî danib â-i-i;

⁹ǃhū-i, ǁî-i ǃnâ du ǀoro ra pereba ǂû tide-i, ǁî-i ǃnâ du xū-e tôasi tide-i, ǃhū-i, ǀuidi â-i a ǂnūǀuri-i, tsî ǃhomgu â-e xuts nî ǂaiba ǁhāǂui-e.

¹⁰ǂÛ tsî du ga ǁâo, o du ge ǃKhūb, sadu Eloba nî ǃkhōǀkhā ǁnā ǃgâi ǃhūb, ǁîb ge sado māb ǃaroma.

¹¹ǂAnbasen, î du ǃKhūb sadu Eloba tā ǀuru, ǁîb di mîmādi tsî ǁîb di ǂhanugu tsî ǁîb di ǂnûiǂgādi tsîn, nētsē ta ra mîba duna du ǃkhōǀgaipe tidesa xu;

¹²îb tā ǀnîsi ǂû tsî du ga ǁâ tsî ǃgâi omga ǂnubibasen tsî ǁîga ǁanǃnâ,

¹³tsî sadu goman tsî sadu gūn ga ǂgui, tsî ǀhaiǀurib tsî ǃhuniǀurib on ga ǂguio, ā, ū du hân hoan ga ǂguio;

¹⁴sadu di ǂgaoba ǁnāǃnubai ǀnîsi tā ǀgapiǀgapisen, î du tā ǀuru ǃKhūb sadu Elob, Egipteǃhūba xu, khobosis omma xu ge ǂgaeǂguiǂui duba,

¹⁵ǁnā kai tsî ǃaoǃaosa ǃgaroǃhūb, ǁîb ǃnâ ǀaexa ǀaogu, ǀhūgu tsî ǂnâsa ǃhūb tsîna hâb, ǁgam-i ǁîb ǃnâ a ǀkhaib ǃnâ ge ǂgaeǂguiǂgâb, ǁgamma ǁguruxa ǃhaoba xu ge ūǀkhība duba.

¹⁶ǃGaroǃhūb ǃnâ manab, sadu îgu ge ǀū i xūba ge ǂû kai dub, sadob nî ǃgamǃgam tsî sadob nî ǃâitsâse, ǀuni ǀams aib nî ǃgâidī-ū duga;

¹⁷tsî sadu ǂgaob ǃnâ du mî tidega: Ti ǀgaib tsî ǁkhāsib ti ǃommi dib ge ǃkhūsiba go ǃoaǂuiba te, ti.

¹⁸Xawe du ge ǃKhūb, sadu Elob xa nî ǂâi, ǁîb a ǁnā ǃkhaisa, ǀgaiba ra mā duba, ǃkhūsiba du nî hōse, ǁîb di ǃgaeǀhaos, sadu îgab ge nūbasab nî ǁapoǁapose, nētsē ī khami.

¹⁹Tsî ī i karao, ǃKhūb, sadu Eloba du ga ǀuruǃari, tsî ǀkhara eloga sao tsî ǁîga ǃoaba, tsî ǁîgu aiǃâ ǃhonǁgoao, o ta ge tita nētsē ra ǀhûǀguitimî sadu ǃoagu, amase du nîra kā ǃkhaisa.

²⁰ǀŪben, ǃKhūb xa sadu ais aiǃâ hîkākāhe hân ǁkhās xase du ge sado nîra kā, ǃKhūb, sadu Elob di domma du ǁnâuǀnam tama xui-ao.