Read Khoekhoegowab Deuteronomium 9 Bible Online

Deuteronomium 9 - Khoekhoegowab bible

Deuteronomium 9

¹ǁNâu, Israeltse, sadu ge nētsē Jordanna nî ǃgâu, ǂgâ tsî du nî ǁaedi, sadu xa kai tsî ǀgaisade ǀumise, ǃādi, hîa kai tsî ǀhommi kōse ǀgaiǀgaihe hâde;

²kai tsî gaxu ǁaes, Anakǁîn di ôan, ǁîna du a ǂan tsî ǁîn xa du ge: Tari-e mâ ǁkhā Anaki ôan di ais aiǃâ? ti ǁnâuna.

³O du ge nētsē nî ǂan, ǃKhūb, sadu Elob a ǁî ǃkhaisa, sadu di ais aiǃâ ra ǃgûǃganuba khauǃkhū ra ǀaese: Elob ge ǁîna nîra hîǀhuru, tsîb ge ǁîna sadu ais aiǃâ nîra aoǁgui; o du ge ǁîna ūn hâna xu doeǁgaǂui tsî nîra ǃhaese dī, ǃKhūb ge sadu ǃoa mî xase.

⁴Tsî ǃKhūb, sadu Elob ga ǁîna sadu di ais aiǃâ ǂhāǂuio, tā ǁnâi ǃhoa ǂgaob âts ǃnâ, mî rase: ǃKhūb ge tita ti ǂhanu-aisib ǃaroma ge ūǂgâ, nē ǃhūba ta nî ǀumise; eloxoresasib nē ǁaedi dib ǃaromas ge ǃKhūb, sadu Elob ra ǁîna sadu di ais aiǃâ ūn hâna xu doeǁgaǂuisa xuige.

⁵Sadu di ǂhanu-aisib ǃaroma tamas ge tsî ǁkhāti sadu ǂgaob di ǂhauǃnâsib ǃaroma tamas ge ǂgâ tsî du nî ǃhūba ǀumisa, tsî nē ǁaedi di eloxoresasib ǃaromas ge ǃKhūb, sadu Elob ra ǁîna sadu di ais aiǃâ ūn hâna xu doeǁgabēsa; tsî ǁnā mîsab nî ǁapoǁapose, ǃKhūb, sadu Elob ge abogu Abrahammi, Isaki tsî Jakob tsîga nūbasa.

⁶ǂAn ǁnâi ǃKhūb, sadu Elob ra sadu di ǂhanu-aisib ǃaroma tama ǁnā ǃgâi ǃhūba mā du ǃkhaisa, ǀumi bi du nîse; ǂnîxaǃao ǁae du a xui-ao.

⁷ǂÂis ǃnâ ūhâ, î du tā ǀuru, ǃKhūb, sadu Eloba du ge ǃgaroǃhūb ǃnâ kaise gere ǁaiǁai ǃkhaisa; ǁnātsē, Egipteǃhūba xu du ge ǃgûǂoasa xu, nē ǃkhais tawa du ge hās kōse du ge mâǃoaxa ge i ǃKhūb ǃoagu.

⁸Horeb tawa du ge ǃKhūba kaise ge ǂoeǂoe, sadu ǃoagub ge ǁaixas kōse, hîǀhuru dub nî ti.

⁹ǃHommi ai ta ge ǃapao, ǀuixoa-aixūra, ǃgaeǀhaos, ǃKhūb ge sadu ǀkha dīs di xoa-aixūra, ǃkhōǃoasa ǃoa, o ta ge hakadisi tsēdi tsî hakadisi tsuxugu kōse ǃhommi ai hâ tsî pere-i xa ǂû tama tsî ǁgam-i xa ā tama ge hâ i.

¹⁰Tsî ǃKhūb ge ǁnā ǀgam ǀuixoa-aixūra, Elob di ǀkhunub ǀkha xoahe hâra ge mā te; tsî ǁîra ai i ge ge xoahe hâ i ǁnā mîdi, ǃKhūb ge ǃhommi ai sadu ǀkha ǀhûs di tsēs ai ǀaes ǁaeguba xu ǃhoadi hoadi ǃoa.

¹¹O i ge hakadisi tsēdi tsî hakadisi tsuxugu tsîn di ǀunis ai ge ī, ǃKhūb ge tita ǁnā ǀgam ǀuixoa-aixūra, ǃgaeǀhaos di xoa-aixūra māo,

¹²ob ge ǃKhūba tita ǃoa ge mî: Khâi îts ǃhaese nēpa xu ǁgôa, sa ǁaes, Egipteba xuts ge ǂgaeǂguiǂuis ge go ǁgao; ǁîn ge ǃhaese go ǁnā, daob tita ge ǁîna mîmāba xu; ǂnâhe hâ ī-en kom go dībaseno.

¹³ǃAruǀîb ge ǃKhūba tita ǃoa ge mî: Tita ge nē ǁaesa go ǃgaoǃgâ tsî mû, ǂnîxaǃao ǁaes ge ǁîsa.

¹⁴ǁNāxū te î ta ǁîsa hîkākā, î ta ǀons âna ǀhommi ǃnagaba xu ǀari; o ta ge tita satsa nēs xa kai tsî ǀoasa ǁaese nîra dī.

¹⁵ǃNubai ta ge dabasen tsî ǃhomma xu ge ǁgôa, tsî ǃhommi ge ǀaes xa ge khau, tsî ǃgaeǀhaos di xoa-aixūra ge ti ǃomkha hoakha ǃnâ ge hâ i.

¹⁶Tsî ta ge ge kō tsî mû, sadu ge ǃKhūb, sadu Elob ǃoagu ǁore tsî ǂnâhe hâ tsâu-e ge dībasen; ǃhaese du ge ǁnā daob, ǃKhūb ge mîmā duba xu ge ǂgō.

¹⁷O ta ge tita ǁnā ǀgam xoa-aixūra ū tsî ti ǃomkha hoakha xu ǁîra aoǁgui tsî ǁîra sadu di mûdi aiǃâ ge khôaǂkhū.

¹⁸Tsî ta ge ǃKhūb di ais aiǃâ ge ǁnāǁgoe, ǂguro ǃnās ǁkhās xase, hakadisi tsēdi tsî hakadisi tsuxugu kōse; tita ge pere-i xa ǂû tama tsî ǁgam-i xa ā tama ge i sadu di ǁoreb, hîa du gere ǁoreb hoab ǃaroma, ǂkhabase ra dīǃâ ǃKhūb mûǁae, ǁaib ǃoa du nî ǂoeǂoe biga.

¹⁹ǃAo ta ge xui-ao, ǁaib tsî ǁgôasib, ǁîb ǀkhab ge ǃKhūba sadu ǂama ǁaixaba, hîkākā dub nîse, xawe ǃKhūb ge nē ǃnās ai ge ǁnâu-am te.

²⁰ǁKhātib ge ǃKhūba kaise ge ǁaixa Aronni ǂama, hîǀhuru bib nîga; xawe tita ge ǁkhā ǁaeb ai Aronna gere ge ǀgoreba.

²¹Xawe sadu di ǁoreb, ǁnā tsâub hîa du ge dībasenni, ǁîba ta ge ū tsî ǀaes ǀkha khauǃkhū tsî ge xon, ǁîba ǃgâise ra ǁkhamitsautsauǃâ, tsarab khamib ge ǂkharis kōse; o ta ge tsarab âba ǃārob, ǃhomma xu ra dâuǁgôaxab ǃnâ ge tsoroǂgā.

²²ǁKhāti du ge ǃKhūba kaise ge ǁaiǁai Taberas tawa, Masas tawa tsî Kibrot-Taavas tawa.

²³ǃAruǀîb ge ǃKhūba sado ge sî Kades-Barneasa xu, mî rase: ǃGûǃapa î du sī ǀumi ǁnā ǃhūb, tita ge mā duba; ǃnubai du ge ǃKhūb, sadu Elob di mîmāsa mâǃoaxase ge ība, tsî du ge ǁîba ǂgom tama tsî dommi âba ǃgâ tama ge ī.

²⁴Sadu ge mâǃoaxa ge i ǃKhūb ǃoagu, sado ta ge a ǂan tsēsa xu.

²⁵Tsî ta ge ǃKhūb di ais aiǃâ ge ǁnāǁgoe, hakadisi tsēdi tsî hakadisi tsuxugu kōse ta ge ge ǁnāǁgoe, ǃKhūb ge mî xui-ao, sadob nî hîǀhuru ti.

²⁶O ta ge ǃKhūb ǃoa ǀgore tsî ge mî: ǃKhūtse, ǃKhūtse, sa ǁaes tsî sa ǀumis, sa kaisiba xuts ge oresa tā hîǀhuru, Egipteba xuts ge ǀgaisa ǃommi ǀkha ǂgaeǂguiǂuisa.

²⁷ǂÂi re sa ǃgāgu, Abrahammi, Isaki tsî Jakob tsîgu xa; tā kō karosasib nē ǁaes diba tsî ǁîn di eloxoresasib tsî ǁîn di ǁoreb ona;

²⁸îb ǁnā ǃhūb, ǁîba xuts ge ǂgaeǂguiǂui daba tā mî: ǃKhūb ge ǁîna ǁnā ǃhūb, ǁîb xab ge ǁîna mîmâibab ǃoa ūsī ǁoa ge i, tsî ǁînab ge ǁkhan amagab ge ǁîna ge ǂgaeǂguiǂui, ǃgaroǃhūb ǃnâb nî ǁîna ǃgamse.

²⁹Sa ǁaes kom tsî sa ǀumis komo, sa kai ǀgaib ǀkha tsî sa ǀhōǂuihesa ǁôab ǀkhats ge ǂgaeǂguiǂuisa.