Read Khoekhoegowab Johaneb 10 Bible Online

Johaneb 10 - Khoekhoegowab bible

Johaneb 10

¹Amase, amase ta ra mîba du: Dao-amsa-ū gūn di ǃharas ǃnâ ǂgâ tama-i, tsî nau ǃkhai-e xu ra ǃapaǂgâ-i, ǁnā-i ge ǃnari-ao tsî ǃgamao-e.

²Xawe dao-amsa xu ra ǂgâ-i, ǁnā-i ge gūn di ǃûi-ao-e.

³ǁÎbab ge daoǃûi-aoba ra ǁkhowa-amba, tsîn ge gūna ǁîb di domma ra ǁnâu; tsîb ge ǁîb di gūna ǀons ǀkha ra ǂgai, tsî ǁîna ra ǂgaeǂguiǂui.

⁴Tsî gūn âbab ga dīǂuio, ob ge ǁîna ra ai-aiba, on ge gūna ǁîba ra sao, dommi âban a ǂan amaga.

⁵Xawe ǀkharaban ge sao tide, tsî nî ǁîba xu ǃkhoeni, ǀkharan di domman ǂan tama hâ amaga.

⁶Nē ǂkhoamî-eb ge Jesuba ǁîn ǃoa ge mî; xawen ge ǁnâuǃā tama ge i, tare-i a ǃkhaisa, ǁîn ǃoab ge ǃhoa-e.

⁷Ob ge Jesuba ǁkhawa ǁîn ǃoa ge mî: Amase, amase ta ra mîba du: Tita ge gūn di dao-amta.

⁸Ti aiǃâ ge hān hoan ge a ǃnari-ao, tsî ǃgamao; xawen ge gūna ǁîna ǁnâuǀnam tama ge i.

⁹Tita ge dao-amta. Khoe-i ga tita xu ǂgâo, o i ge nîra ǃgâiǃō, tsî i ge ǂoa tsî nîra ǂgâ; tsî ǃû-ai-e nîra hō.

¹⁰ǃNari-ao-i kom ǃnari tsî i nî ǂā, tsî i nî hîǀhuru, ti ī ǂâibasens ǀguis ǀkha ra hāo. Tita ge ge hā, ûib tsî ǃnāǂamsasib tsîkhan nî ūhâse.

¹¹Tita ge ǃgâi ǃÛi-aota. ǃGâi ǃÛi-aob ge ǁîb di ûiba ǁîb di gūna ra mâiba;

¹²xawe ǃgaesab, ǃûi-ao tamab tsî gūn â-i tamab, ge ǂhiras ǃgoaxa ǃkhaisa mû, tsî gūna xū tsî ra ǃkhoeni; os ge ǂhirasa ǁîna ǃkhō, tsî gūna ra ǀgaruǀgaru.

¹³Tsîb ge ǃgaesaba ra ǃhū, ǃgaesab a tsî gūnab ǁae-ū tama amaga.

¹⁴Tita ge ǃgâi ǃÛi-aota, tsî ta ge tina a ǂan, tsî ta ge tin xa ra ǂanhe.

¹⁵Titab Aboba a ǂans ǁkhās khami ta tita ona Aboba a ǂan, tsî ta ge ti ûiba gūna ra mâiba.

¹⁶Tsî ta ge ǀnî gūn nē ǃharas di tamana ūhâ; tsî ǁîn ona ta nî ūhā, tsîn ge ti domma nîra ǁnâu, on ge nî ǀgui gū ǀgui ǃûi-aoba ūhâna.

¹⁷ǁNā-amagab ge Aboba tita ǀnam hâ, ti ûiba ta ra ǁguiǁnâ amaga, ǁkhawa ta nî ǁîba ūse.

¹⁸Khoe-i xare-i ge ǁîba tita xu ū tama, xawe ta ge ti aitsama ǁîba ra ǁguiǁnâ. Tita ge ǀgaiba ūhâ, ǁîba ǁguiǁnâsa, tsî ta ge ǀgaiba ūhâ, ǁîba ǁkhawa ūbasensa. Nē mîmāsa ta ge ti Îba xu ge hō.

¹⁹O i ge ǁkhawa ǁhaiǃāgu-e Jodeǁîn ǃnâ ge hā, nē mîdi ǂama.

²⁰On ge ǂguin ǁîn dina ge mî: ǁGâua-eb ūhâ, ob kom go ǃkhauo; tarexa du ǁîba ra ǁnâu?

²¹On ge ǀnîna ge mî: ǁGâuab xa hâǃnâhe-i di mî tamadi kom nēdeo. ǁGâua-e kha ǁkhā i a, ǂgī hân di mûde khowasa?

²²Tsî-i ge Jerusalems ǃnâ tempeli khaihes di kaitsē ge i, tsî i ge sao ge i.

²³Tsîb ge Jesuba tempeli ǃnâ gere ǃgûma, Salomob di ai-ommi ǃnâ.

²⁴On ge Jodeǁîna ǃnamiǂgā bi, tsî ǁîb ǃoa ge mî: Matikō ǂomxasets sida ra ǀgommaǂâi kai? Xristuts ka satsao, ǁkhoaǂgaose sida mîba re.

²⁵Ob ge Jesuba ǁîna ge ǃeream: Mîba du ta ge, xawe du ge ǂgom tama i. Sîsengu, ti Îb di ǀons ǃnâ ta ra dīgu, ǁîgu kom tita xa ra ǃkhō-amo.

²⁶Xawe du ge ǂgom tama hâ, ti gūn di tama du a amaga, mîba du ta ge khami.

²⁷Ti gūn ge ti domma ra ǁnâu, tsî ta ge tita ǁîna ǂan hâ, tsîn ge ǁîna tita ra sao.

²⁸Tsî tita ge ǁîna ǀamo ûiba ra mā; tsîn ge tātsēs tsîna kāǁō tide, tsî khoe-i xare-i ge ǁîna ti ǃomma xu tsubuǂui tide.

²⁹Ti îb, tita ǁîna ge māb ge hoan ǂamai a kai; tsî khoe-i xare-i ge ǁîna ti îb di ǃomma xu a tsubuǂui ǁoa.

³⁰Tita tsî Abob tsîkhom a ǀgui.

³¹On ge Jodeǁîna ǁkhawa ǀuide ge ūkhâi, ǀuiǁhom bin nîse.

³²Ob ge Jesuba ǁîna ge ǃeream: ǂGui ǃgâidīgu ti Îba xu hâga ta ge ǁgau du; mâ dīb ǁnāgu dib ǃaroma du kha ra ǀuiǁhom te? ti.

³³On ge Jodeǁîna ǃeream bi tsî ge mî: ǃGâi dī-i ǃaroma da satsa ǀuiǁhom tama, xawe eloǃkhāǃkhās, tsî khoets a hîats sa-aitsama ra Elodīsen ǃkhais ǃaroma.

³⁴Ob ge Jesuba ǁîna ge ǃeream: Sadu ǂhanub ǃnâ xoamâihe tama i hâ: Tita ge ge mî, elogo a ǃkhaisa? ti.

³⁵Tsîb ga ǁnāgu, ǁîgu ǃoas ge mîsa hāga, elogo, ti ǂgaio (tsî xoas ge khôahe ǁoasa),

³⁶mati du kha Abob ge khai tsî ǃhūbaib ai sî ta ǃoa ra mî: Elobats ra ǃkhāǃkhā, Elob Ôata ge tita, ti ta goro mî amaga?

³⁷Ti Îb di sîsenga ta ga dī tama io, tā ǂgom te.

³⁸Xawe ǁîga ta kara dīo, ǁnâi sîsenga ǂgom, tita du ga ǂgom tama i xawe; î du ǂan tsî ǂgom, Abob tita ǃnâ hâ, tsî tita ǁîb ǃnâ hâsa.

³⁹On ge ǁkhawa ǁîba ge ǃkhō ǁga, xaweb ge ǃomgu âna xu ge bē.

⁴⁰Tsîb ge ǁkhawa Jordanǃāb nauǃani, Johaneb ǀguitsē gere ǁāǁnâ ǃkhais tawa sī tsî ǁnāpa ge hâ.

⁴¹Tsî ǂguin ge ǁîb tawa sī tsî ge mî: Johaneb ge sao-i xare-e dī tama hâ; xawe Johaneb nēb xa gere mîn hoan ge a ama.

⁴²Tsî ǂguin ge ǁnāpa ǁîb ǃnâ ge ǂgom.