Read Khoekhoegowab Johaneb 11 Bible Online

Johaneb 11 - Khoekhoegowab bible

Johaneb 11

¹Tsîb ge ǂanǂansa khoeba ge ǀaeǁgoe hâ i, Lasarub ti ǀon hâb, Betanis dib, Marias tsî ǁîs ǃgâsas Martas tsîra ǃāros diba.

²Tsîs ge Mariasa ǁnā ge i, ǃKhūba gere ǂkhaus, tsî ǂaira âba ǀûn as ǀkha gere ǀomǀkhāsa; ǁîs di ǃgâsab Lasarub ge ǀaeǁgoe hâ isa.

³O ra ge ǃgâsara ǁîb ǃoa sî tsî ge mîba kai bi: ǃKhūtse, mû, ǀnamts hâb ge ǀaeǁgoe hâ.

⁴Tsî Jesub ge ǁnâu, ob ge ge mî: Nē ǀaesenni ge ǁōb ǃoa hâ tamaba, tsîb ge ǂkhaisib Elob dib ǃoa hâ, Elob Ôab nî ǁîba xu ǂkhaiǂkhaihega.

⁵Tsîb ge Jesuba Martas, tsî ǁîs di ǃgâsas tsî Lasarub tsîna ǀnam ge i.

⁶Tsî ǁîb ǀaesen hâ ǃkhaisab ge ǁnâu, ob ge ganupe ǀgam tsēra hâb a ǃkhais tawa ge hâ.

⁷ǁNās khaoǃgâb ge ǁkhāǁkhāsabegu ǃoa ge mî: A ge ǁkhawa Judeab ǃoa ǃgû.

⁸O gu ge ǁkhāǁkhāsabega ǁîb ǃoa ge mî: Rabitse, ǀasen go Jodeǁîna satsa ǀuiǁhom ǂgao hâ i, xawets ǁkhawa ǁnāǀî nî ǃgû?

⁹Ob ge Jesuba ge ǃeream: Disiǀgamǀa irga kha tsēs ǃnâ hâ tama hâ? Khoe-i ga tsēa ǃgûo, o-i ge ǃnomsen tide; nē ǃhūbaib di ǃnâba i ra mû amaga.

¹⁰Xawe khoe-i ga tsuxuba ǃgûo, o-i ge ra ǃnomsen, ǃnâ-e-i ǁî-i ǃnâ ūhâ tama amaga.

¹¹Nēna ǃhoa tsîb ge ǁnās khaoǃgâ ǁîgu ǃoa ge mî: Lasarub sage horesab ge ǁom hâ; o ta ge ra ǃgû, ǁîba ta nî ǂkhaiǂkhaise.

¹²O gu ge ǁkhāǁkhāsabegu âba ge mî: ǃKhūtse ǁommi nîs karao, ob ge nî ǂgau.

¹³Xaweb ge Jesuba ǁnāsa ǁōb âb xa ge mî; xawe gu ge ǁîga ǂoms di sâb xab ra ǃhoa, ti ge ǂâi hâ i.

¹⁴ǃNubaib ge Jesuba ǃoaǃū ǁîgu ǃoa ge mî: Lasarub ge go ǁō;

¹⁵tsî ta ge sago ǃaroma ra ǃgâiaǂgao, ǁnāpa ta go hâ tama hâ isa, ǂgom ǁkhā go nîse. Xawe a ge ǁîb ǃoa ǃgû!

¹⁶Ob ge Tomab, Didimub ti ra ǂgaiheba, ǁîb di ǀhōsaǁkhāǁkhāsabegu ǃoa ge mî: A ge sage ona ǃgû, î ge ǁîb ǀkha ǁō.

¹⁷Tsî Jesub ge sī, ob ge ǁîba ǀnai haka tsēde ǀhobas ǃnâ ǁgoese ge hō.

¹⁸Tsîs ge Betanisa Jerusalems ǀgūse ge ǁgoe i, ǃnona nî ī kilometergu kōse.

¹⁹Tsî ǂgui Jodeǁîn ge Martas tsî Marias tsîra ǃoa ge hā hâ i, ǃgâsab ǂaman nî ǁîra ǁkhaeǂgaose.

²⁰Tsî Martas ge Jesub ǃgoaxa ǃkhaisa ǁnâuo, os ge ǁîba ge ǃgûǃoa; xawe Marias ge oms ǃnâ ge ǂnû.

²¹ǃNubais ge Martasa Jesub ǃoa ge mî: ǃKhūtse, sats ga nēpa hâ hâo, ob ge ti ǃgâsaba ga ǁō tama hâ i.

²²ǁNāti ī xawe ta a ǂan, Elobats ga satsa ǂgaoǀkhā xū-i hoa-eb nî Eloba mā tsi ǃkhaisa.

²³Ob ge Jesuba ǁîs ǃoa ge mî: Khâi nî ǃgâsab âs ge.

²⁴Os ge Martasa ǁîb ǃoa ge mî: ǂAn ta a, ǀuni tsēs aib khâis ǃnâ nîra hâ ǃkhaisa.

²⁵Ob ge Jesuba ǁîsa ge mîǀî: Tita ge Khâita, tsî Ûita. Tita ǃnâ kara ǂgom-i, ǁnā-i ge nîra ûi, ǁō i ka xawe.

²⁶Tsî ûi tsî tita ǃnâ kara ǂgom-i hoa-i, ǁnā-i ge tātsē ǁō tide. ǂGoms ra nēsa?

²⁷Os ge ǁîb ǃoa ge mî: Ā, ǃKhūtse ǂgom ta ra, Xristu, Elob Ôats, ǃhūbaib ai nîra hāts a ǃkhaisa.

²⁸Tsî nēna mî tsîs ge ge ǃgû tsî Marias ǃgâsas âsa ǂgai, tsî ǂganǃgâse ǁîs ǃoa ge mî: ǁKhāǁkhā-aob ge go hā, tsî ra ǂgai si.

²⁹Tsî ǁîs ge ǁnâuo, os ge ǁnātimîsi khâi tsî Jesub tawa ge sī.

³⁰Tsîb ge Jesuba ganupe ǃāros ǃnâ ge ǂgâ tama hâ i, tsî Martas ge ǃgûǃoa bi ǃkhais ǂhanis tawa ge hâ i.

³¹Tsî Jodeǁîn ǁîs ǀkha oms ǃnâ hân, tsî ǁîsa ra ǁkhaeǂgaon ge mû, Marias ge ǃhaese khâi tsî ǂoa ǃkhaisa, on ge ǁîsa sao tsî: ǀHobas ǃoas kom ra ǃgûo, ǁnāpas nî āse, ti ge mî.

³²Tsî Marias ge Jesub hâ ǃkhai-i tawa sī tsî mû bio, os ge ǂaira âb tawa ǁnāǁgoe, tsî ǁîb ǃoa ge mî: ǃKhūtse, sats ga nēpa hâ io, ob ge ti ǃgâsaba ga ǁō tama hâ i.

³³Tsî Jesub ge ǁîs tsî ǁîs ǀkha go hā Jodeǁîn on ra ā ǃkhaisa mûo, ob ge gagas ǃnâ ǁgonaǂgao tsî ge gongonǃnâhe;

³⁴ob ge ge mî: Mapa du ǁîba ǁgui hâ? On ge ǁîb ǃoa: ǃKhūtse, hā î mû re! ti ge mî.

³⁵Tsîb ge Jesuba ge ā.

³⁶On ge Jodeǁîna ge mî: Kō, matikōseb go ǁîba ǀnam isa!

³⁷On ge ǀnîn âna ge mî: Okha, nēb ǂgī hâb di mûra go khowaba ǁkhāti dī ǁoab ga i nēb ga ǁō hâ ga tidesa?

³⁸Ob ge Jesuba ǁkhawa ǁîb ǃnâ ǁgonaǂgao, tsî ǀhobas tawa ge sī. Tsî ǀhobas ge ǁhoab ǃnâ ge hâ i, tsîs ge ǀui-i ǀkha ge ǂganamhe hâ i.

³⁹Ob ge Jesuba: ǀUisa ūbē! ti ge mî. Os ge Martas ǁō hâb di ǃgâsasa ǁîb ǃoa ge mî: ǀNaib ǀō hâ, ǃKhūtse, hakaǁî tsēs komo.

⁴⁰Ob ge Jesuba ǁîs ǃoa ge mî: Mîba si tama ta hâ, ǂgoms kao, os nî ǂkhaisib Elob diba mûsa?

⁴¹On ge ǀuisa ge ūbē, ǁō hâb ge ǁgoe i ǃkhaisa xu. Ob ge Jesuba kōkhâi tsî ge mî: Abotse, gangan tsi ta ra, ǁnâu-am tets go ǃkhais xa.

⁴²Tsî ta ge a ǂan, hugaǀguits ra ǁnâu-am te ǃkhaisa; xawe mâǂnamipe hâ ǁaes ǃaroma ta ǁîsa ra mî, ǂgomn nîga sats ge sî te ǃkhaisa.

⁴³Tsî nēna mî tsîb ge ǃgari dommi ǀkha Lasarutse, ǂoaxa! ti ge ǂgai.

⁴⁴Ob ge ǁō hâba ge ǂoaxa, ǃomkha tsî ǂaira ai ǀhobas ǃkhaiga ǃgaehe hâse, tsî ais âba aosenǃkhaib ǀkha ǃnanhe hâse. Ob ge Jesuba ǁîn ǃoa ge mî: Xore bi, îb ǃgû!

⁴⁵On ge Marias ǃoa ge hā tsî Jesub go dīna go mû Jodeǁîn di ǂguina ǁîb ǃnâ ge ǂgom.

⁴⁶Xawe ǀnîn ân ge Farisegu ǃoa ǃgû, tsî ǁîga Jesub go dīna sī ge mîba.

⁴⁷O gu ge ǀgapipristergu tsî Farisegu tsîga ǀapeǀhao-e dī, tsî ge mî: Tare-e ge nî dī? Nē khoeb kom ǂgui saode ra dīo.

⁴⁸ǁNāti ge ga ǁîba dī kaio, on ge hoana ǁîb ǃnâ nî ǂgom. O gu ge Romeǁîga hā, tsî nî ǃhūb tsî ǁaes tsîna sage ūǀhana.

⁴⁹Ob ge ǀguib âgu, Kajafab, ǁnā kurib ǁkhāb ai ǀgapiprister ge iba ǁîgu ǃoa ge mî: Sago kom xū-e ǂan tamao,

⁵⁰tsî go kom ǁkhāti ǂâiǂâisen tamao, ǃgâiba da a ǃkhaisa, ǀgui khoe-i nî ǁaesa ǁōbasa, ǁaes hoas nî kās xa.

⁵¹Tsîb ge ǁnāsa ǁîb ǂûba xu mî tama; xawe ǁkhā kurib aib ge ǀgapiprister i xui-aob ge ge kēbo, Jesub nî ǁaesa ǁōbasa,

⁵²tsî ǁaesab nî ǁōbas ǀguisa tama, xaweb nî ǁkhāti Elob ôan, ǀgaruǀgaruhe hâna ǀhaoǀhaose.

⁵³ǁNā tsēs ǁkhāsa xu gu ge ge ǀapeǀape, ǃgam bi gu nîsa.

⁵⁴Ob ge Jesuba ǃaruǀî ǁkhoase Jodeǁîn ǃnâ ǃgûma tama ge i; ob ge ǁnāpa xu ǃgaroǃhūb ǀgūse hâ ǃkhais, Efraim ti ǀon hâ ǃās ǃoa ǃgû, tsî ǁnāpa ǁkhāǁkhāsabegu âb ǀkha ge hâ.

⁵⁵Tsîb ge Jodeǁîn di Pasxaba ǀgū ge i; tsîn ge ǂguin ǁnā ǃhūb dina Jerusalems ǃoa ge ǃapa Pasxab aiǃâ ǃanuǃanusenn nîse.

⁵⁶On ge Jesuba ôa, tsî tempeli ǃnâ mâse gere mîǀîgu: Mati du ǂâi hâ? Hāb nî xare kaitsēs ai?

⁵⁷Tsî gu ge ǁkhāti ǀgapipristergu tsî Farisegu tsîga mîmā-e ge ǂoa kai, khoe-i ga ǂan, mapab hâsa, o i ge nî ǂanǂan ǃkhō bi gu nîse, ti.