Read Khoekhoegowab Johaneb 12 Bible Online

Johaneb 12 - Khoekhoegowab bible

Johaneb 12

¹Tsî ǃnani tsēde Pasxakaitsēs aiǃâb ge Jesuba Betanis tawa ge sī, Lasarub, Jesub go ǁō hâna xu ǂkhaiǂkhaib ge hâǃnâ isa.

²Tsîn ge ǁnāpa ǃuiǂûǁae-e ge dība bi, tsî Martas ge gere ǃoaba, tsî Lasarub ge ǁîb ǀkha tāb tawa ǂnôan di ǀgui ge i.

³Os ge Mariasa ǃkhare literi ǂkhauǀkhāxū-i, ǃūmû tsî ǃgomǀgausa nardub xa ū, tsî Jesub di ǂaira ǂkhau, tsî ǁîs di ǀûn ǀkha gere ǀomǀkhā; os ge omsa ǃgâihamxūb di ǁamab xa ge ǀoa.

⁴Ob ge ǁkhāǁkhāsabegu di ǀguib, Judab Iskarioǁîb, ega ǁîba nî ǀapexūba ge mî:

⁵Tare xū-i ǃaromab kha nē ǃgâihamxūba ǃnonakaidisi denargu ama ǁamaxūhe tsî ǀgâsana māhe tama hâ?

⁶Tsîb ge ǁîsa ge mî, ǀgâsan xab ra ǂhansens ǃaroma tama, xawe ǃnari-aob ge i, tsî mariǁhōsab ge ūhâ i, tsî ǁîs ǃnâ ra aoǂgāhenab gere ǃnari amaga.

⁷Ob ge Jesuba ge mî: ǁNāxū si; tita nîra ǁkhōhe tsēsas ǁîba sâuba hâ xuige.

⁸ǀGâsana du hugaǀgui sadu tawa ūhâ; xawe du ge tita hugaǀgui ūhâ tama hâ.

⁹Tsîs ge kai ǁaes Jodeǁîn disa ge ǁnâu, ǁnāpab hâsa, on ge ge sī, Jesub ǀguib ǃaroma tama i, tsî Lasarub ǁō hâna xub go ǂkhaiǂkhaiban nî mûse.

¹⁰O gu ge ǀgapipristerga ge ǀapeǀape, Lasarub ona gu nî ǃgam, ti.

¹¹Jodeǁîn ǂguin ge ǁîb ǃaroma ǃgûsī, tsî Jesub ǃnâ ǂgom amaga.

¹²ǀGuitsēs ai, kai ǂnubis kaitsēs ǃoa go hās ge ǁnâuo, Jesub Jerusalems ǃoa ǃgoaxa ǃkhaisa,

¹³on ge palmhaidi ǂgonaga ū tsî ǁîba nî ǃgûǃoase ge ǂoa, tsî Hosiana, ǀKhaeheb ge hâ, ǃKhūb di ǀons ǃnâ ǃgoaxab, Israeli gao-aoba! ti ge ǂgai.

¹⁴Tsîb ge Jesuba eselro-e hō, tsî ǁî-i ai ge ǂnû; xoamâihe hâ khami:

¹⁵Tā ǃao, Sions ǀgôase! Mû, sa gao-aob ge ǃgoaxa esel-i ǂkhamro-i ai ra ǃgapise, ti.

¹⁶Tsî gu ge ǁkhāǁkhāsabegu âba ǁnāsa aiba ǁnâuǃā tama ge i, xawe ega, Jesub ge ǂkhaiǂkhaihe hâ i ǃnubai gu ge ge ǂâihō, nēs ǁîb xa xoamâihe hâ ǃkhaisa, tsî khoen ge nēsa dība bi ǃkhaisa.

¹⁷Tsî ǂnubis, Lasarubab ge ǀhobasa xu ǂgai tsî ǁō hâna xu ǂkhaiǂkhai ǃnubai ǁîb ǀkha ge hâ is ge ǁîb dīb xa ge ǃkhō-am.

¹⁸ǁNā-amagas ge ǂnubisa ǁkhāti ǁîba ge ǃgûǃoa, nēti-ī sao-eb go dī ǃkhaisan ge ǁnâuo.

¹⁹O gu ge Farisega ǁîgu ǃnâ ge mî: Mû go ra ǁnâi, xū-i xare-e go sîsenǂui tamasa. Mû, ǃhūbaib hoab kom ǁîba ra sao o.

²⁰Tsîn ge ǀnî Grikeǁîna, ǀgoreǀî nîse kaitsēs ǃoa ge hān ǃnâ ge hâ i.

²¹ǁÎn ge Filipub, Betsaidas, Galileab disa xu hâb tawa hā, tsî ǀkhoma bi, tsî: ǃKhūtse, Jesuba da mû ǂgao hâ, ti ge mî.

²²Ob ge Filipuba Andreaba ge sī mîba, tsî Andreab tsî Filipub tsîkha ge Jesuba ge sī mîba.

²³Ob ge Jesuba ǁîna ǃeream, tsî ge mî: Iri ge go hā, ob ge Khoen Ôaba nîra ǂkhaiǂkhaihe.

²⁴Amase, amase, ta ra mîba du: ǃHoroǃkhomro-i ga ǃhūb ǃnâ ǁnā tsî ǁō tama io, o-i ge ǀguri hâ; xawe ǁō i kao, o-i ge ǀoasase ra ǂûtani.

²⁵Ûib â-e kara ǀnam-i ge ǁîb xa nî kāhe-e, tsî ûib â-e nē ǃhūbaib ai ga ǁkhan-i ge ǁîba ǀamo ûib ǃnâ nî sâu-e.

²⁶Khoe-i ga tita ǃoabao, a-i tita sao; tsî tita hâpa, ǁnāpa i ge tita ra ǃoaba-i ona nîra hâ; tsî tita kara ǃoaba-i, ǁnā-eb ge Aboba nîra ǃgôa.

²⁷Nēsis ge ti ǀomsa ǁgonǁgonǃnâhe hâ. Tsî tare-e ta nî mî? Abotse, nē ira xu ore te! Xawe ǁîs ǃaroma ta ge nē iri ǃnâ go ǂgâ.

²⁸Abotse, sa ǀonsa ǂkhaiǂkhai! O i ge dom-e ǀhomma xu ge ǀkhī: ǂKhaiǂkhai si ta go, tsî ta ge ǁkhawa nîra ǂkhaiǂkhai si, ti.

²⁹Os ge ǂnubis ǁnāpa mâ tsî ge ǁnâusa: ǃGuru i kom go-o, ti ge mî. On ge nauna: ǀHomǃgā-i kom ǁîb ǀkha go ǃhoao, ti ge mî.

³⁰Ob ge Jesuba ǃeream tsî ge mî: Tita ǃaroma tamas, tsî sadu ǃaromas ge a nē dommi go ǃnaesa.

³¹Nēsis ge ǀgoraǃgâsa nē ǃhūbaib ǂama ra hā; nēsib ge ǂamsab nē ǃhūbaib diba nîra ǂhāǂuihe.

³²Tsî tita, ǃhūbaiba xu ta ga ǀgapiǀgapiheo, o ta ge hoana Tita ǃoa nîra ǂgae.

³³(Tsîb ge nēsa ge mî, ǁgaub nîse, mâ ǁō ai-eb nîra ǁō ǃkhaisa.)

³⁴Os ge ǂnubisa ǁîba ge ǃeream: Sida ge ǂhanuba xu ge ǁnâu, Xristub nî ǀamose hâsa; tsî matits ǁnâi satsa: Khoen Ôab ge nîra ǀgapiǀgapihe, ti a mî ǁkhā? Tariba kha ǁnā Khoen Ôaba? ti.

³⁵Ob ge Jesuba ǁîn ǃoa ge mî: ǂKhari ǁaero-eb ge ǃnâba ganupe sadu ǀkha nî hâ. ǃGûǃnâ bi, ǃnâba du ūhâ hîa, îb ǃkhaenaba sado tā ǃkhō. ǃKhaenab ǃnâ ra ǃgû-i ge a ǀū, mâǀî i ra ǃgû ǃkhaisa.

³⁶ǃNâba du ūhâ hîa ǃnâb ǃnâ ǂgom re, î du ǃnâb di ôa kai. Nēnab ge Jesuba mî, ǃnubaib ge ǃgûbē tsî ǁîna xu ge gaugausen.

³⁷Tsî ǁnātikō ǂgui saodeb ge ǁîn aiǃâ gere dī, xawen ge ǁîb ǃnâ ǂgom tama ge i,

³⁸mîs kēbo-aob Jesajab dis nî ǀoaǀoahese, nēti ra mîsa: “ǃKhūtse, tari-e sige aoǁnâsa ra ǂgom? Tsî tari-eb ǃKhūb di ǁôaba ǂhaiǂhaibahe hâ?”

³⁹ǁNā-amagan ge ǂgom ǁoa ge i, Jesajab ra ǁkhawa mî xui-ao:

⁴⁰“Mûdi ânab ge ǂgī kai, tsî ǂgaob ânab ge karokaro, mûdi ǀkhan mû tidese, tsî ǂgaob ǀkhan ǁnâuǃā tidese, tsîn ǃhobasen tidese, tsî ta ǁîna ǂgauǂgau tidese.”

⁴¹Nēnab ge Jesajaba ge mî, ǁîb ǂkhaisibab ge mû, tsî ǁîb xab gere ǃhoa ǃnubai.

⁴²Tsî ǁnāti ī xawe gu ge ǁkhāti ǂgui ǂamkhoega ǁîb ǃnâ ge ǂgom; xawe Farisegu ǃaroma gu ge ǁîsa ǁguiǁnâ tama ge i, sinagogeba xu gu ǂhāǂuihe tidega;

⁴³khoen ǃgôaba gu ge Elob di ǃgôab ǃgâ-ai ǀnam i xui-ao.

⁴⁴Tsîb ge Jesuba ǂgai tsî ge mî: Tita ǃnâ ra ǂgom-i ge tita ǃnâ ǂgom tama-e, tsî i ge tita ge sîb ǃnâ ra ǂgom,

⁴⁵tsî tita ra mû-i ge tita ge sîba ra mû-e.

⁴⁶ǃNâ-i ase ta ge tita ǃhūbaib ai ge hā, mâ-i hoa-i tita ǃnâ ra ǂgom-i ǃkhaenab ǃnâ hâ tidese.

⁴⁷Tsî khoe-i ga ti mîde ǁnâu, tsî ǂgom tama i, ǁnā-e ta tita ǀgoraǃgâ tide; ǃhūbaiba ta nî ǀgoraǃgâse ta hā tama, tsî ǃhūbaiba ta nî ǃgâiǃō kaise ta ge hā xui-ao.

⁴⁸Tita kara ǃharaxū-i, tsî ti mîde ǃkhōǃoa tama i ge ǀnai ǁî-e ra ǀgoraǃgâ-e ūhâ: Mîs tita gere ǃhoas, ǁîs ge ǁî-e nîra ǀgoraǃgâ ǀuni tsēs ai.

⁴⁹Tita ge tita xa aitsama ǃhoa tama hâ; xawe Abob, tita ge sîb, ǁnāb ge mîmā-e ge mā te, tare-e ta nî mî tsî ǃhoa ǃkhaisa.

⁵⁰Tsî ta ge a ǂan, ǁîb di mîmās a ǀamo ûi ǃkhaisa. O ta ge ǃhoa ta rana, Abob ge tita mîba khami ra ǃhoa.