Read Khoekhoegowab Johaneb 13 Bible Online

Johaneb 13 - Khoekhoegowab bible

Johaneb 13

¹Tsî Pasxakaitsēs aiǃâ, Jesub ge ǂan io, iri âb, ǁîb aib nî nē ǃhūbaiba xu ǁGûb ǃoa ǃgûb go hā ǃkhaisa, ob ge ǁîb din, ǃhūbaib ai hâna, ǁînab ge ǀnam hâ i khami ǀunis kōse ge ǀnam.

²Tsî ǃuiǂûǁaeb ge hāo, ǀnaib ǁgâuaba Judab, Simonni ôab, Iskarioǁîb di ǂgaob ǃnâ mâ hîa, ǀapexū bib nîsa,

³tsî Jesub ge ǂan io, hoanab ǁGûba ǁîb di ǃomǁae mā hâ ǃkhaisa, tsî Eloba xub ge ǂoa, tsî Elob ǃoab ra ǃgûsa,

⁴ob ge ǃuiǂûsa xu khâi, tsî saran âba ǂgaeǂui, tsî ǃuri ǃkhaiba ū tsî ǁîb ǀkha ge ǃgaesen.

⁵ǁNās khaoǃgâb ge ǁgam-e ǃore-i ǃnâ ǂnâ, tsî ǁkhāǁkhāsabegu di ǂaide ge ǁātsoatsoa, tsî ǃuri ǃkhaib, ǁîb ǀkhab ǃgaesen hâb ǀkha ge ǀomǀkhā.

⁶Tsî Simon Petrub tawab ge sīo, ob ge ǁnāba ǁîb ǃoa ge mî: ǃKhūtse, satsa kha ǁnâi ti ǂaira nî ǁā?

⁷Ob ge Jesuba ǃeream tsî ǁîb ǃoa ge mî: Dī ta ra-ets nēsi a ǀū, xawets ge nēn khaoǃgâ nîra ǂan.

⁸Ob ge Petruba ge mîǀî bi: Tātsē, tātsēts ge satsa ti ǂaira ǁā tide. Ob ge Jesuba ǁîba ge ǃeream: ǁĀ tsi tama ta ga io, ots kom tita ǃnâ amǃnâ-e ūhâ tamao ti.

⁹Ob ge Simon Petruba ǁîb ǃoa ge mî: ǃKhūtse ti ǂaira ǀguira tama, îts ǃomkha tsî danas ona ǁā.

¹⁰Ob ge Jesuba ǁîb ǃoa ge mî: Khōhe hâ-i kom ǀnî ǁāhesa ǂhâba tamao, ǂaira ǁāhes ǀguis. Hoaragase i kom a ǃanuo. Tsî sago ge ǁkhāti a ǃanu, xawe hoatsama tama.

¹¹ǁÎba nîra ǀapexūbab ge ǂan i amagab ge: Hoatsama tama go ge a ǃanu, ti ge mî.

¹²Tsî ǂaidi âgab ge ǁātoa, tsî saran âbab ge ǂgaeǂgāo, ob ge ǁkhawa tāb tawa ǂnû, tsî ǁîgu ǃoa ge mî: ǂAn go a, tare-e ta goro dība go ǃkhaisa?

¹³Sago ge tita: ǁKhāǁkhā-aotse tsî: ǃKhūtse, ti ra ǂgai, tsî go ǁnāsa ǂhanuse ra mî: ǁÎ ta kom titao.

¹⁴Tsî ta ǁnâi tita, sago ǃKhū tsî ǁkhāǁkhā-aota sago ǂaide goro ǁāo, o go ge sago ona surudegu hâ, ǂaide ǁābagusa.

¹⁵Aiǁgau-e ta go mā go, sago on nî dīga, tita goro dība go khami.

¹⁶Amase, amase, ta ra mîba go: ǃGāb ge ǁîb ǀhonkhoeb xa kai tama hâ, tsî sîsabeb ge ǁîba ge sîb xa kai tama hâ.

¹⁷Nēna ǂan tsî go ga ǁîna dīo, o go ge a ǃgâiǃō.

¹⁸Sago hoago xa ta mî tama. ǂAn ta a, mâga ta ǃkhōǂuibasen hâsa; xawes ge nēsa go ī, xoas nî ǀoaǀoahese: “Tita ǀkha ra pereǂûb ge ǃnôas âba tita ǃoagu ge ūkhâi” ti.

¹⁹ǀNai nēsi ta ge ǁîna ra mîba go, ǃnae taman hâ hîa, ǃnaen ka ǃnubai go nî ǂgom ga, tita a ǁî ǃkhaisa.

²⁰Amase, amase ta ra mîba go: Tita nî sîba kara ǃkhōǃoa-i ge tita ra ǃkhōǃoa-e; tsî tita kara ǃkhōǃoa-i ge tita ge sîba ra ǃkhōǃoa-e.

²¹Tsî nēnab ge Jesuba mîo, ob ge gagas ǃnâ gongonhe tsî ǃkhō-am tsî ge mî: Amase, amase ta ra mîba go, ǀguib âgo nî tita ǀapexūsa.

²²O gu ge ǁkhāǁkhāsabega ge kōǀîgu tarib xab ra ǁnāsa mî ǃkhaisa, îganǀgē tsî.

²³Tsîb ge ǁkhāǁkhāsabegu âb di ǀguib, tāb tawa ǂnôaba Jesub di ǃâǃnâb tawa ge ǃgâsen hâ i, Jesub ge ǀnam iba.

²⁴ǁÎbab ge Simon Petruba ge nape, dîb nîse, tarib a ǃkhaisa ǁîb xab goro ǃhoaba.

²⁵Ob ge ǁîba Jesub di ǁkhaiǂams ǃoa ǂōsen tsî ǁîb ǃoa: ǃKhūtse, tariba a ǁî? ti ge mî.

²⁶Ob ge Jesuba ge ǃeream. ǁNāb ge ǁîb, ǁîba ta pereǃâro-e ǀobeba tsî nî māba, ti. Ob ge pereǃâro-e ǀobe tsî Judab, Simonni ôab Iskarioǁîba ge mā.

²⁷Tsî pereǃâro-i khaoǃgâb ge Satanna ǁîb ǃnâ ge ǂgâ. Ob ge Jesuba ge mîǀî bi: Dīts ra-e ǃhaese dī!

²⁸Tsî ǀguib xaweb, tāb tawa ǂnôagu dib ge ǂan tama ge hâ i, tare xū-i ǃaromab go ǁnāsa ǁîb ǃoa mî ǃkhaisa.

²⁹ǀNîgu ge ge ǂâi, Judab mariǁhōsa ūhâ amagab ra Jesuba mîǀî bi: Kaitsēs ǃoa ge ǂhâba hâna ǁama, tamas ka io, ǀgâsanab nî xū-e māsa.

³⁰Tsî pereǃâro-eb ge ūo, ob ge ǁnātimîsi ge ǂoa; tsî i ge tsuxu ge i.

³¹Tsî Judab ge ǂoao, ob ge Jesuba ge mî: Nēsib ge Khoen Ôaba ǂkhaiǂkhaihe hâ, tsîb ge Eloba ǁîb ǃnâ ǂkhaiǂkhaihe hâ.

³²Tsî Elob ga ǁîb ǃnâ ǂkhaiǂkhaihe hâo, ob ge ǁkhāti Eloba ǁîba ǁîb ǂûb ǃnâ nîra ǂkhaiǂkhai, tsîb ge ǃhaese nîra ǂkhaiǂkhai bi.

³³ǀGôarogo, ǂkhari ǁaero-i ǀgui-e ta sago ǀkha nî hâ. O go ge tita nî ôa; tsî Jodeǁîn ǃoa ta gere mî khami: “Tita ra ǃgûba du ge a sī ǁoa” ǁnās ǁkhās khami ta ǁkhāti nēsi sago ǃoa ra mî.

³⁴ǀAsa mîmā-e ta ra mā go: ǀNamgu go nî, ti; tita ge sago ǀnam is ǁkhās khami go nî sago ǀnamgu.

³⁵Nēs tawan ge hoana nî mûǂan, ti ǁkhāǁkhāsabe go asa, ǀnamguba go ga sago ǃnâ ūhâo.

³⁶Ob ge Simon Petruba ǁîb ǃoa ge mî: ǃKhūtse, mâǀîts kha ra ǃgû? Ob ge Jesuba ge ǃeream bi: Tita ra ǃgûpats ge nēsi a sao te ǁoa; xawets ge ega nîra sao te.

³⁷Ob ge Petruba ǁîb ǃoa ge mî: ǃKhūtse, tare xū-i ǃaroma ta kha nēsi a sao tsi ǁoa? Ti ûiba ta kom satsa nî mâibao.

³⁸Ob ge Jesuba ge ǃeream bi: Sa ûibats kha satsa tita nî mâiba? Amase, amase ta ra mîba tsi: Anib nî ās aiǃâts ge satsa ǃnona ǃnāde nî ǀūxū te.