Read Khoekhoegowab Johaneb 14 Bible Online

Johaneb 14 - Khoekhoegowab bible

Johaneb 14

¹Tsîb ge ǁîb ǁkhāǁkhāsabegu ǃoa ge mî: ǂGaob âgo ab tā ǃhuri. Elob ǃnâ ǂgom, î go ǁkhāti tita ǃnâ ǂgom!

²Ti Îb di ommi ǃnâ di ge ǂgui ǃnā-omde hâ. ǁNāti tamas ga io, o ta ga mîba go hâ: ǃGûsī ta ra, hâǃkhai-e ta nî ǂhomiba gose.

³Tsî ǃgû tsî ta nî hâǃkhai-e ǂhomiba go, xawe ta nî ǁkhawa hā, tsî nî sago tita tawa ūsī, î go tita hâpa sago ona hâ.

⁴Tsî mâǀî ta ra ǃgû ǃkhaisa go ge a ǂan, tsî daoba go ǁkhāti a ǂan.

⁵Ob ge Tomaba ǁîb ǃoa ge mî: ǃKhūtse, ǀū ge ge a, mâǀîts ra ǃgû ǃkhaisa, tsî mati ge kha daoba a ǂan ǁkhā?

⁶Ob ge Jesuba ǁîb ǃoa ge mî: Tita ge daota, tsî amata, tsî ûita. Khoe-i xare-i ge Abob tawa a sī ǁoa, tita xu i ga sī tama io.

⁷Tita go ga ǂan hâo, o go ga ti Îb ona ǂan hâ. Tsî nēsisa xu go ge ǁîba a ǂan tsî ǁîba go mû.

⁸Ob ge Filipuba ǁîb ǃoa ge mî: ǃKhūtse, sa Îba ǁgau ge re, o ge ge a ǂkhî.

⁹Ob ge Jesuba ge mîǀî bi: Filiputse, nētikō ǂomxase ta ge sago ǀkha hâ, xawets ǂan te tama hâ? Tita ra mû-i kom ǁGûba ra mû-eo. Matits ǁnâi: Sa Îba ǁgau ge re, ti ra mî?

¹⁰ǂGom tamats hâ, tita Abob ǃnâ hâ ǃkhaisa, tsî Abob tita ǃnâ hâsa? Mîdi, sadu ǃoa ta ra ǃhoade ta kom tita xu ǃhoa tamao; xawe Abob tita ǃnâ ǁan hâb, ǁnāb kom ǁîb di sîsenga ra dīo.

¹¹ǂGom te re, tita Abob ǃnâ hâ ǃkhaisa, tsî Abob tita ǃnâ hâsa; tsî ǁnā tamas ga io, ǁnâi sîsengu ǂûgu ǃaroma ǂgom te re.

¹²Amase, amase ta ra mîba go: Tita ǃnâ kara ǂgom-i, ǁnā-i ge tita ra dī sîsenga ǁkhāti nîra dī, tsî i ge ǁîgu ǃgâ-ai kaiga nîra dī; tita ti Îb ǃoa ra ǃgû xui-ao;

¹³tsî ti ǀons ǃnâ go ga ǂgan xū-i hoa-i, ǁî-e ta nî dī, ǁGûb nî ǀGôab ǃnâ ǂkhaiǂkhaihese.

¹⁴Xū-e go ga ti ǀons ǃnâ ǂgano, o ta ge tita ǁî-e nî dī.

¹⁵Tita go ga ǀnamo, o go nî ti mîmāde ǃkhōǀgaipe!

¹⁶O ta ge tita Aboba nî ǂgan, ob ge ǀnî ǁkhaeǂgao-aoba sago nîra mā, ǀamos kōse sago ǀkha nîra hâhâba,

¹⁷Gagab amab dib, ǃhūbaib a ǃkhōǃoa ǁoaba, ǁîbab mû tsî ǂan tama amaga; xawe go ge sago ǂan bi hâ, sago tawab hâ tsîb nî sago ǃnâ hâhâ xui-ao.

¹⁸ǃOaǀgôase ta sago ǃgoro tide; ǁkhawa ta nî sago ǃoa hā.

¹⁹ǂKhari ǁaero-i ǀgui-i, ob ge ǃhūbaiba ǃaruǀî mû te tide; xawe go ge sago tita nîra mû, tita ûi hâ tsî sago on nîra ûi xui-ao.

²⁰ǁNā tsēs ǁkhās ai go ge nî mûǂan, tita ti Îb ǃnâ, tsî sago tita ǃnâ, tsî tita sago ǃnâ hâ ǃkhaisa.

²¹Ti mîmāde ūhâ, tsî kara ǁîde dī-i ge tita ǀnam hâ-e; tsî tita kara ǀnam-i ge ti Îb xa nîra ǀnamhe-e; tsî tita ge ǁî-e ǀnam, tsî nîra ǂhaiǂhaisenba i.

²²Ob ge Judab, Iskarioǁî tamaba, ǁîb ǃoa ge mî: ǃKhūtse, mati i kha ī, ots sige nîra ǂhaiǂhaisenba, tsî ǃhūbaiba ǂhaiǂhaisenba tide?

²³Ob ge Jesuba ǃeream, tsî ǁîb ǃoa ge mî: Khoe-i ga tita ǀnamo, o i ge ti mîsa nî dī, tsî ti Îb ge ǁî-e nî ǀnam, tsî khom sikhoma ǁî-i ǃoa sī tsî nî ǁî-i tawa ǁanǃkhai-e dībasen.

²⁴Tita ǀnam tama-i, ǁnā-i ge ti mîde dī tama-e tsî mîs, ǁnâu go ras ge ti tamasa, tsîs ge a ǁGûb, tita ge sîb di.

²⁵Nēna ta sago ǃoa goro ǃhoa, sago tawa ta hâ hîa.

²⁶Xawe ǁKhaeǂgao-aob, ǃAnu Gagab, Abob ti ǀons ǃnâ nîra sîb, ǁnāb ge hoana nîra ǁkhāǁkhā go, tsîb ge sago nîra ǂâiǂâi, tita gere mîba gon hoan xa.

²⁷ǂKhîba ta ra ǃgoroba go, ti ǂkhîba ta ra mā go. ǃHūbaib ra mā khami ta tita sago mā tama. Ab ǂgaob âgo tā ǃhuri, îb tā ǃao!

²⁸Sago go ǁnâu, tita goro mîba gosa: ǃGû ta ra, tsî ta nî ǁkhawa sago tawa hā, ti. Tita go ga ǀnamo, o go ge ga ǃgâiaǂgao: ǁGûb ǃoa ta ra ǃgû, tita goro mî ǃkhais xa; Abob tita ǃgâ-ai a kai xui-ao.

²⁹Tsî nēsi ta ǁîsa sago go mîba, ǃnae tamas hâ hîa, î go ga ǃnaes kao, ǂgom.

³⁰ǃAruǀî ta ǂguina sago ǀkha ǃhoa tide. ǂAmsab nē ǃhūbaib dib ǃgoaxa xui-ao, tsîb ge tita ai xū-i xare-e ūhâ tama,

³¹xawe ǃhūbaib nî mûǂan, Aboba ta a ǀnamsa tsî Abob ge mîmā te khami ta ra dī ǃkhaisa. Khâi î ge nēpa xu ǃgû!