Read Khoekhoegowab Johaneb 15 Bible Online

Johaneb 15 - Khoekhoegowab bible

Johaneb 15

¹Tita ge ama-ai ǂauxûiǂûhaita, tsî ti Îb ge ǃhanasîsen-aoba.

²Mâ ǂgona-i hoa-i, tita ǃnâ hâ-i, ǂûtani tama-eb ge ra ūbē; tsî mâ-i hoa-i ǂûtani ra-eb ge ra ǃanuǃanu, ǃaruǀîǀgui i nî ǂûtanise.

³Sago ge ǀnai a ǃanu, sago ǃoa ta gere ǃhoa mîs ǃaroma.

⁴Tita ǃnâ hâ, î ta tita sago ǃnâ hâ. ǂGonab ǁîb ǂûba xu a ǂûtani ǁoa khami, ǂauxûiǂûhais ǃnâb ga hâ tama io, ǁnās ǃkhās khami go ge ǁkhāti sago a ǂûtani ǁoa, tita ǃnâ go ga hâ tama io.

⁵Tita ge ǂauxûiǂûhaita, sago ge ǂgonago. Tita ǃnâ ra hâ-i tsî tita ǁî-i ǃnâ ra hâ-i ǁnā-i ge kaise ra ǂûtani; tita ose du kom xū-e a dī ǁoao.

⁶Tita ǃnâ hâ tama khoe-i, ǁnā-i ge ra aoǂuihe, ǂgona-i xase, tsî i ra ǂnâ; tsîn ge ǀhaoǀhaohe, tsî ǀaes ǃnâ aoǂgāhe tsî ra khauǃkhūhe.

⁷Tita ǃnâ go ga hâo, tsî ti mîdi ga sago ǃnâ hâo, o go ge ǂgao go ka-i hoa-e a ǂgan ǁkhā, o i ge nî ība go.

⁸Nēs ǃnâb ge ti Îba ǂkhaiǂkhaihe hâ, kaise go ga ǂûtanio, tsî ti ǁkhāǁkhāsabe go kao.

⁹ǁGûb tita ǀnam hâ khami ta ge tita ona sago ǀnam hâ. Hâhâ re ti ǀnammi ǃnâ!

¹⁰Ti mîmāde go kara dīo, o go ge ti ǀnammi ǃnā nî hâhâ, tita ti Îb di mîmāde dī tsî ǁîb di ǀnammi ǃnâ ra hâhâ khami.

¹¹Nēna ta sago ǃoa goro ǃhoa, ti ǃgâiaǂgaob nî sago ǃnâ hâhâse, tsîb nî sago ǃgâiaǂgaoba ǀoase.

¹²Nēs ge ti mîmāsa, ǀnamgu go nî, ti, tita ge sago ǀnam hâ i khami.

¹³Nē-i ǃgâ-ai kai ǀnam-e i ge khoe-e ūhā tama, khoe-i nî ǁî-i khoen ǃaroma ǁî-i ûiba mā, ti.

¹⁴Sago ge a ti khoe, tita ra mîmā gona go kara dīo.

¹⁵ǃAruǀî ta sago “ǃgāgo” ti ǂgai tide, ǃgā-i a ǀū, ǀhonkhoeb â-i ra dī-e xui-ao. Xawe ta ge sago “khoego” ti ge ǂgai, ti Îba xu ta ge ǁnâun hoana ta ge sago ge ǂanǂan xui-ao.

¹⁶Sago ge tita ǃkhōǂuibasen tama hâ; xawe ta ge tita sago ǃkhōǂuibasen hâ, tsî ta ge ge mâi go, ǃgû tsî go nî ǂûtanise, tsîs nî sago di ǂûsa hâhâse, îb Aboba ti ǀons ǃnâ go ga ǂgan-i hoa-e sago mā.

¹⁷Nēsa ta ra mîmā go, ǀnamgu go nîse.

¹⁸ǃHūbaib ga sago ǁkhano, ǂan, titab ge sago aiǃâ ǁkhan hâ i ǃkhaisa.

¹⁹ǃHūbaiba xu go ga hâo, ob ga ǃhūbaiba ǁîb di-e ǀnam; xawe ǃhūbaiba xu go hâ tama, tsî tita sago ǃhūbaiba xu ǃkhōǂuibasen hâ amagab kom ǃhūbaiba sago ra ǁkhano.

²⁰ǁNā mîs, tita gere mîba gos xa ǂâiǂâisen: ǃGā-i ǁî-i ǀhonkhoeb xa kai tama ǃkhaisa. Titan ga ǃgôaǃgono, on kom sago ona nî ǃgôaǃgono; ti mîsan ga dī hâo, on kom sago dis ona nî dīo.

²¹Tsîn ge nēn hoana sago nîra dī ti ǀons ǃaroma, tita ge sîban ǂan tama amaga.

²²Hā tsî ta ga ǁîn ǃoa ǃhoa tama io, on ga ǁore-i xare-e ūhâ tama i hâ, xawe nēsin kom ǀhapiokaisen-i ǁîn ǁoreb di-e ūhâ tamao.

²³Tita ra ǁkhan-i ge ti Îb ona ra ǁkhan-e.

²⁴ǁNā sîsenga ta ga ǁîn ǃnâ dī tama i hâo, ǀkhara-i dī tama hâga, on ga ǁore-i xare-e ūhâ tama i hâ; xawe nēsin ge ǁîga ge mû, tsî tita tsî ti Îb tsîkhoma ra ǁkhan.

²⁵Xawe i ge ra ī, ǁîn di ǂhanub ǃnâ xoahe hâ mîs nî ǀoaǀoahese: “ǀHapi-i osen ge tita ra ǁkhan” ti.

²⁶ǁKhaeǂgao-aob, tita nî Aboba xu sago sîbab, Gagab amab dib, Aboba xu ra ǂoab ga hāo, ǁnāb ge tita xa nîra ǃkhō-am.

²⁷Tsî sago on ge nîra ǃkhō-am, tsoatsoasa xu go ge tita ǀkha hâ i xui-ao.