Read Khoekhoegowab Johaneb 16 Bible Online

Johaneb 16 - Khoekhoegowab bible

Johaneb 16

¹Nēna ta ge sago ǃoa gere ǃhoa, ǁgonǁgonǂgaohe go tidega.

²Sinagogeba xun ge sago nîra ǂhāǂui. Ā, iri, ge nîra hâ, o i ge sago kara ǃgam-i hoa-e Eloba i ǁnās ǀkha ra ǃoaba, ti nî ǂâi.

³Tsîn ge nēna nîra dī, Abob tsî tita tsîkhoman ǂan tama hâ xui-ao.

⁴O ta ge ǁîna sago go mîba, iri ga hā ǃnubai go nî ǁîn xa ǂâiga, mî ta gere ǃkhaisa. Tsî ta ge ǁîna tsoatsoasa xu mîba go tama hâ, sago ǀkha ta ge hâ i xui-ao.

⁵Xawe ta ge nēsi ra ǃgû tita ge sîb ǃoa; tsî ǀguib âgo xaweb ge: Mapats ra ǃgû? ti dî te tama hâ.

⁶Xawe nēna ta go mîba go amagab ge ǂgaob âgo ǃoab xa go ǀoa.

⁷Xawe ta ge amaba ra mîba go: ǃGâiba go a, ǃgû ta ra ǃkhaisa. ǃGû tama ta ga io, ob kom ǁKhaeǂgao-aoba sago ǃoa hā tideo. Xawe ǃgû ta karao, o ta ge ǁîba sago ǃoa nîra sî.

⁸Tsî ǁnāb kara hāo, ob ge ǃhūbaiba nîra ǃhoadan ǁoreb xa, tsî ǂhanu-aisib xa, tsî ǀgoraǃgâs xa.

⁹ǁNā ǁoreb xa: Tita ǃnân ǂgom tama, ti.

¹⁰Tsî ǁnā ǂhanu-aisib xa: Ti Îb ǃoa ta ra ǃgû, tsî go ǃaruǀî mû te tide, ti.

¹¹Tsî ǁnā ǀgoraǃgâs xa: Nē ǃhūbaib di ǂamsab ǀgoraǃgâhe hâ, ti.

¹²ǂGuin ganupe ta nî mîba gona ta ūhâ, xawe go ge nēsi a tani ǁoa.

¹³Xawe ǁnāb, amab di Gagab kara hāo, ob ge ǁîba hoaraga amab ǃnâ nîra ǂgaeǂgui go. ǁÎb ǂûb xab ǃhoa tide xui-ao; xaweb ge ǁnâub rana ǃhoa, tsî ǃgoaxana nîra ǂhôa go.

¹⁴ǁÎb ge tita nîra ǂkhaiǂkhai; tin xa ū tsîb nî sago ǂhôa xui-ao.

¹⁵Abob ūhân hoan ge a ti: ǁNā-amaga ta ge tin xa ū tsîb nî sago ǂhôa, ti go mî.

¹⁶ǂKhari ǁaero-i, o go ge tita mû tide, tsî ǁkhawa ǂkhari ǁaero-i, o go ge tita nîra mû; Abob ǃoa ta ra ǃgû xui-ao.

¹⁷O gu ge ǀnî ǁkhāǁkhāsabegu âba ge mîǀîgu: Tare-e, nēb ra sige mîba-e: ǂKhari ǁaero-i, o go tita mû tide, tsî ǁkhawa ǂkhari ǁaero-i, o go tita nîra mû tsî: Abob ǃoa ta ra ǃgû?

¹⁸O gu ge ge mî: Tare-e kha nē-e: ǂKhari ǁaero-i, tib ra mî-e. Sage ge a ǀū tare-eb ra mîsa.

¹⁹Tsî Jesub ge ǂan, ǁîba gu ra dî ǂgao ǃkhaisa, ob ge ǁîgu ǃoa ge mî: Nēs xa go kha ra dîgu: ǂKhari ǁaero-i, o go tita mû tide, tsî ǁkhawa ǂkhari ǁaero-i, o go tita nîra mû, ti ta goro mî amaga?

²⁰Amase, amase ta ra mîba go: Sago ge ā tsî nîra ǃgae, xaweb ge ǃhūbaiba nîra ǃgâiaǂgao; sago ge nîra ǃoa, xaweb ge ǃoab âgo nîra ǃgâiaǂgao kaihe.

²¹Taras, ǁoras rao, os ge ǃoa-e ūhâ, iri âs go hā xui-ao; xawe ǀgôaro-es ra hō-o, os ge ǃaruǀî ǂōǂōsib xa ǂâi tama hâ, khoe-i go ǃhūbaiba ǃnaeba ǃkhais ǃaromas ra ǃgâiaǂgao xui-ao.

²²Tsî sago ge nēsi ǃoa-e ūhâ; xawe ta ge sago ǁkhawa nîra mû, ob ge ǂgaob âgo nîra ǃgâiaǂgao, tsî khoe-i xare-i ge ǃgâiaǂgaob âgo ūǀhana go tide.

²³Tsî ǁnātsē go ge xū-i xare-e dî te tide. Amase, amase ta ra mîba go: ǁGûba go ga ǂgan xūn hoanab ge sago ti ǀons ǃnâ nîra mā.

²⁴Nēsis kōse go ge ti ǀons ǃnâ xū-i xare-e ǂgan tama hâ. ǂGan, o go ge nîra ǃkhōǃoa, îb ǃgâiaǂgaob âgo ǀoa.

²⁵Nēna ta ge ǂkhōdi ǃnâ sago ǃoa goro ǃhoa. Xaweb ge ira nîra hā, o ta ǃaruǀî ǂkhōdi ǃnâ sago ǃoa ǃhoa tide, o ta ǂhauǃnâse Abob xa nîra ǂhôa go.

²⁶ǁNātsē go ge ti ǀons ǃnâ nîra ǂgan. Tsî ta nî Abob tawa sago ǂganba ǃkhaisa ta mîba go tama.

²⁷Abob kom aitsama sago ǀnam hâo, sago tita ǀnam hâ, tsî Eloba xu ta ge ǂoa ǃkhaisa go ǂgom hâ amaga.

²⁸Aboba xu ǂoa, tsî ta ge ǃhūbaib ai ge hā; o ta ge ǁkhawa ǃhūbaiba ǁnāxū, tsî Abob ǃoa ra ǃgû.

²⁹O gu ge ǁkhāǁkhāsabegu âba ge mî: Kō, nēsits ra ǂhauǃnâse ǃhoa, tsîts ǂkhō-i ǃnâ mî tama.

³⁰Nēsi ge ge a ǂan, hoanats a ǂan, tsî khoe-i nî dî tsisa ǂhâbasa tama ǃkhaisa. ǁÎ ǃkhaisa xu ge ge ra ǂgom, Eloba xuts ge ǂoa ǃkhaisa.

³¹Ob ge Jesuba ge ǃeream gu: ǂGom go ra nēsi?

³²Mû, iri ge nîra hā, tsî ǀnaib ge go hā, o go ge nîra ǀgaruǀgaruhe, mâb hoaba ǁîb di-i ǃoa, tsî go nî tita ǀguri ǃgoro; xawe ta ǀguri hâ tama, Abob kom tita ǀkha hâo.

³³Nēna ta sago ǃoa goro ǃhoa, tita ǃnâ go nî ǂkhîba ūhâse. ǃHūbaib ǃnâ go ǂōǂōsi-e ūhâ; xawe ǃgâiǂâixa re, tita ge ǃhūbaiba ge dan.