Read Khoekhoegowab Johaneb 17 Bible Online

Johaneb 17 - Khoekhoegowab bible

Johaneb 17

¹Nēnab ge Jesuba ǃhoa, tsî mûra âba ǀhommi ǃoa ǃhâkhâi, tsî ge mî: Abotse, iri ge go hā; ǂkhaiǂkhai sa Ôaba, îb sa Ôaba satsa ǂkhaiǂkhai,

²ǀgai-ets mā bi hâ khami ǁgans hoas ǂama, ǁîbats ge mān hoanab nî ǀamo ûiba māse.

³Tsî nēb ge ǀamo ûiba, sats ǀguise ama-ai Elots, tsî sats ge sîb Jesub Xristub onan nî ǂan ǃkhaisa.

⁴Tita ge satsa ǃhūbaib ai ge ǂkhaiǂkhai, ǁnā sîsenni, dī ta nîsets ge mā teba ta ge dītoas ǀkha.

⁵Tsî nēsi ǂkhaiǂkhai te re, Abotse, sats ǂûts tawa, ǁnā ǂkhaisib, ǃhūbaib ge īs aiǃâ ta ge sa tawa ūhâ ib ǀkha.

⁶Sa ǀonsa ta ge ǁnā khoena ge ǂhaiǂhaiba, ǃhūbaiba xuts ge mā tena. Sa din ge ǁîna ge i, tsîts ge ǁîna tita ge mā, tsîn ge sa mîsa ge sâu.

⁷On ge nēsi mûǂan hâ, titats ge mān hoan satsa xu hâ ǃkhaisa.

⁸ǁNā mîdi, sats ge tita māde ta ge ǁîna mā xui-ao; tsîn ge ǁîde ge ǃkhōǃoa, tsîn ge amase ge mûǂan, satsa xu ta ge ǂoa ǃkhaisa, tsîn ge ǂgom hâ, sats ge tita sî ǃkhaisa.

⁹Tita ge ǁîna ra ǀgoreba; ǃhūbaiba ta ǀgoreba tama, xawe sats ge tita māna ta ra ǀgoreba, sa din a amaga.

¹⁰Tsî tin hoan ge a sa, tsî san hoan ge a ti; tsî ta ge ǁîn ǃnâ ǂkhaiǂkhaihe hâ.

¹¹Tsî ta ge tita ǃaruǀî ǃhūbaib ai hâ tama hâ; xawen ge ǁîna ǃhūbaib ai hâ, tsî ta ge tita sa tawa ra sī. ǃAnu Abotse, sa ǀons ǃnâ ǁîna sâu re, titats ge māna, în ǀgui, sakhom a ǀgui khami.

¹²ǃHūbaib ai ta ǁîn ǀkha hâ hîa ta ge ǁîna sa ǀons, titats ge mās ǃnâ ge sâu, tsî ta ge ǁîna ge ǃûi, tsî ǀgui-i ân ge kā tama hâ, kāǁōsib di ǀgôab ǀguib, xoas nî ǀoaǀoahese.

¹³Tsî nēsi ta sa tawa ra sī, tsî ta nēna ǃhūbaib ai ra ǃhoa, ti ǃgâiaǂgaoban nî ǀoa hâse ǁîn ǃnâ ūhâga.

¹⁴Tita ge ǁîna sa mîsa ge mā, tsî ǃhūbaib ge ǁîna ra ǁkhan, ǃhūbaiba xun hâ tama amaga, tita on ǃhūbaiba xu hâ tama khami.

¹⁵ǃHūbaiba xuts nî ǁîna ūbē, ti ta ǀgore tama, xawe ǂkhababa xuts nî ǁîna sâu, ti ta ra ǀgore.

¹⁶ǃHūbaiba xun ǁîna hâ tama, tita on ǃhūbaiba xu hâ tama khami.

¹⁷ǁÎna ǃanuǃanu amab ǃnâ, sa mîs ge a ama.

¹⁸Titats ge ǃhūbaib ai sî khami ta ge tita ona ǁîna ǃhūbaib ǃoa ra sî.

¹⁹Tsî ǁîn ǃaroma ta ti aitsama ra khaisen, ǁîn on nî ǃanuǃanuhega amab ǃnâ.

²⁰Tsî ta ǁîn ǀguina ǀgoreba tama, xawe ta ǁkhāti ǁîn di mîsa xu tita ǃnâ nîra ǂgomna ra ǀgoreba,

²¹în hoana ǀgui, sats Abots ge ti ǃnâ, tsî tita sa ǃnâ ǀguis ǁkhās khami; în ǁîn ona sakhom ǃnâ ǀgui, ǃhūbaib nî ǂgomga, sats ge tita sî ǃkhaisa.

²²Tsî ta ge ǁîna ǁnā ǂkhaisib, titats ge māba ge mā, în ǀgui, sakhom a ǀgui khami.

²³Tita ǁîn ǃnâ, tsî satsa tita ǃnâ; în dīǀoaǀoahe hâse ǀgui, îb ǃhūbaiba mûǂan, sats tita ge sî ǃkhaisa, tsîts ǁîna ǀnam hâ ǃkhaisa, titats ǀnam hâ khami.

²⁴Abotse, ǂgao ta ra, tita hâpa, ǁnāpan nî ǁkhāti titats ge māna hâ ǃkhaisa, în ti ǂkhaisiba kō, sats ge mā teba; ǃhūbaib ganupe ǃgaoǃgaohe tama hâ hîats ge tita ǀnam i xui-ao.

²⁵ǂHanu-ai Abotse, ǃhūbaib ge satsa ǂan tama hâ; xawe ta ge tita a ǂan tsi, tsî nēn on ge a ǂan, sats tita ge sî ǃkhaisa.

²⁶Tsî ta ge ǁîna sa ǀonsa ge ǂanǂan, tsî nîra ǂanǂan si, îb ǁnā ǀnammi titats ra ǀnamūba ǁîn ǃnâ hâ, î ta tita ǁîn ǃnâ hâ.