Read Khoekhoegowab Johaneb 18 Bible Online

Johaneb 18 - Khoekhoegowab bible

Johaneb 18

¹Nēnab ge Jesuba ǃhoa, ob ge ǁîb di ǁkhāǁkhāsabegu ǀkha ǂoa, tsî ǃārob Kidronni nauǃani ge ǃgâu; ǁnāpab ge ǃhanaba ge hâ i, ǁîb ǃnâb ge Jesuba ge ǂgâ tsî ǁîb di ǁkhāǁkhāsabegu tsîna.

²Tsî Judab, ǀapexū bi geb ge ǁkhāti ǁnâ ǃkhaisa ǂan ge i, Jesub ge ǁnāpa ǁîb di ǁkhāǁkhāsabegu ǀkha ǁaekorobe gere ǀhû amaga.

³Ob ge Judaba toroǂnubis tsî ǀgapipristergu tsî Farisegu tsîgu di ǃgāga ū, tsî ǁnāpa ge sī, ǃamamǀaedi tsî lanterndi tsî ǁâtanin tsîn ǀkha.

⁴Tsî Jesub ge ǁîb ai nîra hān hoana ǂan io, ob ge ǂoa, tsî ǁîn ǃoa: Tari-e go ra ôa? ti ge mî.

⁵O gu ge ge ǃeream bi: Jesub Nasareǁîba ti. Ob ge Jesuba ǁîgu ǃoa: Tita ge ǁî ta, ti ge mî. Tsî Judab ǀapexū bi geb ge ǁkhāti ǁîgu ǀkha ge mâ i.

⁶Tsî Jesub ge: Tita ge ǁî ta, ti mîo, o gu ge ǃgâǃgâbē, tsî ǃhūb ai ge ǁnā.

⁷Ob ge ǁkhawa ǁîga: Tari-e go ra ôa? ti ge dî. O gu ge ǁîga Jesub Nasareǁîba, ti ge mî.

⁸Ob ge Jesuba ge ǃeream: Mîba go ta go, tita a ǁî ǃkhaisa; tita go ga ǁnâi ôao, î gu ǁnâi nēga ǃgû! ti.

⁹ǁNā mîs, ǃhoab ges nî ǀoaǀoahese: Titats ge mān xa ta ǀgui-i xare-e kā kai tama hâ, ti.

¹⁰Ob ge Simon Petrub gôaba ūhâba ǂgaeǂui, tsî ǀgapipristeri di ǃgāba ǂnau, tsî ǁîb amǀkhāb ǂgaesa ge ǂnauǁnâ; tsî ǁnā ǃgāb ge Malxub ti ge ǀon hâ i.

¹¹Ob ge Jesuba Petrub ǃoa ge mî: Gôab âtsa ǂgā ǁhōb ǃnâ! Ā ta tide, Abob ge mā te ǀgabisa?

¹²On ge ǂnubis tsî danakhoeb tsî Jodeǁîn di ǃgāgu tsîna Jesuba ǃkhō, tsî ge ǃgae bi,

¹³tsî ǁîba ǂguro Annab ǃoa ge ǂgaeǂgui; ǁîb ge Kajafab, ǁnā kurib ai ǀgapiprister ge ib taras di î-i xui-ao.

¹⁴Tsî Kajafab ge ǁnāb Jodeǁîna ge ǀapemāba, ǃgâi i ka ǃkhaisa, ǀgui khoe-i nî ǁaesa ǁōba ǃkhaisa.

¹⁵Tsî Simon Petrub tsî ǀnî ǁkhāǁkhāsabeb tsîkha ge Jesuba ge sao; tsîb ge ǁnâ ǁkhāǁkhāsabeba ǀgapipristeri tawa ge ǂansa i, tsî Jesub ǀkha ǀgapipristeri di ai-ommi ǃnâ ge ǂgâ.

¹⁶Tsî Petrub ge dao-ams ǃauga ge mâ i. Ob ge nau ǁkhāǁkhāsabeb, ǀgapipristeri tawa ǂansa ge iba ǂoa, tsî daos ǃûi-aos ǀkha ǃhoa, tsî Petruba ge ūǂgâxa.

¹⁷Os ge ǃgās, daos ǃûi-aosa Petrub ǃoa ge mî: Sats ona kha nē khoeb ǁkhāǁkhāsabegu di ǀgui tamatsa? Ob ge: ǁÎ tama ta, ti ge mî.

¹⁸Tsî gu ge ǃgāgu tsî sîsenaogu tsîga ge mâ i, ǂnomǀae-e khau tsî, ǃkhai ge i amaga, tsî gere sâ; tsî Petrub ge ǁîgu ǀkha mâ tsî gere sâ.

¹⁹Tsî ǀgapipristeri ge Jesuba ǁkhāǁkhāsabegu âb tsî ǁkhāǁkhās âb xa gere dîǃā.

²⁰Ob ge Jesuba ge ǃeream: Tita ge ǂhauǃnâse ǃhūbaib ǃoa gere ǃhoa. Tita ge hugaǀgui sinagogeb tsî tempeli, hoa Jodeǁîn ra ǀhûǃnâb ǃnâ gere ǁkhāǁkhā, tsî ǂganǃgâsib ǃnâ ta ge xū-i xare-e ǃhoa tama hâ;

²¹tarexats tita ra dîǃā? ǁNâu gena dîǃnâ, tarena ta ge ǁîna ǃhoa-ū ǃkhaisa. Mû, ǁîn ge a ǂan, tarena ta gere ǃhoa ǃkhaisa.

²²Tsî nēnab ra ǃhoa hîab ge ǃgāgu di ǀguib, ǁnāpa mâba Jesuba ǁapu, tsî: ǁNātits kha ǀgapipristera ra ǃeream? ti ge mî.

²³Ob ge Jesuba ge ǃeream: ǂKhabase ta ga ǃhoa hâo, ǁnâi ǂkhabab xa ǃhoadan te, tsî ǃgâise ta ga ǃhoa hâo, tarexats ǁnâi ra ǂnau te? ti.

²⁴Ob ge Annaba ǁîba ǃgaehe hâse Kajafab ǀgapipristeri ǃoa ge sî.

²⁵Tsî Simon Petrub ge mâ, tsî gere sâ. On ge ǁîb ǃoa ge mî: Sats ona kha ǁîb ǁkhāǁkhāsabegu di ǀgui tamatsa? Xaweb ge ǀoa tsî: ǁÎ tama ta, ti ge mî.

²⁶Ob ge ǀgapipristeri ǃgāgu di ǀguib, Petrub go ǂgaesa ǂnauǁnâb di khoexa ge iba ge mî: ǃHanab ǃnâ ǁîb ǀkha mû tsi tama ta hâ?

²⁷Ob ge Petruba ǁkhawa ge ǂnoa, tsî ǁnātimîsib ge aniba ge ā.

²⁸Tsîn ge Jesuba Kajafaba xu ǂhanuǂhanu-ommi ǃoa ge ǃgû-ū; tsî i ge ǃnauǁgoaga ge i. Tsîn ge ǁîn ǂûna ǂhanuǂhanu-ommi ǃnâ ǂgâ tama ge i, ǀuriǀurisenn tidese, în Pasxaba ǂû ǁkhā,

²⁹Ob ge Pilatuba ǁîn ǃoa ǂoa, tsî ge mî: Mâ ǀhapiǀhapi-ai-e du kha nē khoeb ǃoagu ra ūhā?

³⁰O gu ge ǃeream tsî ge mîǀî bi: Nēb ga ǂkhabadī-ao tama io, o da kom ga satsa māǁnâ bi tama i hâo.

³¹Ob ge Pilatuba ǁîn ǃoa ge mî: Sado ǁnâi ū bi, î sadu ǂhanub ǃoa ǀgoraǃgâ bi. On ge Jodeǁîna ǁîb ǃoa ge mî; Khoe-e ǃgamsa da kom mā-amhe tamao.

³²(Jesub di mîs, mîb ges nî ǀoase ǁgaub geo, mâ ǁō-ai-eb nîra ǁō ǃkhaisa.)

³³Ob ge Pilatuba ǁkhawa ǂhanuǂhanu-ommi ǃnâ ǂgâ, tsî Jesuba ǂgai, tsî ǁîb ǃoa ge mî: Satsa kha Jodeǁîn di gao-aotsa?

³⁴Ob ge Jesuba ge ǃeream: Aitsamats ra satsa xu nē-e mî? Nauna go tita xa mîba tsi? ti.

³⁵Ob ge Pilatuba ge ǃeream Jodeǁîta tita? Sa ǁaes tsî ǀgapipristergu tsîn ge satsa go māǁnâ te. Tare-ets go dī?

³⁶Ob ge Jesuba ge ǃeream: Ti gaosib ge nē ǃhūbaiba xu hâ tama hâ. Nē ǃhūbaiba xub ga ti gaosiba hâ hâo, o gu ga ti ǃgāga ǃkham hâ, Jodeǁîna ta māǁnâhe tidese; xawe nēsib ge ti gaosiba nēpa xu hâ tama hâ, ti.

³⁷Ob ge Pilatuba ǁîb ǃoa ge mî: Gao-aotsa kha ǁnâi? Ob ge Jesuba ge ǃeream: Sats ra mî, gao-aota asa. ǁÎs ǃoa ta ge ge ǃnae, tsî ǁîs ǃoa ta ge ǃhūbaib ai ge hā, amaba ta nî ǃkhō-ambase. Amaba xu hâ-i hoa-i ge ti domma ra ǁnâu-e.

³⁸Ob ge Pilatuba ǁîb ǃoa ge mî: Tare-e kha ama-e? Tsî nēsa mî tsîb ge ǁkhawa Jodeǁîn ǃoa ǂoa, tsî ge mî: Tita ge ǁîb ǃnâ ǀhapixū-e hō tama hâ.

³⁹Xawe du ge ǁnaeti-e ūhâ, ǀgui-e ta sado Pasxaǁaeb ai nî xūba ǃkhaisa. ǁNâi ǂgao du hâ, Jodeǁîn di gao-aoba ta nî xūba du ǃkhaisa?

⁴⁰On ge ǃgarise ǁkhawa ǂgai tsî ge mî: ǁÎb ose, xawe Barababa! Tsî Barabab ge ǃgamao ge i.