Read Khoekhoegowab Johaneb 19 Bible Online

Johaneb 19 - Khoekhoegowab bible

Johaneb 19

¹ǃNubaib ge Pilatuba Jesuba ū, tsî ge ǂnau kai bi.

²Tsî toro-aogu ge ǁkhūgu xa kron-e ǂgoma, tsî ǁîb danas ai ǂnûi, tsî purpursara-e ana bi,

³tsî ǁîb tawa ǀgū tsî ge mî: Tawede tsi Jodeǁîn gao-aotse! Tsî gu ge ǁîba gere ǁapu.

⁴Ob ge Pilatuba ǁkhawa ǂoa, tsî ǁîn ǃoa ge mî: Mû, sado ta ǁîba ra ūǂoaxaba, mûǂan du nîga, ǀhapi-i xare-e ta ǁîb ǃnâ hō tama ǃkhaisa.

⁵Ob ge Jesuba ge ǂoaxa, ǁkhūkrons tsî purpursarab tsîra anahe hâse. Ob ge Pilatuba ǁîn ǃoa: Mû nē khoeba re! ti ge mî.

⁶Tsî ǀgapipristergu tsî ǃgāgu tsîgu ge mû bio, o gu ge ǂgai tsî: ǃGâu bi! ǃGâu bi! ti ge mî. Ob ge Pilatuba ǁîgu ǃoa ge mî: Sago ǁnâi ū î ǃgâu bi, tita ǁîb ǃnâ ǀhapi-i xare-e hō tama xuige.

⁷On ge Jodeǁîna ge ǃeream bi: Sida ge ǂhanu-e ūhâ tsî sida ǂhanub ǃoab ge ǁōba a anu, ǁîb ge aitsama Elob Ôase dīsen xui-ao.

⁸Tsî Pilatub ge nē mîsa ǁnâu, ob ge ǃaruǀîǀgui ge ǃao.

⁹Tsî ǁkhawa ǂhanuǂhanu-ommi ǃnâ ǂgâ tsîb ge Jesub ǃoa: Mapa xuts hâ? ti ge mî. Xaweb ge Jesuba ǃeream-i xare-e mā bi tama ge i.

¹⁰Ob ge Pilatuba ǁîb ǃoa ge mî: Tita ǀkhats ǃhoa tama hâ? ǂAn tamats kha ǁnâi hâ, ǁnāxū tsi ta nî, ti ī ǀgaiba ta ūhâsa, tsî ǃgâu tsi ta nî ti ī ǀgaiba ta ūhâsa?

¹¹Ob ge Jesuba ge ǃeream: ǀGai-i xare-ets ge tita ǂama ūhâ tama ga i hâ, ǀgapiseba xu i ga satsa māhe tama io; ǁnā-amagab ge tita go satsa māǁnâba, sa dib xa kai ǁore-e ūhâ.

¹²ǁNā ǁaeba xub ge Pilatuba, matib nî ǁîba ǁnāxūsa gere ôa-am; xawen ge Jodeǁîna ǂgai, tsî ge mî: ǁÎbats ga ǁnāxūo, ots kom Kaesari di khoe tamao, ǁî-aitsama ra gao-aodīsen-i hoa-i ge Kaesara mâǃoa hâ-e xui-ao.

¹³Tsî Pilatub ge nē mîde ǁnâuo, ob ge Jesuba ǂgaeǂguiǂui, tsî ǂhanuǂhanuǃnaos ai ge ǂnû, Litostrotos ti ra ǂgaihe ǃkhais ai, tsî Hebreǁîgowab ǃnâ Gabatas ti ra ǂgaihesa.

¹⁴Tsî i ge Pasxab di aiǂhomisen tsē, tsî ǁaupexa ǃnaniǁî ir ge i. Ob ge Jodeǁîn ǃoa ge mî: Mû, nēb ge a sadu gao-ao.

¹⁵Xawen ge: Ūbē, ūbē, î ǃgâu bi! ti gere ǂgai. Ob ge Pilatuba ǁîn ǃoa ge mî: Sadu gao-aoba ta ǁnâi nî ǃgâu? O gu ge ǀgapipristerga ge ǃeream: ǀNî gao-ao-e da ūhâ tama, Kaesari ǀguib, ti.

¹⁶ǃNubaib ge ǁîba ǁîga ge māǁnâ ǃgâuheb nîse. On ge Jesuba ū tsî ge ǃgû-ū bi.

¹⁷Ob ge aitsama ǃgâuhaib âba tani tsî ge ǂoa, danaǂkhōs ǃās, ti ra ǂgaihe ǃkhais ǃoa, Hebreǁîgowab ǃnâ Golgota ti ra ǂgaihesa.

¹⁸ǁNāpan ge ǁîba ge ǃgâu, tsî nau ǀgamkha ǁîb ǀkha ǃnamkha hoakha ai ǀguib, tsî Jesuba ǁaegub ǃnâ.

¹⁹Tsî Pilatub ge ǁkhāti xoaǂam-e ge xoa, tsî ǁîba ǃgâuhaib ai ge ǂnûi; tsî i ge nēti ge xoahe hâ i: Jesub Nasareǁîb, Jodeǁîn di gao-aob, ti.

²⁰Nē xoaǂamsan ge ǂgui Jodeǁîna ge khomai, Jesub go ǃgâu-aihe ǃkhais ge ǃāsa xu ǀgū i amaga; tsîs ge Hebreǁî- tsî Romeǁî- tsî Grikeǁîgowagu ǃnâ ge xoasa i.

²¹O gu ge Jodeǁîn di ǀgapipristerga Pilatub ǃoa ge mî: Jodeǁîn di gao-aob, ti tā xoa; î Jodeǁîn di gao-aota, tib gere mîb ti xoa re.

²²Ob ge Pilatuba: Xoa ta go-i ge xoa ta go-e, ti ge ǃeream.

²³O gu ge toro-aoga Jesuba gu ge ǃgâuo, saran âba ū, tsî ǁîna haka ǃâse ge dī, mâ toro-aob hoaba ǀgui ǃâsa, tsî ǂamsarab ona. Tsî ǂamsarab ge ǂomdao-o ge i, ǀgapiseba xu ǃnagab kōse ǂgāǃnâguhe hâse.

²⁴O gu ge ge mîǀîgu: A ge ǁîba tā ǀkhauǃā, î ge ǁîb ai ǂnoagusa ao tarib dib nîsa. Xoas nî ǀoaǀoahese, nēti ra mîsa: “Ti saranan ge ǁîn ǃnâ ge ǀgoragu, tsî ti ǂamsarab ain ge ǂnōgusa ge ao.” Nēsa gu ge toro-aoga ge dī.

²⁵Tsî di ge Jesub di ǃgâuhaib tawa ǁîb îs, tsî ǁîb îs di ǃgâsas, Marias, Kleofab di taras, tsî Maria Magdalenas tsîde ge mâ i.

²⁶Tsî Jesub ge ǁgûsa mûo, tsî ǁkhāǁkhāsabeb, ǁîb ge ǀnam iba ǁîs tawa mâse, ob ge ǁgûs ǃoa ge mî: Tarase, mû, nēb ge a sa ôa.

²⁷ǁNās khaoǃgâb ge ǁkhāǁkhāsabeb ǃoa ge mî: Mû nēs ge a sa î. Ob ge ǁkhāǁkhāsabeba ǁnā ira xu ǁîsa ǁîb tawa ge ū.

²⁸ǁNās khaoǃgâ, Jesub ge ǂano, hoan go ǀnai dītoahe ǃkhaisa, xoas nî dīǀoaǀoahese, ob ge ge mî: “ǁGâ ta hâ.”

²⁹Tsî i ge ǀkhuruxûi-i xa ǀoa hâ xapa-e ǁnāpa ge mâ i. O gu ge sponsa ǀkhuruxûib ǀkha ǀoaǀoa, tsî hisob ai ǂgā si, tsî ams âb tawa ge ǀhōǃapa si.

³⁰Tsî Jesub ge ǀkhuruxûiba ūo, ob ge ge mî: Dītoahe go! Tsî danasa ǃgam tsîb ge gagasa ge mā.

³¹On ge Jodeǁîna, sorodi sâtsēsa ǃgâuhaib ai hâǃganu tidese, tsî aiǂhomisentsē-i ge i tsî ǁnā sâtsēs ge kai i amaga Pilatuba ge ǂgan, ǀnūgu âga khôahe tsî gu nî ūǁnâhe ǃkhaisa.

³²O gu ge toro-aoga hā tsî ǂgurob ǀnūkha ge khôa, tsî naub, ǁîb ǀkha ǃgâuhe go hâ ib dikha ona.

³³Xawe Jesub tawa sī tsî gu ge mûo, ǀnaib go ǁō ǃkhaisa, o gu ge ǁîb di ǀnūkha khôa tama ge i.

³⁴Tsî toro-aogu di ǀguib ge gôab âb ǀkha, ǁîb di ǃnammi ǃnâ ge ǃkhāǂgā, o kha ge ǁnātimîsi ǀaob tsî ǁgammi tsîkha ge ǀkhī.

³⁵Tsî nēsa ge mûb ge ǁîs xa ra ǃkhō-am, tsî ǃkhō-ams âb ge a ama; tsîb ge a ǂan, amabab ra mî ǃkhaisa, sadu on nî ǂgomse.

³⁶Nēn ge ǃnae xui-ao, xoas nî ǀoaǀoahese: “ǂKhō-i xare-i âb ge khôahe tide” ti.

³⁷Tsî ǁkhawa i ge ǀnî xoa-e ra mî: “ǁÎb ǃnân ge ǃkhāǂgāban ge nîra mû.”

³⁸Nēn khaoǃgâb ge Joseb, Arimateas dib, Jesub di ǁkhāǁkhāsabe ge ib, xawe Jodeǁîna ǃaos xa ǂganǃgâse ge hâ iba Pilatuba ge ǂgan, iseb Jesub di sorosa nî ūǁnâ ǃkhaisa. Ob ge Pilatuba ge mā-am. Ob ge sī tsî Jesub di sorosa ge ūǁnâ.

³⁹Tsîb ge ǁkhāti Nikodemub aibe tsuxuba Jesub tawa ge sība hā, tsî habaguhe hâ miren tsî aukoren tsîna ge ūhā, korodisi litergu nî īs kōse.

⁴⁰O kha ge Jesub di sorosa ū, tsî ǃuri ǃkhain tsî ǃgâihamxūn ǀkha ge ǂgā si, Jodeǁîn ǁkhōs di ǁnaetiba ǃoa.

⁴¹Tsî ǃgâu-aiheb ge ǃkhais ǀgūseb ge ǃhanaba ge hâ i, tsî ǃhanab ǃnâ i ge ǀasa ǁao-i tātsē i ge khoe-e ǁguiǃnâhe tama hâ i-e ge hâ i.

⁴²ǁNāpa kha ge Jesuba ge ǁgui, Jodeǁîn di aiǂhomisentsēs ǃaroma, ǀhobas ge ǀgū i amaga.