Read Khoekhoegowab Johaneb 2 Bible Online

Johaneb 2 - Khoekhoegowab bible

Johaneb 2

¹Tsî ǃnonaǁî tsēs ai i ge ǃgameǁâu-e ge dīhe Kanas tawa Galileab ǃnâ; tsîs ge Jesub îsa ǁnāpa ge hâ i.

²Tsîb ge Jesub ona ǁîb di ǁkhāǁkhāsabegu ǀkha ǃgameǁâus ǃoa ge ǁkhauhe hâ i.

³Tsî ūn ge hâ i ǂauxûi-i ge toaǀkhā nîo, os ge Jesub îsa ǁîb ǃoa ge mî: ǂAuxûi-en kom ūhâ tamao.

⁴Ob ge Jesuba ǁîs ǃoa ge mî: Tare-e ta sas ǀkha ǁae hâ, tarase? Ti iri kom ganupe hā tamao.

⁵Os ge ǁgûsa ǃgāgu ǃoa ge mî: Mîba gob ga xū-i hoa-e dī re.

⁶Tsî di ge ǁnāpa ǃnani ǁgamxapade ge mâ i, Jodeǁîn ǃanuǃanusens di ǁnaetiba ǃoa, mâs hoas ǀgam tamas ka io ǃnona nî ī emerga ǃkhōǂgā ǁkhāde.

⁷Ob ge Jesuba ǁîgu ǃoa ge mî: ǁGamxapade ǁgam-i ǀkha ǀoaǀoa! O gu ge ǁîde ams kōse ge ǀoaǀoa.

⁸Ob ge ǁîgu ǃoa ge mî: Nēsi xuri î go ǂûǂhûiǂui-aoba ūsība! O gu ge ge ūsī.

⁹Tsî ǂûǂhûiǂui-aob ge ǁgam-i, ǂauxûi kai go-e tsâtsâo, (ǂan tamab go hâ i mapa xu i hâsa; xawe ǃgāgu ǁgam-e go xuri gu ge ge ǂan i), ob ge ǂûǂhûi-aoba dî-amaoba ǂgai,

¹⁰tsî ǁîb ǃoa ge mî: Mâ khoe-i hoa-i ge aibe ǃgâi ǂauxûi-e ra mā, tsî ākhanun kao, o i ge ǁkhoa tama-e ra māhe; xawets kom satsa ǃgâi ǂauxûi-e nēsis kōse go sâuo.

¹¹Nē tsoatsoas saodi disab ge Jesuba Kanas Galileab dis tawa ge dī, tsîb ge ǁîb ǂkhaisiba ge ǂhaiǂhai. Tsî gu ge ǁkhāǁkhāsabegu âba ǁîb ǃnâ ge ǂgom.

¹²Nēs khaoǃgâb ge Kapernaums ǃoa ge ǁgôa, ǁîb ǂûb tsî ǁîb îs tsî ǃgâsagu, tsî ǁkhāǁkhāsabegu âb tsîna, tsî ǀoro tsēde ǁnāpa ge hâ.

¹³Tsîb ge Jodeǁîn di Pasxakaitsēsa ǀgū ge i, tsîb ge Jesuba Jerusalems ǃoa ge ǃapa.

¹⁴Tsîb ge tempeli ǃnâ gomagu tsî gūn tsî ǂnabun tsîna ra ǁamaxūgu tsî mariǂharugu-aogu tsîga ǁnāpa ǂnôase ge hō.

¹⁵Ob ge tsurin ǀkha sami-e dībasen, tsî hoaga tempela xu ge doeǁgaǂui, gūn tsî gomagu tsîn ǀkha, tsî mariǂharugu-aogu di marinab ge ge tsoroxū tsî tāgu âgab ge ge ǂhāǃgau;

¹⁶tsîb ge ǂnabuna ra ǁamaxū gu ǃoa ge mî: Nēna nēpa xu ūbē î go tā ti Îb di omma ǁamagu-omse dī.

¹⁷O gu ge ǁkhāǁkhāsabegu âba ge ǂâihō: “Ôasasib sa ommi dib ge tita go hapu” ti xoahe hâ ǃkhais xa.

¹⁸On ge Jodeǁîna ǃeream, tsî ǁîb ǃoa ge mî: Mâ sao-ets ǁnâi sida ra ǁgau, nēnats dī ǁkhā ǃkhaisa?

¹⁹Ob ge Jesuba ǃeream, tsî ǁîn ǃoa ge mî: Nē tempela khôaǁnâ, o ta ge ǃnona tsēdi ǃnâ ǁîba nî omkhâi.

²⁰On ge Jodeǁîna ge mî: Hakadisiǃnaniǀa kurigu ǃnâb kom nē tempela ge omheo, ots satsa ǃnona tsēdi ǃnâ ǁîba nî omkhâi?

²¹Xaweb ge ǁîba ǁnāsa ǁîb soros di tempeli xa ge ǃhoa.

²²ǁŌ hâna xub ge khâi ǃnubai gu ge ǁkhāǁkhāsabegu âba, nēsab ge mîǀî gu ǃkhais xa ge ǂâi, tsî gu ge xoas tsî Jesub ge mîǀî gu mîs tsîra ge ǂgom.

²³Tsî Jerusalems tawab ge Pasxakaitsēs di ǁaeb ai hā, on ge ǂguina ǁîb di ǀons ǃnâ ge ǂgom, dīb gere saoden ge mû amaga.

²⁴Xaweb ge Jesub ǂûba ǁîn ai ge ǂgomǃgâsen tama hâ i, hoanab ge ǂan i amaga;

²⁵tsî khoe-i nî nau khoe-i xa ǃkhō-amba bisab ge ǂhâba tama hâ i amaga; ǁî-aitsamab khoe-i ǃnâ hâ-e ge ǂan i xui-ao.