Read Khoekhoegowab Johaneb 20 Bible Online

Johaneb 20 - Khoekhoegowab bible

Johaneb 20

¹Tsî ǂguro tsēs wekheb dis ais ge Maria Magdalenasa ǃnauǁgoaga, ganupe a ǃkhae hîa ǀhobas tawa hā, tsî ǀuis ǀhobasa xu gababēhe hâ ǃkhaisa ge mû.

²Os ge ǃkhoe, tsî Simon Petrub tsî nau ǁkhāǁkhāsabeb, Jesub ǀnam hâb tsîkha tawa sī, tsî ge mî: ǃKhūban ǀhobasa xu ūbē hâ, tsî sise ge a ǀū, mapan go ǁgui bi ǃkhaisa.

³Ob ge Petrub tsî nau ǁkhāǁkhāsabeb tsîkha ǂoa, tsî ǀhobas ǃoa ge ǃgû.

⁴Tsî kha ge ǁî ǀgamkha ge ǀguiǃkhoe, xaweb ge nau ǁkhāǁkhāsabeba Petruba ǃkhoedā tsî ǂgurose ǀhobas tawa ge sī.

⁵Tsî ǃgamǃgâb ge, ob ge ǃkhaiga ge mûǁgoe; xaweb ge ǂgâ tama ge i.

⁶Ob ge Simon Petruba saohā bi, tsî ǀhobas ǃnâ ǂgâ, tsî ǃkhaiga ge mûǁgoe;

⁷tsî aosenǃkhaib, Jesub danas ai go hâ ibab ge nau ǃkhaigu tawa mûǁgoe tama i, tsî ǁîba xamihe hâse ǃkhai-i tawa ǀguri ge mûǁgoe.

⁸Ob ge nau ǁkhāǁkhāsabeb, ǂguro sī ge ǀhobas tawab ona ǂgâ, tsî mû tsî ge ǂgom.

⁹Xoasa kha ge ganupe ǂan tama hâ i xui-ao, ǁō hâna xub nî khâi ǃkhaisa.

¹⁰O kha ge ǁkhāǁkhāsabekha ge ǁaru.

¹¹Tsîs ge Mariasa ǀhobas ǃauga mâ, tsî gere ā. Tsî ās ra hîas ge ǀhobas ǃnâ ǃgamǃgâ,

¹²tsî ǀgam ǀhomǃgākha ge mûǂnôa, ǃuri sarana ana hâkha, ǀguiba danas ǀkhāb ai tsî nauba ǂaira ǀkhāb ai, Jesub di soros go ǁgoe i ǃkhais tawa.

¹³Tsî kha ge ǁîs ǃoa ge mî: Tarase, tarexas ra ā? Os ge ǁîkha ǃoa ge mî: Ti ǃKhūban go ūbē, tsî ta a ǀū mapan go ǁgui bi ǃkhaisa amaga.

¹⁴Tsî nēna mî tsîs ge ǂnano, os ge Jesuba ge mûmâ, xawes ge Jesub a ǃkhaisa ge ǀū i.

¹⁵Ob ge Jesuba ǁîs ǃoa ge mî: Tarase, tarexas ra ā? Tari-es ra ôa? Os ge ǁîsa ǃhanasîsenaob ti ǂâi tsî ǁîb ǃoa ge mî: ǃGôahesatse sats ga ǁîba tanibē hâo, ǁnâi mîba te re, mapats go ǁgui bisa, î ta ǁîba sī ūbē.

¹⁶Ob ge Jesuba ǁîs ǃoa ge mî: Mariase! Os ge dabasen tsî ǁîb ǃoa Hebreǁîgowab ǃnâ ge mî: Rabunitse! (ǁNās ge ǁkhāǁkhā-aotse ti mîsa.)

¹⁷Ob ge Jesuba ǁîs ǃoa ge mî: Tā tsâǀkhā te, ganupe ta ti Îb ǃoa ǃapa tama hâ xuige. Xawe ǃgûsī ti ǃgâsagu ǃoa, î ǁîga mîba; ǃApa ta ra ti Îb ǃoa, tsî sago Îb ǃoa; ti Elob ǃoa, tsî sago Elob ǃoa.

¹⁸Os ge Maria Magdalenasa ǁkhāǁkhāsabega ge sī ǂhôa, ǃKhūbas go mû, tsî nēnab goro mîba si ǃkhaisa.

¹⁹Tsî ǃui i geo, ǁnā ǂguro tsēs wekheb dis ai, tsî ǁkhāǁkhāsabegu ǀhû hâ ǃkhais di dao-amdi ge ǂganamhe hâ io, Jodeǁîna ǃaob xa, ob ge Jesuba hā, tsî ǁaegub ǃnâ mâ tsî ge mîǀî gu: ǂKhîba ab sago ǀkha hâ.

²⁰Tsî nēsa mî tsîb ge ǁîga ǃomkha âb tsî ǃnammi âb tsîkha ge ǁgau. O gu ge ǁkhāǁkhāsabega ge ǃgâiaǂgao, ǃKhūba gu go mûo.

²¹Ob ge Jesuba ǁkhawa ǁîgu ǃoa ge mî: ǂKhîba ab sago ǀkha hâ! Abob ge tita sî khami ta tita ǁkhāti sago ra sî.

²²Tsî nēsa mî tsîb ge ǁîgu ai ǃgom tsî ǁîgu ǃoa ge mî: ǃKhōǃoa ǃAnu Gagaba.

²³Khoe-e go kara ǁorena ǀûbao, ǁnā-i ge ǀûbahe hâ-e; tsî khoe-e go kara ǁorena ūhâbao, ǁnā-i ge ūhâbahe hâ-e.

²⁴Tsîb ge Tomab, disiǀgamǀagu di ǀguib, Didimub ti ra ǂgaiheba ǁîgu ǀkha hâ tama ge hâ i, Jesub ge hā ǃnubai.

²⁵O gu ge nau ǁkhāǁkhāsabega ǁîb ǃoa ge mî: Sige ge ǃKhūba go mû. Ob ge ǁîgu ǃoa ge mî: ǁÎb di ǃomkha ǃnâ ta ga ǀuridan di saode mû tama io, tsî ǀkhunuba ta ga ǀuridan di saodi ǃnâ ǁgui tama io, tsî ti ǃomma ta ga ǃnammi âb ǃnâ ǁgui tama io, o ta ge tātsē ǂgom tide.

²⁶Tsî ǁkhaisa tsēde ǁnās khaoǃgâ gu ge ǁkhāǁkhāsabegu âba ǁkhawa oms ǃnâ ge hâ i, tsî Tomaba ǁîgu ǀkha. Ob ge Jesuba, dao-amdi ǂganamhe hâ hîa hā, tsî ǁaegub ǃnâ mâ, tsî ge mî: ǂKhîba ab sago ǀkha hâ!

²⁷ǁNās khaoǃgâb ge Tomab ǃoa ge mî: Sa ǀkhunuba ūhā, î ti ǃomkha kō, î sa ǃomma ūhā, î ti ǃnammi ǃnâ ǁgui bi; î tā ǂgomoǃnâ, î ǂgom.

²⁸Ob ge Tomaba ǃeream, tsî ǁîb ǃoa ge mî: Ti ǃKhūtse tsî ti Elotse!

²⁹Ob ge Jesuba ǁîb ǃoa ge mî: Titats go mû amagats ra ǂgom, Tomatse? ǃGâiǃōn ge hâ ǁnān, mû tama xawe ra ǂgomna.

³⁰Tsî ǀnî saodi ǂguideb ge Jesuba ǁîb di ǁkhāǁkhāsabegu aiǃâ gere dī, nē ǂkhanis ǃnâ xoahe tama hâde.

³¹Xawe di ge nēde xoahe hâ, ǂgom du nîga, Jesub a Xristu, Elob Ôa ǃkhaisa, tsî ǂgomsa xu du ǁîb ǀons ǃnâ ǀamo ûiba nî ūhâga.