Read Khoekhoegowab Johaneb 3 Bible Online

Johaneb 3 - Khoekhoegowab bible

Johaneb 3

¹Tsîb ge khoeba ge hâ i, Farisegu dib, Nikodemub ti ǀon hâb, Jodeǁîn di ǂamkhoeba.

²ǁÎb ge tsuxuba Jesub tawa hā, tsî ǁîb ǃoa ge mî: Rabitse ǂan ge ge a, Eloba xu ge hā ǁkhāǁkhā-aots a ǃkhaisa; khoe-i xare-i kom nē saodi, sats ra dīde a dī ǁoao, Elob ga ǁî-i ǀkha hâ tama io.

³Ob ge Jesuba ǃeream, tsî ǁîb ǃoa ge mî: Amase, amase ta ra mîba tsi, khoe-i ga ǁkhawa ǃnae tama io, o i ge gaosib Elob diba a mû ǁoa.

⁴Ob ge Nikodemuba ǁîb ǃoa ge mî: Mati i kha khoe-e, kaira hâǃâ a ǃnae ǁkhā? Xare i kha ǁkhawa ǁgûs di ǃnāb ǃnâ ǂgâ-oa tsî a ǃnae ǁkhā?

⁵Ob ge Jesuba ge ǃeream: Amase, amase ta ra mîba tsi: Khoe-i ga ǁgam-i tsî Gagaba xu ǃnae tama io, o i ge tātsē gaosib Elob dib ǃnâ a ǂgâ ǁoa.

⁶ǁGansa xu ǃnae hâ-i ge a ǁgan; tsî Gagaba xu ǃnae hâ-i ge a gaga.

⁷Tā buru: ǁKhawa du nî ǃnae, ti ta go mîba tsi ǃkhais ǃaroma.

⁸ǂOab ge ǂgaob ra ǃkhai-i hoa-i ai ra ǃgom, tsîts ge ǀōb âba ra ǁnâu, xawets ge a ǀū, mapa xub ra ǀkhī tsî mâǀîb ra ǃgû ǃkhaisa. ǁNās ǁkhās khami i ge Gagaba xu ǃnae hâ-i hoa-e ī.

⁹Ob ge Nikodemuba ǃeream, tsî ǁîb ǃoa ge mî: Matin kha ǁnâi nēna a ī ǁkhā?

¹⁰Ob ge Jesuba ǃeream, tsî ǁîb ǃoa ge mî: Israelǁîn di ǁkhāǁkhā-aotsa kha satsa, tsîts nēna ǂan tama hâ?

¹¹Amase, amase ta ra mîba tsi: Sige ge ǂan ge ana ra ǃhoa tsî mû ge gena ra ǃkhō-am; tsî du ge sige ǃkhō-amsa ǃkhōǃoa tama hâ.

¹²ǃHūbaib din xa ta ga mîba du, tsî du ga ǂgom tama io, mati du kha nî ǂgom, ǀhommi din xa ta ga mîba duo?

¹³Tsî khoe-i xare-i ge ǀhommi ǃoa ǃapa tama hâ, ǀhomma xu ge ǁgôaxab ǀguib, Khoen Ôab, ǀhommi ǃnâ hâba.

¹⁴Tsî Moseb ge ǃgaroǃhūb ǃnâ ǀaoba ǀgapiǀgapi hâ is ǁkhās khamib ge Khoen Ôaba nîra ǀgapiǀgapihe,

¹⁵hoan ǁîb ǃnâ ra ǂgomn nî ǀamo ûiba ūhâse.

¹⁶ǁNātikōseb ge Eloba ǃhūbaiba ge ǀnam, ob ge ǁîb di ǀguise ǃnae hâ ǀGôaba ge mā, ǁîb ǃnâ ra ǂgomn hoan kāǁō tidese, xawen nî ǀamo ûiba ūhâse.

¹⁷Elob kom ǁîb di ôaba ǃhūbaib ai sî tamao, ǃhūbaibab nî ǀgoraǃgâseo, tsîb kom ǃhūbaib nî ǁîba xu sâuhese ge sî bio.

¹⁸ǁÎb ǃnâ kara ǂgom-i ge ǀgoraǃgâhe tide-e; xawe ǂgom tama ka i-i ge ǀnai ǀgoraǃgâhe hâ-e ǀguise ǃnae hâ ǀGôab Elob dib di ǀons ǃnâ i ǂgom tama amaga.

¹⁹Tsî nēs ge ǀgoraǃgâsa, ǃnâb ge ǃhūbaib ai hā, xawen ge khoena ǃkhaenaba ǃnâb xa ǀnam isa, sîsengu ân ge ǂkhaba i xui-ao.

²⁰ǂKhababa ra dī-i hoa-i kom ǃnâba ra ǁkhan-eo, tsî i kom ǃnâb ǃoa hā tamao, ǁî-i sîsengu xa i ǂgōǀauhe tidese.

²¹Xawe amaba ra dī-i ge ǃnâb ǃoa ra hā-e, î gu ga ǁî-i sîsenga ǂhai; Elob ǃnâ gu dīhe hâ xui-ao.

²²Nēn khaoǃgâb ge Jesuba ǁkhāǁkhāsabegu âb ǀkha Judeaǃhūb tawa ge sī; ǁnāpab ge ǁîgu ǀkha hâ tsî gere ǁāǁnâ.

²³Tsî Johaneb on ge Enons, Salims ǀgūse hâs tawa gere ǁāǁnâ, ǁgamxa ǃkhais ge i amaga. Tsîn ge ǁnāpa sī, tsî ge ǁāǁnâkaisen.

²⁴Ganupeb ge Johaneba ǃkhō-oms ǃnâ aoǂgāhe tama hâ i xui-ao.

²⁵Tsî i ge ǂnoagu-e ge ǀkhī Johaneb ǁkhāǁkhāsabegu tsî Jodeǁîn ǁaegu, ǃanuǃanusens xa.

²⁶On ge Johaneb tawa sī tsî ge mî: Rabitse, ǁnāb, Jordanǃāb nauǃani sats ǀkha go hâ ib, sats go ǁîb xa ǃkhō-ammi, mû, ǁîb ge ra ǁāǁnâ, tsîn ge hoana ǁîb tawa ra sī.

²⁷Ob ge Johaneba ǃeream tsî ge mî: Khoe-i ge xū-i xare-e a ūbasen ǁoa, ǀhomma xu i ga ǁî-e māhe tama io.

²⁸Sadu ǂûdu ge ti ǀhûǀguitimî-aodo: Tita ge Xristu tama ta, tsî ǁîb aiǃâ sîhe hâ ta ti ta gere mî ǃkhaisa.

²⁹ǃGame-aosa ūhâb ge ǃgame-aoba; tsî ǃgame-aob di khoeb mâ tsî ra ǁnâu bib ge ǃgame-aob di dommi xa kaise ra ǃgâiaǂgao. ǁNātib ge nē ǃgâiaǂgaob tiba go ǀoa.

³⁰ǁÎb ge ǃaruǀîǀgui nî ǀom, xawe tita ge ǃaruǀîǀgui nî ǂkhari.

³¹ǀGapiseba xu ra ǁgôaxab ge hoan ǂamai hâba; tsî ǃhūba xu ra ǀkhīb ge a ǃhū, tsî ǃhūb din xa ra ǃhoa. ǀHomma xu ra hāb ge hoan ǂamai hâba.

³²Tsîb ge ra ǃkhō-am, mû tsîb ge ǁnâuna; tsî khoe-i xare-i ge ǃkhō-ams âba ǃkhōǃoa tama hâ.

³³ǃKhō-ams âba kara ǃkhōǃoa-i, ǁnā-i ge ra ǀgaiǀgai, Elob a ama-ai ǃkhaisa.

³⁴Elob ge sîb ge Elob mîde ra ǃhoa xui-ao; tsîb kom Eloba Gagaba ǀnōsib ǀkha mā tamao.

³⁵ǁGûb ge ǀGôaba ǀnam hâ tsîb ge hoana ǁîb ǃomǁae ge mā.

³⁶ǀGôab ǃnâ ra ǂgom-i ge ǀamo ûiba ūhâ-e, xawe ǀgôaba ǁnâuǀnam tama-i ge ûiba mû tide-e, tsîb ge Elob ǁaiba ǁî-i ai ra hâhâ.