Read Khoekhoegowab Johaneb 4 Bible Online

Johaneb 4 - Khoekhoegowab bible

Johaneb 4

¹Tsî ǃKhūb ge hōǃâo, Farisegu ge ǁnâu ǃkhaisa, Jesub ge Johaneb ǃgâ-ai ǂguina ǁkhāǁkhāsabedī tsî a ǁāǁnâ ǃkhaisa,

²(Jesub ge aitsama ǁāǁnâ tama, tsî ǁîb ǁkhāǁkhāsabegu ge ǁîsa ge dī),

³ob ge Judeaba xū tsî ǁkhawa Galileab ǃoa ge ǃgû.

⁴Tsîb ge Samariab ǃnâ-ū nî ǃkharu.

⁵Ob ge Samariaǁîn di ǃāros Sixar ti ǀon hâs, Jakob ge ǁîb ôab Joseba mā ǃhanab ǀgūse ǁgoes tawa ge sī.

⁶Tsîs ge ǁnāpa Jakob di tsausa ge hâ i. Ob ge Jesuba ǃgûs xa ǀhupu hâse tsaus xōǀkhā ge ǂnû; tsî-i ge ǃnaniǁî ir ge i.

⁷Os ge Samariaǁî tarasa ge hā, ǁgam-es nî xurise. Ob ge Jesuba ǁîs ǃoa ge mî; Mā te, î ta ā re!

⁸Tsî gu ge ǁkhāǁkhāsabegu âba ǃāros ǃoa ge ǃgû hâ i, ǂûna gu nî ǁamase.

⁹Os ge Samariaǁî tarasa ǁîb ǃoa ge mî: Matits ǁnâi satsa, Jodeǁîts a hîa, tita Samariaǁî tarata ǁgam-e ra ǂgaoǀkhā? (Jodeǁîn kom Samariaǁîn ǀkha ǁae-ūgu tamao.)

¹⁰Ob ge Jesuba ǃeream tsî ǁîs ǃoa ge mî: Elob hōsas ga ǂano, tsî tarib a ǃkhaisa: Mā te, î ta ā re! ti ra mîǀî siba, os ga ǁîba ǂgaoǀkhā hâ, tsîb ga ûitsama ǁgam-e mā si hâ.

¹¹Os ge tarasa ǁîb ǃoa ge mî: ǃKhūtse, ǃkhā-ūxū-ets kom ūhâ tamao, tsî tsaus kom a ǃgamo; mapa xuts ǁnâi ûitsama ǁgam-e ūhâ?

¹²Abob Jakob, nē tsausa ge mā dab ǃgâ-aits a kai? Tsîn ge ǁîb ǂûb, ǁîb di ôan, tsî ǁîb ǀgoan tsîna ǁîs ǃnâ ge ā.

¹³Ob ge Jesuba ǃeream, tsî ǁîs ǃoa ge mî; Nē ǁgam-i xa ra ā-i hoa-i ge ǁkhawa nî ǁgâ-e.

¹⁴Xawe ǁnā ǁgam-i, tita nî ǁî-e mā-i xa kara ā-i hoa-i ge ǀamose ǁgâ tide-e; xaweb ge nî ǁnā ǁgam-i, tita nî ǁî-e mā-i, ǁî-i ǃnâ ǁgamxa ǀau kai, ǀamo ûib kōse ra ôa-e.

¹⁵Os ge tarasa ǁîb ǃoa ge mî: ǃKhūtse, ǁnā ǁgam-i xa mā te, î ta tā ǁgâ, î ta tā nēpa xuri hāsa ǂhâ.

¹⁶Ob ge Jesuba ǁîs ǃoa ge mî: ǃGû î sī sa aoba ǂgai, î hā.

¹⁷Os ge tarasa ǃeream tsî ǁîb ǃoa ge mî: Ao-e ta kom ūhâ tamao. Ob ge Jesuba ge mîǀî si: Aio, ǂhanuses go mî: Ao-e ta ūhâ tama.

¹⁸Koro aogas ge ūhā i, tsî nēsis ūhâb kom sa ao tamabao. Os ge amaba go ǃhoa.

¹⁹Os ge tarasa ǁîb ǃoa ge mî: ǃKhūtse, kēbo-aots a ǃkhaisa ta ge ra mû.

²⁰Sida îgu ge nē ǃhommi ai gere ǀgoreǀî; o du ge sado, Jerusalems a ǃās, ǁîs tawa nî ǀgoreǀîhesa, ti ra mî.

²¹Ob ge Jesuba ǁîs ǃoa ge mî; Tarase, ǂgom te re, iri ge nîra hā, ǁîb ai du ǁGûba nē ǃhommi ais karao, Jerusalems tawas karao ǀgoreǀî tideba.

²²Sadu ge ǀū du a-e ra ǀgoreǀî; xawe da ge sida ǂan tari-e da ra ǀgoreǀîsa; ǃgâiǃōsib Jodeǁîna xu ra hā xui-ao.

²³Xaweb ge ira nîra hā, tsîb ǀnai nēsi hâ, on ge ama-ai ǀgoreǀî-aona ǁGûba Gagab tsî amab tsîkha ǃnâ nîra ǀgoreǀî; ǁGûb nēti ra ǀgoreǀî bina ra ôa xui-ao.

²⁴Elob ge a Gaga; tsî ǁîba ra ǀgoreǀîn ge Gagab tsî amab tsîkha ǃnâ nî ǀgoreǀî bi.

²⁵Os ge tarasa ǁîb ǀoa ge mî: ǂAn ta a Mesiab (Xristub ti ra ǂgaiheb) nîra hā ǃkhaisa. ǁÎb ga hāo, ob ge hoana nîra ǂhôa da.

²⁶Ob ge Jesuba ǁîs ǃoa ge mî: Tita ge ǁî ta sas ǀkha ra ǃhoa ta.

²⁷ǃNubai gu ge ǁkhāǁkhāsabegu âba hā, tsî ge buru, tara-i ǀkhab ra ǃhoa ǃkhais xa; xaweb ge ǀguib xaweba: Tare-ets ra dî? Tare-ets ra ǁîs ǀkha ǃhoa? ti mîtsâ tama ge i.

²⁸Os ge tarasa ǁîs di xapasa xū, tsî ǃās ǃoa ǃgû, tsî khoen ǃoa ge mî:

²⁹Sī î du khoeba mû, dī ta geren hoana go mîba teba, iseb ǀnîsi Xristu tamasa.

³⁰On ge ǃārosa xu ǂoa, tsî ǁîb tawa ge sī.

³¹ǁÎn ra ǂoa hîa gu ge ǁkhāǁkhāsabega ǁîba ǁkhau tsî: Rabitse, ǂû re! ti ge mî.

³²Ob ge ge mîǀî gu: Tita ge ǂû ta ra ǂû-e ūhâ, sago a ǀū-e.

³³O gu ge ǁkhāǁkhāsabega ge mîǀîgu: Khoe-e kha ǂûxū-e go hā-ūba bi?

³⁴Ob ge Jesuba ǁîgu ǃoa ge mî: Nēs ge ti ǂûsa, sî te geb di ǂâisa ta nî dī, tsî ǁîb di sîsenna ta nî dītoasa.

³⁵Ganupe haka ǁkhâgu, os nî ǃgaosa hā, ti mî tama du hâ? Mû, tita ra mîba du: ǃGapakhâi, î ǃhanaga kōǀî, ǀnai gu kom go ǃurio, ǃgaohe gu nîse.

³⁶ǀNaib ge ǃgao raba amǃnâ-e ra hō, tsî ǂûna ǀamo ûib ǃoa ra ǀhaoǀhaobasen, hoakha, tsoro rab tsî ǃgao rab tsîkha nî ǃgâiaǂgaose.

³⁷Nēs ǃnâ i ge ǁnā ǂkhoamî-e ama: Nēb ge ra tsoro tsî naub ge ra ǃgao.

³⁸Tita ge sago ge sî, sago sîsen tama hâ-e go nî ǃgaose; naugu ge ǁî-e gere sîsen, o go ge sago ǁîgu di sîsenni ǃnâ ge ǂgâ.

³⁹Tsî ǂguin ǁnā Samariaǁî ǃāros din ge ǁîb ǃnâ ge ǂgom, taras di mîs ǃaroma: Dī ta geren hoanab go mîba te, ti ra ǃkhō-amsa.

⁴⁰Tsî Samariaǁîn ge ǁîb tawa sīo, on ge ge ǀkhoma bi, ǁîn ǀkhab nî hâsa; ob ge ǀgam tsēra ǁnāpa ge hâ.

⁴¹On ge naun ǃgâ-ai ǂguina ǁîb di mîs ǃaroma ge ǂgom,

⁴²tsî taras ǃoa ge mî: Sa mîs ǀguis ǃaroma da nēsi ǂgom tama hâ, ǁî-aitsama da kom ǁnâu tsî go mûǂano, nēb a amase Xristu ǃkhaisa, ǃhūbaib di ǃGâiǃōdī-aoba.

⁴³Tsî ǀgam tsēra khaoǃgâb ge ǁnāpa xu bē, tsî Galileab ǃoa ge ǃgû.

⁴⁴Jesub ǂûb ge ǃkhō-am xui-ao, kēbo-ao-i ǁgûxan ǃhūb ǃnâ ǃgôahe tama hâ ǃkhaisa.

⁴⁵Tsî Galileab tawab ge sī, on ge Galileaǁîna ge ǃkhōǃoa bi, Jerusalems tawab gere kaitsēs ai dīn hoana ge mûna; ǁîn on ge kaitsēs ai sī hâ i xui-ao.

⁴⁶Tsîb ge Jesuba ǁkhawa Kanas Galileab dis tawa ge sī, ǁîs ǃnâb ge ǁgam-e ǂauxûi kaisa. Tsîb ge Kapernaums tawa ǂanǂansa gao-aob ǃgāb, ǁîb di ôab ǀaesen hâba, ge hâ i.

⁴⁷Nēb ge ǁnâuo, Jesub ge Judeaba xu Galileab ǃoa hā ǀkhaisa, ob ge ǁîb tawa sī, tsî ge ǀkhoma bi, ǁgôa tsîb nî ǁîb di ôaba ǂgauǂgausa, ǁōǁga raseb ge ǁgoe i xui-ao.

⁴⁸Ob ge Jesuba ǁîb ǃoa ge mî: Saodi tsî buruxan tsîna du ga mû tama io, o du ge tātse ǂgom tide.

⁴⁹Ob ge gao-aob ǃgāba ǁîb ǃoa ge mî: ǃKhūtse, ǁgôa re, ti ôab ǁō tama hîa.

⁵⁰Ob ge Jesuba ge mîǀî bi: ǃGû, sa ôab ge go ûi. Ob ge khoeba Jesub go mîǀî bi mîsa ǂgom, tsî ge ǃgû.

⁵¹Tsî ǀnai ǁgôab ra hîa gu ge ǃgāgu âba ǃoa bi, tsî ǂhôa bi tsî ge mî: Sa ôab ge go ûi.

⁵²Ob ge ǁîga iri, ǁîb aib go ǃgâise tsâba ge dîǃā; o gu ge ǁîb ǃoa ge mî: ǁAri hûǁî iri ais ge ǁkhaisa go xū bi.

⁵³Ob ge ǁgûba ge mûǂan, ǁkhā iri a ǃkhaisa, ǁîb aib ge Jesuba ǁîb ǃoa: Sa ôab ge go ûi, ti a mîba. Ob ge ǁîb ǂûb tsî ommi âb hoaragaba ge ǂgom.

⁵⁴Nēs ge ǀgamǁî saos, Jesub ge dīsa, Judeaba xub ge Galileab ǃoa hā ǃnubai.