Read Khoekhoegowab Johaneb 5 Bible Online

Johaneb 5 - Khoekhoegowab bible

Johaneb 5

¹Nēn khaoǃgâ i ge Jodeǁîn di kaitsē ge i, tsîb ge Jesuba Jerusalems ǃoa ge ǃapa.

²Tsî i ge Jerusalems ǃnâ Gūdao-ammi tawa khōsenǁgam-e ge hâ i, Hebreǁîgowab ǃnâ Betesda, ti ra ǂgaihe-e, koro hâǃnâ-omga ūhâ-e.

³ǁÎgu ǃnân ge kaise ǂgui ǀaesen hân, ǂgīn, ǃhoran tsî ǃhom hân tsîna gere ǁgoe, ǁgam-i di gongonhesa gere ǃâuna.

⁴ǀHomǃgā-i ge ǃkharaga ǁaegu ai khōsenǁgam-i ai ǁgôaxa tsî ǁgam-e gere gongon xui-ao. ǂGuro ra ǁgam-i di gongonhes khaoǃgâ ǂgâ-i, ǁnā-i ge gere ǂgau, mâ ǀaesenai-i ǀgui-e i ga ūhâ xawe.

⁵Tsîb ge ǁnāpa ǂanǂansa khoeba ge hâ i, ǃnonadisiǁkhaisaǀa kuriga ge ǀaesen ǁgoe iba.

⁶Tsî Jesub ge ǁîba mûǁgoe, tsî ge ǂan ǀnaib ge ǂomxase ǀaesen ǁgoe i ǃkhaisa, ob ge ǁîb ǃoa ge mî: ǂUru ǂgaots ra?

⁷Ob ge ǀaesen hâba ge ǃeream bi: ǃKhūtse, ǁgam-i ra gongonhe ǃnubai nî tita khōsenǁgam-i ǃnâ ǂgā khoe-e ta kom ūhâ tamao; o i kom, tita ǃgûgaru hîa, ǀnî-e ti aiǃâ ra ǁgôao!

⁸Ob ge Jesuba ǁîb ǃoa ge mî: Khâi, kharob âtsa ū, î ǃgû!

⁹Ob ge khoeba ǁnātimîsi ǂgau, tsî kharob âba ū, tsî ge ǃgû. ǁNāb ge sâtsē ge i.

¹⁰On ge Jodeǁîna ǂgauǂgauhe gob ǃoa ge mî: Sâtsēs kom, kharoba tanisats kom mā-amhe tamao.

¹¹Ob ge ǁîn ǃoa ge mî: ǂGauǂgau te gob ge: Kharob âtsa ū, î ǃgû, ti go mîǀî te.

¹²On ge ge dî bi: Tariba kha ǁnā khoeb, sats ǃoa: Kharob âtsa ū, î ǃgû, ti go mîba?

¹³Xaweb ge ǂgauǂgauhe goba, tarib a ǃkhaisa ge ǀū i; Jesub ge ūbēsen amaga; ǁnāpan ge ǂgui khoena hâ i xui-ao.

¹⁴Nēn khaoǃgâb ge Jesuba tempeli ǃnâ hō bi, tsî ǁîb ǃoa ge mî: Kō, ǂuruts go; ǃaruǀî tā ǁore, î-i tā ǁnā-i ǃgâ-ai tsû xū-e hāǂam tsi.

¹⁵Ob ge khoeba ǃgû, tsî Jodeǁîna sī ge ǂhôa, Jesub a ǃkhaisa, ǁîba go ǂgauǂgauba.

¹⁶ǁNā-amagan ge Jodeǁîna Jesuba ge ǃgôaǃgon, tsî matin nî ǃgam bisa ge ôa-am, sâtsēs aib ge ǁîsa dī xui-ao.

¹⁷Ob ge Jesuba ǁîna ge ǃeream: Ti îb ge nēsis kōse ra sîsen, o ta ge tita ona ra sîsen.

¹⁸ǁNā-amagan ge Jodeǁîna ǁnās ǃgâ-ai, matin nî ǃgam bisa ge ôa-am, sâtsēsab go khôas ǀguis ǃaroma tama i, tsîb ge ǁkhāti Eloba ǁîb Îb ase go ǂgai, tsî ǁî-aitsamab Elob ǀkha ǀguiti-īse go dīsen.

¹⁹Ob ge Jesuba ǃeream, tsî ǁîn ǃoa ge mî: Amase, amase ta ra mîba du: ǀGôab ge ǁîba xu aitsama xū-i xare-e a dī ǁoa, ǁgûb ra dīseb ra mû-i ǀgui-e; ǁîb ra dī-eb ǀgôab ona ra dī xui-ao.

²⁰ǁGûb ǀgôaba a ǀnam xui-ao, tsîb ge ǁîb ǂûb ra dīn hoana ra ǁgau bi; tsîb ge nēn ǃgâ-ai kai sîsenga nî ǁgau bi, sadu nî burus kōse.

²¹ǁGûb ǁō hâna ǂkhaiǂkhai tsî ra ûi-ûis ǁkhās khamib ge ǀgôab ona ǂgaob ra-i hoa-e ra ûi-ûi.

²²ǁGûb ge khoe-i xare-e ǀgoraǃgâs tsîna hî tamaba, tsîb ge ǀgoraǃgâs hoasa ǀgôaba ge mā,

²³hoan nî ǀgôaba ǃgôase, ǁgûban ra ǃgôas ǁkhās khami. ǀGôaba ǃgôa tama-i ge ǁgûb, ǁîba ge sîba ǃgôa tama-e.

²⁴Amase, amase ta ra mîba du: Ti mîsa ǁnâu tsî tita ge sîb ǃnâ ra ǂgom-i, ǁnā-i ge ǀamo ûiba ūhâ, tsî ǀgoraǃgâs ǃnâ sī tide, xawe i ge ǁōba xu ûib ǃoa nî ǃgâu.

²⁵Amase, amase ta ra mîba du: Iri ge nîra hā, tsîb ǀnai nēsi hâ, on ge ǁō hâna Elob Ôab di domma nîra ǁnâu; tsî ǁnâu bi ran, ǁnān ge nîra ûi.

²⁶ǁGûb aitsama ǁîb ǃnâ ûiba ūhâs ǁkhās khamib ge ǁkhāti ǀGôaba ge mā, ûibab nî aitsama ǁîb ǃnâ ūhā ǃkhaisa;

²⁷tsîb ge ǁîba ǀgaiba ge mā, ǀgoraǃgâsab nî dīse, Khoen Oab a xui-ao.

²⁸Tā buru ǁîs ǃaroma; iri ge nîra hā xuige, ǁîb ain ǀhobadi ǃnâ hân hoana ǁîb di domma nîra ǁnâuba,

²⁹tsîn nîra ǀkhī, ǃgâina gere dīna ûib di khâis ǃoa, tsî ǂkhabana gere dîna ǀgoraǃgâs di khâis ǃoa.

³⁰Tita ge tita ǂû ta xu xū-e a dī ǁoa. ǁNâu ta ra khami ta ra ǀgoraǃgâs ge a ǂhanu, ti ǂâisa ta ôa tama, tsî ta Abob, tita ge sîb di ǂâisa ra ôa xui-ao.

³¹Tita xa ta ga aitsama ǃkhō-amo, os ge ti ǃkhō-amsa ama tama hâ.

³²Xaweb ge ǀnîba hâ, tita xa ra ǃkhō-amma; tsî ta ge a ǂan tita xab ra ǃkhō-am ǃkhō-ams a ama ǃkhaisa.

³³Sadu ge Johaneb ǃoa sadu di sîsabega ge sî, tsîb ge amaba ge ǃkhō-am.

³⁴Xawe ta ge tita khoe-i di ǃkhō-amsa ǃkhōǃoa tama hâ; tsî nēna ta ra mî, ǃgâiǃō kai du nîse.

³⁵ǁÎb ge khau tsî ra ǃnâ ǃamamǀae ge i; o du ge ǃnubu ǁaeroba ǁîb di ǃnâb ǃnâ ǃgâiǃgâisen ǂgao hâ i.

³⁶Xawe ta ge tita Johaneb di-i xa kai ǃkhō-am-e ūhâ, ǁnā sîsengu, ǁGûb ge tita māgu, ǀamǀam gu ta nîsa, ǁnā sîsengu, dī ta ra gu kom tita xa ra ǃkhō-amo, ǁGûb ge tita sî ǃkhaisa.

³⁷Tsî tita ge sî ǁGûb ge ǁkhāti tita xa ge ǃkhō-am; sadu ge tātsē ǁîb di domma ǁnâu tama, tsî ǁîb di ība mû tama hâ.

³⁸Tsî du ge ǁîb mîsa, sadu ǃnâs nî hâhâse ūhâ tama hâ, ǁîb ge sîba du ǂgom tama hâ amaga.

³⁹Sadu ge xoas ǃnâ ra ôa, ǁîs ǃnâ du ǀamo ûiba ūhâ, ti du ǂâi hâ xui-ao; tsî ǁîs kom tita xa ra ǃkhō-amsao.

⁴⁰Tsî du ge tita ǃoa hā ǂgao tama hâ, ûiba du nî ūhâse.

⁴¹Khoena xu ta ge tita ǃgôa-e ūǃoa tama hâ.

⁴²Xawe ta ge sado a ǂan, Elob ǀnamma du sadu ǃnâ ūhâ tama hâ ǃkhaisa.

⁴³Tita ge ti îb di ǀons ǃnâ ge hā, tsî du ge ǃkhōǃoa te tama hâ. ǀKharab ga ǁîb ǀons ǂûs ǃnâ hāo, o du nî ǃkhōǃoa bi.

⁴⁴Mati du kha a ǂgom ǁkhā, sadu ǃnâ ǃgôa-e ra ūǃoabagu do, tsî Elob ǀguiba xu hâ ǃgôaba ôa tama do?

⁴⁵Tā ǂâi, Abob tawa ta nî sado ǀanaǃgâ ǃkhaisa. ǀGuib ge hâ, sado ra ǀanaǃgâba: Moseb, ǁîb ai du ge mûmâinǃgâba.

⁴⁶Moseba du ga ǂgomo, o du ga tita ona ǂgom hâ; ǁîb tita xa xoa hâ amaga.

⁴⁷Xawe ǁîb di xoade du ga ǂgom tama io, mati du kha ti mîde nî ǂgom?