Read Khoekhoegowab Johaneb 6 Bible Online

Johaneb 6 - Khoekhoegowab bible

Johaneb 6

¹ǁNās khaoǃgâb ge Jesuba Galileahurirob, Tiberias tawa hâb nauǃani ge ǃgâu.

²Tsîs ge kai ǂnubisa ǁîba ge sao, ǀaesen hân tawab ra dī saoden ge mû xui-ao.

³Ob ge Jesuba ǃhommi ai ǃapa, tsî ǁnāpa ǁkhāǁkhāsabegu âb ǀkha ge ǂnû.

⁴Tsîb ge Pasxab, Jodeǁîn di kaitsēsa ge ǀgū i.

⁵ǃNubaib ge Jesuba ǃgapakhâi tsî ge mû, kai ǂnubis ǁîb ǃoa ra hāsa; ob ge Filipub ǃoa ge mî: Mapa ge nî perena ǁama, nēn nî ǂûga?

⁶Tsîb ge nēsa ǃâitsâ bi rase ge mî; ǁîb kom ge ǂan io, tare-eb nî dīsao.

⁷Ob ge Filipuba ge ǃeream bi: ǀGamkaidisi denargu di pere-i kom ǁîna ǂâuba tideo, mâ-i hoa-i ân ga ǂkhari ǃâro-e hō xawe o, ti.

⁸Ob ge ǁkhāǁkhāsabegu âb di ǀguib, Andreab, Simon Petrub di ǃgâsaba ǁîb ǃoa ge mî:

⁹Axarob ge nēpa hâ, koro gerstperes tsî ǀgam ǁaukha tsîna ūhâba, xawe tarena ǁîna nētikō ǂgui ǂnubis ǃnâ?

¹⁰Ob ge Jesuba ge mî: An khoena ǂnû! Tsîs ge ǁnā ǃkhaisa ǀgâxa ge i. ǃNubai gu ge koroǀoadisi nî ī khoega ge ǂnû.

¹¹Ob ge Jesuba perega ū, tsî gangan, tsî ǁîga ǁkhāǁkhāsabega ge mā, tsî ǁkhāǁkhāsabegu ge ǂnû gona ge mā; ǁnās ǁkhās xase ǁaun tsîn xa, ǂgaon ge hâ is kōse.

¹²Tsî ǁân geo, ob ge ǁkhāǁkhāsabegu âb ǃoa ge mî: ǃGau go ǃârona ǀhaoǀhao, î-i tā xū-i xare-e kā.

¹³O gu ge ǀhaoǀhao, tsî disiǀgamǀa ǀharudi ǀoaba ǃâron xa ge ǀoaǀoa, ǁnā koro gerstperegu xa gu ge ǂûǃgau hâ in xa.

¹⁴Tsî khoen ge Jesub go dī saosa mûo, on ge ge mî: Nēb ge amase ǁnā kēbo-aob, ǃhūbaib ai nîra hāba.

¹⁵Tsî Jesub ge ǂan io, hā tsîn nî ǃkhō bi ǃkhaisa, gao-aodī bin nîse, ob ge ǁkhawa ǃhommi ǃoa ge ǂgō, ǁîb ǀguiba ǀguri.

¹⁶Tsî ǃui-i ge, o gu ge ǁîb di ǁkhāǁkhāsabega hurirob ǁga ge ǁgôa.

¹⁷Tsî ǂgaus ǃnâ ǂgâ tsî gu ge hurirob nauǃani Kapernaums ǃoa ge ǃgâu. Tsî i ge ǀnai ǃkhae ge i, tsîb ge Jesuba ganupe ǁîgu tawa hā tama ge hâ i.

¹⁸Tsîb ge huriroba kai ǂoa-i xa ge khâi,

¹⁹Tsî koro nî ī ǃnani nî ī kilometerde gu ge ǃgâu hâ i ǃnubai gu ge Jesuba, hurirob aib garu, tsî ǂgausab ra ǀgū hîa ge mû; o gu ge ge ǃao.

²⁰Ob ge ǁîgu ǃoa ge mî: Tita komo, tā ǃao!

²¹ǃNubai gu ge ǁîba ǂgaus ǃnâ ge ūǂgâxa ǂgao; os ge ǂgausa ǃhaese garuǀî gu ge i ǃhūb tawa ge sī.

²²Tsî ǀguitsēs ge ǂnubis, hurirob ammi ai mâsa ge mû, ǀnî ǂgau-i ǁnāpa a ǀkhai ǃkhaisa, ǁkhāǁkhāsabegu go hâǃnâ hâ is ǀguis, tsî Jesub go ǁîb di ǁkhāǁkhāsabegu ǀkha ǂgâ tama i, tsî gu go ǀguri ī ǃkhaisa;

²³xawe di ge ǀnî ǂgaude Tiberiasa xu, ǁnā ǃkhais ǁîs tawa gu ge ǃKhūb ra gangan hîa pereǂûs ǀgūse ge hā.

²⁴Tsî ǂnubis ge mû, Jesub tsî ǁîb di ǁkhāǁkhāsabegu tsîgu ǁnāpa ǀkhai ǃkhaisa, on ge ǁîn ona ǂgaudi ǃnâ ǂgâ tsî Kapernaums tawa ge sī, Jesuba ra ôase.

²⁵Tsî hurirob nauǃanin ge hō bio, on ge ǁîb ǃoa ge mî: Rabitse, mâ ǁaets go nēpa hā?

²⁶Ob ge Jesuba ǁîna ǃeream tsî ge mî: Amase, amase ta ra mîba du, saode du ge mûs ǃaroma tama i tsî peren xa ǂû tsî du go ǁâ ǃkhais ǃaroma du ra ôa te.

²⁷Tā kā ra ǂû-i ǃaroma sîsen, î du ǁnā ǂû-i, ǀamo ûib kōse ra hâhâ-i Khoen Ôab nîra mā du-i ǃaroma sîsen; ǁîbab ǁGûb Eloba ǀgaiǀgai hâ xuige.

²⁸On ge ǁîb ǃoa ge mî: Tare-e da nî dī, o da Elob di sîsenga nî sîsen?

²⁹Ob ge Jesuba ǃeream, tsî ǁîn ǃoa ge mî: Nēb ge Elob di sîsenna, ǁîba ge sîb ǃnâ du nî ǂgom ti.

³⁰On ge ǁîb ǃoa ge mî: Mâ sao-ets kha ra dī, mû tsî da nî satsa ǂgomse? Tare-ets ra sîsen?

³¹Sada îgu ge ǃgaroǃhūb ǃnâ manaba gere ǂû, xoamâihe hâ khami: “ǀHomma xub ge ǁîna pere-i xa ge ǂûmā.”

³²Ob ge Jesuba ǁîna ǃoa ge mî: Amase, amase ta ra mîba du: Mose tamab ge ǁnāb, ǀhommi pereba ge sado māba, xaweb ge a ti Î, sado ama-ai ǀhommi pereba ra māba.

³³Nēb ge Elob di pereb, ǀhomma xu ge ǁgôaxab, tsî ǃhūbaiba ûiba ra māba xui-ao.

³⁴On ge ǁîb ǃoa ge mî: ǃKhūtse hugaǀgui nē pereb xa mā da.

³⁵Ob ge Jesuba ǁîn ǃoa ge mî; Tita ge ûib di pereta. Tita ǃoa ra hā-i ge tātsē ǃâ tide-e, tsî tita ǃnâ ra ǂgom-i ge tātsē ǁgâ tide-e.

³⁶Tsî ta ge go mîba du, mû te du ge ǃkhaisa, xawe du ǂgom tama.

³⁷ǁGûb ra tita mā-i hoa-i ge tita ǃoa ra hā-e; tsî tita ǃoa ra hā-e ta ǂhāǂui tide.

³⁸ǀHomma xu ta ge ǁgôaxa xui-ao, ti ǂâisa ta nî dīse tama, xawe tita ge sîb di ǂaisa ta nî dīse.

³⁹Tsî nēs ge tita ge sî ǁGûb di ǂâisa, ǁîb ge tita mān hoan xa ta ǀgui-i xare-e kā kai tide ǃkhaisa, tsî ta nî ǁî-e ǀuni tsēs ai ǂkhaiǂkhai ǃkhaisa.

⁴⁰Tsî nēs ge ǂâis tita ge sîb disa, ǀgôaba ra ǃgapaǀî-i, tsî ǁîb ǃnâ ra ǂgom-i hoa-i nî ǀamo ûiba ūhâ ǃkhaisa; tsî ta ge tita ǁî-e nî ǂkhaiǂkhai ǀuni tsēs ai.

⁴¹On ge Jodeǁîna ǁîb ǂama ge ǀara: Tita ge ûib di pereta, ǀhomma xu ge ǁgôaxa ta, tib goro mî ǃkhais ǃaroma.

⁴²On ge ge mî: Jesub, Joseb ôa tamaba kha nēb, ǁîb ǁgûb tsî ǁgûs tsîra da a ǂanna? Matib ǁnâi: ǀHomma xu ta ge ǁgôaxa, ti ra mî?

⁴³Ob ge Jesuba ǃeream, tsî ǁîn ǃoa ge mî: Tā sadu ǃnâ ǀara.

⁴⁴Khoe-i xare-i ge tita ǁga a hā ǁoa, ǁGûb tita ge sîb ga ǁî-e tita tawa ǂgaihā tama io; tsî ta ge tita ǁî-e nîra ǂkhaiǂkhai ǀuni tsēs ai.

⁴⁵Kēbo-aogu ǃnâ xoamâihe hâ: Tsîn ge hoana Elob xa ǁkhāǁkhāhe hâse nî hā. Mâ-i hoa-i, ǁGûb xa ǁnâu tsî ra ǁkhāǁkhāsen-i ge tita ǃoa ra hā.

⁴⁶ǁNāti tamas: Khoe-i ga ǁGûba mû hâs, ǁnāb, Eloba xu hâb ǀguib kom ǁGûba ge mûo.

⁴⁷Amase, amase ta ra mîba du: ǂGom ra-i hoa-i ge ǀamo ûiba ūhâ.

⁴⁸Tita ge ûib di pereta.

⁴⁹Sadu îgu ge ǃgaroǃhūb ǃnâ manaba gere ǂû, xawe gu ge ge ǁō.

⁵⁰Nēb ge pereb, ǀhomma xu ra ǁgôaxaba, ǁîb xa ga ǂû khoe-i ǁō tidese.

⁵¹Tita ge ûitsama pereta, ǀhomma xu ge ǁgôaxa ta. Nē pereb xa kara ǂû khoe-i ge ǀamosib kōse nîra ûi-e. Tsî pereb, tita nî māb ge ti ǁgans, ǃhūbaib di ûib ǃaroma ta nîra māsa.

⁵²On ge Jodeǁîna ǂnoagu tsî ge mî: Matib kha nēba sada ǁîb di ǁgansa a ǂûmā ǁkhā?

⁵³Ob ge Jesuba ǁîn ǃoa ge mî: Amase, amase ta ra mîba du: Khoen Ôab di ǁgansa du ga ǂû tama io, tsî ǁîb ǀaoba du ga ā tama io, o du kom sadu ǃnâ ûi-e ūhâ tamao.

⁵⁴Ti ǁgansa ra ǂû-i, tsî ti ǀaoba ra ā-i, ǁnā-i ge ǀamo ûiba ūhâ tsî ta ge ǁî-e nîra ǂkhaiǂkhai ǀuni tsēs ai.

⁵⁵Ti ǁgans a ama-ai ǂû, tsî ti ǀaob a ama-ai āxū xui-ao.

⁵⁶Ti ǁgansa ra ǂû-i, tsî ti ǀaoba ra ā-i ge tita ǃnâ ra hâ-e, tsî tita ge ǁî-i ǃnâ ra hâ.

⁵⁷Ûitsama ǁGûb ge tita sî, tsî ta ǁGûba xu ra ûis ǁkhās khami i ge ǁkhāti tita ra ǂû-e tita xu nîra ûi.

⁵⁸Nēb ge pereb, ǀhomma xu ge ǁgôaxaba, sadu îgu ge manaba ǂû tsî gere ǁō khami ī tamaba. Nē pereb xa kara ǂû-i kom ǀamosib kōse nîra ûi-eo.

⁵⁹Nēnab ge Kapernaums tawa ge mî, sinagogeb ǃnâ ra ǁkhāǁkhāǃâ.

⁶⁰Tsî ǂguin ǁîb ǁkhāǁkhāsaben din ge ǁnâuo, on ge ge mî: Ama ǁgonǁgonǂgaosa mî-i ge nē-e; tari-e ǁî-e a ǁnâu ǁkhā?

⁶¹Tsî Jesub ge ǁîb ǃnâ ǂan, ǁîb di ǁkhāǁkhāsaben ǁîs ǃaroma ra ǀara ǃkhaisa, ob ge ǁîn ǃoa ge mî: ǁGonǁgonǂgao dus ra nēsa?

⁶²Mati i kha nî ī, Khoen Ôaba du ga aibeb ge hâ i ǃkhais ǃoa ra ǃapase mûo?

⁶³Gagab ge ûi-ûi raba, ǁgans ge harebe tama hâ. Mîdi, sadu ǃoa ta go ǃhoadi ge gaga tsî a ûi.

⁶⁴Xawe ǀnîn ge sadu ǃnâ hâ ǂgom tamana. Tsoatsoasa xub kom Jesuba ge ǂan io, mân a ǃkhaisa, ǂgom tidena, tsî mâb a ǃkhaisa ǁîba nî ǀapexūba.

⁶⁵Ob ge ge mî: ǁNā-amaga ta ge ge mîba du: Khoe-i xare-i ge tita ǃoa a hā ǁoa, ǁGûba xu i ga ǁnāsa māhe tama io.

⁶⁶ǁNā ǁaeba xun ge ǂguin ǁîb ǁkhāǁkhāsaben dina oa, tsî ǃaruǀî ǁîb ǀkha ǃgû tama ge i.

⁶⁷Ob ge Jesuba disiǀgamǀagu ǃoa ge mî: Tsî sago ona ra ǃgûbē ǂgao?

⁶⁸Ob ge Simon Petruba ǁîba ge ǃeream: ǃKhūtse, tari-i ǃoa ge kha nî ǃgû? Sats kom mîdi ǀamo ûib dide ūhâo.

⁶⁹Tsî ge kom sige ǂgom tsî ge mûǂano, Xristu, ûitsama Elob di Ôats a ǃkhaisa.

⁷⁰Ob ge Jesuba ǁîga ge ǃeream: Disiǀgamǀase ta kha sago ǃkhōǂuibasen tama hâ? Tsî ǀguib âgo ge a ǁgâua.

⁷¹Tsîb ge ǁîsa Judab, Simonni ôab Iskarioǁîb xa ge mî; ǁîb ge ega ge ǀapexū bi, tsîb ge disiǀgamǀagu di ǀgui ge i.