Read Khoekhoegowab Johaneb 7 Bible Online

Johaneb 7 - Khoekhoegowab bible

Johaneb 7

¹Tsîb ge Jesuba nēn khaoǃgâ Galileaba ge ǃgûǃnâ; Judeabab ge ǃgûǃnâ ǂgao tama ge i, Jodeǁîn ge ǃgam bin nîsa gere ôa-am xui-ao.

²Tsîs ge Jodeǁîn di kaitsēs, ǁhaogu kaitsēs ti ra ǂgaihesa ge ǀgū i.

³O gu ge ǃgâsagu âba ǁîb ǃoa ge mî: Nēpa xu ǃgû, î Judeab tawa sī în ǁkhāǁkhāsaben âtsa ǁkhāti dīts ra sîsenga mû.

⁴Khoe-i xare-i ge xū-e ǂganǃgâsib ǃnâ dī tama, ǂhaisase i nî ǂansa ǃkhaisa ra ôa-amǃâ. Nēnats ga dīo, ǃhūbaiba ǁnâi aitsama ǂhaiǂhaisenba re.

⁵ǃGâsagu âb ǂûgu on ge ǁîb ǃnâ ǂgom tama i xui-ao.

⁶Ob ge Jesuba ǁîgu ǃoa ge mî: Ti ǁaeb ge ganupe hā tama hâ, xawe sago di ǁaeb ge hugaǀgui nēpa hâ.

⁷ǃHūbaib ge sago a ǁkhan ǁoa; xaweb ge tita ra ǁkhan, ǁîb di sîsengu a ǂkhaba, ti ta ǁîb xa ra ǃkhō-am xui-ao.

⁸Sago ǁnâi nē kaitsēs ǃoa ǃgû. Tita ge nē kaitsēs ǃoa ganupe ǃgû tide, ti ǁaeb ganupe hā tama hâ xui-ao.

⁹Tsî nēna mî tsîb ge Galileab ǃnâ ge hâ.

¹⁰Tsî ǃgâsagu âb ge ǃgûbē ǃnubaib ge ǁîb ǂûb ona ge ǃgû, ǂhaisase tama, xawe ǂganǃgâsib ǃnâ.

¹¹On ge Jodeǁîna ǁîba kaitsēs ai ôa, tsî ge mî: Mapab ǁîba hâ?

¹²Tsîs ge ǁîb xa ǀhuikhoms kaisa ǁaes ǃnâ ge hâ i. ǀNîn ge: ǃGâi khoeb komo, ti ge mî. On ge nauna: Hî-i, ǁaesab kom ra ǂgaeǂhapuo, ti ge mî.

¹³Xawe i ge khoe-i xare-e ǁîb xa ǁkhoaǂgaose ǃhoatsâ tama ge i, Jodeǁîna ǃao tsî.

¹⁴Tsî ǀnai i ge kaitsēgu ǁaegu i, ǃnubaib ge Jesuba tempeli ǃoa ǃgû, tsî gere ǁkhāǁkhā.

¹⁵On ge Jodeǁîna buru, tsî ge mî: Matib kha nēba xoade a ǂan, ǁkhāǁkhāhe tamab hâ hîa?

¹⁶Ob ge Jesuba ǁîna ǃeream tsî ge mî: ǁKhāǁkhās âtas ge ti tama hâ, xawes ge a tita ge sîb di.

¹⁷Khoe-i ga ǁîb di ǂâisa dī ǂgao-o, o i ge nî hōǃâ, ises nē ǁkhāǁkhāsa Eloba xu hâsa, īse ta aitsama tita xa ra ǃhoasa.

¹⁸Aitsama ǁî-i xa ra ǃhoa-i ge ǁî-i ǃgôab ǂûba ra ôa-e, xawe ǁî-e ge sîb di ǃgôaba ra ôa-i, ǁnā-i ge a ama-ai, tsî ǂhanuoǃnâsi-i xare-i ge ǁî-i ǃnâ hâ tama hâ.

¹⁹Moseba sado ǂhanuba mā tamab hâ? Xawe i ge khoe-i sadu di-i xare-e ǁîba dī tama hâ. Tarexa du kha ǃgam te du nîsa ra ôa-am?

²⁰Os ge ǁaesa ǃeream, tsî ge mî: ǁGâuabats kom ūhâo. Tari-e ǃgam tsi nîsa ra ôa-am?

²¹Ob ge Jesuba ǃeream, tsî ǁîn ǃoa ge mî: ǀGui dī-i ǀgui-e ta ge dī, o du ge hoatsama ǁî-i ǂama buru hâ.

²²Moseb ge ǃgaosa ge mā du; Moseba xus hâo tama, tsîs ǁgûga xus hâ; xawe du ge khoe-e sâtsēs ai ra ǃgao.

²³Tsî khoe-i ga sâtsēs ai ǃgaosa hō, Moseb ǂhanub khôahe tidese, o du tita ǃoagu ǁnâi ra ǁaixa, hoaraga khoe-e ta go sâtsēs ai ǂuruǂurus ǂama?

²⁴Tā mûs ǃoa ǀgoraǃgâ, î du ǂhanu-ai ǀgoraǃgâ-e ǀgoraǃgâ.

²⁵On ge ǀnîn Jerusalems dina ge mî: Nē tamaba kha ǁnāb ǃgam bin nîsan ra ôa-amma?

²⁶Tsî mû, ǂhaisaseb ra ǃhoa, xawen ge xū-i xare-e mîba bi tama hâ. Mûǂan gu go xare sada ǂamkhoega, nēb a amase Xristu ǃkhaisa?

²⁷Xawe da sada a ǂan, mapa xub nēba hâsa. Tsî Xristub ga hāo, o i kom khoe-i xare-e ǂan tideo, mapa xub hâsao.

²⁸Ob ge Jesuba tempeli ǃnâ ra ǁkhāǁkhāse ǃgarise ge ǂgaiǂui: Ā, sadu ge tita ǂan hâ, tsî du ge a ǂan, mapa xu ta hâsa: Aitsama ta ge tita xu hā tama hâ, xawe ama-aib ge ǁîb, tita ge sîb, sadu ǂan tama hâba.

²⁹Xawe ta ge tita a ǂan bi, ǁîba xu ta hâ xui-ao, tsîb ge ǁîba ge sî te.

³⁰On ge ǃkhō bin nîsa ge ôa-am; xawe khoe-i xare-i ge ǃomma ǁîb tawa ǁgui tama, iri âb ganupe hā tama ge hâ i xui-ao.

³¹Tsî ǂguin ǂnubis din ge ǁîb ǃnâ ǂgom tsî ge mî: Xristub ga hāo, xareb kha nēb ra dī saodi xa ǂgui saode nî dī?

³²Tsî Farisegu ge ǁnâu, nēti īnas ra ǂnubisa ǁîb xa ǀhoeǃhoa ǃkhaisa, o gu ge Farisegu tsî ǀgapipristergu tsîga ǃgāga ge sîǂui, ǁîba gu nî ǃkhōse.

³³Ob ge Jesuba ǁîn ǃoa ge mî: Ganupe ǂkhari ǁaero-i ǀgui-e ta ge sadu ǀkha nî hâ, o ta ge tita ge sîb ǃoa nî ǃgû.

³⁴ǃNubai du ge tita nî ôa, tsî hō te tide; tita hâpa, ǁnāpa du a sī ǁoa xui-ao.

³⁵On ge Jodeǁîna ǁîn ǁaegu ge mî: Mapab kha nēba nî ǃgû, o da ǁîba hō tide? ǀGaruǀgaruhe hâ Grikeǁînǀî ǃgû tsîb kha nî Grikeǁîna ǁkhāǁkhā?

³⁶Mâ mîǃnôa-e kha nēb ra mî-e: O du ge tita nî ôa, tsî hō te tide; tsî: Tita hâpa, ǁnāpa du ge a sī ǁoa?

³⁷Tsî ǀuni tsēs kaitsēdi dis, hoadi xa kais aib ge Jesuba mâ, tsî ǂgai tsî ge mî: Khoe-i ga ǁgâ, a-i tita ǁga hā, î-i ā.

³⁸Tita ǃnâ ra ǂgom-i, xoas ra mî khami, ǁnā-i di sorosa xu gu ge ûitsama ǁgamǃāga nîra dâu.

³⁹Tsîb ge nēsa ǁîb ǃnâ ga ǂgomn nîra hō Gagab xa ge mî; ganupeb ge ǃAnu Gagaba hā tama ge hâ i, Jesub ge ganupe ǂkhaiǂkhaihe tama hâ i amaga.

⁴⁰On ge ǂguin ǂnubis dina, nē mîsan ge ǁnâuo ge mî: Nēb ge amase ǁnā kēbo-aoba.

⁴¹On ge nauna ge mî: Xristub ge ǁîba. Xawen ge nauna ge mî: Xristuba kha Galileaba xub nî ǀkhī?

⁴²Xoasa kha mî tamas hâ, Davib di suriba xu, tsî ǃāros Betlehems, Davib ge hâǃnâ isa xub nî Xristuba ǀkhī ǃkhaisa?

⁴³O i ge ǁhaiǃāgu-e ǂnubis ǁaegu ge hā ǁîb ǃaroma.

⁴⁴Tsî ǀnîn ge ǁîba ǃkhō ǂgao ge hâ i; xawe khoe-i xare-i ge ǁîb tawa ǃomma ǁgui tama hâ.

⁴⁵Tsî sîsabegu ge ǀgapipristergu tsî Farisegu tsîgu tawa ǁarusīo, o gu ge nēga ǁîgu ǃoa ge mî: Tare xū-i ǃaroma go ūhā bi tama hâ?

⁴⁶O gu ge sîsabega ge ǃeream: Tātsē i kom khoe-e nē khoeb khami ǃhoa tama ge hâ io.

⁴⁷O gu ge Farisega ge ǃeream: Sago ona kha ǂgaeǂhapuhe hâ?

⁴⁸ǂAmkhoegu di ǀgui-e ǁîb ǃnâ ǂgom-i ge, tsî Farisegu di ǀgui-i tsîna?

⁴⁹Xawe nē ǂnubis ǂhanuba ǂan tamas ge ǀâxarexūhe hâ.

⁵⁰Ob ge Nikodemub, tsuxuba ǁîb tawa ge hāb, ǁîgu di ǀgui ge iba ǁîgu ǃoa ge mî:

⁵¹Sada di ǂhanuba xareb khoe-e ra ǀgoraǃgâ, khoe-i aibe ǁnâuǃgâhe tama, tsî dī-i ra-e ǂanǃāhe tama hâ hîa?

⁵²O gu ge ǃeream, tsî ǁîb ǃoa ge mî: Sats ona kha a Galileaǁî? Ôaǃnâ î mû, Galileaba xu i kēbo-ao-i xare-e khâi tama hâsa.

⁵³O i ge mâ-i hoa-e ǁnāti ge ǁaru.