Read Khoekhoegowab Johaneb 8 Bible Online

Johaneb 8 - Khoekhoegowab bible

Johaneb 8

¹Tsîb ge Jesuba ǀKheraǃhommi ǃoa ge ǃgû.

²Tsî ǃnauǁgoagab ge ǁkhawa tempeli ǃnâ ge sī, tsî ǂnubis hoas ge ǁîb tawa ge hā. Ob ge ǂnû tsî ǁîna gere ǁkhāǁkhā.

³Tsî gu ge xoaǂansabegu tsî Farisegu tsîga taras, ǀase ǃgamekhôas ǃnâ go ǃkhōhesa ǁîb tawa ūhā, tsî ǁaegub ǃnâ mâi si,

⁴tsî ǁîb ǃoa ge mî: ǁKhāǁkhā-aotse, nē taras ge ǀase ǃgamekhôas ǃnâ go ǃkhōhe.

⁵Tsî Moseb ge ǂhanub ǃnâ ge mîmā, nēti īn nî ǀuiǁhomhe ǃkhaisa; satsa ǁnâi, tare-ets ra mî?

⁶Tsî gu ge ǁnāsa ge mî, ǃâitsâ bi gu nîse, î gu ga ǁîba ǀhapiǀhapi ǁkhā ti. Ob ge Jesuba ǃgamǃgâ tsî ǀkhunub ǀkha ǃhūb ai ge xoa.

⁷Tsî dîhâhâ bi gu geo, ob ge khuisen tsî ǁîgu ǃoa ge mî: Sago xa ga ǁoreoba ab ǂguro ǀuisa ǁîs ai ǂnoa.

⁸Tsî ǁkhawa ǃgamǃgâ tsîb ge ǃhūb ai ge xoa.

⁹Tsî ǁnāsa gu ge ǁnâu, o gu ge ǁîgu ǂâis ǂûs xa ǃhoadanhe hâse ǀguiǀguibese ge ǂoa, kaiba xu tsoatsoa tsî ǂkhammi kōse. Tsîb ge Jesuba taras, ǁaegub ǃnâ mâs ǀkha ǀguri ge ǃgau.

¹⁰Tsî Jesub ge khuisen tsî ǀnî khoe-e mû tama io, taras ǀguisa, ob ge ǁîs ǃoa ge mî: Mapa gu hâ, tarase, sa ǀanaǃgâ-aoga? Khoe-e kha ǀgoraǃgâ si tama hâ?

¹¹Os ge ge mî: Khoe-i xare tama-i, ǃKhūtse. ǃNubaib ge Jesuba ǁîs ǃoa ge mî: O ta tita ona ǀgoraǃgâ si tama hâ; ǃgû î ǃaruǀî tā ǁore!

¹²Tsî ǁkhawab ge Jesuba ǁîga ǃhoa-ū tsî ge mî: Tita ge ǃhūbaib di ǃnâta; tita ra sao-i, ǁî-i ge ǃkhaenab ǃnâ ǃgû tide, tsî i ge ûib di ǃnâba nî ūhâ.

¹³O gu ge Farisega ǁîb ǃoa ge mî: Aitsamats ge sats xa ra ǃkhō-amsen, os kom ǃkhō-ams âtsa ama tamao.

¹⁴Ob ge Jesuba ǃeream tsî ǁîgu ǃoa ge mî: Tsî tita xa ta aitsama ra ǃkhō-amsen, xawes ge ti ǃkhō-amsa a ama; ǂan ta a xui-ao, mapa xu ta ge hā, tsî mâǀî ta ra ǃgûsa; xawe du ge sado ǂan tama hâ, mapa xu ta ge hā tsî mâǀî ta ra ǃgûsa.

¹⁵Sadu ge ǁgans ǃoa ra ǀgoraǃgâ; tita ge khoe-i xare-e ǀgoraǃgâ tama hâ.

¹⁶Tsî ǀgoraǃgâ ta ra xawes ge ti ǀgoraǃgâsa a ama; ǀguri ta hâ tama xui-ao; xawe tita tsî sî te ge ǁGûb tsîkhom komo.

¹⁷Tsî sadu di ǂhanub ǃnâ ǁkhāti xoahe hâ: ǀGam khoekha di ǃkhō-amgus a ama ǃkhaisa.

¹⁸Tita ge aitsama tita xa ra ǃkhō-amsen ta, tsî Abob, tita ge sîb on ge tita xa ra ǃkhō-am.

¹⁹O gu ge ǁîb ǃoa ge mî: Mapab sa Îba hâ? Ob ge Jesuba ge ǃeream: Sadu ge tita kas, ti Îb kasa ǂan tama hâ; tita du ga ǂan io, o du ga ti Îb ona ǂan hâ.

²⁰Nē mîdeb ge Jesuba ǁuib ǂgaes tawa ge ǃhoa, tempeli ǃnâ ra ǁkhāǁkhāǃâ; tsî khoe-i xare-i ge ǁîba ǃkhō tama, iri âb ge ganupe hâ tama hâ i amaga.

²¹Ob ge Jesuba ǁkhawa ǁîn ǃoa ge mî: Tita ge ra ǃgû, o du ge tita nî ôa, xawe du nî ǁoren âdu ǃnâ ǁō; tita ra ǃgûba ǃkhais tawa du a sī ǁoa xui-ao.

²²On ge Jodeǁîna ge mî: Aitsamab kha nî ǃgamsen, ob ra mî: Tita ra ǃgûba ǃkhais tawa du a sī ǁoa?

²³Ob ge ǁîn ǃoa ge mî: Sadu ge ǃnagaba xu hâ, tita ge ǀgapiseba xu hâ; sadu ge nē ǃhūbaiba xu hâ, tita ge nē ǃhūbaiba xu hâ tama hâ.

²⁴O ta go mîba du, ǁoren âdu ǃnâ du nî ǁō ǃkhaisa; tita a ǁî ǃkhaisa du ga ǂgom tama io, o du kom ǁoren âdu ǃnâ nîra ǁō-o.

²⁵On ge ǁîb ǃoa ge mî: Taritsa kha satsa? Ob ge Jesuba ǁîn ǃoa ge mî: ǀAse ta goro ǃhoa khami ī ta ge tita.

²⁶ǂGuin, sadu xa mî tsî ta ga ǀgoraǃgâna ta ūhâ; xawe tita ge sîb ge a ama-ai, tsî ǁîba xu ta ge ǁnâun, ǁnāna ta ǃhūbaiba ra ǃhoa-ū.

²⁷Xawen ge ǁnâuǃā tama ge i, ǁGûb xab go ǁîna ǃhoa-ū ǃkhaisa.

²⁸Ob ge Jesuba ǁîn ǃoa ge mî: Khoen Ôaba du nî ǀgapiǀgapi ǃnubai du ge nî mûǂan, ǁî ta a ǃkhaisa; tsî tita xu ta aitsama xū-e dī tamasa, tsî ti Îb ge ǁkhāǁkhā te khami ta ra ǃhoa ǃkhaisa.

²⁹Tsî tita ge sîb ge tita ǀkha hâ; Abob ge tita ǀguri hâ kai tama hâ, ǃgâiba bi ana ta hugaǀgui ra dī xui-ao.

³⁰Nēnab ge mî, on ge ǂguina ǁîb ǃnâ ge ǂgom.

³¹Tsîb ge Jesuba ǁîb ǃnâ ǂgom hâ Jodeǁîn ǃoa ge mî: Ti mîs ǃnâ du ga hâhâo, o du ge a amase ti ǁkhāǁkhāsabe;

³²tsî du ge amaba nî ǁnâuǃā, tsîb ge amaba sado nî ǃnoraǃnora.

³³On ge ge ǃeream bi: Abrahammi surida komo, tsî da kom tātsē khoe-i di khobo tama ge hâ io; matits ǁnâi: ǃNoraǃnorahe du ge nî, ti ra mî.

³⁴Ob ge Jesuba ǁîna ǃeream, tsî ge mî: Amase, amase ta ra mîba du, ǁoreba ra dī-i hoa-i ge a ǁoreb di khobo.

³⁵Khobo-i ge ǀamose oms ǃnâ hâ tama hâ; ǀgôab ge ǀamose ra hâ.

³⁶ǀGôab ga ǁnâi ǃnoraǃnora duo, o du ge a amase ǃnorasa.

³⁷Abrahammi suridu a ǃkhaisa ta a ǂan; xawe du ǃgam te du nîsa ra ôa-am, ti mîs sadu ǃnâ ǂgâǃkhai-e ūhâ tama xui-ao.

³⁸Tita ge ti Îb tawa ta ge mûna ra ǃhoa; tsî du sadu ona sadu îb tawa du ge mûna ra dī.

³⁹On ge ǃeream, tsî ǁîb ǃoa ge mî: Abrahammi kom sida îo. Ob ge Jesuba ǁîn ǃoa ge mî: Abrahammi ôa du kao, o du ga Abrahammi di sîsenga dī hâ.

⁴⁰O du nēsi tita du nî ǃgamsa ra ôa-am, khoeta, Eloba xu ta ge ǁnâu amaba ra ǃhoaba du ta; nēsab ge Abrahamma dī tama hâ.

⁴¹Sadu ge sadu îb di sîsenga ra dī. On ge ǁîb ǃoa ge mî: ǀAiba xu da ǃnae tama hâ. ǀGui ǁGûb ǀguiba da ge ūhâ, Eloba.

⁴²Ob ge Jesuba ǁîn ǃoa ge mî: Elob ga sadu Îo, o du ga tita ǀnam hâ; Eloba xu ta ge ǂoa tsî hā xui-ao; ti aitsama ta ǂoa tama, xaweb ge ǁîba ge sî te.

⁴³Tarexa du kha ti mîsa ǁnâuǃā tama hâ? Ti mîsa du a ǁnâu ǁoa amaga.

⁴⁴Sadu ge ǁgâuaba ǁgûb ase ūhâ, tsî du ge sadu îb di turagu ǃoa ra dī ǂgao. ǁÎb ge khoen ǃgamao ge i, tsoatsoasa xu, tsîb ge amab ǃnâ mâhō tama ge i; ama-i xare-i ǁîb ǃnâ hâ tama hâ xui-ao. ǂHumibab ra ǃhoa, ob ge ǁîb ǂûb di-e xu ra ǃhoa, ǂhumi-aob a, tsî ǂhumib di ǁgûb a amaga.

⁴⁵Xawe tita, amaba ta ra mî amaga du ǂgom te tama.

⁴⁶Tari-i âdo tita ǁore-i xa a mîdan ǁkhā? Tsî amaba ta kara mîo, tarexa du ǂgom te tama hâ?

⁴⁷Eloba xu hâ-i ge Elob di mîde ra ǁnâu-e; ǁnā-amaga du sado ǁnâu tama. Eloba xu du hâ tama xui-ao.

⁴⁸On ge Jodeǁîna ǃeream, tsî ge mîǀî bi: ǃGâise da mî tama hâ, Samariaǁîts a, tsîts ǁgâua-e ūhâ ǃkhaisa?

⁴⁹Ob ge Jesuba ge ǃeream: Tita ge ǁgâua-e ūhâ tama, xawe ta ge ti Îba ra ǃgôa, tsî sadu ge tita ra ǀgoe.

⁵⁰Tsî tita ge ti ǃgôaba ôa tama hâ; xaweb ge ǀguiba hâ, ǁîba ra ôa tsî ǀgoraǃgâba.

⁵¹Amase, amase ta ra mîba du: Khoe-i ga ti mîsa ǃkhōǀgaipeo, o-i ge ǀamos kōse ǁōba tsâ tide.

⁵²On ge Jodeǁîna ǁîb ǃoa ge mî: Nēsi da ra mûǂan, ǁgâua-ets ūhâ ǃkhaisa. Abrahammi kom ge ǁō-o, tsî kēbo-aogu on, ots satsa ra mî: Khoe-i ga ti mîsa ǃkhōǀgaipeo, o i ge ǀamos kōse ǁōba tsâ tide, ti.

⁵³Satsa kha Abob Abrahammi, ǁō geb ǃgâ-ai a kai? Tsî kēbo-aogu on ge ǁō. Tarits asets kha aitsama ra dīsen?

⁵⁴Ob ge Jesuba ge ǃeream: Tita ga aitsama ǃgôasen, os ge ti ǃgôasa a ǁau. Xawe ti Îb ge ǁnāb, tita ra ǃgôab, sadu di Elob a, ti du ra mîba.

⁵⁵Tsî du ge ǁîba mûǂan tama hâ; xawe ta ge tita ǁîba a ǂan, tsî ǁîba ta ǂan tama ti ta ga mîo, o ta ga ǂhumi-ao, sadu ī khami; xawe ta a ǂan bi, tsî ta ge mîs âba ra ǃkhōǀgaipe.

⁵⁶Abrahammi sadu îb ge ǃgâiaǂgao ge hâ i, ti tsēsab nî mûs ǂama; tsîb ge mû si, tsî ge ǃgâiaǂgao.

⁵⁷On ge Jodeǁîna ǁîb ǃoa ge mî: Ganupets kom korodisi kurixa tamao, ots kha Abrahamma ge mû?

⁵⁸Ob ge Jesuba ǁîn ǃoa ge mî: Amase, amase ta ra mîba du, Abrahammi hâ tama hîa ta ge tita ge hâ i.

⁵⁹On ge ǀuide ge ūkhâi, ǁîban nî ǂnoase; xaweb ge Jesuba gaugausen, tsî tempela xu ge ǂoa.