Read Khoekhoegowab Johaneb 9 Bible Online

Johaneb 9 - Khoekhoegowab bible

Johaneb 9

¹Tsî ǃgû-īb ra hîab ge ǃnaesa xu a ǂgī khoeba ge mû.

²O gu ge ǁkhāǁkhāsabegu âba dî bi, tsî ge mî: Rabitse, tari-e ge ǁore, nēba, ǁîb îra, ǂgī hâseb ge ǃnaesa?

³Ob ge Jesuba ge ǃeream: Nēb kas, ǁîb îra kas ge ǁore tama hâ; xawe i ge ge ī, Elob sîsengu nî ǁîb tawa ǂhaise.

⁴Tita ge ǁnāb, tita ge sîb di sîsenga nî sîsen, tsē-i as kōse; tsuxub ge ǃgoaxa, khoe-i xare-i ǁîb ǃnâ a sîsen ǁoaba.

⁵ǃHūbaib ai ta hâs kōse ta ge a ǃhūbaib di ǃnâ.

⁶Tsî nēna mî tsîb ge ǃhūb ai ǂara, tsî ǂāba ǂgobe, tsî ǀâ ǂgoaba ǂgī hâb di mûra ai ǂkhau,

⁷tsî ge mîǀî bi: ǃGûsī î Siloams, (Sîǂuis, ti ra ǂnûiǃkhunihes) di khōsenǁgam-i ǃnâ ǁāsen! Ob ge ǃgûsī tsî ǁāsen tsî mû rase ge hā.

⁸On ge ǀgūkhoen, tsî aibeb ge ǂgī i ǃkhaisa ge mûna ge mî: Nēba kha ǀkhope gere ǂnôa tamaba?

⁹On ge ǀnîna: ǁÎb komo, ti ge mî. Tsî naun: ǁÎb khami ī. Xaweb ge ǁîb ǂûba: ǁÎ ta kom titao, ti ge mî.

¹⁰On ge ǁîb ǃoa ge mî: Matits kha mûra âtsa go khowabahe?

¹¹Ob ge ǃeream tsî ge mî: Khoeb, Jesub ti ra ǂgaiheb go ǂgoa-e ǂgobe tsî ǂkhaumû te, tsî mî: ǃGûsī î Siloams di khōsenǁgam-i ǃnâ ǁāsen! Tsî ǃgûsī tsî ta go ǁāseno, o ta ge go mû.

¹²On ge ǁîb ǃoa ge mî: Mapab ǁîba hâ? Ob ge: ǀŪ ta a, ti ge mî.

¹³On ge ǂgī ge iba Farisegu tawa ge ūsī.

¹⁴Tsî i ge sâtsē ge i, Jesub ge ǀâ ǂgoaba dī tsî ǁîb di mûra khowa ǃnubai.

¹⁵O gu ge Farisega ǁkhawa ǁîba ge dî, matib go mûsa. Ob ge ǁîgu ǃoa ge mî; ǂGoa-eb go ti mûra ai ǂkhau, tsî ta go ǁāsen, o ta ra mû.

¹⁶O gu ge ǀnîgu Farisegu diga ge mî: Nē khoeb ge Eloba xu hâ tama hâ, sâtsēsab khai tama hâ xui-ao. Xawe gu ge nauga ge mî: Mati i khoe-i hîa a ǁore-ao-e nēti ī saode a dī ǁkhā? Tsî i ge ǁhaiǃāgu-e ǁîn ǃnâ ge hā.

¹⁷O gu ge ǁkhawa ǂgī go ib ǃoa ge mî: Satsa ǁnâi, tare xū-ets ǁîb xa ra mî, sa mûrab go khowaba tsi ǃkhais xa? Ob ge: Kēbo-aob komo, ti ge mî.

¹⁸Tsîn ge Jodeǁîna ǂgom tama ge i, ǂgīb go hâ i hîab go mû ǃkhaisa, ǁgûra mû kaihe gob diran ge ǂgais kōse.

¹⁹On ge ǁîra dîǃā tsî ge mî: Nēba saro ôab, ǁnā ǂgī hâse ge ǃnae, ti ro ǁîb xa ra mîba? Matib ǁnâi nēsi ra mû?

²⁰O ra ge ǁgûra ǃeream tsî ge mî: ǂAnm ge a, nēb a sim di ôa, tsî ǂgī hâseb ge ǃnae ǃkhaisa;

²¹xawe matib nēsi ra mû ǃkhaisam a ǀū; tsî tari-i go mûra âba khowaba bi ǃkhaisam sima ǂan tama; kaiǂâub kom hâo, ǁîba dî re, îb ǁîba aitsama ǃhoabasen re.

²²Nēna ra ge ǁîb îra ge ǃhoa, Jodeǁîna ra ge ǃao amaga. ǀNain ge Jodeǁîna ǀgui xui-ao, khoe-i ga ǁîba Xristub ase ǁguiǁnâo, o i nî sinagogeba xu ǂhāǂuihe, ti.

²³ǁNā-amaga ra ge ǁîb îra: ǁÎb kom kaiǂâu hâo, ǁîba dîǃnâ re, ti ge mî.

²⁴On ge ǀgamǁî ǃnās ai ǂgī go i khoeba ǂgai tsî ǁîb ǃoa ge mî: Eloba ǃgôaba mā; sige ge a ǂan, nē khoeb a ǁore-ao ǃkhaisa.

²⁵Ob ge ǃeream tsî ge mî: Iseb a ǁore-ao ǃkhaisa ta ge tita a ǀū, ǀgui xū-i ǀgui-e ta ge a ǂan, ǂgī ta go i tsî nēsi ta ra mû ǃkhaisa.

²⁶O gu ge ǁîb ǃoa ge mî: Tare-eb go dī tsi? Matib go mûra khowaba tsi?

²⁷Ob ge ge ǃeream gu: ǀNai ta kom go mîba go-o, xawe go kom ǁnâu tamao. Tarexa go kha ǀgam ǃnāra ǁnâu ǂgao hâ? Sago ona ǁnâi ǁîb di ǁkhāǁkhāsabe kai ǂgao hâ?

²⁸O gu ge ǁîba ǀgoe, tsî ge mî: Sats ge a ǁîb di ǁkhāǁkhāsabe; xawe sige ge a Moseb di ǁkhāǁkhāsabe.

²⁹Sige ge a ǂan, Elob ge Moseb ǀkha a ǃhoa ǃkhaisa, xawe ge ge nēba a ǀū, mapa xub hâsa.

³⁰Ob ge khoeba ǃeream, tsî ǁîgu ǃoa ge mî: Ama buruburuxaba te a, sago a ǀū ǃkhaisa, mapa xub hâsa; xaweb ge ti mûra go khowa.

³¹O da ge a ǂan, Elob ǁore-aona ǁnâu tama ǃkhaisa, xawe eloǃaoǃgâxa-i tsî ǁîb ǂâisa ra dī-i, ǁnā-eb ra ǁnâu.

³²ǃHūbaib di ǁaeba xu i ge ǁnâusa tama ge hâ i, khoe-i ge ǂgī hâse ge ǃnae i di mûra khowa ǃkhaisa.

³³Nēb ga Eloba xu hâ tama io, ob kom ga xū-e dī ǁoao.

³⁴O gu ge ǃeream, tsî ǁîb oa ge mî: Hoaragasets ge satsa ǁoreb ǃnâ ge ǃnae, tsîts kha sige ra ǁkhāǁkhā? O gu ge ǁîba ge ǂhāǂui.

³⁵Tsî Jesub ge ǁnâu, ǂhāǂui bi gu go ǃkhaisa, ob ge hō bib geo, ǁîb ǃoa ge mî: Satsa Elob Ôab ǃnâ ǂgomts ra?

³⁶Ob ge ge ǃeream: Mâba kha ǃKhūtse, î ta ǁîb ǃnâ ǂgom?

³⁷Ob ge Jesuba ǁîb ǃoa ge mî: ǁÎbats go mû, tsî sats ǀkha ra ǃhoab kom ǁîbao.

³⁸Ob ge: ǂGom ta ra, ǃKhūtse, ti mî tsî ge ǀgorelî bi.

³⁹Ob ge Jesuba ge mî: ǀGoraǃgâ-i ǃoa ta ge ǃhūbaib ai ge hā, mû taman nî mûse, tsî mû ran nî ǂgīse.

⁴⁰Tsî ǀnîgu Farisegu digu, ǁîb tawa hâgu ge ǁnâuo, o gu ge ǁîb ǃoa ge mî: Tsî sige ǁkhāti ǂgī hâ?

⁴¹Ob ge Jesuba ǁîgu ǃoa ge mî: ǂGī go ga hâo, o go ga ǁore-e ūhâ tama i hâ; xawe: Mû ge ra, ti go nēsi ra mî amagab ge ǁoreb âgo ra hâ.