Read Khoekhoegowab ǃNaeǃkhaidi 1 Bible Online

ǃNaeǃkhaidi 1 - Khoekhoegowab bible

ǃNaeǃkhaidi 1

¹ǂGuro ǂkhanisa ta ge ge xoa, o Teofilutse, Jesub gere dī tsî ǁkhāǁkhātsoatsoan hoan xa

²ūǃapaheb ge tsēs kōse, ǃkhōǂuibasensa apostelgab ge ǃAnu Gagaba xu mîmāde mās khaoǃgâ.

³ǁNāgu, ǁîb di tsâb khaoǃgâb ge ǁkhāti ûitsamase ǁgausenga, ǃkharaga ǂhaiǂhaisendi ǃnâ, hakadisi tsēdi kōse ǁîgu xa ra mûheǃâ, tsî Elob gaosib xa ra ǃhoaǃâ.

⁴Tsî ǁîgu ǀkha ǀhû hâseb ge ǁîga ge mîmā, Jerusalemsa xu go ǀgora tide, tsî go nî ǃâubasen mîmâis ǁGûb dis, ǁîs xa go tita xu ge ǁnâusa, tib ge ge mî.

⁵Johaneb ge ǁgam-i ǀkha gere ǁāǁnâ, xawe go kom sago ǃAnu Gagab ǀkha nîra ǁāǁnâheo, nē tsēdi nî ǃgû-īs aiǃâ.

⁶O gu ge ǀhû ge hâ iga dîǃgâ bi tsî ge mî: ǃKhūtse, nē ǁaeb aits kha Israelǁîna gaosiba ǁkhawa nî ūkhâiba?

⁷Ob ge ǁîgu ǃoa ge mî: Anuba go tama, ǁaegu tsî kamagu, Abob ge ǁîb di ǀgaib ǂûb ǃnâ mâiga ǂansa;

⁸xawe go ge sago ǃAnu Gagab di ǀgaiba nîra hō, sago ǂama nîra hāba; o go ge nî ti ǃkhō-amao, Jerusalems ǃnâs kas Judeab hoab ǃnâs kas Samariab hoab ǃnâs kasa, tsî ǃhūbaib di ǀams kōse.

⁹Tsî nēnab ge mîo, ob ge mû gu ra hîa ge ūǃapahe, tsî ǀnanu-i ge ǁîba ǁîgu di mûde xu ge ūbē.

¹⁰Tsî ǀhommiǀî gu ge ǃgapakhâio, ǃgûǃapab ra hîa, mû, ǀgam khoekha ge ǁîgu tawa ǃuri saran ǃnâ ge mâ,

¹¹ǁkhāti nēti ra mîkha: Galileaǁî aogo, tarexa go ǀhommiǀî ra ǃgapase mâ? Nē Jesub, sago xu ǀhommi ǃoa go ūǃapaheb, ǁîb ge ǁnās ǁkhās xase nîra hā, ǀhommiǀîb ra ǃapase go go mû bi khami.

¹²ǃNubai gu ge Jerusalems ǃoa ge oa, ǁnā ǃhommi, ǀKheraǃhommi ti ra ǂgaiheba xu, ǁaupexa ǀgui kilometera Jerusalems ǀgūse hâba.

¹³Tsî sī gu geo, o gu ge oms ǂamai hâ omǃnāb ǃoa ge ǃapa, tsî gu ge ǁnāpa ge hâ: Petrub, Johaneb, Jakobub, Andreab, Filipub, Tomab, Bartolomeub, Mateub, Jakobub, Alfeub ôab, Simon Seloteb tsî Judab, Jakobub ôab tsîga.

¹⁴Nēgu hoagu ge ǀguiǃnâxase ǀgores tsî ǀkhomas tsîra ǃnâ ge hâhâ, taradi ǀkha tsî Marias, Jesub îs, tsî ǁîb di ǃgâsagu tsîn ǀkha.

¹⁵Tsî ǁnā tsēdi ǃnâb ge Petruba ǁkhāǁkhāsaben ǃnâ khâi (tsî i ge ǂnubi-e ge ǀhû hâ i, ǁaupexa ǀguikaidisi tsî ǀgamdisin kōse) tsî ge mî:

¹⁶ǃGâsago, nē xoas ge nî ǀoaǀoahe, ǃAnu Gagab ge Davib di amsa xu aiǂhôasa, Judab, Jesuba ge ǃkhōgu di ǂgaeǂgui-ao ge ib xa.

¹⁷ǁÎb kom sage ǀkha ǃgôaǁaehe ge hâ io, tsîb kom nē ǃoabas di amǃnâsa ge hō-o.

¹⁸Tsîb ge nēpa ǃhana-e ge ǃoaǂui ǂhanuoǃnâsib di amǃnâs ama, tsî ǁnāǁgôa tsî ge ǂariǃā tsîn ge ǃnāxūn hoan âba ge ǁnāǂoa.

¹⁹Tsîs ge ǁîsa Jerusalems ǃnâ ǁan hân hoan tawa ge ǂansa, ob ge ǁnā ǃhanaba ǁîn di gowab ǂûb ǃnâ “Akeldama” ti ra ǂgaihe, ǁnās ge ǀAoǃhanab ti ra ǂnûiǃkhunihe.

²⁰Psalmǂkhanis ǃnâ xoahe hâ amaga: “As hâǃnâǃkhais âba ǀkhaiǃnâ, î-i tā khoe-e hā, ǁîs ǃnâ nî ǁan-e;” tsî: “Ab ǀnîba ǁîb di mûǂamaosisa hō!” ti.

²¹O i ge a ǂhâbasa, ǁnā aogu, ǃKhūb Jesub ge sada ǃnâ ǂgâ tsî gere ǂoa ǁaeb hoaba ge ǀguipa gere ǃgûmaga,

²²Johaneb di ǁāǁnâsa xu, sada xub ge ūǃapahe tsēs kōse, sada ǀkha ge hâ igu di ǀguib nî sige ǀkha ǁîb khâis di ǃkhō-amao kai ǃkhaisa.

²³On ge ǀgamkha ge mâi: Joseb, Barsabab ti ra ǂgaiheb, ǁkhāti Justub ti ǀon hâb tsî Matiab tsîkha.

²⁴On ge ǀgore tsî ge mî: Sats ǃKhūts, hoan di ǂgaoba a ǂantse, nē ǀgamkha xa ǀguiba ǁgau, sats ǃkhōǂuibasen hâba,

²⁵în ǀguiba ǃkhōǃoa, nē ǃoabas tsî apostelsis di amǃnâs, ǁîsa xub ge Judaba ǂgōsa ǃoa, ǁîb di ǃkhais ǂhanis ǃoab nî ǃgûse.

²⁶Tsîn ge ǁîkha ǂama ǂnōgusa ge ao; tsîs ge ǂnōgusa Matiab ai ge ǁnā, ob ge disiǀguiǀa apostelgu ǀkha ge ǃgôaǁaehe.