Read Khoekhoegowab ǃNaeǃkhaidi 10 Bible Online

ǃNaeǃkhaidi 10 - Khoekhoegowab bible

ǃNaeǃkhaidi 10

¹Tsî Kaesareas tawab ge ǂanǂansa khoeb, Korneliub ti ǀon hâb, ǁnā ǂnubis, Italiaǁîs ti ra ǂgaihes di danakhoeba ge hâ i,

²eloǃgâiǃōxa tsî eloǃaoǃgâxa khoeb ommi âb hoaragab ǀkha, tsî ǁaesa kaise audi ǀkha hui tsî hugaǀgui Elob ǃoa gere ǀgoreba.

³ǁÎb ge ai-i ǃnâ ǂhaisase ge mû, tsēs di khoeseǁî iri ai Elob di ǀhomǃgā-i ge ǁîb tawa hā ǂgâxa, tsî Korneliutse! ti a mîsa.

⁴Ob ge ǃgapaǀî bi tsî ǃao rase ge mî: Tare-e, ǃKhūtse? Ob ge ǁîb ǃoa ge mî: Sa ǀgoredi tsî sa audi ge ǂâiǂâixūse Elob aiǃâ ge sīǃapa.

⁵Tsî nēsi khoega sî Jopas ǃoa, î Simonni, Petrub tis tsîna ra ǂgaiheba ǂgai,

⁶Simonni khōǀnoro-aob tawa ra hâba, ǁîb oms hurib amǃgâ mâba; ǁîb ge nîra mîba tsi, tare-ets nî dī ǃkhaisa.

⁷Tsî ǁnā ǀhomǃgāb, Korneliub ǀkha gere ǃhoab ge bēo, ob ge ǁîb oms ǃgāgu di ǀgamkha, tsî eloǃaoǃgâxa toro-aob, hugaǀgui ǁîb tawa hâgu diba ǂgai,

⁸tsî hoana ǃhoaba gu, tsî Jopas ǃoa ge sî gu.

⁹Tsî nautsē daob ai gu hâ tsî ǃāsa gu ra ǀgū, hîab ge Petruba oms ǂamais ǃoa ge ǃapa, ǀgoreb nîse, tsēs di ǃnaniǁî iri ai.

¹⁰Ob ge kaise ǃâ tsî ge ǂû ǂgao. Tsî ǁāǁāba bin ra hîa i ge gagamûnanai-e ǁîb ai ge hā.

¹¹Ob ge ǀhomma ǁkhowa-amsen hâse ge mû, tsî soa-e ǁîb ǃoa ra ǁgôaxase, kai lineǃkhaib khami ī-e, haka ǀamdi ai ǃgaehe hâ-e, tsî i ge ǃhūb ai ge ǁgôa kaihe.

¹²ǁÎ-i ǃnân ge hoa hakaǀnū ǀgurun ǃhūbaib din, tsî ǂhanaben, tsî anin tsîna ge hâ i.

¹³Tsî i ge dom-e ge hāba bi: Khâi, Petrutse, ǂā î ǂû! ti.

¹⁴Ob ge Petruba ge mî: Hî-î, ǃKhūtse, tātsē ta kom khaihe tama tsî ǃanuoǃnâ xū-e ǂû tamao.

¹⁵Ob ge domma ǁkhawa ǀgamǁî ǃnās ai ǁîb ǃoa ge mî: Elob go ǃanuǃanu xū-ets ge satsa ǃanuoǃnâ ti ǂgai tide.

¹⁶Tsîs ge nēsa ǃnona ǃnādi kōse ge ī; os ge soasa ǁnātimîsi ǁkhawa ǀhommi ǃoa ge ūǃapahe.

¹⁷Tsî Petrub ge ǁîb ǃnâ ǀgamǂâi, mâ aiǃnôa-i a ǃkhaisa, ǁnā mûb go-e, o gu ge ǁnā khoegu, Korneliub xa go sîhega Simonni omsa dîǃā, tsî oms dao-ams aiǃâ mâ,

¹⁸tsî ǂgai, tsî ge dî, iseb Simonni, Petrub tis tsîna ra ǂgaiheba ǁnā oms ǃnâ hâ ǃkhaisa.

¹⁹Tsî Petrub ra ais xa ǂâiǂâisen hîab ge Gagaga ǁîb ǃoa ge mî: Mû, ǃnona khoegu ra ôa tsi;

²⁰ǁnā-amaga khâi î ǁgôa, î ǁîgu ǀkha ǃgû, xū-i xare-e îganǀgē tama i tsî, tita go ǁîga sî xuige.

²¹Ob ge Petruba ǁnā khoegu ǃoa ǁgôa tsî ge mî: Mû, tita ge ǁî ta, sago ra ôata; tare xū-i ǃaroma go go hā?

²²O gu ge ge mî: Korneliub, kaidisigu danakhoeb, ǂhanu-ai tsî Eloba ra ǃaoǃgâ aob, Jodeǁaes hoaragas tawa ǃgâi gom-e ūhâb, ǁîb ge ǃanu ǀhomǃgā-e xu elosi mîmā-e ge hō, ǁîb oms ǃoab nî satsa ǂgai ti, îb ga satsa xu mîde ǁnâu.

²³Ob ge ǂgaiǂgâxa tsî ge ǃkhōǃoa gu. Tsî nautsēb ge Petruba ǁîgu ǀkha ge ǂoa, tsî ǀnî ǃgâsagu Jopas digu ge ǁîb ǀkha ge ǃgû.

²⁴Tsî nautsē gu ge Kaesareas tawa ge sī. Tsî Korneliub ge ǁîga gere ǃâu, khoexagun tsî horesan âba ǂgaiǀhû hâǃâ.

²⁵Petrub ra ǂgâ hîab ge Korneliuba ǁîba ǃgûǃoa, tsî ǁîb ǂaira tawa ǁnā tsî kai ǃgôasib ǀkha ge tawede bi.

²⁶Ob ge Petruba ǁîba ǃkhōkhâi, tsî ge mî: Khâi, tita on a khoe xuige.

²⁷Tsî ǃhoa-ū bib ra, hîab ge ǂgâ tsî ǂguin, ǀhao ge hâ ina ge hō.

²⁸Tsîb ge ǁîn ǃoa ge mî: Sadu ge a ǂan, Jodeǁî ao-i mā-amhe tama hâ ǃkhaisa, ǃhaokhoe-i ǀkha ǁaeǁaesen tsî ǁî-i tawa sīsa, xaweb ge Eloba go ǁgau te, khoe-i xare-e ta khaihe tama tsî ǃanuoǃnâ ti ǂgai tide ǃkhaisa.

²⁹ǁNā-amaga ta ge ǁkhāti hā ta nîsa ǂkhā tama go i, ǂgaihe ta go-o. O ta ra dî, mâ xū-i ǃaroma du go ǂgai te ǃkhaisa.

³⁰Ob ge Korneliuba ge mî: Haka tsēdi ge go ī, tsî ta ge ǁaupexa nē khoeseǁî iri ai ti oms ai gere ǀgore. Ob ge ǃnapetamase ǂkhaisa sara-e ge anahe hâ i khoeba ti aiǃâ mâ

³¹tsî ge mî: Korneliutse, sa ǀgoresats ǁnâu-amhe hâ, tsî Elob ge sa ǀkhaexūn xa go ǂâi.

³²Sî ǁnâi Jopas ǃoa, î Simonni, Petrub ti ǀon hâba ǂgai; ǁîb ge Simonni, khōǀnoro-aob di oms, hurib amǃgâ mâs ǃnâ ra hâ; ǁnāb ge, hāb kao, nîra ǃhoa-ū tsi.

³³O ta ge ǁnātimîsi satsa go sî, tsîts ge ǃgâise go dī, hāts go ǃkhaisa. O da hoada nēsi Elob aiǃâ ǀhao hâ, ǃKhūb xats mîmāhe hân hoana da nî ǁnâuse.

³⁴Ob ge Petruba amsa khowa tsî ge mî: Amab ǃnâ ta ra hōǃâ, Elob khoe-i aisa ǃkhōǃoa tama ǃkhaisa;

³⁵xawe mâ ǁae-i hoa-i ǃnâ ga ǁîba ǃaoǃgâ tsî ǂhanu-aisiba dī-i ge ǁîb di ǃkhōǃoasabe-e.

³⁶ǁNā mîsab ge Eloba Israeli ôana ge sîba, ǃgâiǂhôas Jesub Xristuba xu hâ ǂkhîba ra aoǁnâsa; ǁîb a hoan di ǃKhū.

³⁷ǁNā ǃnaeǃkhais xa du ge a ǂan, Judeab hoaragab ǃnâ ge īsa, Galileab ǃnâ tsoatsoa tsî, Johaneb gere aoǁnâ ǁāǁnâs khaoǃgâ:

³⁸Jesub, Nasareǁîb di ǃnaeǃkhais xa, matib Eloba ǁîba ǃAnu Gagab tsî ǀgaib ǀkha ge ǂkhau ǃkhaisa; ǁnāb, ǃhūba gere ǃgûǃnâb, ǃgâidī tsî ge ǂuruǂuruǃâ ǁgâuab xa ge dāhe hâ in hoana, Elob ge ǁîb ǀkha hâ i xui-ao.

³⁹Tsî sige ge a ǀhûǀguitimî-ao, Jodeǁîn di ǃhūb tsî Jerusalems tawab gere dīn hoan xa. ǁÎban ge haib ai ǂgā tsî ge ǃgam.

⁴⁰ǁÎbab ge Eloba ǃnonaǁî tsēs ai ge ǂkhaiǂkhai, tsî ge ǂhai kai bi,

⁴¹ǁaes hoas tawa tama, xawe ǁnā ǀhûǀguitimî-aogu, Elob xa ge ǃkhōǂuibasenhe hâ igu tawa, sige ǁîb ǀkha gere ǂû tsî āge tawa, ǁō hâna xub ge khâis khaoǃgâ.

⁴²Tsîb ge sige ge mîmā, ǁaesa aoǁnâ tsî ge nî ǃkhō-amsa, ǁîb ǂûb ge ûitsaman tsî ǁō hân tsîn di ǀgoraǃgâ-aose Elob xa ǂnûiǂgāhesa.

⁴³ǁÎb xa gu ge kēbo-aogu hoaga ra ǃkhō-am, ǁîb di ǀonsa xun ǁîb ǃnâ ra ǂgomn hoana ǁoren ǀûbasa nîra hō ǃkhaisa.

⁴⁴Tsî ganupeb ra Petruba nē mîde ǃhoa hîab ge ǃAnu Gagaba mîsa ra ǁnâun hoan ǂama ge ǁnā.

⁴⁵Tsî Jodeǁî ǂgomsabegu, Petrub ǀkha ge hāgu ge ge burugâ, ǃAnu Gagab di hōs ra ǁkhāti ǀūben ǂama ǁhōǂuihe ǃkhais xa.

⁴⁶ǀKhara gowagan ra ǃhoa tsî Eloban ra kaikai ǃkhaisan ge ǁnâu xui-ao. ǃNubaib ge Petruba ge ǃeream:

⁴⁷Khoe-e kha ǁgamma ǃkhâi ǁkhā i a, nēn ǃAnu Gagaba sage khami go hōn ǁāǁnâhe tidese?

⁴⁸Ob ge ge mîmā, Jesub Xristub di ǀons ǃnân nî ǁāǁnâhe ti. ǃNubain ge ge ǀkhoma bi, ǀnî tsēdeb ga ǁnāpa hâ ti.