Read Khoekhoegowab ǃNaeǃkhaidi 11 Bible Online

ǃNaeǃkhaidi 11 - Khoekhoegowab bible

ǃNaeǃkhaidi 11

¹Tsî gu ge apostelgu tsî ǃgâsan, Judeab ǃnâ hân tsîna ge ǁnâu, ǀūben go ǁkhāti Elob mîsa ǃkhōǃoa ǃkhaisa.

²Tsî Petrub ge Jerusalems tawa oasī, o gu ge ǃgaohe hâga ǁîb ǀkha ǂnoagu

³tsî ge mî: Sats kom aikhōba ūhâ khoegu tawa ǂgâ tsî ǁîgu ǀkha go ǂûo.

⁴Ob ge Petruba tsoatsoa tsî ǁîga saogubese ǃhoaba tsî ge mî:

⁵Tita ge ǃās Jopas ǃnâ ǀgore rase hâ io, o ta ge gagaǂgaeǃapahes ǃnâ ai-e ge mû; soa-i ǁgôaxa ra-i, kai ǃuri ǃkhaib khami ī-i, haka ǀamdi tawa ǃgaehe hâ-i, ǀhomma xu ra ǁgôaxa kaihe-e, tsî i ge tita kōse ge hā.

⁶Tsî ǁî-i ǃnâ ta ge kō, o ta ge hōǃâ tsî ǁî-i ǃnâ hakaǀnūn ǃhūbaib din, tsî ǀgurun, tsî ǂhanaben, tsî ǀhommi di anin tsîna ge mû.

⁷Tsî ta ge ǁkhāti dom-e ge ǁnâu: Khâi, Petrutse, ǂā î ǂû! ti ra mîǀî te-e.

⁸O ta ge tita ge mî: Hî-i, ǃKhūtse, tātsē i kom khaihe tama i tsî ǃanuoǃnâ-i hoa-e ti ams ǃnâ ǂgâ tamao.

⁹Ob ge domma ǀgamǁî ǃnās ai ǀhomma xu ge ǃeream te, Elob go ǃanuǃanunats ge satsa ǃanuoǃnâse ǂgai tide, ti.

¹⁰Tsî nēs ge ǃnona ǃnādi kōse īo, on ge hoana ǁkhawa ǀhommi ǃoa ge ūǃapahe.

¹¹ǁNātimîsi gu ge ǃnona khoegu, Kaesareasa xu tita ǃoa go sîhega, hâǃnâ ta a oms aiǃâ ge mâ i.

¹²Ob ge Gagaba ge mîmā te, îganǀgē tama i tsî ta nî ǁîgu ǀkha ǃgûsa. Tsî gu ge ǁkhāti tita ǀkha nē ǃnani ǃgâsaga ge sī, tsî ge ge Korneliub di oms ǃnâ ge ǂgâ.

¹³Ob ge sige ge ǂhôa, matib ge ǁîb di oms ǃnâ ǀhomǃgāba mû ǃkhaisa, mâ tsî ǁîb ǃoa ra mîba: Khoega sî Jopas ǃoa, î Simonni, Petrub tis tsîna ra ǂgaiheba ǂgai;

¹⁴ǁîb ge sats ǃoa nîra ǃhoa, ǁnāsa xuts ge sats tsî sa oms hoaragasa nî ǃgâiǃō.

¹⁵Tsî ǃhoatsoatsoa ta ra hîab ge ǃAnu Gagaba ǁîn ai ge ǁnā, tsoatsoas ǃnâb ge sada ai ǁnās ǁkhās khami.

¹⁶O ta ge ǃKhūb di mîs, mîb geres xa ge ǂâi: Johaneb ge ǁgam-i ǀkha gere ǁāǁnâ, xawe du ge sado ǃAnu Gagab ǀkha nîra ǁāǁnâhe.

¹⁷Elob ga ǁnâi ǁîn ǁkhā hōde mā, sada, ǃKhūb Jesub Xristub ǃnâ ra ǂgomdab ge mā khami, tari ta kha ǁnâi tita, o ta Eloba nî ǃkhâi ǁkhā?

¹⁸Tsî nēnan ge ǁnâuo, on ge ǃnō, tsî Eloba kare tsî ge mî: Ob kom Eloba ǁkhāti ǀūbena ûib ǃoa ǃhobasensa go māo!

¹⁹Tsî ǁnān, Stefanub ǁaeb ǃnâ ge hā ǁgâiǀāba xu ǀgaruǀgaruhe hân ge gere ǃgûma Fenisiab tsî Siprus tsî Antioxias tsîn kōse, ǀnî khoe-i ǃoa mîsa aoǁnâ tamase, xawe Jodeǁîn ǀguin ǃoa.

²⁰Tsî gu ge ǀnîga ǁîn ǃnâ ge hâ i, Sipruǁî tsî Sireneǁî khoega, ǁîgu ge Antioxias tawa sī, tsî ǁkhāti Grikeǁîn ǃoa gere ǃhoa, ǃKhūb Jesub di ǃgâiǂhôasa aoǁnâ tsî.

²¹Tsî ǃKhūb di ǃommi ge ǁîgu ǀkha ge hâ i, os ge kai ǁaesa ǂgom tsî ǃKhūb ǃoa ge ǃhobasen.

²²Tsîb ge nē gommi âna Jerusalems ǀhaohâb di ǂgaedi tawa ge sī; on ge Barnababa ge sîǂui, Antioxias kōseb nî ǃhūba ǃgûǃnâse.

²³Tsî sī tsîb ge Elob ǀkhomma mûo, ob ge ǃgâiaǂgao, tsî ǁîn hoana gere ǁnama, ǁaposa ǂgaob di ǂâibasens ǀkhan nî ǃKhūb tawa hâhâga.

²⁴Ama ǃgâi khoeb ge i xui-ao, ǃAnu Gagab tsî ǂgoms xa ǀoa hâba. Os ge kai ǁaesa ǃKhūba ge ǀarobahe.

²⁵Tsîb ge Barnababa Tarsus ǃoa ge ǂoa, Saulubab nî ôase.

²⁶Tsî hō bib geo, ob ge Antioxias ǃoa ge ūsī bi. Tsî kha ge kurib hoaragaba ǀhaohâb ǀkha ge ǀhao hâ i, tsî kai ǁaesa gere ǁkhāǁkhā, tsî ǁkhāǁkhāsaben ge ǂguro ǃnāsa Antioxias tawa Xristeǁîn ti ge ǂgaihe.

²⁷Tsî ǁnā tsēdi ǁkhādi ai gu ge kēbo-aoga Jerusalemsa xu Antioxias tawa ge ǀkhī.

²⁸Ob ge ǁîgu di ǀguib, Agabub ti ǀon hâba khâi, tsî Gagaba xu kai ǃâtsūǀkhā-i, ǃhūbaib hoab ai nîra hā-e ge ǂanǂan, Kaesari Klaudiub di ǁaeb ai ǁkhāti ge hā-e.

²⁹O i ge ǁkhāǁkhāsaben di-i hoa-e ge ǂâibasen, ǁkhā i as kōse i nî xū-e sîsa Judeab ǃnâ ǁan hâ ǃgâsan di huihes ǃoa;

³⁰tin ge ǁkhāti ega ge dī, tsîn ge huixūna Barnabab tsî Saulub tsîkha di ǃomma xu ǂnomdomga ge sîba.