Read Khoekhoegowab ǃNaeǃkhaidi 12 Bible Online

ǃNaeǃkhaidi 12 - Khoekhoegowab bible

ǃNaeǃkhaidi 12

¹ǁNā ǁaeb ge gao-aob Herodeba ǃomga ǀnîn ǀhaohâb din tawa ge ǁgui, ǁînab nî tsûtsûse.

²Tsîb ge Jakobub, Johaneb di ǃgâsaba gôab ǀkha ge ǃgam.

³Tsî mûb geo, Jodeǁîn ra ǃgâibahe ǃkhaisa, ob ge ǃaruǀî Petrub ona ge ǃkhō. Tsî di ge ǀkhuruǀkhuruhe tama peren di tsēde ge ī.

⁴Tsî ǃkhō bib geo, ob ge ǃkhō-oms ǃnâ ǂnûi bi, tsî haka ǃûidi, mâs hoas âdi haka toro-aoga ūhâde ge māǁnâ bi, ǁîba gu nî ǃûise, Pasxab khaoǃgâb nî ǁaes aiǃâ ūsī bi, ti ǂâi tsî.

⁵Tsî Petrub ge ǃkhō-oms ǃnâ ge sâuhe, xawe ǀhaohâb ge ǀûs ose Elob ǃoa ǁîba ge ǀgoreba.

⁶Tsî Herodeb ge ǁîba mâi-aiǃâ ǂgao ǃnubaib ge Petruba ǁkhā tsuxub ǃnâ ǀgam toro-aokha ǁaegu ge ǁom, ǀgam ǁkhamkha ǀkha ǃgaehe hâse, tsî ǃûi-aogu ge ǃkhō-oms di dao-amsa gere sâu.

⁷Tsî mû, ǃKhūb di ǀhomǃgā-i ge hā mâ, tsî ǃnâ-i ge ǃkhō-oms ǃnâ ge ǃnâ; ob ge Petruba ǃnammi ai ǂnau, tsî ǂkhaiǂkhai bi tsî: ǃHaese khâi! ti ge mî. O kha ge ǁkhamkha ǁîb di ǃomma xu ge ǁnā.

⁸Tsîb ge ǀhomǃgāba ǁîb ǃoa ge mî: ǂGaeǂgāsen î sa ǀkhapura ana! Ob ge ǁnāti ge dī. Tsîb ge ǁîb ǃoa ge mî: Anaǂamxūba ǂgaeǂgā î tita sao!

⁹Ob ge ǂoa tsî ge sao bi, ǀhomǃgāba xu go ī-i a ama ǃkhaisa ǀū tsî, xaweb ge ai-eb ra mû, ti ge ǂâi.

¹⁰Tsî ǂguro ǃûis tsî ǀgamǁîsa ǃgûǃganu tsî kha ge ǀuridao-ammi, ǃāsa-ū garub tawa ge sī; ǁîb ge aitsama ǁîkha ge ǁkhowa-amsenba, o kha ge ǂoa tsî ǃganni kōse ge ǃgû; ǃnubaib ge ǀhomǃgāba ǁnātimîsi ǁîba xu ge bē.

¹¹Tsî Petrub ge ǂâihō-o, ob ge ge mî: Nēsi ta amase a ǂan, ǃKhūb go ǁîb ǀhomǃgāba sî, tsî Herodeb di ǃomma xu tsî Jodeǁaes hoas di ǃâusa xu ore te ǃkhaisa.

¹²Tsî ǂâiǂâisenni geo, ob ge Marias, Johaneb îs, Markub tis tsîna ge ǀon hâ ib di oms ǃoa ge ǃgû; ǁnāpan ge ǂguina ge ǀhao hâ i tsî gere ǀgore.

¹³Tsî Petrub ge dao-ams tawa ǃgubu-amo, os ge ǃgās Rode ti ǀon hâsa, ǃgâsas nîse ge hā.

¹⁴Tsî Petrub di dommas ge ǁnâu, os ge dao-amsa ǃgâiaǂgaob xa ǁkhowa-am tama i tsî ǃkhoeǂgâ tsî: Petrub kom dao-ams aiǃâ mâo, ti ge ǂhôa.

¹⁵On ge ǁîs ǃoa ge mî: ǃKhaus hâ! Xawes ge ǁîsa ǁnāti-i ī ǃkhaisa ge mîǃgûǃgû. On ge: ǁÎb di ǀhomǃgāb komo, ti ge mî.

¹⁶Tsî Petrub ge ge ǃgubu-amǀgara. Tsî ǁkhowa-amn geo, on ge ǁîba mû tsî ge burugâ.

¹⁷Ob ge ǃommi âb ǀkha ǁîna ge ǁgau, ǃnōn nîga, tsîb ge ǁîna ge mîba matib go ǃKhūba ǃkhō-omsa xu a ǂgaeǂguiǂui bi ǃkhaisa, tsî ge mî: Jakobub tsî nau ǃgâsagu ona nēsa mîba. ǃNubaib ge ǂoa, tsî ǀkhara ǃkhais ǃoa ge dāǁnâ.

¹⁸Tsî ǁgoa i geo, o i ge kai ǂkhupi-e toro-aogu ǃnâ ge hā, tare-i go Petrub ǀkha ī ǃkhaisa.

¹⁹Ob ge Herodeba ge ôa kai bi, tsî hō bi tamab ge io, ob ge ǃûi-aoga ge dîǃgâ, tsî ge ǃgam kai gu. Tsîb ge Judeaba xu Kaesareab ǃoa ǁgôa tsî ǁaero-e ǁnāpa ge hâ.

²⁰Tires tsî Sidonǁîn ǀkhab ge Herodeba ge torodī ǂgao hâ i. Xawen ge ǀguiǂâixase ǁîb tawa hā, tsî gao-aob di ǁuiǃkhōmâi-aob Blastuba ǃhoadan tsî ǂkhîba ge ǂgan, ǁîn di ǃhūb gao-aob di ǃhūba xu gere ǂûmāhe xui-ao.

²¹Ob ge Herodeba mîmâisa tsēs ai gao-aosi saraba ana, tsî trons ai ǂnû tsî ǁîna ge ǃhoa-ū.

²²Os ge ǁaesa: Elob di dommi tsî khoe-i di tamab komo, ti ge mî.

²³Ob ge ǃKhūb di ǀhomǃgāba ǁnātimîsi ge ǂnau bi, Elobab ge ǃgôasiba mā tama i amaga, ob ge ǂunin xa ōhe tsî ge ǁō.

²⁴Xawes ge Elob mîsa ǀom tsî ge ǂguiǂguisen.

²⁵Tsî Barnabab tsî Saulub tsîkha ge ǁkhawa Jerusalemsa xu ge oa, ǃoabasa kha ge dītoao, tsî kha ge Johaneb, Markub tis tsîna ǀon hâba, ge ǃgû-ū.