Read Khoekhoegowab ǃNaeǃkhaidi 13 Bible Online

ǃNaeǃkhaidi 13 - Khoekhoegowab bible

ǃNaeǃkhaidi 13

¹Tsî gu ge Antioxias tawa ǁnāpa hâ ǀhaohâb ǃnâ ǀnî kēbo-aogu tsî ǁkhāǁkhā-aogu tsîga ge hâ i, nēgu: Barnabab tsî Simeonni Niger ti ra ǂgaiheb tsî Lusiub Sireneǁîb, tsî Manaenni, Herodeb hakaǁî ǃhūǃâs gaosab ǀkha gere kaikaiheb tsî Saulub tsîga.

²Tsî ǃKhūba ǃoaba tsî gu ge ǂûtama hâo, ob ge ǃAnu Gagaba ge mî: Tita khaiba Barnabab tsî Saulub tsîkha ǁnā sîsenni, tita go ǁîkha ǂgaibab ǃoa.

³O gu ge ǂûtama hâ, tsî ǀgore, tsî ǁîkha ǃomga ǁgui-ai, tsî ge ǃgû kai kha.

⁴O kha ge ǃAnu Gagab xa sîǂuihe hâse Seleusias ǃoa ǃgû, tsî ǁnāpa xu ge Siprus ǃoa ge ǃgâu.

⁵Tsî ǃās Salamis tawa kha ge sī, o kha ge Elob mîsa Jodeǁîn di sinagogegu ǃnâ gere ǂhôa. Tsî kha ge ǁkhāti Johaneba hui-aose ge ūhâ i.

⁶Tsî ǃnāǃnuis hoaragasa kha ge ǃās Pafos kōse ǃgûǃnâǃganuo, o kha ge ǂanǂansa ǃgaidī tsî ǂkhaba kēbo-aoba ge hō, Jodeǁîb, Bar-Jesub ti ǀon hâb,

⁷Sergiub Paulub, ǃāǃkhōmâi-aob, ǁnâuǃāxa aob ǀkha gere hâba. ǁÎb ge Barnabab tsî Saulub tsîkha ge ǂgaihā, Elob mîsa ǁnâu ǂgao tsî.

⁸Ob ge Elimab ǃgaidī-aoba (ǁnātis ge ǀons âba ra ǂnûiǃkhunihe) ǁîkha mâǃoa, tsî ǃākhōmâi-aobab nî ǂgomsa xu ǁkhaedawa ǃkhaisa ge ôa-am.

⁹Ob ge Saulub, ǁkhāti Paulub ti ra ǂgaiheba, ǃAnu Gagab ǀkha ǀoa hâse ǃgapalî bi

¹⁰tsî ge mî: Okha, gāxaǃnâsi-i hoa-i tsî ǂkhabasi-i hoa-i xa ǀoa hâts, ǁgâuab ôats, ǂhanu-aisi-i hoa-i di khākhoetse, xarets kha ǀû tide, ǃKhūb di ǂhau daoga dawaǃkhunisa?

¹¹Tsî nēsi mû, ǃKhūb di ǃommi ge ǀase sats ǂama nîra hā, ots ge nîra ǂgī tsî soresa ǁaeb kōse mû tide. Tsî ǁnātimîsi kha ge ǃkhaeb tsî ǃkhaenab tsîkha ǁîb ai ge ǁnā, ob ge ǃgûma tsî ǂgaeǂgui-aona ge ôabasen.

¹²Tsî ǃāǃkhōmâi-aob ge ī go-e mûo, ob ge ge ǂgom, ǃKhūb di ǁkhāǁkhās ǂama burugâ hâse.

¹³Tsî Paulub tsî ǁîb ǀkha hân ge Pafosa xu dāǁnâo, on ge Perges Pamfiliab dis tawa ge sī. ǁNāpab ge Johaneba ǁîkha xu ǀgora tsî Jerusalems ǁga ge oa.

¹⁴Xawe kha ge ǁîkha Pergesa xu ǃhūba ǃgûǃnâǃganu hâse Antioxias Pisidiab dis tawa ge sī, o kha ge sâtsēs ai sinagogeb ǃnâ ǂgâ tsî ge ǂnû.

¹⁵Tsî ǂhanub tsî kēbo-aogu di khomaihes khaoǃgâ gu ge sinagogeb di danakhoega ǁîkha ǃoa sî tsî ge mîba kaikha: Aokho, ǃgâsakho, ǁnamamî-ai-e kho ga ǁaesa ūhâbao, ǃhoa re!

¹⁶Ob ge Pauluba khâi tsî ǃommi ǀkha nape tsî ge mî: Israelǁî aogo tsî eloǃaoǃgâxado, ǃgâ re!

¹⁷Elob nē ǁaes Israels dib ge ǁgûga ǃkhōǂuibasen tsî ǁaesa ge ǀgapiǀgapi, ǃhaokhoesen ge Egipteb ǃnâ ǁan hâ i ǃnubai, tsîb ge ǁîna ǀgapi ǁôab ǀkha ǁnāpa xu ge ǂgaeǂguiǂui.

¹⁸Tsîb ge hakadisi nî ī kurigu kōse ǁîna ǃgaroǃhūb ǃnâ gere ǂûmā.

¹⁹Tsîb ge hû ǀūbeǁaede Kanaanǃhūba xu ǃhūǃnomasiǂui, tsî ǁîna ǃhūba Israelǁîna ǂnōgus ǃoa ǀumise ge ǀgora.

²⁰Tsî hakakaidisi tsî korodisi nî ī kuriga ǁnās khaoǃgâb ge ǁîna ǂhanuǂhanu-aoga ge mā, kēbo-aob Samueli kōse.

²¹Tsî ǁnā ǁaeba xun ge gao-ao-e ge ǂgaoǀkhā, ob ge Eloba ǁîna Sauli, Kisi ôab, Benjaminni ǃhaos di khoeba ge mā, hakadisi kurigu kōse.

²²Tsî ǁîba ūbē hâǃâb ge ǁîna Daviba gao-aose ge mâiba, ǁîb xab ra ǃkhō-amma: “Davib, Jeseb ôaba ta go hō, ti ǂgaob ǃoa ī aob, ti ǂâis hoaragasa nîra dība.”

²³Nēb di suriba xub ge Eloba mîmâisa ǃoa Israela Jesuba ǃGâiǃōdī-aose ge ǀkhī kaiba,

²⁴ǁîb di hās aiǃâb ge Johaneba aibe ǃhobasens di ǁāǁnâsa Israelǁaes hoasa gere aoǁnâba.

²⁵Tsî Johaneb ge ǃgûs âba ǀoaǀoao, ob ge ge mî: Tari ta ase du ū te hâ? Tita ge ǁî tama ta, xawe mû, ti khaoǃgâb ge ǃgoaxa, ǁîb ǀkhapura ǂaira xu ores xawesa ta anu tamaba.

²⁶Aogo, ǃgâsago, Abrahammi ǃhaos di ôa, tsî sadu ǃnâ eloǃaoǃgâxado, sada ǃoas ge mîs nē ǃgâiǃōsib disa aibe ge sîhe.

²⁷Jerusalems ǃnâ ǁan hân tsî ǁîn di ǂamkhoegu tsîn ge ǁîba mûǂan tama i, tsî mâ sâtsēs hoas ai ra khomaihe kēbo-aogu di domga ge ǀoaǀoa, ǁîba ǀgoraǃgâ tsî.

²⁸Tsî ǁōba anu hâ xū-en ge ǁîb ǃnâ hō tama i, xawen ge Pilatuba ge ǂgan, ǁîb nî ǃgamhe ǃkhaisa.

²⁹Tsî ǁîb xa xoahe hân hoanan ge ǀoaǀoao, on ge haiba xu ūǁnâ, tsî ǀhobas ǃnâ ge ǁgui bi.

³⁰Xaweb ge Eloba ǁō hâna xu ge ǂkhaiǂkhai bi.

³¹Tsîb ge ǂgui tsēde ge ǂhai, ǁnāgu Galileaba xu Jerusalems ǃoa ǁîb ǀkha gere ǃapagu, ǁaes tawa nēsi ǁîb di ǃkhō-amaose īga.

³²Tsî sige on ge ra ǂhôa du, ǁnā mîmâis ǁgûga ge ǃnaebas, Elob ge ǁîsa sada, ǁîgu ôada tawa ge ǀoaǀoa ǃkhaisa, Jesubab ge ǂkhaiǂkhai ǃnubai.

³³ǀGamǁî psalms ǃnâ ǁkhāti xoamâihe hâ khami: Ti ôats ge satsa, nētsē ta ge go sa Î kai, ti.

³⁴Tsî ǁō hâna xub ge ǂkhaiǂkhai bis, ǁgaoǁgaosib ǃoab ǁkhawa oa tide ǃkhais xab ge ǁnāti ge mî: “Davib di ǀkhomxaǂgaosigu, ǂgomǂgomsase īga ta nî mā du.”

³⁵ǁNā-amagab ra ǁkhāti ǀnî ǃkhais tawa mî: “Sa ǃanub nî ǁgaoǁgaosiba mû ǃkhaisats ge mā-am tide.”

³⁶Davib kom ǁîb di ǁaeb aib ge Elob di ǂâisa ǃoa ǃoabas khaoǃgâ ge ǁō-o, tsî ǁgûgu tawa ǁguibēhe, tsî ǁgaoǁgaosiba ge mû.

³⁷Xawe nēb, Elob ge ǂkhaiǂkhaib, ge ǁgaoǁgaosiba mû tama hâ.

³⁸Î du ǁnâi ǂan, aogo, ǃgâsago, ǁîba xu du ǁoren ǀûbasa ra aoǁnâbahe ǃkhaisa.

³⁹Tsî ǂgom ra-i hoa-i ge nēb ǃnâ ra ǂhanuǂhanuhe. Xawe Moseb di ǂhanuba xu du ge nēn hoana xu ǂhanuǂhanuhe ǁoa ge i.

⁴⁰ǂAnbasen ǁnâi re î-i tā kēbo-aogu ǃnâ mîhe hâ-e sadu ǂama hā:

⁴¹“Kō, sa ǃharaxū-aodo, buru î kā! Sîsen-e ta ra dī, sadu di tsēdi ai, sadu tātsē ǂgom tide-e, khoe-i ga ǁî-e sado ǃhoabao” ti.

⁴²Tsî sinagogeba xu kha ge ǂoa, on ge ǀūbena ge ǀkhoma, ǁkhā mîdi nî ǃgoaxa sâtsēs ai ǁîna mîbahe ǃkhaisa.

⁴³Tsî sinagogeb di ǀhaohâb ge ǁaru, on ge ǂgui Jodeǁîn tsî eloǃaoǃgâxa Jodehoresana Paulub tsî Barnabab tsîkha ge sao. O kha ge ǁîna ǃoa ǃhoa tsî ge ǁnama, Elob ǀkhommi tawan nî hâhâ ǃkhaisa.

⁴⁴Tsî ǃgoaxa sâtsēs ais ge ǁaupexa ǃās hoaragasa ge ǀhû, Elob mîsan nî ǁnâuse.

⁴⁵Tsî Jodeǁîn ge kai ǁaesa mûo, on ge tauxasib xa ǀoa, tsî Paulub xa ra mîhesa ge ǃhoaǃoa, ǃkhāǃkhā raǃâ.

⁴⁶Paulub tsî Barnabab tsîkha ge ǁkhoaǂgaose ge mî: ǂHâbasa i ge ge i, sadu nî aibe Elob mîsa mîbahe ǃkhaisa; xawe ǂhāxū si tsî du ǁî-aitsama ǀamo ûiba anu tama hâse ra ǃgôasen amaga, mû, o khom ge ǀūben ǃoa ra unusen.

⁴⁷Nētib ge ǃKhūba sige mîmā xui-ao: “ǀŪben di ǃnâse ta ge ge mâi tsi, ǃgâiǃōsisets nî īse ǃhūbaib di ǀams kōse,” ti.

⁴⁸Tsî ǀūben ge ǁîsa ǁnâuo, on ge ǃgâiaǂgao, tsî ǃKhūb mîsa ge kare, tsî ǀamo ûiba ǃoa ǃkhōǂuibasenhe hân hoan ge ge ǂgom.

⁴⁹Tsîs ge ǃKhūb mîsa ǁnā ǃhūb hoaragab ǃnâ ge khoraǂuihe.

⁵⁰On ge Jodeǁîna eloǃaoǃgâxa tsî ǃgôahesa taradi tsî ǁnā ǃās di ǂamsaga ǂgāǁare tsî ǃgôaǃgon-e Paulub tsî Barnabab tsîkha ǂama ge ǀkhī kai; on ge ǁîn di ǀkhariga xu ge aoǂui kha.

⁵¹O kha ge ǁharodi âkha di tsaraba ǁîn ǃoagu ǃhaebeǁnâ tsî Ikoniums tawa ge sī.

⁵²Tsîn ge ǁkhāǁkhāsabena ǃgâiaǂgaob tsî ǃAnu Gagab tsîkha xa ge ǀoa.