Read Khoekhoegowab ǃNaeǃkhaidi 14 Bible Online

ǃNaeǃkhaidi 14 - Khoekhoegowab bible

ǃNaeǃkhaidi 14

¹Tsî i ge Ikoniums tawa ge ī, o kha ge ǀhûpe Jodeǁîn di sinagogeb ǃnâ ǂgâ tsî ǁnāti ge ǃhoa, kaise ǂgui Jodeǁîn tsî Grikeǁîn tsîn ge ǂgoms kōse.

²On ge ǂgomoǃnâ Jodeǁîna ǀūben di ǀomde gongonkhâi tsî ǁîde ge au-au ǃgâsagu ǃoagu.

³Tsî kha ge ǂomxa ǁaeba ǁnāpa hâ, tsî ǁkhoaǂgaose gere ǃhoa ǃKhūb ǃnâ, ǀkhommi âb di mîsa ǀhûǀguitimî, tsî ǁîkha di ǃomga xu saodi tsî buruxana ge ī kaiba.

⁴Tsîs ge ǃās di ǂnubisa ge khaisen; ǀnîn ge Jodeǁîn ǀkha ge hâ i, tsî nauna apostelgu ǀkha.

⁵Tsî ǀūben tsî Jodeǁîn tsîn ge danakhoegu ân ǀkha ǂâibasensa dīo, ǁîkhan nî tsūse sîsenū tsî ǀuiǁhomse.

⁶O kha ge ǁnāsa hōǃâ tsî ge ǃhū Likaoniab di ǃāra Listras tsî Derbes tsî ǁgoeǂnamipe hâ ǃhūb ǃoa,

⁷tsî kha ge ǁnāpa ǃgâiǂhôasa gere aoǁnâ.

⁸Tsî Listras ǃnâb ge ǂanǂansa khoeba ge ǂnôa i, ǂaira ǃnâ ǀgaio hâb, tsî ǁgûs di sorosa xu ǃhom hâb, tātsē ge ǃgû tama hâ iba.

⁹ǁÎb ge Paulub ra ǃhoana gere ǃgâ. Ob ge Pauluba ǃgapaǀî bi tsî ge mû, huiheb nîsab ra ǂgom ǃkhaisa,

¹⁰tsî ǃgari dommi ǀkha ge mî: ǂHanuse mâ, sa ǂaira ai! Ob ge urikhâi tsî ge ǃgûma.

¹¹Os ge ǁaesa, Paulub xa go dīhesan ge mûo, dommi âna ūkhâi, tsî Likaoniaǁîgowab ǃnâ ge ǂgai: Elogu go khoen khami īkaisen tsî sada ǃoa ǁgôaxa.

¹²On ge Barnababa Seub ti ge ǂgai tsî Pauluba Hermeb, mîxūxab ge i xui-ao.

¹³Ob ge Seub di pristeri, ǁîn di ǃās aiǃâ hâba gomagu tsî ǃkhā-anixūn tsîna ǁāgu aiǃâ ūsī, tsî ǁaes ǀkha ge ǁguiba ǂgao.

¹⁴Tsî apostelkha Barnabab tsî Paulub tsîkha ge ǁnâuo, o kha ge saran âkha ǀkhauǃā, tsî ǁaes ǃnâ uriǂgâ tsî ǃau

¹⁵tsî ge mî: Khoedo, tarexa du nēna ra dī? Sikhom on ge a khoe, ǁkhā tsâsendi sadu didi khami īde ūhâ khoma. Tsî khom ge ra ǂhôa du, nē ǁau eloga xu du nî ǃhobasen ǃkhaisa, ûitsama Elob, ǀhommi tsî ǃhūbaib tsî hurib tsî ǁîb ǃnâ hân hoana ge kurub ǃoa,

¹⁶ǃgû-ī ge ǁaegu ǃnâ ǀūben hoana ǁîn di daoga ge ǃgû kaiba,

¹⁷ǁgauǂuisen tamaseb ge hâ tama hâ i xawe; ǃgâidī tsîb kom ǀhomma xu ǀapib tsî ǃgâi ǁaega ge mā duo, sadu ǂgaoga ǂûs tsî ǃgâiaǂgaob tsîra ǀkha ǀoaǀoa tsî.

¹⁸Tsî nēna kha ra mî xawe kha ge ǁaesa ǁaupexa ǀû kai ǁoa ge i, ǁîkhan ǁguiba tidesa.

¹⁹Tsîn ge Jodeǁîna Antioxias tsî Ikoniumsa xu hā, tsî ǁaesa ge ǃhoadan, on ge Pauluba ǀuiǁhom, tsî ǃāsa xu ǃaugab ǃoa ge ǃkhara bi, ǁōb hâ ti ǂâi tsî.

²⁰Tsî ǁkhāǁkhāsaben ge hâǂnamipe bio, ob ge khâi tsî ǃās ǃnâ ge ǂgâ. Tsî sao ra tsēb ge Barnabab ǀkha Derbes ǃoa ge ǂoa.

²¹Tsî ǁnā ǃāsa kha ge ǃgâiǂhôasa aoǁnâ, tsî ǂgui ǁkhāǁkhāsabena dīo, o kha ge ǁkhawa Listras tsî Ikoniums tsî Antioxias ǃoa ge ǂoa.

²²Tsî ǁkhāǁkhāsaben di ǀomde ǀgaiǀgai, tsî ǁîna ge ǁnama, ǂgoms ǃnân nî hâhâsa, tsî ǂgui ǁgâiǀāga xu da Elob gaosib ǃnâ nî ǂgâsa.

²³Tsî kha ge mâ ǀhaohâb hoab ǃnâ ǃomǁgui-ais ǀkha ǂnomdomga ge ǂnûiǂgā, tsî ǀgore tsî ǂûtamahâ, tsî ǁîna ǃKhūba ge māǁnâ, ǁîb ǃnân ge ǂgomma.

²⁴Tsî kha ge Pisidiaba ǃgûǃnâǃganu, tsî Pamfiliab ǃnâ ge sī,

²⁵tsî Perges tawa kha ge mîsa ǃhoao, o kha ge Atalias ǃoa ge ǁgôa.

²⁶Tsî ǁnāpa xu kha ge Antioxias ǃoa ge ǃgâu, ǁîsa xu kha ge Elob ǀkhomma māǁnâhe hâ isa, dī kha ge sîsenni ǃoa.

²⁷Tsî ǁnāpa kha ge sī, o kha ge ǀhaohâba ǀhaoǀhao tsî ge ǂhôa, matikōnab Eloba ǁîkha ǀkha ge dī ǃkhais tsî matib ǀūbena ǂgoms di dao-amsa ge ǁkhowa-amba ǃkhais xa.

²⁸Tsî kha ge ǁnāpa ǂkhari tama ǁaeba ǁkhāǁkhāsaben ǀkha ge hâ.