Read Khoekhoegowab ǃNaeǃkhaidi 15 Bible Online

ǃNaeǃkhaidi 15 - Khoekhoegowab bible

ǃNaeǃkhaidi 15

¹Tsî gu ge ǀnîga Judeaba xu ǁgôaxa tsî ǃgâsaga gere ǁkhāǁkhā: Tsî go ga ǃgaokaisen tama io, Moseb di ǁnaetib ǃoa, o go kom a ǃgâiǃō ǁoao ti.

²Tsî ǁî ǃkhaisa xu i ǁnâi ǂkhari tama gongonai-i tsî ǂnoagu-ai-e ge hāo Paulub tsî Barnabab tsî ǁîn tsîn ǁaegu, on ge ge mîmā Paulub tsî Barnabab tsî ǀnîgu ân nî Jerusalems ǃoa apostelgu tsî ǀhaohâb di ǂnomdomgu ǃoa ǃapa ǃkhaisa nē ǂnoagus ǃaroma.

³O gu ge ǀhaohâb xa ǁnūhe tsî Fenisiab tsî Samariab tsîkha ǃgûǃnâǃganu, tsî ǀūben di ǃhobasens xa ǃhoaba, tsî ǃgâsan hoana kaise ge ǃgâiaǂgao kai.

⁴Tsî Jerusalems tawa gu ge sīo, o gu ge ǀhaohâb tsî apostelgu tsî ǂnomdomgu tsîn xa ge ǃkhōǃoahe. Tsî gu ge ge ǂhôa, matikōnab ge Eloba ǁîgu ǀkha dīsa.

⁵O gu ge ǀnîgu Fariseǁî ǃnans digu ǂgomsabe kai ge hâ iga khâi tsî ge mî: ǃGaohe gu ge nî, tsî gu ge nî mîmāhe, Moseb di ǂhanuba gu nî dīsa.

⁶O gu ge apostelgu tsî ǂnomdomgu tsîga ge ǀhû, nē ǃkhaisa gu nî kōkōse.

⁷Tsî kaise gu ge dîǃgâguo, ob ge Petruba khâi tsî ǁîgu ǃoa ge mî: Aogo, ǃgâsago, sago ge a ǂan, ǂomxa ǁaeb aiǃâb ge Eloba sage ǃnâ tita ǁhûiǂuibasen ǃkhaisa, ǀūben nî ti amsa xu ǃgâiǂhôas di mîsa ǁnâu tsî ǂgomga.

⁸Tsî Elob ǂgaoba ǂan hâb ge ǁîn ǂama ge ǀhûǀguitimî, sadu khamib ge ǁîn ona ǃAnu Gagaba mās ǀkha.

⁹Tsîb ge sadu tsî ǁîn ǁaegu ǀgora-i xare-e dī tama hâ, ǁîn di ǂgaogab ge ǂgomsa xu ǃanuǃanuo.

¹⁰Tare xū-i ǃaroma go ǁnâi Eloba ra ǃâitsâ, ǃnaob, sage îgu tsî sage ǁkhāti tani ǁoa ge iba, ǁkhāǁkhāsaben di ǃhōgu ai ǁguis ǀkha?

¹¹ǂGom ta kom rao, sada ǃKhūb Jesub Xristuba xu da nî ǃgâiǃō kaihesao, ǁkhā dommi ai, ǁîn on khami.

¹²ǃNubaib ge ǂguib hoaba ge ǃnō, tsî Paulub tsî Barnabab tsîkha ge ǃgâ, matikō saodi tsî buruxanab ge Eloba ǁîkha xu ǀūben ǃnâ ge dī ǃkhaisa ra ǃhoakha.

¹³Tsî ǁîkha ge ǃnō, ob ge Jakobuba ǃeream tsî ge mî: Aogo, ǃgâsago, ǃgâ te re!

¹⁴Simonni ge go ǃhoaba ge, matib ge Eloba ǂgurosa ǂâibasen ǃkhaisa, ǀūbena xub nî ǀons âba ǁae-e hōbase.

¹⁵Tsî ǁîs ǀkha di ge kēbo-aogu di mîde a ǀgui, xoamâihe hâ khami:

¹⁶Tsî ǁnās khaoǃgâ oa tsî ta nî ǁkhawa Davib oms, khôaǁnâhe hâsa ǂnubikhâi, tsî ta nî ǂkhūhe hâ-e ǁkhawa ǂnubi tsî nî ǁîsa ǃkhōkhâi;

¹⁷în ga ǃgau ge khoena ǃKhūba ôa, tsî hoa ǀūben tsîn, ǁîn ǂamas ti ǀonsa ǂgaihe hâna, tib ra ǃKhūba mî, nēn hoana ra dība.

¹⁸Tib ge ǃKhūba ra mî, nēna hugasa xu ge ǂan iba.

¹⁹ǁNā-amaga ta tita ra ǂâi, în ǁnān, ǀūbena xu Elob ǃoa ra ǃhobasenna tā ǃgomǃgomhega,

²⁰în xoabahe ǁîn nî ūdawasen ǃkhaisa ǁgôatsuiǁgoagu di ǃanuoǃnâsiga xu, tsî ǀaiba xu tsî ǀhomǀomhe hâ-e xu tsî ǀaoba xu.

²¹Moseb di mîmādi kom hugasa xu mâ ǃā-i hoa-i ǃnâ ǁîde ra aoǁnâna ūhâo, tsî di kom mâ sâtsēs hoas ai sinagogegu ǃnâ ra khomaiheo.

²²ǃNubain ge apostelgu tsî ǂnomdomgu tsî ǀhaohâb hoaba ge ǃgâiǂâibasen, ǁîna xu khoekha ǁhûiǂui tsîn nî ǁîkha Paulub tsî Barnabab tsîkha ǀkha Antioxias ǃoa sîsa: Judab, Barsabab tis tsîna ǀon hâb tsî Silab tsîkha, ǃgâsan ǃnâ aiǃgû-aose īkha.

²³Tsîn ge ǁîkha di ǃommi ǀkha ǂkhani-e ge sî, nēti ra mî-e: Sida apostelgu tsî ǂnomdomgu tsî ǃgâsada ge Antioxias tsî Siriab tsî Silisiab ǃnâ hâ ǃgâsan, ǀūbena xu hâna ra tawede.

²⁴Sida ge ge ǁnâu ǀnîgu sida xu ge ǂoagu ge sī tsî mîdi ǀkha sâoǃnâ kai du, tsî sadu ǀomde ǁnopeǁnope ǃkhaisa, ǃgaohe du nî tsî du nî ǂhanuba ǃkhōǀgaipe ti ra mîgu, ǁîga da ǁnāsa mîmā tamaga.

²⁵ǁNā-amaga da ge ǀguiǂâixase ǀhû hâse go ǃgâiǂâibasen, ǀnî khoekha ǁhûiǂui tsî da nî ǁîkha sadu ǃoa sîsa, sada ǀnamǀnamsa Barnabab tsî Paulub tsîkha ǀkha,

²⁶ǁîkha ǀomde ge māǁnâ aokha sada ǃKhūb Jesub Xristub di ǀons ǃaroma.

²⁷O da ge Judab tsî Silab tsîkha go sî, mîdi tsîn ǀkha ǁkhā-e nî ǂhôakha.

²⁸ǃAnu Gagaba i go ǃgâiǂâiba xui-ao tsî sida ona, ǀnî ǃgomai-e da sado ǁgui-ai tide ǃkhaisa, nē ǂhâǂhâsa ǃâdi ǀguide:

²⁹Ūdawasen du nî ǁgôatsuiǁgoaǁguibade xu tsî ǀaoba xu, tsî ǀhomǀomhe hâ-e xu, tsî ǀaib tsîna xu, ti; ǁîna xu du ga ǃûiseno, o du ge nî ǃgâise dī. ǃGâise hâ re!

³⁰Tsî ǁnāxūhe gu geo, o gu ge Antioxias tawa sī, tsî ǂguina ǀhaoǀhao tsî ǂkhanisa ge māǁnâ.

³¹Tsî khomain ge, on ge ǁkhaeǂgaos ǂama ge ǃgâiaǂgao.

³²Tsî Judab tsî Silab tsîkha, ǁkhāti ge kēbo-ao ikha ge ǂgui mîdi ǀkha ǃgâsana ǁnama, tsî ǁîna ge ǀgaiǀgai.

³³Tsî ǁaeb kōse kha ge ǀhaweo, on ge ǃgâsana ǂkhîb ǀkha ge ǃgû kai kha apostelgu ǃoa.

³⁴Xaweb ge Silaba ge ǃgâiǂâibasen, ǁnāpab nî hâsa.

³⁵Tsî Paulub tsî Barnabab tsîkha ge Antioxias tawa ge hâ, tsî ǀnîgu ǂguigu ǀkha ǁkhāǁkhā tsî ǃKhūb mîsa gere aoǁnâ.

³⁶Tsî ǀnî tsēde ǁnās khaoǃgâb ge Pauluba Barnabab ǃoa ge mî: A khom ǁkhawa oa, î khom ǃgâsan âkhoma kō mâ ǃās, ǃKhūb mîsa khom gere aoǁnâǃnâs hoas tawa, matin hâsa.

³⁷Ob ge Barnababa ge ǀapemā Johaneb, Markub ti ra ǂgaiheba kha nî ūsaosa.

³⁸Xaweb ge Pauluba ge ǂâi, ǁnāb Pamfiliaba xu ǁîkha ǁnāxū tsî ǁîkha ǀkha sîsenni ǃoa ge ǃgû tama iba kha ūsao tide ǃkhaisa.

³⁹Tsî ǀaraǃâgus ge ǁnātikōse ge ǀā, ǀgora kha ges kōse. Ob ge Barnababa Markuba ū, tsî Siprus ǃoa ge ǃgâu.

⁴⁰Xaweb ge Pauluba Silaba ūǂuibasen, tsî ge dāǁnâ, ǃgâsan xa Elob di ǀkhomma māǁnâhe hâǃâ.

⁴¹Ob ge Siriab tsî Silisiab tsîkha ge ǃgûǃnâǃganu, ǀhaohâga ra ǀgaiǀgaise.