Read Khoekhoegowab ǃNaeǃkhaidi 16 Bible Online

ǃNaeǃkhaidi 16 - Khoekhoegowab bible

ǃNaeǃkhaidi 16

¹Paulub ge Derbes tsî Listras tsîra tawa ge sī; ǁnāpab ge ǁkhāǁkhāsabeba ge hâ i, Timoteub ti ǀon hâb, ǂgomsa Jodeǁî taras ôab, tsî Grikeǁî ǁgûba ūhâb,

²ǃgâi gom-e ūhâba Listras tsî Ikoniums di ǃgâsan tawa.

³ǁÎbab ge Pauluba ge ūsao ǂgao. Ob ge ū tsî ge ǃgao bi, ǁnā ǃhūǃâdi tawa hâ Jodeǁîn ǃaroma, hoan ge ǁîb îba ǂan i xui-ao, Grikeǁîb a ǃkhaisa.

⁴Tsî ǃāde gu ra ǃgûǃnâǃganu hîa gu ge dīhe di nîse ī ǂnûiǂgādi, apostelgu tsî ǂnomdomgu Jerusalems digu xa ge ǂnûiǂgāhede ge māǁnâ.

⁵O gu ge ǀhaohâga ǂgoms ǃnâ ǀgaiǀgaihe tsî ǃgôab ǃnâ tsēkorobe gere ǀarohe.

⁶Tsî gu ge Frigiab tsî Galatiab tsîna ge ǃgûǃnâǃganu, ǃAnu Gagab xa gu ge ǃkhâihe, mîsa Asiab ǃnâ aoǁnâsa amaga.

⁷Tsî Misiab tawa gu ge sīo, o gu ge ge dītsâ, Bitiniab ǃoa dāǁnâsa, xawe Gagab Jesub dib ge ǁîsa mā-am gu tama ge i.

⁸O gu ge Misiaba ǃgû-īǀkhā hâse Troas ǃoa ge ǁgôa.

⁹Tsî tsuxubab ge Pauluba ai-e ge mû; Masedoniaǁî khoeb ge ǁnāpa mâ tsî ǀkhoma bi tsî ge mî: ǀKhī Masedoniab ǃoa î hui da re!

¹⁰Tsî aisab ge mûo, o ge ge ǁnātimîsi Masedoniab ǃoa dāǁnâsa ge ôa-am, ǁaposase ǂâi hâse, Elob go ǁnāǀî ǂgai ge ǃkhaisa, ǁîna ge ǃgâiǂhôasa nî aoǁnâga.

¹¹O ge ge Troasa xu ǂoa tsî ǂhanuse Samotrakes tawa ge sī, tsî sao ra tsēs ai Neapolis tawa;

¹²tsî ǁnāpa xu Filipis tawa, ǁnā ǃâs Masedoniab dis di danaǃā tsî Romeǁîn xa ge xūhe hâ isa. Tsî ge ge ǁnā ǃās ǃnâ ǀnî tsēde ge hâ.

¹³Tsî sâtsēs ai ge ge ǃās ǃauga ǃāb amǃgâ ge ǃgû, ǀgores ra dīhe ti ge ge ǂâi ǃkhais tawa, tsî ǂnû tsî ge ge ǀhû ge taradi ǀkha ge ǃhoa.

¹⁴Tsî ǂanǂansa taras Lidia ti ǀon hâs, purpurǁamaxū-aos, Tiatiras ǃās dis, Eloba ra ǃaoǃgâs ge ge ǃgâ, ǁîsab ge ǃKhūba ǂgaoba ge khowaba, os ge Paulub xa ra mîhesa ge ǃgaoǃgâ.

¹⁵Tsî ǁîs tsî ǁîs oms din ge ǁāǁnâheo, os ge sige ǁkhau, tsî ge mî: ǃKhūb ǃnâ ta ra ǂgom, ti go ga ǂâio, ti oms ǃnâ sī, î ǁnāpa hâ. Tsîs ge sige ge ǁgūǀkhā.

¹⁶Tsî i ge ǀgores ǃoa ge ǃgûgaru hîa ge ī, os ge ǂanǂansa ǃgās aimûǀgarugaga-e ūhâsa sige ge ǃoa, tsîs ge ǀhonkhoegu âsa kai hōǂgāsa ge ūhāba aimûǀgarus âs ǀkha.

¹⁷ǁÎs ge Paulub tsîge sao tsî ǂgai tsî ge mî: Nē khoegu ge Elob, Hoan xa ǀGapib di ǃgā, ǃgâiǃōsib di daoba sado ra ǂhôaga.

¹⁸Tsîs ge ǁnāsa ǂgui tsēde gere dī. Ob ge Pauluba ǁgonǁgonǂgaosen, tsî ǂnan tsî gagab ǃoa ge mî: Jesub Xristub di ǀons ǃnâ ta ra mîmā tsi, ǁîsa xuts nî ǂoa ǃkhaisa. Ob ge ǁkhā iri ai ge ǂoa.

¹⁹Tsî ǀhonkhoegu âs ge mûo, ǁîgu hōǂgās di ǃâubasens go kā ǃkhaisa, o gu ge Paulub tsî Silab tsîkha ǃkhō tsî ǁamaxūǃkhais ǃoa ǂamkhoegu aiǃâ ge ǃkhara.

²⁰Tsî ǁîkha danakhoegu tawa ǂgaeǂguisī tsî ge mî: Nē khoekha ge sada ǃāsa ra gongonǃnâ, Jodeǁîkha kom;

²¹tsî kha kom ǂūga ra ǂhôao, sada ǃkhōǃoa tsî da nî dī ǃkhaisa mā-amhe tama hâga, Romeǁîda komo.

²²Os ge ǁaesa ǁkhāti ǁîkha ǃoagu ge khâi, tsî danakhoegu ge ǁîkha sarana ge ǀkhauǀkhā kai tsî ǂnauhe kha nî ǃkhaisa ge mîmā.

²³Tsî ǂgui ǃnāde gu ge ǁîkha ǂnauo, o gu ge ǃkhō-oms ǃnâ aoǂgā kha, tsî ǃkhō-oms ǃûi-aoba ge mîmā ǂōrisaseb nî ǃûi kha ǃkhaisa.

²⁴Tsî ǁnāti ī mîmā-eb ge hō-o, ob ge ǁîkha ǂguri hâ ǃkhō-oms ǃnâ aoǂgā tsî ǂaidi âkha ǂaiǃnaos ǃnâ ge ǃgaeǀgaiǀgai.

²⁵Tsî tsuxuǃgâǁaeb ai kha ge Paulub tsî Silab tsîkha ǀgore tsî Eloba ǁnaetsanadi ǀkha gere kare, tsî ǃkhōsan ge ǁîkha gere ǃgâ.

²⁶Tsî i ge ǃhaese kai ǃhūǂgubi-e ge ī, ǃkhō-oms di ǃgaoǃgaogu ge ǁnopes kōse. O di ge ǁnātimîsi dao-amdi hoade ge ǁkhowa-amsen, tsî hoan di ǃgae-ūdade ge xoresen.

²⁷Tsî ǃkhō-oms ǃûi-aob ge ǃnoaǂkhai tsî ǃkhō-oms di dao-amde ǁkhowa-amsen hâse mûo, ob ge gôaba ǂgaeǂui tsî ge ǃgamsen ǁga, ǃkhōsan ǁhai hâ ti ǂâi tsî.

²⁸Ob ge Pauluba ǃgari dommi ǀkha ǂgai, tsî ge mî: Tā tsūdīsen, hoatsama da nēpa hâ xuige.

²⁹Ob ge ǃamamǀaeba ǂgan tsî uriǂgâ tsî ǀkhū raǃâ Paulub tsî Silab tsîkha aiǃâ ǁnāǁgoe,

³⁰tsî ǂgaeǂguiǂui kha tsî ge mî: Ti ǃkhūkhoekho-e, tare xū-e dī tsî ta nî ǃgâiǃōsiba hō?

³¹O kha ge ge mî: ǂGom ǃKhūb Jesub Xristub ǃnâ, o du ge sats tsî sa oms din tsîdo nîra ǃgâiǃō.

³²Tsî kha ge ǁîba ǃKhūb mîsa ge ǂhôaba, tsî ǁîb oms din hoana.

³³Tsîb ge ǁîkha ǁkhā iri tsuxub dib ai ū tsî ǀhapina ge ǁā-aiba kha, tsîb ge ǁnātimîsi ge ǁāǁnâkaisen, ǁîb tsî ǁîb oms din hoana.

³⁴Tsîb ge ǁîkha ǁîb di oms ǃnâ ūǂgā tsî tāba ge mâi-aiǃâ kha, tsî ǁîb din hoan ǀkha ge ǃgâiaǂgao, Elob ǃnân go ǂgom ǃkhais xa.

³⁵Tsî ǁgoa i ge, o gu ge danakhoega sîsabega sî tsî ge mî: Khoekha ǁnākha ǃgû kai re!

³⁶Ob ge ǃkhō-oms ǃûi-aoba ǁnā mîde Pauluba ge ǂhôa: ǂAmkhoegu go sî, ǁnāxūhe kho nî ti. ǃGûǂoa ǁnâi î ǂkhîb ǃnâ ǃgû re.

³⁷Ob ge Pauluba ǁîgu ǃoa ge mî: Sikhoma gu ge ǀgoraǃgâhe tama hâse ǂhaisase go ǂnau, Romeǁî khom hîa, tsî ǃkhō-oms ǃnâ go aoǂgā khom, tsî gu kha nēsi nabasase ra ǂhāǂui khom? ǁNāti tamas, a gu aitsama hā, î gu sikhoma ǂgaeǂguiǂui.

³⁸O gu ge sîsabega nē mîde ǂamkhoega ge sī ǂhôa, o gu ge ǁîga ge ǃao, Romeǁîkha a ǃkhaisa gu ge ǁnâuo.

³⁹O gu ge hā tsî ge ǀkhoma kha, tsî ǂgaeǂguiǂui tsî ge ǂgan, î kha ǃāsa xu ǂoa, ti.

⁴⁰O kha ge ǃkhō-omsa xu ǂoa tsî Lidias ǃoa ge ǃgû. Tsî ǃgâsana mû tsî kha ge ǁîna ǁkhaeǂgao-o, o kha ge ge ǂoa.