Read Khoekhoegowab ǃNaeǃkhaidi 17 Bible Online

ǃNaeǃkhaidi 17 - Khoekhoegowab bible

ǃNaeǃkhaidi 17

¹Tsî Amfipolib tsî Apoloniab tsîkha gu ge ǃganu ǃnubai gu ge Tesalonikas, Jodeǁîn di sinagogeb hâ ǃās tawa ge sī.

²Ob ge Pauluba ǁîb di ǁnaetiba ǃoa ǁîn tawa ǂgâ, tsî ǁîn ǀkha ǃnona sâtsēde gere dîǃnâgu, xoade xu.

³Tsîb ge ǁîde ǁîna mîǃāba, tsî ǁîna ge mâi-aiǃâ, Xristub nî tsâ tsî ǁō hâna xu khâi ǃkhaisa, tsîb ge: Nē Jesub, tita ra aoǁnâba dub ge a Xristu, ti ge mî.

⁴Tsî ǀnîn ân ge ǂgom tsî Paulub tsî Silab tsîkha ǀkha ge ǁaeǁaesen, kaise ǂgui eloǃaoǃgâxa Grikeǁîn tsî ǀoro tama ǀgapiǃgôahesa taradi tsîna.

⁵On ge ǂgomoǃnâ Jodeǁîna tauxa, tsî ǀnî ǂkhaba khoegu ǁamaxūǃkhais diga ū, tsî ǁaesa ǃkhoeǀhao kai, tsî ǃāsa gongonǃnâ, tsî Jasonni omsa xāǂgā, tsî ǁîkhan nî ǁaes aiǃâ ūhāse ge ôa-am.

⁶Tsî ǁîkhan ge hō tama io, on ge Jasonni tsî ǀnî ǃgâsagu tsîga ǃās di ǂamkhoegu ǃoa ǃkhara tsî ge ǃau: Nēkha, ǃhūbaib hoaragaba ra gongonǃnâkha ge ǁkhāti nēpa go hā.

⁷ǁÎkhab ge Jasonna sâu hâ, tsî gu kom nēgu hoaga Kaesari di ǂnûiǂgādi ǃoagu ra dīo, ǀkharab a gao-ao ǃkhaisa, Jesub, ti mî tsî.

⁸Tsîn ge ǁaes tsî ǃās di ǂamkhoegu tsîna ge gongon, nēna ge ǁnâuna.

⁹Tsî Jasonni tsî naun xa gu ge ǂkhîǂkhîhe ǃnubai gu ge ǁîkha ge ǁnāxū.

¹⁰ǃUi i ra hîa gu ge ǃgâsaga ǁnātimîsi Paulub tsî Silab tsîkha Bereas ǃoa ge sîbē. Tsî sī kha ge, o kha ge Jodeǁîn di sinagogeb ǃnâ ge ǂgâ.

¹¹Tsîn ge ǁîna Tesalonikaǁîn xa khoexaǃnâ ge i, ǁîn ge mîsa hoaragase māsen hâse ǃkhōǃoa, tsî tsēkorobe xoas ǃnâ gere ôa, īsen nē xūna ǁnāti īsa.

¹²Tsîn ge ǂguin âna ge ǂgom, ǂâusa Grikeǁî taradi tsî aogu tsîna.

¹³Tsî Tesalonikas di Jodeǁîn ge ǁnâuo, Bereas on tawas ra Elob mîsa Paulub xa aoǁnâhesa, on ge ǁkhāti ǁnāpa sī, tsî ǁaesa ge gongonǃnâ.

¹⁴ǃNubai gu ge ǃgâsaga ǁnātimîsi Pauluba hurib kōse ge sîbē, xawe kha ge Silab tsî Timoteub tsîkha ǁnāpa ge hâ-oa.

¹⁵Tsî Pauluba ra ǁnūn ge ǁîba Atenes ǃoa ge ūsī. Tsî Silab tsî Timoteub tsîkha ǃoan ge haisi-am-e hō-o, ǃhaese kha nî ǁîb tawa hā ti ra mî-e, on ge ge oa.

¹⁶Tsî Paulub ra ǁîkha Atenes tawa ǃâu hîas ge gagas âba ǁîb ǃnâ ge ǁaixa, nētikōses ǃāsa ǁgôatsuiǁgoagu xa ǀoa hâ ǃkhaisab ge mûo.

¹⁷Tsîb ge sinagogeb ǃnâ Jodeǁîn tsî eloǃaoǃgâxan ǀkha gere dîǃnâgu, tsî ǁkhāti tsēkorobe ǁamaxūǃkhais ai ǁnāpa ra ǀkhīn ǀkha.

¹⁸Tsî Epikureǁî tsî Stoiǁî ǂansabegu ge ǁîb ǀkha gere ǂnoagu. Tsî gu ge ǀnîga ge mî: Tare xū-eb kha nē ǃhoaxūxaba nî mî? O gu ge nauga ge mî: ǃHao ǁgôatsuiǁgoagu di aoǁnâ-aob khamib kom īo, ǃgâiǂhôas Jesub dis tsî khâis xab go ǁîna ǂhôa xui-ao.

¹⁹O gu ge ū tsî Areopagub ǃoa ūǃgû bi tsî ge mî: ǂAn ǁoa ge kha a ǁnâi, mâ ǀasa ǁkhāǁkhā-ai-i a ǃkhaisa, sats ǁî-i xa ra ǃhoa-e.

²⁰Ama ǃhao xūnats kom go ǁnâu kai geo, o ge ge ǂan ǂgao hâ, mâ xūn asa.

²¹(Tsî Ateneǁîn hoan tsî ǁnāpa hâ ǃhaokhoen tsîn ge ǀnî xū-e dī tama, hugaǀgui ǀasa ǃhoaxū-e mî tsî ǁnâus ǀguis.)

²²Ob ge Pauluba Areopagub ǁaegu mâ tsî ge mî: Ateneǁî aogo, hoan ǃnâ du ge kaise a eloǃaoǃgâxa ǃkhaisa ta ge ra mû.

²³ǃĀsa ǃgûǃnâǃganu tsî ta go sadu ǃanusiga ǃgapao, o ta ge ǁkhāti altar-e go hō, ǁî-i ai xoahe hâ-e: ǂAnsa tama Elob di, ti. ǁNâi ǁNāb, sadu ǂan tamase ra ǃoabab, ǁîba ta ra aoǁnâba du.

²⁴ǁNā Elob, ǃhūbaib tsî ǁîb ǃnâ hân hoana ge dīb, ǁnāb hîa ǀhommi tsî ǃhūbaib tsîkha di ǃKhūb ge ǃomgu ǀkha dīhe hâ tempelgu ǃnâ ǁan tama hâ.

²⁵Tsî ǁkhāti khoen ǃomgu ǀkha ǃoabahe tama hâ, xū-eb ga ǂhâba hâ khami, hoanab kom ûib tsî ǀoms tsî hoa xūna ra māo.

²⁶Tsîb ge ge dī, o di ge ǃhaodi khoen didi hoade ǀgui ǀaob ǀguiba xu ǃhūbaib hoaragab ai ǁan hâ, tsîb ge ǁîn ǁans di mîmâisa ǁaeb tsî ǁîn ǃhūgu di ǀkhariga ge mâiǁapoǁapo,

²⁷ǃKhūban nî ôase, īsen nî ǀnîsi ǁîba tsanana tsî hō ǃkhaisa; mâ-i hoa-i âda xub kom ǃnūse hâ tamao,

²⁸ǁîb ǃnâ da ra ûi, tsî gon tsî hâ xui-ao, ǁkhāti amde ra dī aogu ǀnîgu sadu tawa ge mî khami: ǁÎb ǃhaoda kom sadao.

²⁹Tsî Elob ǃhao da kao, o da ge ǂâi tide, Elosi ǃhuniǀurib tsî ǃuriǀurib tsî ǀuib, khoe-i di ǁāǁāǁkhāsiba xu tsî khoe-i di ǂâis ǃoa dīhe hâb khami ī ǃkhaisa.

³⁰Ob ge Eloba ǀūsib di ǁaega mûǁnâ hâse nēsi hoa khoena mâ ǃkhai-i hoa-i tawa ra mîmā în ǃhobasen ti.

³¹Tsē-eb ge mâi xui-ao, ǁî-i aib nîra ǃhūbaiba ǀgoraǃgâ-e ǂhanu-aisib ǀkha, ǀgui khoeb ǁîs ǃoab mâi hâba xu, mâ-i hoa-e ǂgomsa ra mâi-aiǃâse, ǁîba ǁō hâna xu ǂkhaiǂkhai hâǃâ.

³²Tsî ǁō hân di khâis xa gu ge ǁnâuo, o gu ge ǀnîga ge ǃhō. Xawe gu ge nauga: ǁKhawa ge nî ǁîs xa ǁnâu tsi, ti ge mî.

³³Nētib ge Pauluba ǁîgu ǁaeguba xu ge bē.

³⁴Tsî ǀnî khoegu ge ǁîba ǂae-ai tsî ge ǂgom; ǁîn ǃnâb ge Dionisiub Areopaguǁîba ge hâ i, tsî taras Damaris ti ǀon hâsa, tsî ǀnîna ǁîn ǀkha.