Read Khoekhoegowab ǃNaeǃkhaidi 18 Bible Online

ǃNaeǃkhaidi 18 - Khoekhoegowab bible

ǃNaeǃkhaidi 18

¹ǁNās khaoǃgâb ge Pauluba Atenesa xu bē tsî Korintes tawa ge sī.

²Tsîb ge ǂanǂansa Jodeǁîb, Akwila ti ǀon hâb, Pontub ǃnâ ge ǃnaeb, ǀase Italiaba xu ge hāba ge hō, ǁîb taras Prisilas ǀkha (Klaudiub ge mîmā xui-ao, Jodeǁîn hoan nî Romesa xu bē, ti).

³Tsîb ge ǁîra tawa ge ǂgâ, tsî ǁkhā sîsenai-i dib a xui-ao ǁîra ǀkha hâ, tsî gere sîsen, tentomkuru-aora ge i amaga.

⁴Tsîb ge sâtsēkorobe sinagogeb ǃnâ dîǃnâgu tsî Jodeǁîn tsî Grikeǁîn tsîna gere ǃhoadan.

⁵Tsî Silab tsî Timoteub tsîkha ge Masedoniaba xu ǁgôaxa ǃnubaib ge Pauluba mîs ǀkha ge ǀhawe i, Jodeǁînab nî Jesub a Xristu ǃkhaisa ǃkhō-ambase.

⁶Tsî mâǃoa tsîn ge ǃkhāǃkhāo, ob ge saran âba ǃhaebeǁnâ, tsî ǁîn ǃoa ge mî: Ab sadu ǀaoba sadu danas ai hâ; tita ge a ǃanu, tsî nēsisa xu ta ge ǀūben ǃoa nî ǃgû.

⁷Ob ge ǁnāpa xu ǃgû tsî ǀguib, Justub ti ǀon hâb di oms ǃnâ ge sī, eloǃaoǃgâxa khoeb, ǁîb di oms sinagogeb tawa ǁae hâba.

⁸Tsî Krispub, sinagogeb di danakhoeb ge ǃKhūb ǃnâ ge ǂgom, ǁîb di ommi hoaragab ǀkha, tsî ǂgui Korinteǁîn, ǁnâu bi gen ge ǂgom tsî ge ǁāǁnâkaisen.

⁹Tsîb ge ǃKhūba tsuxuba ai-i ǃnâ Paulub ǃoa ge mî: Tā ǃao, î ǃhoa î tā ǃnō!

¹⁰Tita hâǀkhā tsi, tsî khoe-i xare-i tsâǀkhā tsi tide xuige, ǂkhôaǂkhôa tsi nîse; kai ǁae-e ta kom nē ǃās ǃnâ ūhâo.

¹¹Tsîb ge ǁnāpa ǀgui kurib tsî ǃnani ǁkhâga ge hâ i, ǁîn ǃnâ Elob mîsa ra ǁkhāǁkhāǃâ.

¹²Tsî Galiob ge Axajab ǃnâ ǃāǃkhōmâi-ao i ǃnubain ge Jodeǁîna ǀguiǂâixase Paulub ǃoagu khâima tsî ǂhanuǂhanuǃnaos aiǃâ ūsī bi

¹³tsî ge mî: Nēb ge khoena ra nanaba, Eloban nî ǂhanub ǃoagu ǃoaba, ti.

¹⁴Tsî Paulub ge ams âba khowa ǃnubaib ge Galioba Jodeǁîn ǃoa ge mî: ǂKhabadī-i ga io, ǂkhôasi-i ga io, Jodeǁîdo, o ta ge ga ǂhanub ǃoa ǁnâuǃgâ du hâ.

¹⁵Xawe mî-i tsî ǀondi tsî sadu ǃnâ hâ ǂhanub di ǂnoagu-i a amaga, aitsama mûbasen re, tita kom nē xūn ǂama ǂhanuǂhanu-aose ǂnû ǂgao tamao.

¹⁶Tsîb ge ǁîna ǂhanuǂhanuǃnaosa xu ge doeǁgabē.

¹⁷On ge Grikeǁîn hoana Sosteneb, sinagogeb danakhoeba ǃkhō tsî ǂhanuǂhanuǃnaos aiǃâ ge ǂnau bi, tsî Galiob ge nē xūn ǀkha ǁae tama ge i.

¹⁸Tsî Paulub ge gorose ǂgui tsēde ǁnāpa ge hâ, ǁnās khaoǃgâb ge ǃgâsana tawede, tsî huriba-ū Siriab ǃoa ge ǂoa, tsî Prisilas tsî Akwilab tsîra ǁîb ǀkha, ǁîb di danasa Kenxreas tawa ǂkhomhe hâǃâ, mîmâi-eb ge ūhâ i xui-ao.

¹⁹Tsîb ge Efesus tawa sī tsî ǁîra ǁnāpa ge hâ kai. Tsîb ge ǁîba sinagogeb ǃnâ ǂgâ tsî Jodeǁîn ǀkha gere dîǃnâgu.

²⁰Tsî ǀkhoma bin geo, ǂomxa ǁaero-eb nî ǁîn ǀkha hâsa xaweb ge ǂkhā

²¹tsî tawede tsî ge mî: ǁKhawa ta ge sadu ǃoa nî oaǀkhī, Elob ga ǂgao-o. Tsîb ge Efesusa xu ge doe.

²²Tsî Kaesareas tawab ge sīo, ob ge Jerusalems ǃoa ǃapa, tsî ǀhaohâba tawede tsî Antioxias ǃoa ge ǁgôa.

²³Tsî ǁaeb kōseb ge hâ io, ob ge ǃgûǂoa tsî saogusase Galateǁî tsî Frigiaǁî ǃhūba ge ǃgûǃnâǃganu, ǁkhāǁkhāsaben hoana ǀgaiǀgai tsî.

²⁴Tsî ǂanǂansa Jodeǁîb, Apolob ti ǀon hâb, Aleksandrias ǃnâ ge ǃnaeb, ǃgâise ra ǃgaraǃā khoeb, xoadi ǃnâ ǀgaisab ge Efesus tawa ge sī.

²⁵ǁÎb ge ge ǃKhūb di daob ǃnâ ǁgauhe hâ i tsî ǀaexa gagas ǀkha ǃhoa, tsî ôasase ǃKhūb xa gere ǁkhāǁkhā; xaweb ge Johaneb di ǁāǁnâs ǀguisa ge ǂan i.

²⁶Tsîb ge ǁîba sinagogeb ǃnâ ǂhauǂgarose ge aoǁnâtsoatsoa. Tsî Akwilab tsî Prisilas tsîra ge ǁîba ǁnâuo, o ra ge ǁîra tawa ū bi, tsî Elob di daoba ǂōrisase ge ǁguiǃāba bi.

²⁷Tsî Axajab ǃoab ge dāǁnâ ǂgao, o gu ge ǃgâsaga xoa tsî ǁkhāǁkhāsabena ge ǁnama, în ǃkhōǃoa bi. Tsî sīb geo, ob ge ǂgomsa kai gena kaise ge hui ǀkhomma xu.

²⁸ǁKhōseb ge Jodeǁîna ǂhaisase ǃhoadan, tsî xoasa xu ge ǁgau, Jesub a Xristu ǃkhaisa.