Read Khoekhoegowab ǃNaeǃkhaidi 19 Bible Online

ǃNaeǃkhaidi 19 - Khoekhoegowab bible

ǃNaeǃkhaidi 19

¹Tsî i ge Apolob Korintes tawa hâ hîa ge ī, ob ge Pauluba ǀgapise hâ ǃhūǃâde ǃgûǃnâǃganu hâǃâ Efesus tawa ge sī. Tsîb ge ǀnî ǁkhāǁkhāsabega hō

²tsî ǁîgu ǃoa ge mî: Xare ǃAnu Gagaba hō go ge, ǂgomsabe kai go geo? O gu ge ǁîb ǃoa ge mî: Tātsē ge ǁnâusa xawe hî tama, ise i ǃAnu Gaga-e hâ ǃkhaisa.

³Ob ge ǁîgu ǃoa ge mî: Tare xū-i ǃnâ go kha ǁnâi ge ǁāǁnâhe? O gu ge: Johaneb di ǁāǁnâs ǃnâ, ti ge mî.

⁴Ob ge Pauluba ge mî: Johaneb ge ǁāǁnâs ǃhobasens dis ǀkha gere ǁāǁnâ, tsîb ge ǁaes ǃoa ge mî, ǁîb khaoǃgâ nîra hāb ǃnân nî ǂgomsa, Xristub Jesub ǃnâ.

⁵Tsî ǁnâu gu geo, o gu ge ǃKhūb Jesub di ǀons ǃnâ ge ǁāǁnâkaisen.

⁶Tsî Paulub ge ǃomkha ǁîgu ai ǁguio, ob ge ǃAnu Gagaba ge hāǂam gu tsî gu ge namgu ǀkha ǃhoa, tsî gere kēbo.

⁷Nē khoegu hoagu ge ǁaupexa ge disiǀgamǀa i.

⁸Tsîb ge sinagogeb ǃnâ ǂgâ tsî ǁkhoaǂgaose gere ǁgam, ǃnona ǁkhâgu kōse ra ǁkhāǁkhā tsî ǃgaraǃāǃâ Elob gaosib din xa.

⁹Tsî ǀnîn ge karokarosen tsî ǂgom tama i, tsî ǃKhūb di daob xa ǂguib aiǃâ tsūse ǃhoao, ob ge ǁîna xu ǀgora tsî ǁkhāǁkhāsabena ǀguri hâse ū, tsî tsēkorobe ǂanǂansa Tiranub di skoli ǃnâ gere ǁkhāǁkhā.

¹⁰Tsîs ge nēsa ǀgam kurikha kōse ge ī, on ge Asiab ǃnâ ǁan hân hoana ǃKhūb Jesub di mîsa ge ǁnâu, Jodeǁîn tsî Grikeǁîn tsîna.

¹¹Elob ge kai buruxa dīna Paulub di ǃomma xu gere dī,

¹²ǁnātikōse, on ge ǁkhāti ǁîb ǀkhāba xu aosenǃkhaigu tsî ǃgaesenǃkhaigu tsîga ǀaesen hân ai ge ǁgui, o gu ge ǀaesenga ǁîna xu ge bē, tsî ǂkhaba gagan ge ǁîna xu ge ǂoa.

¹³Tsî ǀnî ǃgûma ra Jodeǁîgu, nūba-ao ge igu ge dītsâ, Jesub ǀonsa ǂgaisa ǁnān, ǂkhaba gagana ūhân ǂama: Nūba du ge ge ra ǁnā Jesub, Paulub ra aoǁnâb di ǀons ǃnâ ti.

¹⁴Tsî nēsa ge dīgu ge Skevab, Jodeǁî ǀgapipristeri di hû ǀgôa ge iga.

¹⁵Xaweb ge ǂkhaba gagaba ǃeream tsî ge mî: Jesuba ta ge a ǂan, tsî Pauluba ta ge a ǂan; xawe sago tarigo?

¹⁶Ob ge ǁnā khoeb, ǂkhaba gagab xa ge hâǃnâhe iba ǁîgu ai uri tsî dan gu tsî ge ǀgaidā gu, o gu ge ǀōǀkhāse tsî ǀhapiǀhapihe hâse ǁnā omsa xu ge ǁhâ.

¹⁷Tsîs ge nēsa Efesus ǃnâ ǁan hâ Jodeǁîn tsî Grikeǁîn hoan tawa ge ǂansa, o i ge ǃao-e hoan ai ge ǁnā, tsîs ge ǃKhūb Jesub di ǀonsa ge kaikaihe.

¹⁸On ge ǂguin ǂgomsabe kai gena hā, tsî ǁîn di ǃgaidīga ǁguiǁnâ tsî ge ǂanǂan.

¹⁹Tsî ǁkhāti ǂguin, ǃgaidīga gere dīn ge ǂkhanide ūhā, tsî ǁîde ǂhaisase ge khauǃkhū, tsîn ge ǁîdi ǀgausa ǃgôaǀhao, tsî ǁîsa korodisiǀoadisi ǀhaiǀuri maride ge hō.

²⁰ǁNātis ge ǃKhūb di mîsa ǀgaisase ǀom tsî ge dan.

²¹Tsî nēn ge dītoaheo, ob ge Pauluba gagas âb ǃnâ ge ǂâibasen, Masedoniab tsî Axajaba ǃgûǃnâǃganu tsîb nî Jerusalems ǃoa dāǁnâsa, tsî: ǁNāpa ta ge hâ is khaoǃgâ ta ǁkhāti Romesa nî mû, ti ge mî.

²²Tsîb ge ǀgamkha ǁîba ra ǃoabakha Masedoniab ǃoa ge sî, Timoteub tsî Erastub tsîkha, xaweb ge ǁîba ǁaeb kōse Asiab ǃnâ ge hâ.

²³Tsî ǁkhā ǁaeb ai i ge ǂkhari tama gongonai-e nē daob ǃKhūb dib ǃaroma ge ǀkhī.

²⁴ǂAnǂansa Demetriub ǀhaiǀuriǂnau-aob ge ǀhaiǀuri tempelgu Dianas diga gere dī xui-ao, tsîb ge ǁnā ǁāǁāǁkhāsiba ǁîga ǂkhari tama ǃoaǂui-e ge ūhāba.

²⁵ǁÎgab ge ge ǀhaoǀhao tsî ǁkhā sîsenaib digu tsîna, tsîb ge ge mî: Aogo, ǂan go komo, nē sîsenaiba xu ge sage ǃgâiǃgâba ūhâ ǃkhaisa.

²⁶O go mû tsî ra ǁnâu, matib nē Pauluba Efesus ǀguis tawa tama xawe ǁaupe Asiab hoaragab ǃnâ kai ǁaesa ǃhoadan tsî ra ǁnāǁgôa kai ǃkhaisa: ǃOmgu ǀkha dīhe hâ elogu elo tama, ti mî tsî.

²⁷Ob ge sage sîsenaiba tsūǃgâb ǃnâ hâ, ǁîb nî ǃharaxūhes ǀguisa tama i tsîb nî ǁkhāti tempeli kai elos Dianas diba ǁauxūse ūhâhe, tsîb nî ǁîs di kaisiba hîkākāhe, ǁîs Asiab tsî ǃhūbaib hoaragab xa ra ǃoabahesa.

²⁸Tsî ǁnâu gu geo, o gu ge ǁaib xa ǀoa tsî ge ǃau: Kais ge a Efeseǁîn di Dianasa! ti.

²⁹Tsîs ge ǃās hoaragasa ge gongonǃnâhe, on ge ǀguiǂâixase ǀhuru-aiǂgās tawa ǃkhoeǀhao, tsî Masedoniaǁîkha Gajub tsî Aristarxub tsîkha ge ǃkharasī, Paulub di saoǃgonao ge ikha.

³⁰Tsî Paulub ge ǁaes ǃnâ ge ǃgûǂgâ ǂgao, xawe ǁkhāǁkhāsaben ge mā-am bi tama ge i.

³¹Tsî gu ge ǁkhāti ǀnî Asiaǁî danakhoegu, ǁîb di khoe ge iga ǁîb ǃoa haisi tsî ge ǀkhoma bi, îb ǁî-aitsama ǀhuru-aiǂgās tawa tā sī, ti.

³²On ge ǀnîna nēti tsî nauna ǀkharatise ge ǃau, ǀhû hân ge are tsî tare xū-i ǃaroman go ǀhû ǃkhaisa ǀū i xui-ao.

³³On ge Aleksandera ǁaesa xu ge ūǂui, Jodeǁîn ra ǁîba ǂhāǂui hîa. Ob ge Aleksandera ǃommi ǀkha nape, tsî ǁaes aiǃâ ǃereambasensa ge dītsâ ǂgao.

³⁴Xawe Jodeǁîb a ǃkhaisan ge hōǃâo, on ge hoana ǀgam irkha nî īs kōse ǀgui dommi ǀkha ge ǃau: Kais ge a, Efeseǁîn di Dianasa!

³⁵Tsî ǃās di xoa-aob ge ǁaesa ǃnōǃnō-o, ob ge ge mî: Efeseǁî aogo, mâ khoe-e ǂan tama hâ, Efeseǁîn di ǃās a kai elos Dianas tsî ǀhomma xu ge ǁnā īb di sâu-ao ǃkhaisa?

³⁶Tsî nēn a ǃhoaǃoahe ǁoasa, amaga i ge a anu, ǃnō du nî tsî du aiǃhae xū-e dī tide ǃkhaisa.

³⁷Nē khoekha du ge go ūhā, tempelǃnari-ao tamakha, tsî ǁkhāti sadu elosa ǃkhāǃkhā tamakha.

³⁸Demetriub ǁnâi tsî ǁîb ǀkha ǁkhā sîsenaiba ūhâgu ga khoe-i ǃoagu ǀanaǃgâ xū-e ūhâo, o di ǀgoraǃgâtsēde hâ, o gu ge ǃāǃkhōmâi-aoga hâ; a gu ǀanaǃgâ gu.

³⁹Tsî ǀkhara xū-e du ga ǂharugu ǂgao-o, a-i ǂhanub di ǀhû hân ǃnâ ǀgoraǃgâhe.

⁴⁰Tsūǃgâb ǃnâ da kom hâo, nētsēs di gongons ǃaroma da nî ǀanaǃgâheseo, xū-i xare-e ūhâ tamaǃâ ǁî-i ǀkha da nî nē ǃkhoeǀhaosa ǀhapio kai-e. Tsî nēna mî tsîb ge ǀhû hâna ge ǃgû kai.