Read Khoekhoegowab ǃNaeǃkhaidi 2 Bible Online

ǃNaeǃkhaidi 2 - Khoekhoegowab bible

ǃNaeǃkhaidi 2

¹Tsî pinkstertsēs ge ǀoa ǃnubai gu ge hoaga ǀguiǂâixase ge ǀhû hâ i.

²O i ge ǃnapetamase ǀhomma xu ǀō-e ge hā, ǀgaisase ra ǃgom ǃgoaxa ǂoa-i ase ī-e, tsî ǂnûǃnâ gu ge hâ i oms hoaragasa ge ǀoaǀoa.

³Tsîn ge ǁîgu ai ǀgoraǃāsa namdi ǀaes didi xase ge mû; tsî di ge mâb hoab âgu ai ge ǂnû;

⁴tsî gu ge hoaga ǃAnu Gagab xa ǀoa tsî ǀkhara namdi ǀkha ge ǃhoatsoatsoa, Gagab ge ǃhoaǂuisa mā gu khami.

⁵Tsî gu ge Jodeǁîga Jerusalems ǃnâ ge ǁan hâ i, eloǃaoǃgâxa aogu hoa ǁaedi, ǀhommi ǃnaga hâdi diga.

⁶Tsî nē ǀōb ge hāo, os ge ǂnubisa ǀhao tsî ge gongonǃnâhe, mâ-i hoa-i ge ǁî-i gowab ǂûb ǃnâ gu ra ǃhoa ǃkhaisa ǁnâu xui-ao.

⁷On ge hoana burugâ, tsî buru hâse ge mîǀîgu: Mû, nē ra ǃhoa gu hoaga kha Galileaǁî tamaga?

⁸Tsî mati da kha ra ǁnâu, mâ-i hoa-i di gowab, sada ge ǃnaeǃnâba gu ra ǃhoa ǃkhaisa?

⁹Sada Partiaǁîda tsî Medeǁîda tsî Elamǁîda tsî Mesopotamiab tsî Judeab tsî Kapadosiaǁîda tsî Pontub tsî Asiab tsîgu di ǁanaoda,

¹⁰tsî Frigiaǁîda tsî Pamfiliaǁîda tsî Egipteǁîda tsî Libiab, Kireneb tawa ǁgoeb ǀkharigu dida tsî Romes di ǃhaokhoeda, tsî Jodeǁîda tsî Jodeǁî horesada,

¹¹tsî Kretaǁîda tsî Arabiaǁîda, sada ge ra ǁnâu, sada namdi ǀkha gu Elob di kai dīga ra ǃhoa ǃkhaisa.

¹²Tsîn ge hoana burugâ tsî îganǀgē tsî nē-e nau-i ǃoa ge mî: Tare-e kha nē-e nî ī?

¹³Tsî naun ge ǃhō tsî ge mî: ǂKhon ǂauxûib xa gu kom go ǀoao.

¹⁴Ob ge Petruba disiǀguiǀagu ǀkha khâi tsî ǁîn ǃoa ge mî: Jodeǁî aogo tsî Jerusalems ǃnâ ǁan hâdu hoado, nēsa ǂan î du ti mîde sadu ǂgaedi ǃnâ ǂgâ kai.

¹⁵Nēgu ge ǀhoro tama hâ, sadu ǂâi hâ khami; ǃnonaǁî iri tsēs dib kom nēbao.

¹⁶Xawe ǁnās ge kēbo-aob Joeli xa ge mîhesa:

¹⁷Tsî i ge ǀuni tsēdi ǃnâ nîra ī, tib ra Eloba mî, o ta ge tita ti Gagaba ǁgans hoas ai nîra ǁhōǂui, on ge sadu ôagu tsî ôadi tsîna nîra kēbo, o gu ge sadu ǂkhamkhoega īsiga nîra mû, o gu ge kaikhoega ǁhapode nîra ǁhapo.

¹⁸Tsî ta ge ǁkhāti ǁnā tsēdi ǃnâ ti ǃgāgu tsî ti ǃgādi tsîn ǂama ti Gagaba nîra ǁhōǂui, on ge nîra kēbo.

¹⁹Tsî ta ge buruxana nîra dī ǀgapise ǀhommi ǃnâ tsî saode ǃnaga ǃhūbaib ai: ǀAob tsî ǀaes tsî ǀanni tsîna.

²⁰Sores ge ǃkhaenab ǃnâ nîra ǀkhara tsî ǁkhâba ǀaob ǃnâ, ǃKhūb di kai tsî ǂkhaisa tsēs nî hās aiǃâ.

²¹Tsî i ge nîra ī, mâ-i hoa-i, ǃKhūb ǀonsa ra ǂgaiǀî-i nîra ǃgâiǃō ǃkhaisa.

²²Israelǁîdo, nē mîde ǁnâu: Jesub, Nasareǁîb, Eloba xu hâ khoeb, sadu ǃnâ ǁgausen hâb, ǀgaigu tsî buruxan tsî saodi tsîn ǃnâ, Elob ge sadu ǁaegub ǃnâ ǁîba xu gere dīn, sadu ǂûdu ǁkhāti a ǂan khami:

²³ǁÎb, mîmâisa ǂâibasens tsî aiǂans Elob disa xu māǁnâhe hâba du ge ū tsî ǂhanuoǃnân di ǃomga xu ǃgâuhaib ai ǂgāmâi tsî ge ǃgam.

²⁴ǁÎbab ge Eloba ge ǂkhaiǂkhai tsî ǁōb di tsûga xu ge xore bi, īǁoa i ge i xui-ao, ǁōb ǃnâb nî ǃkhōǀgarahe ǃkhaisa.

²⁵Davib ge ǁîb xa a mî xui-ao: ǃKhūba ta ge hugaǀgui ti ais aiǃâ ge mâi; ti amǀkhāb ǁôab aib hâ xui-ao, ǁnopeǁnopehe ta tidega.

²⁶ǁNā-amagab ge ti ǂgaoba ra ǃgâiaǂgao tsîs ge ti namsa ra dâ; tsîs ge ti ǁgans xawesa ǃâubasens ǃnâ nîra sâ.

²⁷Ti ǀomsats Hadeb ǃnâ ǁnāxū tide xui-ao, tsîts ge ǁkhāti mā-am tide sa ǃanub nî ǁgaoǁgaosiba mû ǃkhaisa.

²⁸Ûib daogats ge tita ge ǂanǂan, ots ge sa ais aiǃâ dâb ǀkha nîra ǀoaǀoa te.

²⁹Aogo, ǃgâsago, mā-am te, î ta ǂhauǂgarose abob Davib xa sadu ǃoa ǃhoa: ǁŌ tsîb kom ge ǁkhōheo tsî ǀhobas âb kom nētsēs kōse sada ǃnâ hâo.

³⁰Tsî kēbo-aob ge i amaga, tsî Elob ge nū-i ǀkha ge nūba bi ǁîb di surib nî ǁîb trons ai ǂnû tib ge ǂan i:

³¹ǁNā-amagab ge nēsa aimû-aose Xristub di khâis xa ge ǃhoa: ǁÎb di ǀoms ge ǁō hân ǃnâ ǁnāxūhe tama hâ, tsî ǁgans âb ge ǁgaoǁgaosiba mû tama hâ, ti.

³²Nē Jesubab ge Eloba ge ǂkhaiǂkhaikhâi, ǁî ǃkhais xa ge ge sige hoage a ǀhûǀguitimî-ao.

³³Ob ge ǁîba, Elob di amǀkhāb ǁôab tawa ǀgapiǀgapihe hâǃâ, tsî ǁGûb di mîmâis, ǃAnu Gagab disa hō hâǃâ, nēn, mû tsî du ra ǁnâuna go ǁhōǂui.

³⁴Davib ge ǀhommi ǃoa ǃapa tama hâ, xaweb ge ra mî: ǃKhūb ge ti ǃKhūb ǃoa ge mî: ǂNû ti amǀkhāb ǁôab tawa,

³⁵sa khākhoena ta nî sa ǂaira di mâi-aidase mâis kōse.

³⁶Ab ǁnâi Israeli di ommi hoaragaba ǁaposase ǂan, Elob ge ǁîba ǃKhūse tsî Xristuse a dī ǃkhaisa, ǁnā Jesub sadu ge ǃgâuba.

³⁷Tsî nēsan ge ǁnâuo, on ge ǂgaogu ǃnâ ge ǃkhāǃganuhe, tsî Petrub tsî nau apostelgu tsîgu ǃoa ge mî: Tare-e da ǁnâi nî dī, aogo, ǃgâsago?

³⁸Ob ge Petruba ǁîn ǃoa ge mî: ǃHobasen du î-i mâ-i hoa-e ǁāǁnâkaisen Jesub Xristub di ǀons ǃnâ ǁoren ǀûbasa ǃoa, o du ge ǃAnu Gagaba mās ase nîra hō.

³⁹Sadu dis a nē mîmâisa xui-ao, tsî sadu ôan dis, tsî ǃnūse hân hoan disa, ǃKhūb sada Elob nîra ǂgaihān kōse.

⁴⁰Tsî ǀnî mîdi ǂguidi ǀkhab ge ǃkhō-am tsî gere ǁnama: Orekaisen du re nē ǂkhaba ǃhaosa xu! ti.

⁴¹Tsî ǁîb di mîsa māsenxase ge ǃkhōǃoan ge ge ǁāǁnâkaisen, on ge ǁnā tsēs ai ǃnonaǀoadisi nî ī ǀomdi ǂgomsabena ge ǀaroǃnâhe.

⁴²Tsîn ge ǁîna ge hâhâ apostelgu di ǁkhāǁkhās ǃnâ, tsî ǀhûhâs ǃnâ, tsî pereb di khôas ǃnâ, tsî ǀgoredi ǃnâ.

⁴³Tsî mâ ǀoms hoas ge ǃaob xa ge hāǂamhe, tsîn ge ǂgui buruxa dīn tsî saodi tsîna apostelgu di ǃomga xu ge ǃnae.

⁴⁴Tsî ǂgom hân hoan ge ǀhûpe ge hâ i, tsî hoa xūna gere amǃnâxa kaigu.

⁴⁵On ge ūn hân tsî ǁîn di xūna ǁamaxū tsî hoan ǃnâ ǁîna gere ǀgora, mâ-i hoa-i ǂhâba hâs ǃoa.

⁴⁶Tsîn ge tsēkorobe ǀguiǂâixase tempeli ǃnâ ge hâ i, omsa xu oms ǁga pereba khôa tsî.

⁴⁷Tsîn ge ǂûna ǃgâiaǂgaob tsî ǀguiǃnâxa ǂgaob ǀkha ǂû, tsî Eloba gere kare; tsîs ge ǁaes hoasa ǃgâi ǂgaob ǀkha ge ǃkhōǃoa. Tsîb ge ǃKhūba tsēkorobe ǃgâiǃō kaihe rana ǀhaohâba ge ǀaroǃnâ.