Read Khoekhoegowab ǃNaeǃkhaidi 20 Bible Online

ǃNaeǃkhaidi 20 - Khoekhoegowab bible

ǃNaeǃkhaidi 20

¹Tsî ǂkhupib ge ǀûo, ob ge Pauluba ǁkhāǁkhāsabena ǂgaihā tsî ǁîna ǁnama tsî tawedegu, tsî Masedoniab ǃoab nî dāǁnâse ge ǂoa.

²Tsî ǁnā ǃhūǃâgab ge ǃgûǃnâǃganu tsî ǁîna ǂgui mîdi ǀkha ǁnamao, ob ge Grikeǁîn ǃhūb ǃoa ge hā.

³Tsî ǃnona ǁkhâgab ge ǁnāpa hâǂuio, tsî Jodeǁîn ge ǃgôaǃgon bio, ob ge Siriab ǃoab ra dāǁnâ ǂgao hîa ge ǂâi, Masedoniab ǃoab nî oa, ti.

⁴Tsî gu ge ǁîb ǀkha daob ai Asiab kōse ge ǃgû: Sopateri Pirub ôab Bereaǁîb, tsî Tesalonikaǁîkha Aristarxub tsî Sekundub tsîkha, tsî Gajub Derbes dib, tsî Timoteub, tsî Asiaǁîkha Tixikub tsî Trofimub tsîga.

⁵Nēgu ge aiǃgû tsî Troas tawa sī ge ǃâu.

⁶Tsî ge ge sige ǀkhuruǀkhuruhe tama peregu di tsēdi khaoǃgâ Filipisa xu dāǁnâ tsî koroǁî tsēs ai ǁîgu ǁga Troas tawa sī tsî hû tsēde ǁnāpa ge hâ.

⁷Tsî ǂguro tsēs wekheb dis ai da ge pereba nî khôase ǀhû ǃnubaib ge Pauluba ǀhaohâba ge ǃhoa-ū, sao ra tsēb nî ǃgûǂoa ti ǂâi tsî; tsîb ge mîsa tsuxuǃgâb kōse ge ǃnūǃnū.

⁸Tsî gu ge ǂgui ǃnâga ǀhûǃnâ da hâ ǂamoms ǃnâ ge hâ i.

⁹Tsîb ge ǂanǂansa ǂkhamkhoeb, Eutixub ti ǀon hâba, mûǂuidaos ǃnâb ǂnôa hîa ǃgam ǂoms xa ge hāǂamhe; tsî Paulub ge ǂomxase ǃhoa xui-aob ge ǂoms xa dāhe hâse ǃnonaǁî ǀgapiseb ommi diba xu ǁnāǁgôa tsî ǁō hâse ge ǃkhōkhâihe.

¹⁰Ob ge Pauluba ǁgôa tsî ǁîb ai aoǁguisen tsî ǁnam bi tsî ge mî: Tā sâoǃnâkaisen re, ǀoms kom hâǃnâ bio.

¹¹ǃNubaib ge ǃapa tsî pereba khôa tsî ge ǂû, tsî ǂomxaseb ge ǁgoaǂnobos kōse ǁgams, khaoǃgâb ge ge ǃgû.

¹²Tsîn ge ǀgôaba ûitsamase ge ūhā tsîn ge kaise ge ǁkhaeǂgaohe.

¹³Tsî ge ge sige doe-ommi ǃnâ aiǃgû, tsî Asos ǃoa ge ǃgâu, tsî ge ge ǁnāpa Pauluba ge ūǂgâxa ǂgao, ǁnātib go mîmā xui-ao, ǁîb ǂûb ge ǀnūǃgû ǂgao ge hâ i.

¹⁴Tsî Asos tawab ge sige tawa ǁaeǁaeseno, o ge ge ūǂgâxa bi, tsî Mitilenes tawa ge sī.

¹⁵Tsî ǁnāpa xu ǂnauǁnâ tsî ge ge sao ra tsēs ai Xios ǃoa-ai ge sī; tsî sao ra tsēs ai ge ge Samos tawa ge sī mâ, tsî Trogilionni ǃnâ ge hâ; tsî sao ra tsēs ai ge ge Miletos tawa ge sī.

¹⁶Paulub ge ǂâibasen xui-ao, Efesusab nî huriba-ū ǃgû-īǀkhāsa, Asiab ǃnâb ǀhape tidese, ǃnoeaǂgaob gere xui-ao, īǁkhā i ka, ob pinkstertsēs ai Jerusalems ǃnâ nî hâse.

¹⁷Tsîb ge Miletusa xu Efesus ǃoa haisi tsî ǀhaohâb di ǂnomdomga ge ǂgaiǀhao.

¹⁸Tsî ǁîb tawa gu ge hāo, ob ge ǁîgu ǃoa ge mî: Sago ge a ǂan, ǂguro tsēs Asiab ǃnâ ta ge hāsa xu, mati ta ge ǁnā ǁaeb hoaba sadu tawa hâ isa,

¹⁹ǃKhūba ra sîsenbase ǃgamǃgamsens hoas ǀkha, tsî ǂgui ǁgamron tsî ǃâitsâdi ǀkha, Jodeǁîn di ǃgôaǃgonde xu, tita ge hāǂamde;

²⁰mati ta ge sado harebeba hân xa xū-i xare-e ǃkhōǃgau tama hâ isa, tsî mati ta ge sado aoǁnâ tsî gere ǁkhāǁkhāsa hoan mûǁae tsî sadu omdi ǃnâ;

²¹Jodeǁîn tsî Grikeǁîn tsîna ra ǀhûǀguitimîbase, Elob ǃoa ǃhobasens tsî ǃKhūb Jesub Xristub ǃnâ ǂgomsa.

²²Tita gagas ǃnâ ǃgaehe hâ ta ge Jerusalems ǃoa ra ǃgû; ǁnāpa tita ǀkha nî īna da ge a ǀū.

²³Nēs ǀguisa ta a ǂan, ǃAnu Gagab ra ǃāsa xu ǃās ǃoa ǂanǂan tesa, ǃgae-ūdan tsî tsūǀkhāgu tsîn hâba tesa.

²⁴Xawe ta xū-i xare-e ǃgôa tama, ti ûib xaweba ta ǀgapiǃgôabasen tama, î ta ǃgâiaǂgaob ǀkha dīǀoaǀoa ti ǃgûs tsî ti ǃoabas, ǃKhūb Jesuba xu ta ge hōs, ǃgâiǂhôas Elob ǀkhommi disa ta nî aoǁnâ, tisa.

²⁵Nēsisa ta ge tita a ǂan, ti aisa du ǁkhawa mû tide ǃkhaisa, sadu ǃgâiǂhôasa ra aoǁnâse ta ge ǃgûǃnâǃganudu hoado.

²⁶ǁNā-amaga ta nētsēs ǁkhās ai ra ǃkhō-amba du, hoadu di ǀaob xa ta a ǃanu ǃkhaisa.

²⁷Xū-i xare-e ta ǁnāxūǃnâ tama hâ xui-ao, Elob di ǂâibasens hoaragasa ta ge sado gere aoǁnâba.

²⁸ǁÎ-aitsama ǁnâi ǃûisen, î go gūn hoaragana ǃûi, ǁîn ǂamab ge ǃAnu Gagaba sago mûǂamaose mâina, ǀhaohâb Elob dib, ǁîb di ǀaob ǂûb ǀkhab ǃoaǂuibasen hâba go nî ǃûise.

²⁹Nēsa ta kom a ǂano, ti ǁgôas khaoǃgâ di ǀkhauǂkhū ra ǂhirade nîra hā ǃkhaisa, gūna sâu tidede.

³⁰Tsî sago ǂhanigo xu gu ge aoga nîra khâi, ǂhumiba ra ǃhoaga, ǁkhāǁkhāsabena gu nî ǁîgu ǁga nanase.

³¹ǁNā-amaga ǂkhaikari hâ, î ǂâiǂâisen ǃnona kurigu kōse ta ge ǀû tama hâ i ǃkhaisa, tsēa tsî tsuxuba mâ-i hoa-e ǁgamron ǀkha ǁnamasa.

³²Tsî nēsi, ǃgâsago, tita ge sado Elob tsî ǁîb ǀkhommi di mîsa ra māǁnâ, ǁnāb sado ǂnubikhâi tsîb nî ǃanun hoan ǀkha ǀumi-amǃnâsa mā dusa a ǁkhāba.

³³Khoe-i xare-i di ǀhaiǀurib tsî ǃhuniǀurib tsî saran tsîna ta ge tura tama ge hâ i.

³⁴Sago aitsama a ǂan, nē ǃomkha ge ti ǂhâsigu tsî tita ǀkha hân diga gere ǃoaǂui ǃkhaisa.

³⁵Hoana ta ge ǁgau du, ǁnāti sîsen tsîts nî ǁkhā tamana ǃkhōǃoa ǃkhaisa, tsîts nî ǃKhūb Jesub di mîs, mîb geres xa ǂâi: Mās ge ūs ǃgâ-ai a ǃgâi.

³⁶Tsî nēna mî tsîb ge ǃhonǁgoa, tsî ǁîgu hoagu ǀkha ge ǀgore.

³⁷O gu ge hoatsama kaise ā, tsî Pauluba ǁnam, tsî ge ǁoa bi,

³⁸hoan ǂamai ǃoa hâse nē mîs, mîb goros ǂama, ǁkhawa gu ǁîb di aisa mû tide ti. O gu ge ǁîba doe-ommi ǃoa ge ǁnū.