Read Khoekhoegowab ǃNaeǃkhaidi 21 Bible Online

ǃNaeǃkhaidi 21 - Khoekhoegowab bible

ǃNaeǃkhaidi 21

¹ǁÎna xu ǀgora tsî ge ǃgûgaru hîa ge ge Kos tawa ge sī, tsî sao ra tsēs ai Rodos tawa, tsî ǁnāpa xu Pataras tawa.

²Tsî doe-om-i Fenisiab ǃoa nî ǃgû-e ge ge hō, o ge ge ǂgâ tsî ge ǂnauǁnâ.

³Tsî Siprusa ge ge mûhō tsî ǁîba ǁareǀkhāb ai hâ kaio, o ge ge Siriab ǃoa ǃgâu tsî Tires tawa ge sī, ǁnāpab ge doe-omma xūna nî ǃnaoǁnâse ge ī i.

⁴Tsî ǁkhāǁkhāsabena ge ge hō, o ge ge hû tsēde ǁnāpa ge hâ. ǁÎn ge Pauluba Gagaba xu ge mîba, Jerusalems ǃoab ǃapa tide ǃkhaisa.

⁵ǁNā tsēde ge ge hâtoao, o ge ge ǂoa tsî ge ǃgû. On ge ǁîn hoana taradi tsî ǀgôan tsîn ǀkha sige ǃās ǃaugaba ǃoa ge ǁnū, o da ge hurib amǃgâ ǃhonǁgoa, tsî ge ǀgore.

⁶Tsî tawedegu da geo, o ge ge doe-ommi ǃnâ ge ǂgâ, tsîn ge ǁîna ǁîn din ǃoa ge ǁaru.

⁷Tsî ge ge sige Tiresa xu hurib ǃgâusa toao, o ge ge Ptolemais tawa sī tsî ǃgâsana tawede tsî ǀgui tsēsa ǁîn ǀkha ge hâ.

⁸Tsî sao ra tsēs ai ge ge sige, Paulub tawa hâge ǂoa, tsî Kaesareas tawa ge sī. Tsî ge ge Filipub ǃgâiǂhôa-aob di oms ǃnâ ge ǂgâ, ǁnā hûgu di ǀgui ge iba, tsî ǁîb tawa ge hâ.

⁹Tsîb ge ǁîba haka ǀgôadi ǃgame tamade ge ūhâ i, ǀgôadi hîa ra kēbode.

¹⁰Tsî ǀnî tsēde ge ge hâ io, ob ge ǂanǂansa kēbo-aob, Agabub ti ǀon hâba Judeaba xu ǁgôaxa,

¹¹tsî sige tawa hā, tsî Paulub di ǃgaesenna ū tsî ǃomkha tsî ǂaira âba ǃgaesen tsî ge mî: Nētib ra ǃAnu Gagaba mî: ǁNā khoeb, nē ǃgaesenna ūhâban ge Jodeǁîna ǁnāti Jerusalems tawa ǃgae tsî ǀūben ǃomǁae nî māǁnâ.

¹²Tsî nēna ge ge ǁnâuo, o da ge sige tsî ǁnā ǃās din tsîda ge ǀkhoma bi, îb tā Jerusalems ǃoa ǃapa.

¹³Xaweb ge Pauluba ge ǃeream: Mati du kha ra dī, o du ā tsî ti ǂgaoba ra khôa? Tita kom ǂhomisen hâo, ǃgaehes ǀguisa tama i tsî ta nî ǁkhāti ǁōsa Jerusalems tawa ǃKhūb Jesub di ǀons ǃaroma.

¹⁴Tsî ǃhoadankaisen tamab ge io, o da ge ge ǃnō, tsî: As ǃKhūb di ǂâisa ī, ti ge mî.

¹⁵Tsî ǁnā tsēdi khaoǃgâ ge ge ǂhomisen tsî Jerusalems ǃoa ge ǃapa.

¹⁶Tsîn ge sige ǀkha ǁkhāti ǀnî Kaesareaǁî ǁkhāǁkhāsabena ge ǃgû, tsîn ge ǂanǂansa Sipruǁîb Mnason ti ǀon hâb, kaira ǁkhāǁkhāsabeb ǃoa ge ūǃgû ge, ǁîb tawa ge nî hâba.

¹⁷Tsî Jerusalems tawa ge ge sīo, on ge ǃgâsana sige ǃgâiaǂgaob ǀkha ge ǃkhōǃoa.

¹⁸Tsî sao ra tsēs aib ge Pauluba sige ǀkha Jakobub tawa ge ǂgâ, o gu ge ǂnomdomgu hoaga ǁnāpa ge sī.

¹⁹Tsî ǁîgab ge tawedeo, ob ge ǀguiǀguibes ai gere ǃhoaba, mâ xūnab ge Eloba ǁîb di ǃoabasa xu ǀūben ǃnâ dīsa.

²⁰Tsî ǁnâu gu geo, o gu ge Eloba kare, tsî ǁîb ǃoa ge mî: Mûts ra, ǃgâsatse, matikō ǂgui ǀoadisi Jodeǁîn ge ǂgomsabe kai ǃkhaisa, tsîn ge hoana ǂhanub Moseb diba ra ǃkhōǀgaipe.

²¹Tsîn ge sats xa ge mîbahe, ǀūben ǃnâ hâ Jodeǁîn hoanats ra Moseba xu ǁnāǁgôasa ǁkhāǁkhā ǃkhaisa, ǁîn di ôagan ǃgao tide, tsîn ǁkhāti ǂhanub di dommi ǃoa tanisen tide, ti mî tsî.

²²Mati ǁnâi? ǂHâǂhâsa i ge a, ǂnubis nî ǀhao ǃkhaisa, hoan kom hāts go ǃkhaisa nî ǁnâuo.

²³Dī ǁnâi nē-i sige ra mîba tsi-e: Sige ge haka khoega ūhâ, mîmâi-e ǁîgu ai ūhâga.

²⁴ǁÎga ū, î ǁîgu ǀkha ǃanuǃanusen, î ǁîga marina māǂuiba, î gu danade ǂkhom kai ǁkhā, în hoana ǂan, ǁnā xūn sats xan gere ǃhoabahen a ǁau ǃkhaisa, tsîts sats ǂûtsa ǁkhāti ǁnāti ra tanisen tsî ǂhanuba ra dī ǃkhaisa.

²⁵Tsî ǂgomsabe kai ge ǀūbena ge ge ǂkhanis ǃnâ xoaba tsî ge ǀapeǀape, ǁîn nēti īn xa xū-i xare-e ǃkhōǀgaipe tide ǃkhaisa, în nēn ǀguin xa ǃûisen: ǁGôatsuiǁgoaga ǁguibahe hâ-i tsî ǀaob xa, tsî ǀhomǀomhe hâ-i xa, tsî ǀaib xa.

²⁶ǃNubaib ge Pauluba ǁnā aoga ū, tsî sao ra tsē ǁîgu ǀkha ge ǃanuǃanusen, tsîb ge tempeli ǃnâ ǂgâ, tsî ge ǂanǂan ǃanuǃanusis di tsēdi ǀoa hâ ǃkhaisa, ǀguiǀguibes ai gu nî ǁguibaga ǁguibade.

²⁷Tsî hû tsēdi ge ǁaupexa ǃgû-ī ǃnubain ge Asiab di Jodeǁîna ǁîba tempeli ǃnâ mû, tsî ǁaes hoasa gongonǃnâ, tsî ǃomma ǁîb ai ǁgui,

²⁸tsî ge ǃau: Israelǁî aogo, hui re! Nēb kom ǁnā khoeb, nē ǁaes tsî ǂhanub tsî nē ǃās tsîn ǃoagu hoana mâ ǃkhai-i hoa-i ai ra ǁkhāǁkhāba, tsîb kom ǁnās ǂamai ǁkhāti Grikeǁîna tempeli ǃnâ ūhā, tsî nē ǃanu ǃkhaisa go ǀuriǀurio.

²⁹Trofimub Efeseǁîban ge aiǃâ ǁîb ǀkha ǃās ǃnâ go mû xui-ao; ǁîbab Pauluba tempeli ǃnâ go ūǂgā, tin ge ge ǂâi.

³⁰Os ge ǃās hoaragasa ge gongonhe, tsîs ge ǁaesa ge ǃkhoeǀhao. On ge Pauluba ū tsî tempela xu ge ǃkharaǂui bi, tsî ǁnātimîsi gu ge tempeli di ǁāga ge ǂganamhe.

³¹Tsî ǃgam bi nîsen ge ôa-amo, ob ge gomma Romeǁî toroǂnubis di danakhoeb tawa ge sī Jerusalems hoas ra gongonǃnâhe ǃkhaisa.

³²Ob ge ǁnātimîsi toro-aogu tsî ǂamkhoegu tsîga ū tsî ǁîn tawa ge ǃkhoeǁgôa. Tsî danakhoeb tsî toro-aogu tsînan ge mûo, on ge Pauluba ge ǂnauǀû.

³³ǃNubaib ge danakhoeba ǀgū tsî ǃkhō bi tsî ge mîmā, îb ǀgam ǁkhamkha ǀkha ǃgaehe ti tsî tarib a tsî tare xū-eb ra dī ǃkhaisa ge dîǃā.

³⁴O i ge nē-e nēti tsî nau-e ǀkharase ǁaes ǃnâ ge ǃau. Tsî ǂkhupis ǃaromab ge ǁaposa xū-e hō ǁoa io, ob ge ge mîmā, ǁgoeǃkhais ǃoab nî ūǃapahesa.

³⁵ǃApa-ūda-i tawab ge sīo, o gu ge toro-aoga ǁîba ge tani, ǂnubis di ǁgūǀkhāgus ǃaroma.

³⁶ǁAes di ǂguin sao, tsî: Ūbē bi! ti gere ǂgai amaga.

³⁷Tsî Paulub ge ǁgoeǃkhais ǃnâ ǂgaeǂguiǂgāhe ǃnubaib ge danakhoeb ǃoa ge mî: Mā-amhe ta hâ, sats ǀkha xū-e ǃhoasa? Ob ge ge mî: Grikegowaba ǂants a?

³⁸ǁNā Egipteǁî tamatsa kha, nē tsēdi aiǃâ gongonai-e ge dīts, tsî hakaǀoadisi ǃgamaoga ǃgaroǃhūb ǃoa ge ǂgaeǂguiǂuitsa?

³⁹Ob ge Pauluba ge mî: Tita ge Jodeǁîta Tarsus di ta, Silisiab ǃnâ ǁgoe ǃās gom-e ūhâs di ǁgâuǁî ta; o ta ra ǀkhoma tsi, mā-am te, î ta ǁaes ǀkha ǃhoa.

⁴⁰Tsî mā-am bib geo, ob ge Pauluba ǃapa-ūdan ai mâ, tsî ǃommi ǀkha ǁaesa nape, tsî ǃnōǃarin geo, Hebreǁîgowab ǃnâ ǁîn ǀkha ǃhoa tsî ge mî: