Read Khoekhoegowab ǃNaeǃkhaidi 22 Bible Online

ǃNaeǃkhaidi 22 - Khoekhoegowab bible

ǃNaeǃkhaidi 22

¹Aogo, ǃgâsago, ǁgûgo, ǃgâ re, nēsi ta sado nî dība ǃereambasensa.

²Tsî Hebreǁîgowab ǃnâb ge ǁîna ǃhoa-ū ǃkhaisan ge ǁnâuo, on ge ǁnās ǃgâ-ai ge ǃnō. Ob ge ge mî:

³Tita ge Jodeǁî khoeta, Tarsus Silisiab ǃās ǃnâ ge ǃnae ta tsî nē ǃās ǃnâ ge kaikaihe ta, Gamalieli di ǂaira tawa ǁgûsi ǂhanub di ǁkhōǁkhōsib ǃoa ge ǁgauhe ta, Elob ǂama gere tau ta, sadu hoadu nētsē īs ǁkhās khami,

⁴nē daob dina ǁōb kōse gere ǃgôaǃgon ta, hoan, aogu tsî taradi tsîna ǃgae tsî ǃkhō-oms ǃnâ ra māǁnâse.

⁵ǁKhāti gu ǀgapipristergu tsî ǂnomdomgu hoaga ra ǃkhō-am te khami, ǁîga xu ta ge ǁkhāti ǂkhanide hō ǃgâsagu ǃoa tsî Damaskus ǃoa ge ǃgû, î ta ǁkhāti ǁnāpa hâna ǃgaehe hâse Jerusalems ǃoa ūǃgû ti, ǁkharahen nîga.

⁶Tsî ta ge ge ībahe, ǃgû ta garu hîa tsî ta Damaskusa ra ǀgūse sī hîa ta ge tsēǃgâǁaeb ai ǃnapetamase ǀhomma xu kai ǃnâb xa ge ǃnâǃnâǂnamipehe.

⁷O ta ge ǃhūb ai ǁnā, tsî dom-e ge ǁnâu: Saultse, Saultse, tarexats ra ǃgôaǃgon te? ti ra mîlî te-e.

⁸O ta ge tita ge ǃeream: Tarits a, ǃKhūtse? ti. Ob ge tita ǃoa ge mî: Tita ge Jesuta, Nasareǁîta, sats ra ǃgôaǃgon ta.

⁹Tsî tita ǀkha hâgu ge ǃnâba mû tsî ge ǃhuri, xawe gu ge tita ǀkha ra ǃhoab di domma ǁnâu tama ge hâ i.

¹⁰O ta ge tita ge mî: Tare-e ta nî dī, ǃKhūtse? Ob ge ǃKhūba tita ǃoa ge mî: Khâi, î Damaskus ǃoa ǃgû, ǁnāpats ge nîra mîbahe, dīts nîsets ǂnûibahe hân hoana.

¹¹Tsî ǃnâb di ǂkhaib xa ta ge mû ǁoa io, o ta ge tita ǀkha hâgu xa ǃommi ai ǂgaeǂguihe, tsî Damaskus tawa ge sī.

¹²Tsîb ge Ananiab, ǂanǂansa eloǃaoǃgâxa khoeba ge hâ i, ǂhanub ǃoa ǁnāpa ǁan hâ Jodeǁîn hoan tawa ǃgâi gom-e ūhâba.

¹³ǁÎb ge tita tawa hā tsî mâ tsî ge mî: ǃGâsa Saultse, ǁkhawa mû! O ta ge ǁkhā iri ai ǁîba ge mû.

¹⁴Ob ge ge mî: Elob sada îgu dib ge ǃkhōǂuibasen tsi hâ, ǁîb di ǂâisats nî mûǂanga tsî ǂhanu-ainats nî mûga, tsî ǁîb ams di dommats nî ǁnâuga.

¹⁵ǁÎbats nî ǀhûǀguitimî-aose ība xui-ao, hoa khoen tawa, mû tsîts go ǁnâu xūn xa.

¹⁶Tsî nēsi tarexats ra ǀhawe? Khâi î ǁāǁnâkaisen, în sa ǁorena khōǁnâhe î ǃKhūb di ǀonsa ǂgaiǀî.

¹⁷Tsî ta ge ge ībahe, Jerusalemsa ǃoa ta ge oa, tsî tempeli ǃnâ ǀgoreo, o ta ge gagas ǃnâ ǂgaeǃapahe,

¹⁸tsî ǁîba ge mû, tita ǃoab ra mî hîa: ǃHaeǃhaesen î ǃnoesase Jerusalemsa xu ǂoa, tita xats ra ǃkhō-amsan ǃkhōǃoa tide xuige.

¹⁹O ta ge ge mî: ǃKhūtse, ǁî-aitsaman kom a ǂano, sats ǃnâ ǂgom hâna ta ǃkhō-oms ǃnâ aoǂgā tsî sinagogegu ǃnâ gere ǂnau ǃkhaisa.

²⁰Tsî Stefanub sa ǀhûǀguitimî-aob di ǀaob ge ǂnâxūheo, o ta ge ǁnāpa mâ tsî ǁîb di ǁōb xa ge ǃgâibahe i, tsî ǁîba ra ǃgamn di sarana ge ǃûima i.

²¹Ob ge tita ǃoa ge mî: ǃGû, ǃnūse ta ǀūbena ǃoa ra sî tsi xuige.

²²Tsîn ge nē mîs kōse ge ǃgâba bi. ǃNubain ge ǁîn di domma ǃhâkhâi tsî ge mî: Ūbē nēti ība ǃhūbaiba xu, anu tama i kom hâo, ûib nî ǃkhaisao.

²³Tsî ǃau tsîn ge sarana ge aoxū, tsî tsara-en ge ǂoab ǃnâ tsoroxūo,

²⁴ob ge ǂamkhoeba ge mîmā, ǁgoeǃkhais ǃoab nî ūsīhesa, îb ǂnaus ǀkha ôaǃnâhe, tib ge ge mî, î ta ǁnâuǃā, mâ xū-i ǃaroman ra ǁnāti ǁîb ǂama ǂgai ǃkhaisa.

²⁵Tsî ǃhâugu ǀkha gu ge ǃgaemâi bi ǂgao ǃnubaib ge Pauluba ǁnāpa mâ kaidisigu danakhoeb ǃoa ge mî: Anuba go i kha a, Romeǁî khoeba ǀgoraǃgâhe tamase ǂnausa?

²⁶Tsî kaidisigu danakhoeb ge ǁnâuo, ob ge ǂamkhoeb tawa sī, tsî ge ǂhôa bi: Tare-ets nî dī? Nē khoeb kom a Romeǁîo ti.

²⁷Ob ge ǂamkhoeba ǁîb tawa hā tsî ǁîb ǃoa ge mî: Mîba te re, Romeǁîtsa satsa? Ob ge: Î, ti ge mî:

²⁸Ob ge ǂamkhoeba ge ǃeream: Tita ge kai ǀgaus ai nē ǁgâuǁîsisa ge hōbasen ti. Ob ge Pauluba ge mî: Xawe ta kom tita ǁîs ǃnâ ge ǃnaeo.

²⁹O gu ge ǁnātimîsi ǁîba ge xū, ǁîba ga ôaǃnâ hâga. Tsîb ge ǂamkhoeba ge ǃao, Romeǁîb a ǃkhaisab ge ǁnâuo, ǃgae kai bib go ǃkhais ǃaroma.

³⁰Tsî sao ra tsēs aib ge ǁaposase ǂan ǂgao, tare xū-i ǃaromab ra Jodeǁîn xa ǀhapimāhe ǃkhaisa, ob ge ǃhâugu âba xu xore bi tsî ge mîmā, î gu ǀgapipristeri tsî ǀapemā-aogu hoaga ǀhû ti, tsî Pauluba ūsī tsîb ge ǁîgu aiǃâ ge mâi bi.