Read Khoekhoegowab ǃNaeǃkhaidi 23 Bible Online

ǃNaeǃkhaidi 23 - Khoekhoegowab bible

ǃNaeǃkhaidi 23

¹ǃNubaib ge Pauluba ǀapeǀhaosa ǃgapaǀî, tsî ge mî: Aogo, ǃgâsago, ǃgâi ǂâis hoas ǀkha ta ge tita Elob aiǃâ nētsēs kōse gere tanisen.

²Ob ge ǀgapipristeri Ananiaba ǁîb tawa mâga ge mîmā, î gu ams ai ǂnau bi, ti.

³Ob ge Pauluba ǁîb ǃoa ge mî: Elob ge nîra ǂnau tsi, sats ǃuriǃurisa ǂnubiǂgoatse, ǂnûts hâ ǂhanub ǃoats nî ǀgoraǃgâ tese, tsîts ǂhanub ǃoagu ra mîmā, ǂnauhe ta nîsa?

⁴O gu ge ǁnāpa mâga ge mî: ǀAots ra Elob di ǀgapipristera?

⁵Ob ge Pauluba ge mî: ǀŪ ta go i, ǃgâsago, ǀgapipristeri a ǃkhaisa. Xoamâihe i kom hâo: ǁAes âts di danakhoebats ge ǀgoe tide, ti.

⁶Tsî Paulub ge ǂan io, ǀgui ǃâs a Saduseǁî tsî nau ǃâs a Fariseǁî ǃkhaisa, ob ge ǀapeǀhaos ǃnâ ge ǂgaiǂui: ǃGâsago, tita ge Fariseta tsî Fariseb di ôata, tsî ta ge ǃâubasens tsî ǁō hân di khâis ǃaroma ra ǀanaǃgâhe.

⁷Tsî nēsab ge mîo, o i ge ǂnoagu-e ge hā Farisegu tsî Sadusegu ǁaegu, tsîs ge ǀapeǀhaos ǂnûsa ge ǀgoraǃāsen.

⁸Sadusegu ge khâi-i kas, ǀhomǃgā-i kas, gaga-i kas a ǀkhai ti ra mî xui-ao; xawe gu ge Farisega hoan hâ ǃkhaisa ra ǂgom.

⁹O i ge kai ǃau-e ge hā. O gu ge xoaǂansabegu Fariseǁî ǃâs diga khâi, tsî ǂnoagu tsî ge mî: Sige ge nē khoeb ǃnâ tsū xū-e hō tama hâ; tsî gaga-i kas, ǀhomǃgā-i kas ga ǁîb ǀkha ǃhoa hâo, a ge tā Elob ǃoagu ǂnoagu.

¹⁰Tsî ǂnoagus ge kaio, ob ge ǂamkhoeba ge ǃao, ǀnîsi gu nî Pauluba ǀkhauǃā ǃkhaisa, ob ge toroǁaesa ge mîmā, ǁgôaxa tsî gu nî ǁîba ǁîgu ǁaeguba xu ūǂui tsî ǁgoeǃkhais ǃoa ūsī ǃkhaisa.

¹¹Tsî sao ra tsuxub ǃnâb ge ǃKhūba ǁîb tawa mâ, tsî ge mî: ǃGâiǂâixa re, Paulutse, tita xats ge Jerusalems ǃnâ ǃkhō-am khamits ge ǁkhāti Romes tawa nîra ǃkhō-am.

¹²Tsî ǁgoa i ge, o gu ge ǀnî Jodeǁîga ǀhû, tsî ge ǀâxarexūsen, ǂû tsî gu ā tide ti, Pauluba gu nî ǃgams kōse.

¹³Tsî gu ge hakadisisa ge ǃnā hâ i, nē nūsa ge nūǁaega.

¹⁴ǁÎgu ge ǀgapipristergu tsî ǂnomdomgu tsîgu tawa sī, tsî ge mî: Sige ge ǀâxare-i ǀkha go ǀâxarexūsen, xū-i xare-e ge tsâtsâ tidesa, Pauluba ge nî ǃgams kōse.

¹⁵Sago tsî ǀapemāǃnans tsîna ǁnâi ǂamkhoeba ǂanǂan, îb ǁari sago tawa ūhā bi, ǁîb di ǃnaeǃkhaina go ra ǂōrisase ôaǃnâ ǂgao khami; sige ge ǂhomisen hâ, ǀgūseb hā tama hâ hîa ǁîba ǃgamsa.

¹⁶Tsî Paulub ǃgâsas di ôasab ge ǂâibasens âga ǁnâu, ob ge hā tsî ǁgoeǃkhais ǃnâ ǂgâ, tsî ǁîsa Pauluba ge ǂhôa.

¹⁷Ob ge Pauluba kaidisigu danakhoeb di ǀguiba ǂgaihā, tsî ge mî: Nē ǂkhamkhoeba ǂamkhoeb tawa ūsī, ǂhôa bib nî xū-eb ūhâ xuige.

¹⁸Ob ge ǁîba ū, tsî ǂamkhoeb ǃoa ūsī bi tsî ge mî: ǃKhōsab Paulub ge ǂgai tsî go ǂgaoǀkhā te, nē ǂkhamkhoeb, mîba tsib nî xū-e ūhâba ta nî ūhāba tsi ǃkhaisa.

¹⁹Ob ge ǂamkhoeba ǃommi ai ū bi, tsî ǀguri hâ ǃkhais ǃoa ǃgû, tsî: Tare-e, ǂhôa tets nî-e? ti ge dî bi.

²⁰Ob ge ge mî: Jodeǁîgu ge go mîǀgui, ǂgaoǀkhā tsi gu nîsa ǁarits nî Pauluba ǀapemāǃnans ǃoa ǁgôa kaisa, ǃnaeǃkhaina gu ǂōrisase ôaǃnâ ǂgao hâ khami.

²¹Satsa ǁnâi ǁîga tā ǂgom re, hakadisisa ǃnā hâ khoegu âgu ge ǁîba ǁnoa-e ra ǁguiba, ǀâxareb ǀkha go ǃgaeǀhaosenga, xū-e gu ǂû tsî ā tide ǃkhaisa, ǁîba gu nî ǃgams kōse; o gu kom nēsi ǂhomisen hâo, tsî sa mā-ams ǀguisa ra ǃâuo.

²²Ob ge ǂamkhoeba ǂkhamkhoeba ǁnāxū tsî ge ǃkhâi bi: Nēnats go ǂhaiǂhaiba te ǃkhaisa tā khoe-e mîba, ti.

²³Ob ge ǀgam kaidisigu danakhoekha ǂgaihā, tsî ge mî: ǀGamkaidisi khoega ǁāǁā tsî hûdisi ǃgapi-aogu tsî ǀgamkaidisi ǁkhâu-aogu tsîga, î gu Kaesareas ǃoa ǁgôa, ǃnonaǁî iri tsuxub dib ai.

²⁴Î gu ǁkhāti ǃgapixūna ǂhomi, î gu Pauluba ǂnûi-ai, îb sâusase Feliksi ǃāǃkhōmâi-aob ǃoa ūsī bi.

²⁵Tsîb ge ǂkhani-e ge xoa, nēti ra mî-e:

²⁶Klaudiu Lisiata ǀgapiǃgôahesa ǃāǃkhōmâi-aob Feliksi ǃoa; tawede tsi!

²⁷Nē khoeban ge Jodeǁîna ge ǃkhō, tsîn ra ǃgam bi ǂgao hîa ta ge toroǁaes ǀkha sī, tsî ǁîna go ǃkhōǀhana bi, Romeǁîb a ǃkhaisa ǁnâuǃā tsî.

²⁸Tsî ǀhapixū-i, ǁî-i ǃaroman ra ǀhapiǀhapi bi-e ta go ǂan ǂgao amaga ta ge ǁîn di ǀapemāǃnans ǃnâ go ūǂgā bi.

²⁹O ta ge go hō, ǁîn ǂhanub di ǂnoagu-aidi ǃaromab ra ǀhapimāhesa, xawe ta ge ǁōb tsî ǃgae-ūdana anu hâ ǀhapixū-e hō tama.

³⁰Tsî ǂanǂanhe ta go, Jodeǁîn xab ra nē khoeba ǁnoa-e ǁguibahe ǃkhaisa, o ta ge ǁkhā iri ai sats ǃoa go sî bi, tsî ta ge ǁkhāti ǀanaǃgâ-aoga go mîmā, î gu sa aiǃâ mî ǁîb ǃoagu gu ūhâ xū-e, ti.

³¹O gu ge toro-aoga mîmāhe gu go khami Pauluba ū, tsî tsuxuba Antipatris ǃoa ge ūsī bi.

³²Tsî sao ra tsē gu ge ǃgapi-aoga ǁîb ǀkha ǃgû kai, tsî ǁgoeǃkhais ǃoa ǁkhawa ge ǃhoba.

³³Tsî Kaesareas tawa gu ge sī, o gu ge ǂkhanisa ǃākhōmâi-aoba ge māǁnâ, tsî Paulub ona ge mâi-aiǃâ bi.

³⁴Tsî ǃākhōmâi-aob ge ǂkhanisa khomai, ob ge ge dî, mâ ǃhūǃâs dib a ǃkhaisa. Tsî Silisiab dib a ǃkhaisab ge ǁnâuo,

³⁵ob ge ge mî: ǁNâu tsi ta nî, sa ǀanaǃgâ-aon kara hāo. Tsîb ge ge mîmā, Herodeb di ǂhanuǂhanu-ommi ǃnâb nî sâuhesa.